Ijeremaya 43 - IWE ỌNỊNỊ

 sị Ijeremaya nọ Ijipiti

¹ Ijeremaya ka, ịjị ọnị sị avaba ịrẹyị ọnị Ẹnẹyịmavara Ohomorihi aza ẹnẹnị sị tụ́ ọnị hi wa, ka yị wa.

² Dị ọnọrụ ọnya ana aā hị́ Azarịya ozi Ihosaya, ọnị Ijohananị ozi Ikareya ọnịrị ẹnị enee wù zị, nee tụ́ ohi ka, ireche oni ee che nị. Ẹ ka, Ẹnẹyịmavara, Ohomorihi ẹnịnị, ẹ́ yị tụ ọnị ka, ọnị ọ̀ kà a ka asị ẹnị na ra Ijipiti.

³ Ẹnịnị ka Ibaruki ozi Ineraya aa tụ ọnị ịrẹyị tu ẹnị nị. Ẹ ka, vị ee si ka à kụ ẹnị chire Anibabironi ụvọ, dị ẹ̀ wụ ẹnị, dị ẹ̀ kụ ẹnị ana vọ ne hi Ịbabịrọnị nị.

⁴ Avọọ, ẹ́ yị nyị ọza ịnị ẹngụ ẹnịnị, ọ́ọ vị Ijohananị o, ọ́ọ vị ọdọvịdị isoja nịnị o, ọ́ọ vị aza ana vọ ọ, ana saasa ịrẹyị ọnị Ẹnẹyịmavara kà, ka ẹnịnị ẹ̀ yà ẹtẹ Ijuda.

⁵ Dị Ijohananị ọnịrị ẹnị ọdọvịdị isoja nịnị kụ avaba Anijuda ana vẹtẹ ne hi Ijipiti nị. Avaba aza ana vọ ene zwe ne hi ẹkụra irenyi-irenyi dị ẹ́ vavẹ vị ẹnị ẹ kụ beri wa:

⁶ Ijeremaya ka, ệ kụ́ anọrụ nịnị, anyẹnẹẹ nịnị, ọnịrị ezi anẹẹ ohinọyị. Avaba aza ọnị Inebuzaradani, ọdọvịdị isoja enee sere ohinọyị hụrị ụvọ hi ẹtẹ beri Igidarịya vị ẹnị ẹ́ kụ. Ọ kà, ọnị nyẹmba vị ẹnị ẹ sị beri Ibaruki ozi Ineraya bẹẹ.

⁷ Ẹnịnị ệ saasa ịrẹyị ọnị Ẹnẹyịmavara kà, dị ẹ nọ Ijipiti nị. Ê tù ịzọọ, dị ẹ na huuu na ngụ ẹkụra ana aā hi Itapanihesi ẹtẹ Ijipiti nị.

⁸ Ijeremaya ka ê tù ịzọọ, dị Ẹnẹyịmavara kà a yị ọnị ka,

⁹ ọnị ọ̀ kụ ịrẹta ọgana-ọgana, dị ọnị ọ̀ kụ wa tụ ịnị ịnẹ. Ọ kà, ọnị ọ̀ sị ịnẹ ọnọọ chire ẹtẹ ọvịdị, ịzị á zị ngụ ịnị eehi ohinọyị Ihwarawo ẹkụra ọnọọ. Ẹnẹyịmavara kà, ọnị ọ̀ mẹ̀ ẹ eyi Anisirẹrị nịnị.

¹⁰ Ọ kà, ọnị ọ̀ọ vavọọ sị ọ mẹ, dị ọnị kà a yị Anisirẹrị nịnị ka, ọnị Ẹnẹyịmavara Ochẹtẹẹngụ, Ohomorihi Anisirẹrị nịnị ka, ọnị vaa naa sị ozi ahụ anị Inebukadineza, ohinọyị Ịbabịrọnị vẹ ịzị ẹnị, dị ọ sị aga ohinọyị anị yaatụ ịrẹsụ ịrẹta ọnị ọnị sị chire ẹtẹ aanị. Ọ vaa kà ivori ohinọyị anị kú ịrẹta ẹnẹnị.

¹¹ Ẹnẹyịmavara kà, Inebukadineza vaa kụ́ ịrẹkụ ve Ijipiti, dị ọ nyị ẹbẹẹba nị. Aza anaa nyị ka ụkụ ọ̀ wụ, dị ụkụ wụ̀ wa, aza anaa nyị ka à za ọrịhị, dị a za wa ọrịhị. Aza anaa nyị ka à wụ ịnị ịrẹkụ ọnọọ, dị a wụ̀ wa.

¹² Ọ kà, ohinọyị Ịbabịrọnị vaa jị ịra da irehi Anijipiti nịnị. Ọọ rị ori ẹnịnị ẹnyị ịra, dị ọ kụ ẹnyị aa na. Óseratẹmẹ mẹẹ tọ̀ọ́ ịhyama hụụnị ịta anị hụyẹ-hụyẹ, avọọ ohinọyị Ịbabịrọnị mẹ vaa nyị ẹbẹẹba Ijipiti, dị o hì ọ hụyẹ-hụyẹ, dị aa na nị.

¹³ Ẹnẹyịmavara kà, ọhẹ ana a sị ịrẹta mẹ tụ ịzị aā hị́ Iheriyoporisi ẹtẹ Ijipiti, ẹnẹ ẹ yaa hẹkẹ avọọ, vị ọnị ohinọyị Ịbabịrọnị vaa chaka rugu-ruguu vàa ha. Dị ọ rị irehi ori Anijipiti nịnị ịra va ha.