Ijeremaya 39 - IWE ỌNỊNỊ

Ịrẹkụ mẹmẹ rị Ijerusarẹmị.

¹ Ịnị ụhwẹ ẹẹwụ ịrayị ọhụhịịna ọnị Ịzẹdẹkaya rị ohinọyị Ijuda, Inebukadineza, ohinọyị Ịbabịrọnị ọnịrị isoja anị ệ kụ́ ịrẹkụ va ngụ Ijerusarẹmị.

² Ịnị ana tụ ọ ẹkụhị ịhịịna ịnị ụhwẹ ọhụna ịrayị ẹwụrọnya ọnị Ịzẹdẹkaya rị ohinọyị, dị ẹ chaka ọvọ ana a jị kara Ijerusarẹmị nị.

³ Ịjị ụvọ sị kara Anijerusarẹmị, dị avaba ezida ohinọyị Ịbabịrọnị ngụ eehi, dị ẹ́ yaatụ oze ịnị akakana ana aā zị ngụ ịnị ẹkụra nị. Aza ẹnẹnị ẹ vavọọ ngụ eehi nị: Inagari-Ịsarẹza, Ịsamịga-Inebo, Isasekimi, Inagari-Ịsarẹza ọsa beri ẹnị ọdọvịdị ịdị ohinọyị Ịbabịrọnị ana vọ.

⁴ Ịjị Ịzẹdẹkaya ọnịrị isoja anị nịnị ré wa, dị e zwe ịrahụ nị. Ẹnịnị ê zwè zị oze ịnị ụbazị ohinọyị, dị ẹ́ na parahu zị oze ọbanyị ana kụ ọvọ ẹẹva gẹ nị. Ẹnịnị ê zwè aa nọ inoze Ijodani (ẹtẹ Araba).

⁵ Ama dị isoja Anibabironi dụ wa, dị ẹ za Ịzẹdẹkaya ịnị orere ẹtẹ Ijeriko nị. Ẹnịnị ệ sị ọ ne tu Inebukadineza ẹkụra ana aā hị́ Iribira ịnị ẹtẹ Ihamati. Dị Inebukadineza mẹ̀ ọkarẹyị yị Ịzẹdẹkaya ịzọọ nị.

⁶ Ẹtẹ Iribira ịzọọ, ohinọyị Ịbabịrọnị yà, dị ọ́ wụ̀ avaba ezi Ịzẹdẹkaya ẹnịrị ọdọvịdị Anijuda nịnị eyi Izedekaya nị.

⁷ Ịrẹma ọnọọ, dị ọ ka à tụ Ịzẹdẹkaya eyi, dị à sị ẹba sụ́ ọ, dị à sị ọ aa nọ Ịbabịrọnị nị.

⁸ Anibabironi nịnị ệ rị irehi ohinọyị Ijuda ọnịrị irehi aza ana vọ ịra, dị ẹnịnị wú ọvọ ana jị kara Ijerusarẹmị và hi ẹtẹ nị.

⁹ Ọdịrẹma anị, â nyị ọnọrụ ana aā hị́ Inebuzaradani ana vị ohirẹsụ isoja Anibabironi. Ộ kụ aza ana vọ hí Ijerusarẹmị beri aza ene zwe ne tu ọ ne hi Ịbabịrọnị, dị ẹ vị ọrịhị tụ ịzọọ nị.

¹⁰ Ộ navọ onosiye nịnị ẹnẹ ẹ̀ yị nyị ịsa vụrụ-vụrụ hi Ijerusarẹmị. Dị ọ sị ụbazị ene e chire ọchị ịvayịnị hi yị wa nị. Ộ rẹ sị ẹtẹ yị wa bẹẹ.

 hụrẹ Ijeremaya ụvọ.

¹¹ Ama ohinọyị Inebukadineza ộ mẹ̀ ọda yị Inebuzaradani ka ọ̀ kà a ka:

¹² È ne si Ijeremaya, dị ẹ̀ sị ụvọ ozoza za a. Ọ kà asị a mẹ̀ ẹ ịrẹyị, ama ịsị oo họ̀ use anị kẹnẹ, ọ̀ mẹẹ yị ọ.

¹³ Ijeremaya ka, ịzẹyịza, â nyị ọdọvịdị ẹẹva ọnị udi ẹnịnị kà hịrẹ. Ịrẹha ẹnịnị ọ rị Inebusazibani ọnịrị Inegari-Ịsarẹza nị. Inebuzaradani ọnịrị wa beri avaba ẹnị ezida ohinọyị Ịbabịrọnị ana vọ,

¹⁴ ệ va sị ọnị hụụnị ohweje ịdị ohinọyị. Ẹnịnị ệ sị ọnị chire Igidarịya ụvọ ka ò si eyi pe ọnị. Ẹ ka, Igidarịya ò re ka ọnị ọọ ngụ eehi ịnị ẹngwọọrọ. Ịzẹyịza, dị ọnịrị aza ana vọ yà ịzọọ nị.

¹⁵ Ẹnẹyịmavara ộ kà a yị Ijeremaya a mẹ yị gu oze hi ọ tụ ịnị ẹngwa ịnị ohweje idi ohinọyị ka:

¹⁶ Ọ̀ na kà a yị ọnọrụ ana aā hị́ Ebedi-Ịmẹrẹkị ana vị Anetiyopiya ka; Ẹnẹyịmavara Ochẹtẹẹngụ, Ohomorihi Anisirẹrị nịnị ka: Ré; ọnị vaa mẹ avaba ịrẹyị ọnị ọnị ka ịnị ịpa Ijerusarẹmị. Ịrẹyị ọhịmị ọ vaa vị nị, ẹ́ yị vaa vị ọyịza. Ọ kà, eyi awụ ọ vaa vị ịhị ọnọọ nị.

¹⁷ Ẹnẹyịmavara kà, ama, ọnị vaa dọ ụ ha. Ọza ẹ́ yị vaa sị ụ chire aza ọnị wee hí angwa anị aanị ụvọ.

¹⁸ Ka, ịzẹyịza ọnị vaa dọ ụ ha. Ịrẹkụ ẹ́ yị vaa rị ụ. Ọ kà ụ vaa ha agụvị ka waa sị ayị tụra ọnị.