Ijeremaya 41 - IWE ỌNỊNỊ

Usu Igidarịya

¹ Ịnị ụhwẹ ọhụhịmba ịrayị ọnọọ gẹdẹ-gẹdẹ, Isimẹrị, ozi Inetaniya ọnịrị anọrụ ẹẹwụ, ê ve tu Igidarịya ozi Ahikami Imizipa. Isimẹrị ọnọnị vị aazị Erisama. Aza ohinọyị ọ vị nị, dị ọ vịdị ọza ịnya ịnị ọdọvịdị ohinọyị nị. Avaba ẹnịnị maa rị ịsa,

² dị Isimẹrị ọnịrị aza anị vana tụ̀ ụhwọ, dị ẹ wụ Igidarịya nyẹtẹ nị.

³ Isimẹrị ộ rẹ wụ̀ avaba Anisirẹrị ana yà Imizipa beri Igidarịya ụmẹ ọnọọ. Dị ọ rẹ wụ ẹnị isoja Anibabironi nịnị ene hi ịzọọ bẹẹ nị.

⁴ Eyinẹhẹ anị, dị anaa nyị ka à yẹ ka asị Igidarịya wụ,

⁵ â nyị aza ẹnị ẹbẹẹna ana hụrẹ ẹtẹ Ịsẹkẹmị, Isiro ọnịrị Ịsamarịya vẹ. Ẹnịnị vị ana kụ́ ịrẹwa ẹnịnị, dị ẹ na awuru hi ẹngụ ẹnịnị ẹngụ, dị ẹ́ rẹ tọ̀ ẹngụ ụnava nị. Ệ kụ apaapa ọnịrị eturare aa vaa mẹ̀ ịsọvọ ịnị irehi Ohomorihi.

⁶ Isimẹrị ộ hụrẹ Imizipa na gẹrị wa. Ọ́ maa na, vị aa jị òrèrè nị. Ịjị ó ne si tu wa, dị ọ́ ka, aarịhịnị, ẹẹ vẹ, è ve re Igidarịya nị.

⁷ Aza ẹnẹnị mẹ yị ngụ ịnị ẹkụra kẹnẹ, dị Isimẹrị ọnịrị aza anị wụ̀ wa, dị ẹ kụ oku và hí ịkangga nị.

⁸ Ama â nyị aza ẹnị ẹẹwụ ịnị aza ẹnẹẹ. Ẹnịnị ệ kà a yị Isimẹrị ka, aarịhịnị, asị ọ wụ ẹnị de. Ẹ ka ẹnị aa sị ihwiti, ibaari ọnịrị angwẹ orivi beri ẹhụ ẹnẹ ẹnị kụ́ tẹ̀ ịnị aarẹ. Ịzẹyịza, dị Isimẹrị navọ wa nị.

⁹ Â nyị ịkangga ọbanyị ọnya ọnị Asa, ohinọyị Ijuda chị́ ọnị ọ sị sere ẹngụ anị ụmẹ ọnị Ibaasa ohinọyị Isirẹrị sị kwẹẹtẹ tu ọ. Ịkangga ọnọọ Isimẹrị kụ́ oku aza ọnị ọ wụ aanị và hi di o si hi ọ nị.

¹⁰ Dị ọ zá avaba ezi anẹẹ ohinọyị ọrịhị beri avaba aza ana vọ hi Imizipa nị. Aza ẹnẹẹ vị ọnị Inebuzaradani ka Igidarịya ò si eyi pee. Isimẹrị ộ za wa ọrịhị, dị ọ kụ wa zị oze Amọnị aa na nị.

¹¹ Ijohananị ọnịrị ẹnị ọdọvịdị isoja ene hi ịzọọ pe e ệ wụ̀ ebira odivi ọnị Isimẹrị mẹ̀.

¹² Dị ẹnịnị kú hi Isimẹrị nị. Ệ na saasa wa ọ sị gụrị imisi ana yà ẹtẹ Igibiyọnị.

¹³ Ịjị aza ọnị Isimẹrị za ọrịhị aanị ré ka Ijohananị ọnịrị ọdọvịdị isoja nịnị ana saasa aa vẹ, dị ayị ẹnịnị ee hine nị.

¹⁴ Dị avaba ẹnị ọnị Isimẹrị za ọrịhị Imizipa aanị zwe hụụ ịdị anị na gụ Ijohananị ụvọ nị.

¹⁵ Ama Isimẹrị ozi Inetanaya ọnịrị aza anị ẹnị ịhịnta ê zwe hụụnị ụvọ Ijohananị na ngụ ẹtẹ Amọnị. Ụvọ Ijohananị é yi re ve ku wa.

¹⁶ Dị Ijohananị ọnịrị ẹnị ọdọvịdị isoja ọnị ọnịrịị zị kụ avaba aza ọnị Isimẹrị za ọrịhị hụrị Imizipa nị. Isimẹrị ộ vịdị sị Igidarịya wụ. Aza ẹnẹ kụ varẹma hụrị Igibiyọnị yị: Isoja nịnị, anyẹnẹẹ, ezweyi, ẹnịrị ẹnị ọnụkọrọ ịnị ikootu nịnị.

¹⁷ Ẹnịnị ê zwe aa nọ ẹtẹ Ijipiti. Ẹ́ maa na, dị ẹ́ jẹẹ ẹtẹ Igeruti-Ikimihami ọ sị gụrị Ịbẹtịrẹhẹmị nị.

¹⁸ Ẹnịnị ee zwee yị Anibabironi. Angwa ẹnịnị ee hí wa agụvị ka Igidarịya ọnị ohinọyị Ịbabịrọnị sị mẹ Ịgọvọnọ ẹkụra (Ijuda), Isimẹrị ọ sị ọ wụ.