Ijeremaya 38 - IWE ỌNỊNỊ

Ê ne Ijeremaya ngụ ịkangga ẹnẹ ẹ̀ yi nyị enyi

¹ Â nyị anọrụ ẹnẹẹ ana aā hị́ Isehwatiya ozi Ịmatanị, Igidarịya ozi Ipasihuri, Ijukarị ozi Iseremaya ọnịrị Ipasihuri ozi Imarikija. Ijeremaya ka aza ẹnẹnị ệ wụ́ ọnị maa kà a yị aza ka,

² Ẹnẹyịmavara kà, ịrẹkụ ụngwẹ, à vị ụkụ ọ́ vaa wụ̀ ọza tụra ọza ana àa yị yà ịnị ẹtẹ Ijerusarẹmị nị. Ama ọza ana àa sị ẹngụ anị ne chire Anibabironi ụvọ vaa yàra.

³ Ijeremaya ka ọnị aa kà a yị wa ka Ẹnẹyịmavara kà, ọnị vaa sị ẹkụra ọnọnịị chire Anibabironi nịnịị ụvọ, dị ẹnịnị zaa.

⁴ Dị ẹnị ọdọvịdị nịnị na kà a yị ohinọyị ka, vị á vọrọ ka à wụ ọnọrụ ọnọnị nọ̀. Ẹ ka, ẹngụ ịrẹyị ọnị ọnị aa kà aanị, vị ọnị ọnị aa sị mẹ ka asị isoja ana vọ tụ ịnị ẹkụra kụkụ nyị ọtụtụrụma. Ẹ ka ịsị ọnyọọnya ọnị ọnị raa yịị mẹ̀ ẹ hi aza ana vọ ọ vị ọnọọ nị. Ẹ ka, ọnị ẹ yị gụ aza ụvọ vụrụ-vụrụ; vị ọnị aa kụ ọ kata wa ẹngụ kẹnẹ nị.

⁵ Ohinọyị Ịzẹdẹkaya ô tụ́ ohi ka, ô zoza, ịsị ee ze wa eyi kẹnẹ ẹ̀ na mẹ̀ ọnị. Ọnị ẹ̀ yị za wa jẹ.

⁶ Ijeremaya ka, ịzẹyịza, dị ẹnịnị sị ọnị, dị ẹ́ tụ ọnị obo, dị e ne ọnị ngụ ịkangga nị. Ozi ohinọyị ana aā hị́ Imarikija ọ nyị ịkangga ọnọọ nị. Ịkangga ọnọọ ẹ́ yị nyị enyi, ụdọ-ụdọ ọ vị nị, dị ọnị chì ngụ ụdọ nị.

⁷ Ijeremaya ka, â nyị ọnọrụ ọnya aanị ana aā hị́ Ebedi-Ịmẹrẹkị, Anikusi ọ vị̀ nị, dị aa mẹ̀ ụkọrọ ịdị ohinọyị nị. Ọnọrụ ọnọnị ộ wụ ka asị ọnị ne ngụ ịkangga. Ụmẹ avọọ vị ọnị ohinọyị aa mẹ̀ ọkarẹyị enoze Ịbẹnjamịnị.

⁸ Dị Ebedi-Ịmẹrẹkị na kà a yị ohinọyị ịzọọ ka,

⁹ Taarụ ada ayị, vị aza ẹnẹnị aa chamayị kẹnẹ aanị nọ̀. Ẹ sị Ijeremaya ne ngụ ịkangga o. Ọnị ộ yẹ́ ka ịzọọ ee súu tụ nị, agụvị ka ẹ́ yị kụkụ nyị ịsọyịrị ịnị ẹkụra.

¹⁰ Dị ohinọyị kà a yị Ebedi-Ịmẹrẹkị ka, ọ̀ kụ́ aza ẹnị ohurẹẹwụ saasa ẹngụ dị è ne tura Ijeremaya hụụnị ịkangga ọnọọ dị ò ve sú nị.

¹¹ Ịzẹyịza dị Ebedi-Ịmẹrẹkị kụ aza ẹnẹẹ nị. Dị ẹ́ nọ ịnị aku ana aa kụ ịsa tẹ ịdị ohinọyị, dị ẹ́ tọ̀ ọ ụsẹ hụụ ịzọọ nị. Ê tu ịnị ịkangga ọnọọ, dị ẹ sị obo sụ́ ụsẹ ẹnẹnị, dị ẹ sị ọ ngụ ikangga nị.

¹² Ijeremaya ka, ẹnịnị ệ kà a yị ọnị ka, ọnị ọ̀ kụ ụsẹ ẹnẹnị chire arịvava ụvị asị obo zama ọnị.

¹³ Dị ẹnịnị tụra ọnị hụụnị ịkangga va jịnẹ nị. Ịjị ẹ́ raa sị ọnị va jịnẹ, dị ẹ́ navọ ọnị tụ ohweje oserẹtẹ nịnị nị.

Ịzẹdẹkaya ka Ijeremaya ọ̀ sị ajuwe yị ọnị

¹⁴ Ijeremaya ka, â nyị ẹkụhị ọsa, dị ohinọyị Ịzẹdẹkaya yà enoze ọhụta irehi Ohomorihi, dị ọ́ ka asị ọnị vẹ nị. Ọnị ô tu ịzọọ, dị ọ ka, ịrẹyị ọnị ọnị aa vaa họ̀ ọnị use aanị, ọnị ee sị ka ọnị ọ̀ kà avaba ịzẹyịza anị yị ọnị.

¹⁵ Dị ọnị tụ́ ohi ka, ọnị ọ̀ọ ka ịzẹyịza yọ, vị aa wụ ọnị nị. Ọnị ọ̀ọ va sị ajuwee yọ, ẹ́ yị vaa dọ.

¹⁶ Ọ kà, dị ohinọyị Ịzẹdẹkaya were kà a yị ọnị ka, ọnị ộ sị Ohomorihi ana sị ụhwẹ yị avaba aza hị́ eku ka, ọnị ẹ́ yị vaa wụ̀ ọnị. Ọnị ẹ́ yị rẹ vaa hụrẹ ọnị ụvọ yị aza enee si ọnị isu nị.

¹⁷ Ijeremaya ka dị ọnị vaa kà a yị Ịzẹdẹkaya ka, Ẹnẹyịmavara Ochẹtẹẹngụ, Ohomorihi Anisirẹrị ọ sị ọ ka ka, waa hụrẹ ẹngụ awụ ụvọ yị aza ohinọyị Ịbabịrọnị, ụ vaa há. Ọza ẹ̀ yị vaa rị ẹkụra ọnọnịị ịra. Ẹwụrị ovwoovu awụ vaa há.

¹⁸ Ama wẹ̀ yị hụrẹ ẹngụ awụụ ụvọ, ẹkụra ọnọnị vị ana vaa hụrẹ ụvọọ yị Anibabironi, dị ẹ rị ọ ịra. Ẹwụ ụvọta ẹ́ yị vaa há o.

¹⁹ Dị ohinọyị tụ́ ohi ka, angwa anẹkụra ẹnịnị ene zwe na vaka Anibabironi nịnị ee hí ọnị, agụvị ka á zụ hụrẹ ọnị ụvọ yị wa, dị ẹẹ sị ụya rị ọnị.

²⁰ Ijeremaya ka, dị ọnị kà a yị ọ ka, ọza ẹ́ yị vaa hụrẹ ụvọ yị wa nị. Ọnị aa dá ịpẹẹ yị ọ ka ọ̀ mẹ ịsị Ẹnẹyịmavara kà ọnị ọ̀ kà yị ọ aanị. Ịjọnọọ ọ́ vaa rọ̀ ọ ẹngụ, dị ọ ha nị.

²¹ Ama Ẹnẹyịmavara ọ́ raa sị zụ ọnị ịsị e vee tù ọ, ọ̀ọ ka ọnị ẹ́ yị hụrẹ ẹngụ anịị ụvọ yị Anibabironi nịnị.

²² Ijeremaya ka ọnị ô re ka, aa kụ avaba anyẹnẹẹ ana vọ tụ ịnị eehi ohinọyị Ijuda tụ ẹhẹ yị ezida ohinọyị Ịbabịrọnị. Dị anyẹnẹẹ ẹnẹẹ kụkụ aa ka yị ẹwụ ohinọyị ka. Avaba ọta awụ ẹnị ụ sị ayị tụra ẹ̀ reè vene wu, dị ẹ nyị ẹbẹẹba awụ nị. Wa raa ngụ ụdọ booro aanị, ẹnịnị ẹ́ sị zwe.

²³ Ijeremaya ka ọnị ộ rẹ kà a yị ohinọyị Izedekaya ka; a vaa kụ avaba ese ewu ẹnịrị ezi ewu tụ ẹhẹ yị Anibabironi nịnị. Ẹwụ ụvọta ẹ́ yị vaa haa hụrẹ wa ụvọ, ohinọyị Ịbabịrọnị vị ana vaa za awụ, dị aa rị ẹkụra ọnọnịị ịra.

²⁴ Dị Ịzẹdẹkaya ka, asị ọnị zẹẹ ka ọzọnyị-ọzọnyị ọ̀ wụ́ ịrẹyị ẹnẹ ẹnị kà aanị o, dị asị á nyị ịsị ẹ mẹ̀ ọnị.

²⁵ Ọ kà, ezida anị ẹ̀ẹ wụ ka ẹnị ệ kà ịrẹyị, ẹnịnị vaa vẹ vaa họ̀ ụ use ka sị ẹnị ka. Ẹnịnị vaa kà a wụ ka wàa kà a yị ẹnị, ẹnị ẹ́ yị vaa wụ̀ wụ.

²⁶ Ijeremaya ka, ohinọyị Ịzẹdẹkaya ka ọnị ọ̀ kà a yị wa ka, vị ọnị aa dá ịpẹẹ yị ọnị ka, asị ọnị kụkụ sị ọnị varẹma nọ ịnị ẹhẹ Ijonatani ka ọnị ò ne sú tụ ịzọọ nị.

²⁷ Ijeremaya ka, ịzẹyịza, avaba ezida ohinọyị ệ va họ̀ ọnị usirẹyị. Dị ọnị tụ́ wa ohi anka ohinọyị mẹ kà a yị ọnị gẹdẹ-gẹdẹ. Ẹ́ yị nyị ịsị ẹnịnị kụkụ zụ mẹ, agụvị ka ẹ́ yị nyị ọza ana wụ́ ịrẹyị ọnị ọnịrị ohinọyị kà.

²⁸ Avọọ Ijeremaya mẹ vana yà ịnị ohweje oserẹtẹ nịnị pooro ne tu ụmẹ ana a sị kụ ịrẹkụ va rị Ijerusarẹmị nị.