Ijeremaya 36 - IWE ỌNỊNỊ

Ibaruki ộ kà ịrẹyị ana chẹrẹ tịtẹ.

¹ Ijeremaya ka, ana tụ ọ ịrayị ọhụna ọnị Ijehoyakimi ozi Ijosaya rị ohinọyị Ijuda, Ẹnẹyịmavara ộ kà a yị ọnị ka,

² Ọnị ọ̀ sị iwe ọgọdọ ana aā kara, dị ọnị ọ̀ chẹrẹ avaba ịrẹyị ọnị ọnị kà yị ọnị ịnị ịpa Isirẹrị ọnịrị Ijuda ọnịrị avaba ẹkụra ana vọ tụ ọ. Ọ kà ọnị ọ̀ chẹrẹ ẹ avaba ịrẹyị ọnị ọnị kà yị ọnị hụrị ụmẹ Ijosaya sị vị ohinọyị huuu va ngụ ajịnị.

³ Ẹnẹyịmavara kà, ẹyịyara, ịjị avaba Anijuda ẹẹ wụ avaba ụya ọnị ọnị ka ọnị vaa sịị rị wa, ọzọza vaa vàa hụụnị ẹhẹ odivi ẹnịnị. Ịjọnọọ ọnị rẹ vaa vagu avaba ebira odivi ẹnịnị ọnịrị ịvị ẹnẹ ẹ rị yị wa.

⁴ Ijeremaya ka, ịzẹyịza, dị ọnị hị́ Ibaruki ana vị ozi ọnọrụ ana aā hí Ịnẹraya, dị ọnị za avaba ịrẹyị ọnị Ẹnẹyịmavara kà yị ọnị ịrịka hi ẹtẹ yọ nị. Dị Ibaruki chẹrẹ wa hi ịnị iwe gọdọ ọnọọ nị.

⁵ Ijeremaya ka, dị ọnị kà a yị Ibaruki ka, á raa mẹ ọda yị ọnị ka asị ọnị kụkụ jị ahụ ngụ ịnị irehi Ohomorihi.

⁶ Ama ọnị ee si ka ọ̀ nọ ịzọọ ịhị aza aa ba awẹ. Òo tu ịzọọ dị ọ̀ jẹẹ ịzị avaba aza vaa zụụ wụ́ ọngwẹ anị, dị ọ̀ kà avaba ịrẹyị ọnị Ẹnẹyịmavara kà yị ọnị, ọnị ọnị kà yị ọ, dị ọ chẹrẹẹ tụ ịnị iwe ọgọdọ aanị. Ọnị ka ọ̀ kà a boro-boro dị avaba Anijuda ana hụrẹ ẹkụra irenyi-irenyi vẹ ịzọọ ẹ̀ wụ́.

⁷ Ijeremaya ka, ẹyịyara, ẹnịnị vaa dá ịpẹẹ ị Ẹnẹyịmavara, dị ẹnịnị và hụụnị ẹhẹ odivi ẹnịnị. Ọ kà, Ẹnẹyịmavara ọ raa sị ọyịkụ-ọyịkụ ee wo oto hi aza ẹnẹnị.

⁸ Ịzẹyịza dị Ibaruki na mẹ avaba ịsị ọnị ọnị kà yọ gẹdẹ-gẹdẹ nị.

⁹ Ịnị ụhwẹ ọhụhị ịrayị ọhụhịịna ọnị Ijehoyakimi rị ohinọyị Ijuda, aza ệ ba awẹ ka ahịka Ẹnẹyịmavara vaa vayị ẹnịnị. Avaba aza ana ra hi Ijerusarẹmị ẹnịrị aza ana hụrị aha irenyi-irenyi ẹtẹ Ijuda vẹ, ẹ ba awẹ ọnọọ nị.

¹⁰ Ịjị aza sị gụ, Ibaruki ộ jẹẹ ịnị aku ọnọrụ ọnya aanị ana aā hị́ Igẹmarịya ana vị ozi Isahwani, ọnị ọọ chẹrẹ ịsị ịnị ikootu nị. Aku ọnọọ vị ana ya ịnị ohweje ana ya eyi ẹbẹẹba, ọ sị gụrị oze ọwọọwa ana a zịị ngụ ịnị irehi Ohomorihi. Ibaruki ộ vavọọ ya ini irehi Ohomorihi, dị ọ kà avaba ịrẹyị ọnị Ijeremaya ka yọ ọnị ọ chẹrẹ hi ini iwe ọgọdọ nị.

 rẹ ka ịrẹyị ịnị iwe ọgọdọ ọnọọ yị ọdọvịdị nịnị

¹¹ Â nyị ọnọrụ ọnya aanị ana aā hị́ Imikaya, ada anị ọ rị Igemariya nị, dị ọ vị aazị ọnọrụ ana aā hị́ Isahwani nị. Imikaya ọnọnị ộ wụ avaba ịrẹyị Ẹnẹyịmavara ọnị Ibaruki zarịka hi ẹtẹ hụụnị iwe ọgọdọ aanị.

¹² Dị ọ́ nọ ịnị eehi ohinọyị nị. Ô tu ịzọọ dị ọ́ nọ ịnị akụ ọza anaā chẹrẹ ịsa nị. Avaba ẹnị ọdọvịdị yà ozukọrọ ịzọọ ụmẹ ọnọọ. Aza ẹnẹnị e hi ịzọọ ụmẹ avọọ nị: Erisama anaā chẹrẹ ịsa ịnị ikootu, Ịdẹraya ana vị ozi Isemaya, Ẹrinata ozi Achibọ, Igẹmarịya ozi Isahwani, Ịzẹdẹkaya ozi Ịhananịya, ọnịrị avaba ẹnị ọdọvịdị ana vọ.

¹³ Imikaya ộ kà a yị wa avaba ịrẹyị ọnị ọ́ wụ́ ka Ibaruki ộ kà a hi ẹtẹ yị aza.

¹⁴ Dị ẹnị ọdọvịdị ẹnẹnị tụ ọnọnị ana aā hị́ Ijehudi ozi Inetanaya ne tu Ibaruki nị. Ijehudi ọnọnị vị aazị ọnọrụ ana aā hị́ Isẹrẹmaya, dị ọ vị ẹmaazị ọnọrụ ana aā hí Ikusi nị. Ẹ ka, ọ̀ kà a yị Ibaruki ka ọ̀ sị iwe ọnị ọ kà yị aza vẹ o. Ịzẹyịza dị Ibaruki sị ọ ve tu wa nị.

¹⁵ Ẹnịnị ka Ibaruki ọ̀ yaatụ dị ọ̀ ka iwe ọnọọ zụ ẹnị. Ịzẹyịza, dị Ibaruki kà a zụ wa nị.

¹⁶ Ịjị ẹnịnị wụ́ avaba ịrẹyị ọnọnị, dị ẹnịnị kụkụ ee ré ẹngụ goro-goro angwa mee hi wa nị. Dị ẹ kà a yị Ibaruki ka aa nyị ka ẹnị ẹ̀ na ka ịrẹyị ọnọnị yị ohinọyị nị.

¹⁷ Ọdọvịdị ẹnẹnị ệ họ̀ Ibaruki ka ọ̀ kà a yị ẹnị, aa vị Ijeremaya ọ ka avaba ịrẹyị ọnị ọ maanị chẹrẹ hi ẹtẹ aanị yọ nị.

¹⁸ Dị Ibaruki tụ́ wa ohi ka, Ijeremaya ọ ka avaba ịrẹyị ẹnẹnịị yị ọnị, dị ọnị chẹrẹ wa tụ ịnị iwe nị.

¹⁹ Dị ẹnịnị ka, Ibaruki ọnịrị Ijeremaya ọnọọ è sị aha na tẹ̀ nị. Ẹ ka asị ẹ zẹẹ ka ọza ọ̀ yẹ́ ịzị ẹ na yà.

Ohinọyị ộ rị iwe ọnọọ ịra.

²⁰ Ọdọvịdị ệ sị iwe ọgọdọ ọnọnị tụ́ ịnị aku Erisama anaā chẹrẹ ịsaa yị ikootu, dị ẹ ngụ ịnị ohweje ohinọyị, dị ẹ kà avaba ịrẹyị ọnọnị hi ẹtẹ yị ohinọyị nị.

²¹ Dị ohinọyị tụ́ Ijehudi ka ọ̀ na sị iwe ọnọọ vẹ nị. Dị ọ́ na sị ọ hụụnị aku Erisama nị. Ộ kà a zụ ohinọyị ọnịrị ezi ahụ anị ana jẹẹ pe e ịzọọ.

²² Ụmẹ ọgụ ọ́ vị nị. Â nyị ịzị ohinọyịị yị ịnị irehi anị ụmẹ ọgụ. Dị ọ̀ yaatụ aa wà ịra ana a kà tụ ọvịdị anị nị.

²³ Ijehudi ộ maanị ka ohu ẹẹta à vị ẹẹna avọọ kẹnẹ, dị ohinọyị rẹ sị ụhwọ na wa và hí ịra. Avọọ ọ mẹ mẹ pooro dị ọ rị avaba iwe ọnọnị ịra nị.

²⁴ Angwa e yi re ve hí ohinọyị ọnịrị ezi ahụ anị ana wụ́ ịrẹyị ọnọnị. Ẹnịnị ẹ́ yị daba mẹ̀ ebira ana sị zụ ka ẹnị ee du ayị vụrụ-vụrụ.

²⁵ Ẹrinata, Ideraya ọnịrị Igẹmarịya ệ dá ịpẹ yị ohinọyị ka asị ọ rị iwe ọnọọ ịra, ama ohinọyị ẹ yị dọ.

²⁶ Ama dị ọ tụ ozi anị ọnya ana aā hị́ Ijerahimẹẹrị beri anọrụ ana aā hị́ Iseraya ozi Azireri ọnịrị Iseremaya ozi Abideeri ka ẹ̀ na za Ibaruki ọnịrị Ijeremaya ana vị ọnịsẹ vẹ nị.

Ijeremaya ô tenyi iwe ọsa chẹrẹ

²⁷ Ijeremaya ka, ohinọyị Ijehoyakimi mẹ raa rị iwe ọnị Ibaruki chẹrẹ ịrẹyị ọnị nị ka yị ọ tụ ịra, Ẹnẹyịmavara ộ kà a yị ọnị ka,

²⁸ ọnị ọ rẹ si iwe ọgọdọ ọsa, dị ọnị ọ̀ chẹrẹ avaba ịsa ana a vịdị chẹrẹ hi ịnị ịpaapa tụ ọ.

²⁹ Ẹnẹyịmavara kà ọnị ọ̀ kà a yị ohinọyị ka, ọ́ sị iwe ọgọdọ ọnọọ rị ịra, á vị daa họ̀ Ijeremaya ka, sị ẹ vẹ dị ọ chẹrẹ ẹ ka ohinọyị Ịbabịrọnị vee du ẹkụra ẹnịnịị ha ahẹ. Dị aa họ̀ bẹẹ ka sị ẹ vẹ dị ọ ka ohinọyị Ịbabịrọnị vaa wụ̀ anẹkụra anị ọnịrị ịsụpa a ha.

³⁰ Avọọ, Ẹnẹyịmavara kà ọnị aa kà a yị ẹwụ ohinọyị Ijehoyakimi booro anị ka, ẹ́ yị ma vana nyị evere awụ anaa vanaa yaatụ ịrẹsụ aga ohinọyị Idevidii mẹ ohinọyị. Oku awụ vị ene e vee nee ta tụ ịzị ọyị vaa haa ku ọ ọọdụ, dị eguhi ee chire ku ọ ịrahụ.

³¹ Ẹnẹyịmavara kà ẹwụrị ezi ewu beri ọdọvịdị ana kara awụ, vị ọnị ọnị vaa sị ụyaa rị agụvị avaba ebira odivi ẹnẹ ẹ mẹ. Ọ kà ẹwụrị aza ene hi Ijerusarẹmị ọnịrị Ijuda ẹ́ yị wụ́ ịrẹyị anị ọnị maa kà wụ, nịnị ọnọ. Agụvị avọọ, avaba ụya ọnị ọnị wo oto ka ọnị vaa sịị rị wụ nịnị, vị ọnị ọnị vaa sịị rị wụ nịnị ịzẹyịza.

³² Dị ọnị sị iwe ọgọdọ ọsa yị Ibaruki anaa chẹrẹ ịsaa yị ọnị nị. Ộ chẹrẹ avaba ịrẹyị ọnị ọnị ka yọ. Avaba ịrẹyị ana yị ịnị iwe ịpaapa ọnịrị ịrẹyị ana vọ ọnị ọnị ka yọ vị ọnị ọ chẹrẹ saka-saka.