Ijeremaya 34 - IWE ỌNỊNỊ

Ụtụ ọnị Ẹnẹyịmavara tụ́ hị́ Ịzẹdẹkaya

¹ Ijeremaya ka Ẹnẹyịmavara ộ kà ịrẹyị yị ọnị ụmẹ ọnị Inebukadineza ohinọyị Ịbabịrọnị ọnịrị ezirẹkụ anị sị kụ ịrẹkụ ve tu Ijerusarẹmị. Ezirẹkụ avaba ẹkụra ọnị Inebukadineza aa mẹ ohinọyị tụra ịrẹsụ vị ana saasa a kụ ịrẹkụ ve tu Ijerusarẹmị ọnịrị ẹkụra ana kara a ụmẹ ọnọọ.

² Ọ kà, Ẹnẹyịmavara, Ohomorihi Anisirẹrị nịnị ộ kà a yị ọnị ka, ọnị ọ̀ na kà a yị Ịzẹdẹkaya, ohinọyị Ijuda ka, ọnị Ẹnẹyịmavara vaa hụrẹ ẹkụra ọnọnị ụvọ yị ohinọyị Ịbabịrọnị dị ọ rị ọ ịra.

³ Ẹnẹyịmavara kà ẹwụ Ịzẹdẹkaya ẹ yị vaa ha, vị á vaa za wụ dị aa sị ụ ne chiree ụvọ nị, ọ ka ẹwụrị ọ vaa và eyi ka ẹngụ, dị u re e dị ẹwụrị aa kà ịrẹyị; dị wa vaa nọ Ịbabịrọnị ọgọnị.

⁴ Ẹnẹyịmavara kà, Ịzẹdẹkaya ọ̀ wụ́ ịrẹyị ọnị ọnị aa kà: Wé yi vee sú ịnị ịrẹkụ ọnọnị. Ẹngwọọrọ-ẹngwọọrọ u vee sú nị.

⁵ A vaa rị eturare ịra yị oku awụ anka a mẹ mẹ̀ ẹ yị oku ohiku awụ nịnị ana vịdị rị ohinọyị dị o ve tu u. Aza awụ vaa jị òrèrè awụ dị ẹ ka, ohinọyị ẹnịnị oo wusu ee.

⁶ Ijeremaya ka dị ọnị vavọọ na ka ụtụ ọnọnị yị ohinọyị Ịzẹdẹkaya, Ijerusarẹmị nị.

⁷ Ụmẹ ọnọọ, isoja ohinọyị Ịbabịrọnị kụ ịrẹkụ ve tu Ijerusarẹmị ọnịrị ẹkụra ana vọ hi Ijuda nị. Ẹkụra ẹnẹẹ ẹ rị Irakisi ọnịrị Azẹka nị.

À hụrẹ ọrịhị nịnị ụvọ.

⁸ Ẹnẹyịmavara ộ kà ịrẹyị yị Ijeremaya ịrẹma ọnị ohinọyị Ịzẹdẹkaya ọnịrị Anijerusarẹmị nịnị raa dọ ka ẹnị aa hụrẹ ọrịhị ẹnịnị ụvọ.

⁹ Ẹ ka ọzọza ọ̀ na hụrẹ ọrịhị ẹnịnị ana vị Anihiburuu ụvọ, ọ̀ọ vị ọnọrụ ọ̀ọ vị ọnẹẹ; asị a nyị ọza ana kụkụ za Aniju ọhụva anị ọrịhị.

¹⁰ Dị avaba aza ẹnịrị ọdọvịdị ẹnịnị ana vavọọ dọ ka ọzọza ọ̀ na hụrẹ ọrịhị anịị ụvọ dị asị a kụkụ za wa ọrịhị naa dị ẹ na hụrẹ wa ụvọ nị, ọrịhị ẹnịnị anọrụ ọnịrị anẹẹ ẹ́ hụrẹ ụvọ nị.

¹¹ Ama ộ da ku chee, dị ẹnịnị sị ayị vara nị. Ẹnịnị ệ na kụ wa varẹma, dị ẹ rẹ sị ụkata za wa ọrịhị nị.

¹² Dị Ẹnẹyịmavara va kà a yị Ijeremaya ka,

¹³ Ọnị, Ohomorihi Anisirẹrị ka, ọnị ọ zẹẹ ịzẹzẹ beri ohiku ẹnịnị ọnị mẹ kụ wa hụrị Ijipiti ịzị a za wa ọrịhị tụ aa vẹ, dị ọnị ka;

¹⁴ ịrayị ịhịmba-ịhịmba ọzọza ọọ hụrẹ ọrịhị anị ana vị Anihiburuu ụvọ, ẹ̀ẹ raa hẹkẹ wa mẹ ịrayị ịhịnọnyị. Ama ohiku awụ nịnị ẹ yị va dọ ịrẹyị anị.

¹⁵ Ọ kà, ẹhwị ẹkụhị chee aanị, waa mẹ̀ ebira ene hine ọnị nịnị. Avaba awụ nịnị ộ dọ ka waa hụrẹ ọrịhị awụ nịnị ana vị Anisirẹrị ụvọ, ọvịdị anị ụ vavọọ zẹ ịzẹzẹ ịnị irehi anị nịnị nị.

¹⁶ Ẹnẹyịmavara kà, ama, waa vana rẹ sị ebira awụ nịnị vara, wẹ́ yị sị ụbanyị yị ọnị nịnị. Waa varẹma na za avaba ọrịhị ọnị ụ hụrẹ ụvọ nịnị, waa rẹ sị ụkata-ụkata za wa ọrịhị nịnị.

¹⁷ Avọọ, ọnị Ẹnẹyịmavara kà, wẹ́ yị saasa ịrẹyị anị nịnị. Ụ ka wẹ́ yị hụrẹ anda awụ nịnị ụvọ; agụvị avọọ, ọnị vaa hụrẹ ẹwụ nịnị ka we ne sú ha eyirẹkụ nịnị, dị ụkụ ọnịrị ụngwẹ ẹ̀ wụ̀ wụ nịnị va ha. Ọ kà ịsị ọnị ọnị vaa mẹ ẹwụ nịnị vee chire avaba anẹhẹ angwa.

¹⁸ Ẹnẹyịmavara kà avaba aza ana zẹẹ ịzẹzẹ dị ẹnịnị ẹ̀ yị mẹ̀ ịsa ẹnẹ zẹẹ ịzẹzẹ anị yị ọnị vị ọnị ọnị vaa mẹ anka ozi ụnọ ene e che ẹẹva dị a kụ ahụ hi anị parahu avọọ.

¹⁹ Ọ kà avaba ẹnị ọdọvịdị Ijuda ọnịrị Ijerusarẹmị beri ẹnị ọdọvịdị ikootu ohinọyị, ẹnị ohirẹsụ irehi Ohomorihi ẹnịrị avaba ọdọvịdị ẹkụra nịnị ana kụ ahụ hi ozi ụnọ ọnọọ dị ẹ zẹẹ ịzẹzẹ beri ọnị avọọ,

²⁰ vị ọnị ọnị vaa kụ chire ọnịvị ẹnịnị enee si wa usu ụvọ. Inomi ịnị ahị ẹnịrị uye ịnị avị nịnị ẹ vaa rị oku ẹnịị nị.

²¹ Ẹnẹyịmavara kà ọnị vaa kụ Ịzẹdẹkaya ohinọyị Ijuda ọnịrị ẹnị ọdọvịdị anị nịnị chire ọnịvị ẹnịnị enee si wa usu ụvọ. Ọnị vaa kụ wa chire isoja Anibabironi ana vịdị sị và hụrị ịrẹma awụ nịnị ụvọ.

²² Ẹnẹyịmavara kà ọnị vaa mẹ ọda, dị ọnị kụ wa vavẹ Ijerusarẹmị. Ẹnịnị vee pee kụ ịrẹkụ, dị ẹkụra ene hi Ijuda ẹtẹ, dị ẹ́ yị ma vana nyị ọza ana ra ịzọọ.