Ijeremaya 35 - IWE ỌNỊNỊ

Ijeremaya ọnịrị Anirekabi

¹ Â nyị ọnọrụ ọnyara aanị, ana aā hị́ Ijehoyakimi; ozi ọnọrụ ana aā hị́ Ijosaya ọ vị nị. Ijeremaya ka Ẹnẹyịmavara ộ kà a yị ọnị ka,

² Ọnị ọ̀ na hị́ avaba aza ọnọrụ ana aā hị́ Irekabi dị ọnị ọ̀ kụ wa vẹ ịnị aku ọnya ịnị irehi Ẹnẹyịmavara dị ọnị ọ̀ sị eche yị wa ka è hú ọ.

³ Ịzẹyịza dị ọnị na hị́ ọnọrụ ana aā hị́ Ijaazaniya ana vị ozi ọnọrụ ana aā hị́ Ijeremaya nị. Ijeremaya ọnọnị vị ozi ọnọrụ ọnya ana aā hị́ Ihabazinaya. Ijeremaya ka ọnị ộ hị́ Ijaazaniya ọnọnị ọnịrị ẹyịnyara anị beri avaba ezi anị,

⁴ dị ọnị kụ wa vẹ ịnị irehi Ẹnẹyịmavara nị, ọ ka ọnị ộ kụ wa ngụ ịnị akụ ezi ọza Ohomorihi ọnya ana aā hị́ Ihanani. Ada Ihanani â hị́ Igidarịya nị ọ ka aku ọnị ọnị kụ wa ngụ ịnị anị aanị vị ana gụrị aku ẹnị ọdọvịdị ịnị irehi Ẹnẹyịmavara, dị ọ yà ẹbẹẹba akụ ọnọrụ ana aā hị́ Imaseya ana vị ozi Isarumi nị.

⁵ Ijeremaya ka, ọnị ộ sị ẹnya ka eche ohihi hi ẹtẹ yị wa, dị ọnị kụ ako vakaa yị wa nị, dị ọnị ka ẹnịnị ee hú ọ nị.

⁶ Ama dị ẹnịnị tụ́ ohi ka, ẹnị é yi me hu eche nị, agụvị ka ohiku ẹnịị ana aā hi Inadavu ộ mẹ̀ ọda yị ẹnị ka: asị ẹnị hú eche ọnyọọnyị dị asị ezi ẹnịnị ẹnị re hú eche bẹẹ.

⁷ Ẹ ka ộ rẹ kà a yị ẹnị bẹẹ ka asị ẹnị dà irehi, asị ẹnị da aarẹ, asị ẹnị da ụbazị ịvayịnị, dị asị ẹnị rẹ hị́ ẹngụ ịsa ẹnẹnị vụrụ-vụrụ. Ẹ ka ộ mẹ̀ ẹ ọda yị ẹnị ka ịnị ajẹngụ ẹnị vaa ra pooro anka ọzọga avọọ, ụvị dị ẹnị è ku orubo ịnị ọnọnị nị.

⁸ Ẹnịnị ka avaba ịrẹyị ọnị ohiku ẹnịnị Ijonadabị mẹ ọda anị yị ẹnị vị ẹnị ẹnị saasa. Ẹnị ụvọta e yị me hú eche; ose ẹnịnị ẹnịrị ezi ẹnị e yi re hú bẹẹ.

⁹ Ẹnị ẹ yị dà irehi ka ẹnị ẹ̀ ra ịnị anị. Ẹnị ẹ yị da ụbazị ịvayịnị, ẹnị ẹ yị hị́ ẹtẹ à vị ịsị ịnị aarẹ.

¹⁰ Ẹ ka ịnị ajẹngụ ẹnịị ra nị. Avaba ịrẹyị ọnị ohiku ẹnịnị Inadabi mẹ ọda anị yị ẹnị vị ẹnị ẹnị saasa bemi-bemi.

¹¹ Ama ịjị Inebukadineza ohinọyị Ịbabịrọnị kụ ịrẹkụ va ngụ Ijuda, dị ẹnị ka, a vẹ dị ẹnị ẹẹ vị Ijerusarẹmị agụvị ka angwa isoja Anibabironi ẹnịrị Isiriya ee hi ẹnị nị. Ịsị ẹ vana sị ẹnị va ra Ijerusarẹmị yị.

¹² Ijeremaya ka, dị Ẹnẹyịmavara va kà a yị ọnị ka:

¹³ Ọnị Ẹnẹyịmavara Ochẹtẹẹngụ, Ohomorihi Anisirẹrị ka, ọnị Ijeremaya ọ̀ na kà a yị avaba Anijuda ọnịrị Ijerusarẹmị ka sị ẹ vẹ dị ẹnịnị ẹ̀ yị wụ́ ịrẹyị anị? Sị ẹ vẹ dị ẹnịnị ẹ̀ yị saasa ịrẹyị anị kẹ?

¹⁴ Ẹnẹyịmavara kà ezi Irekabi ệ saasa ọda ọnị Ijonadabị ohiku ẹnịnị mẹ yị wa ka asị e hú eche. Ịzẹyịza ẹnịnị e yi hú eche pooro ve tu ajịnị. Ama ọnị ộ kà ịrẹyị yị ụ nịnị pooro wẹ yị wụ nịnị.

¹⁵ Ọ kà pooro kẹnẹ ọnị aa tụ ezi ahụ anị ọnịsẹ nịnịị hi u nị. Ẹnịnị ệ kà a wụ nịnị ka ọzọza ọ̀ và hụụnị ebira odivi dị waa mẹ̀ ịsa ana vọrọ nịnị. Ệ kà wụ nịnị ọ̀nọ̀ ka asị ụ na hẹkẹ ori nịnị; agụvị wa zụ ra ịnị ẹtẹ ọnị ọnị sị yị ẹwụrị ohiku awụ nịnị. Ama wẹ yị wụ́ ịrẹyị anị nịnị.

¹⁶ Ẹnẹyịmavara kà, ezi Ijonadabị ệ saasa ọda ọnị ohiku ẹnịnị mẹ yị wa ama ẹwụ nịnị ẹ́ yị saasa ịrẹyị anị.

¹⁷ Avọọ, ọnị Ẹnẹyịmavara Ochẹtẹẹngụ, Ohomorihi Anisirẹrị vaa sị ụyaa rị ẹwụ nịnị Anijuda ọnịrị Anijerusarẹmị anka ọnị mẹ kà a tịtẹ. Ọ kà ọnị vavọọ aa mẹ wụ nịnị agụvị ọnị ộ kà ịrẹyị yị wụ nịnị ama wẹ yị wụ; ọnị ộ hị́ wụ nịnị, we yi tụ́ ohi.

¹⁸ Ijeremaya ka dị ọnị kà a yị ezi Irekabi ka, Ẹnẹyịmavara Ochẹtẹẹngụ, Ohomorihi Anisirẹrị nịnị ka: Wa raa mẹ avaba ịsa ọnị Ijonadabị, ohiku awụ nịnị mẹ ọda anị yị wụ nịnị. Waa saasa avaba ịrẹyị ọnị ọ kà yị wụ nịnị.

¹⁹ Avọọ, ọnị Ẹnẹyịmavara Ochẹtẹẹngụ, Ohomorihi Anisirẹrị aa kà a tịtẹ ka ọza é yi vee si ezi Ijonadabị ka ẹ̀ mẹ̀ ụkọrọ anị dị à si e re.