Ijeremaya 40 - IWE ỌNỊNỊ

 hụrẹ Ijeremaya ụvọ.

¹ Ijeremaya ka, Ẹnẹyịmavara ộ kà ịrẹyị yị ọnị Inebuzaradani mẹ raa hụrẹ ọnị ụvọ ẹtẹ Ịraama. Ọ kà vị́ a vịdị tụ ọnị ẹba na ngụ ịzọọ beri aza ana vọ ana kụ hụrị Ijerusarẹmị ọnịrị Ijuda nị. Dị a kụ ẹnị ne hi Ịbabịrọnị anka ọrịhị avọọ nị.

² Inebuzaradani ana vị ohirẹsụ isoja aanị ộ hị́ ọnị tụ oboka, dị ọ ka, Ẹnẹyịmavara Ohomorihi awụ nịnị ô wo oto ka ọnị vee vu ẹkụra ọnọnị ẹtẹ.

³ Ọ́ va sị ọ mẹ booro aanị, ka waa mẹ̀ ebira odivi hi ọ nịnị, wẹ́ yị saasa ịrẹyị anị nịnị avaba ẹsẹnị maanị sị mẹ nị.

⁴ Inebuzaradani ka, ọnị aa ngwa ẹbaa hụrẹ ọnị ụvọ booro aanị, dị ọnị ọ̀ hụrẹ ọnị ụvọ. Ọ kà òo zee ọnị eyi ka ọnị aa nọ Ịbabịrọnị, ọnị ọọ dụ ọnịị vẹ. Ọnị vaa sị ụvọ ọyịzaa za ọnị. Ọnị ọ̀ọ va ka ọnị ẹ́ yị nọ, ọnị ẹ́ yị sị ụkata za ọnị. Ịzị ee zee ọnị eyi ịnị avaba ẹkụra ọnọnị kẹnẹ, ọnị ọ nyẹngụ aa na.

⁵ Ijeremaya ka ọnị ee yi ve hu ahụ, dị Inebuzaradani ka, ọnị ọọ ka Igidarịya, ozi Ahikami na. Igidarịya ọnọnị vị aazị Isahwani. Ọnị Inebukadineza ohinọyị Ịbabịrọnị sị mẹ Ịgọvọnọ avaba ẹtẹ Ijuda nị. Ọ kà ọnịrị aza ana vọ ọ̀ na rá pe e. Ẹyịvavọọ, ịzị ee zé ọnị eyi kẹnẹ ọnị ọọ na. Dị Inebuzaradani mẹ̀ ọnị ẹyịza, dị ọ́ sị ịsọyịrị vakaa yị ọnị nị. Dị ọ́ hụrẹ ọnị ụvọ ka ọnị ọọ na nị.

⁶ Ijeremaya ka dị ọnị na ra pe Igidarịya ẹtẹ Imizipa nị. Ọnịrị aza ana vọ ana a navọ hị́ ịnị ẹkụra ẹ ra hi ịzọọ nị.

⁷ Â nyị ẹnị ohirẹsụ isoja Anijudiya nịnị beri isoja ẹnịnị ẹnẹ ẹ yị hụrẹ ẹngụ ẹnịnị ụvọ yị Anibabironi. Ẹnịnị ệ wụ́ ka ohinọyị Ịbabịrọnị ọ raà sị Igidarịya mẹ Ịgọvọnọ ẹkụra ẹnịnị. Ệ wụ́ ka ọnị ọ kụkụ sị eyi pe avaba aza ana vọ ọnị ọza ẹ̀ yị kụ nọ Ịbabịrọnị nị. Oniruwa ene hu kere-kere á navọ hi ẹtẹ nị.

⁸ Â nyị anọrụ ẹnẹẹ ana aā hị́ Isimẹrị ozi Inetaniya, Ijohananị ozi Ikareya, Iseraya ozi Itanihumẹtị, ẹnị ezi Ehwayi ana vị Aninetohuwa, ọnịrị Ijezaniya ana vị Animaaka. Dị ẹnịrị aza ẹnịnị ve tu Igidarịya Imizipa nị.

⁹ Igidarịya ộ kà a yị wa ka, asị ẹnịnị hí angwa ọ̀ yị hụrẹ ẹngụ ẹnịnị ụvọ yị Anibabironi nịnị. Ọ kà ẹnịnị ẹ̀ yaatụ ịnị ẹkụra ẹnịnị dị ẹ̀ sị ịrẹsụ yị ohinọyị Ịbabịrọnị ka ọ vaa rọ̀ wa ẹngụ.

¹⁰ Ọ kà ọnị ụvọta vaa yà Imizipa, dị ọnị ọ̀ vị odeyi ẹnịnị ụmẹ ọnị Anibabironi ẹẹ sị vẹ ịzọọ. Ama ẹnịnị ẹ̀ naa và eche, dị ẹẹ há ẹtụtụ. Ẹnịnị ẹ̀ rẹẹ mẹ angwẹ dị ẹẹ kụ ọ tẹ̀.

¹¹ Â nyị Anisirẹrị nịnị ene hi ẹtẹ Imowabi, Amọnị, Edomi, ọnịrị ẹkụra ana vọ. Ẹnịnị ệ wụ́ ka ohinọyị Ịbabịrọnị ộ navọ Anisirẹrị ẹnyị ka ẹ̀ ra hi ẹkụra ẹnịnị. Ẹnịnị ệ rẹẹ wụ́ ka ọ́ raa sị̀ Igidarịya mẹ Ịgọvọnọ ẹnịnị.

¹² Dị ẹnịnị hụụ ịzị ẹ zwe ne hi, dị ẹ́ vavẹ Ijuda nị. Ẹnịnị ệ kụ ẹngụ ve tu Igidarịya Imizipa, dị ẹnịnị hàrà eche ọnịrị ẹtụtụ gụ tatarata nị.

 wụ Igidarịya

¹³ Ịrẹma ọsọnị, Ijohananị ọnịrị ẹnị ọdọvịdị isoja nịnị ẹnẹ ẹ yị hụrẹ ẹngụ ẹnịnị ụvọ yị Anibabironi ee ve tu Igidarịya Imizipa.

¹⁴ Dị ẹ kà a yị ọ ka, wáá yẹ ka Ịbaarịsi ohinọyị Amọnị ọ́ raa tụ́ Isimẹrị ka ọ̀ va wụ wụ? Ama Igidarịya ẹ́ yị dọ ka ịzẹyịza ẹ yaa ka nị.

¹⁵ Dị Ijohananị ozi Ikareya wèrè kà a yị Igidarịya Imizipa ka, ọ̀ jẹẹ dị ọnị ọ̀ na wụ Isimẹrị, dị asị á yẹ ọza ana vavọọ mẹ nị. Ọ kà sị ẹ vẹ dị ẹnị aa vaa navọ ka Isimẹrị ọ̀ va wụ Igidarịya kẹnẹ-kẹnẹ? Ijohananị ka, ọ̀ọ vavọọ yà, vị aa mẹ ka avaba Aniju ana gụ kara Igidarịya ẹ̀ gara, dị ọ kụ ẹngụkata ọbanyị tu avaba aza ana vẹtẹ hi Ijuda nị.

¹⁶ Ama Igidarịya ô tu Ijohananị ohi ka, asị ọ vavọọ mẹ o. Ọ kà, ireche kẹnẹ ee chee ku Isimẹrị aanị nị.