Ijeremaya 32 - IWE ỌNỊNỊ

Ijeremaya ô hị́ ẹtẹ

¹ Ijeremaya ka, Ẹnẹyịmavara ộ kà ịrẹyịị yị ọnị ịnị ana tụ ọ ịrayị ẹẹwụ ọnị ọnọrụ ana aā hị́ Ịzẹdẹkaya rị ohinọyị Ijuda. Ịrayị ọnọọ ọ tụ ọ ịrayị ẹwụrịhịnta ọnị Inebukadineza rị ohinọyị Ịbabịrọnị nị.

² Ụmẹ ọnọọ vị ọnị isoja ohinọyị Ịbabịrọnị va họ̀ kara Ijerusarẹmị eyi ẹnyị eyi ọsa. Ọnị vị ene e chire oze hị́ tụ ịnị ohweje ohinọyị ụmẹ ọnọọ.

³ Ọ kà ohinọyị Ịzẹdẹkaya ọ jị ọnị ẹngwa tụ ịzọọ nị, agụvị ka ọnị ộ va kà a ka Ẹnẹyịmavara kà ọnị vaa sị Ijerusarẹmị chire ohinọyị Ịbabịrọnị ụvọ dị ọọ nyị ẹbẹẹba ẹnịnị.

⁴ Ẹnẹyịmavara kà, Ịzẹdẹkaya ohinọyị Ijuda ẹ́ yị vaa ha hụrị Anikaridi nịnị ụvọ. Ama a vaa za a nee chire ohinọyị Ịbabịrọnị ụvọ. Ọnịrị ọ vaa ha eyi tụra ẹngụ dị ẹyaa kà ịrẹyị.

⁵ Ọ kà, ọ vaa sị Ịzẹdẹkayaa nọ Ịbabịrọnị, dị ọ yà ịzọọ pooro nee tu ụmẹ ọnị ọnị ve sii tụ́ ohi ịrẹyị nị. Ẹnẹyịmavara kà Ịzẹdẹkaya ọọ daka gẹ Anikaridi ịrẹvụ, é yi ree mẹ.

⁶ Ijeremaya ka Ẹnẹyịmavara ộ kà a yị ọnị ka,

⁷ Re, Ihanameri ozi ọyịnyara ada anị ana aā hi Isarumi vaa vẹ vaa kà a yị ọnị ka, ọnị ọ̀ va na hị́ ẹtẹ anị ana yà ịzị aā hị́ Anatọtị, agụvị ka ọnị ọ vọrọ tụra ka ọ̀ hị́ ọ nị.

⁸ Ịzẹyịza, anka Ẹnẹyịmavara mẹ kà a gẹdẹ-gẹdẹ, dị Ihanameri ve tu ọnị ịnị ohweje ohinọyị dị ọ ka, ọnị ọ̀ va na hị́ ẹtẹ anị ana yà Anatọtị ịnị ẹtẹ Ịbẹnjamịnị, agụvị ka ọnị ọ vọrọ tụra ka ọ̀ hị́ ọ nị. Agụvị avọọ ọnị ọ̀ hị́ ọ yị ẹngụ anị. Dị ọnị sị yẹ ka Ẹnẹyịmavara ọ ka ịrẹyị ọnọnị nị.

⁹ Ijeremaya ka ọnị ộ hị́ ẹtẹ ọnọọ ana ya Anatọtị hụụnị ụvọ Ihanameri ọnị ọnịrị vị ezi ẹyịnyara, dị ọnị sị ọ ụta ịsẹkẹrị ẹwụrịhịmba nị.

¹⁰ Ọ kà â mẹ iwe tụ ọ, dị ọnị sị ụvọ hi ọ, dị ọnị rẹ sị ịngọ ngọ ẹkẹhị ọnọọ eyi onivenu nịnị nị.

¹¹ Ijeremaya ka, dị ọnị kụ iwe ẹyịva ana a mẹ̀ ọnị ọnị sị hị́ ẹtẹ ọnọọ nị. Ọnyara vị ene e ku oku dị a hụ ọsa ha nị. Â chẹrẹ ọda ana saasa ịrẹyị ẹtẹ ọnọnị hị́ ịnị ẹnịnị.

¹² Ọ kà, ọnị ộ kụ iwe ẹnẹnị yị ọnọrụ ana aā hị́ Ibaruki ana vị ozi Ineraya dị ọ vị aazị Imaseya. Ijeremaya ka eyi Ihanameri ọnịrị ẹnị onivenu ana a sị ụvọ tụ ịnị iwe ana a sị hị́ ẹtẹ ọnọọ, ọnịrị eyi avaba aza ana yaatụ ịnị ohweje ohinọyị ọnị ku iwe ọnọọ yọ nị.

¹³ Ijeremaya ka ọnị ộ kà a yị Ibaruki eyi ẹnịnị ka,

¹⁴ Ẹnẹyịmavara Ochẹtẹẹngụ, Ohomorihi Anisirẹrị ka: Ibaruki ọ̀ kụ iwe ẹyịva ana a sị hị́ ẹtẹ aanị, ene e ku oku ọnịrị ana a hụ̀ ha, dị ọ̀ kụ wa hi ịnị ụnọkọ, ụvị òo ku pooro asị o du ha.

¹⁵ Ẹnẹyịmavara Ochẹtẹẹngụ, Ohomorihi Anisirẹrị ọ sị ọ ka ka, a vànaa hị́ irehi, ẹtẹ ọnịrị ụbazị ịvayịnị ịzị ẹnị o.

Aduwa ọnị Ijeremaya mẹ

¹⁶ Ijeremaya ka, ịjị ọnị raa sị iwe ana a sị hị́ ẹtẹ aanị yị Ibaruki, ọnị ộ mẹ̀ aduwa, dị ọnị ka:

¹⁷ Tee, Ohomorihi Ananyị yị! Ẹwa tana ụvọ dị ụ sị ụkata awụ tụ́ ẹbẹẹba ọnịrị ẹhẹ ọnọnị nọ. Ẹ́ yị nyị ịsị ẹ katẹngụ yị ụ o.

¹⁸ Ẹwụ ee sị ịrẹyị aza akahị-akahị pooro nị. Ẹ wa rẹẹ sị ụyaa rị aza agụvị ebira odivi aza ana ma wa nị. Waa banyị, dị ụ rẹ nyị ụkata ẹtẹẹtẹrẹ nị. Ẹ waa vị Ẹnẹyịmavara Ochẹtẹẹngụ nị.

¹⁹ Ịrẹyọyẹ awụ ọọ banyị, dị ụ rẹẹ mẹ̀ ụkọrọ ẹbanyị-ẹbanyị nị. Wee ré avaba ịsị aza aa mẹ, dị ụ rẹ vavọọ aa sị ọgụ ụkọrọ ọzọza yọ nị.

²⁰ Wâ mẹ apọtẹrẹwa ọnịrị ịvọpa ọrụrụ-ọrụrụ ẹtẹ Ijipiti, yị va ngụ ajịnị dị waa yịị mẹ ẹngụ ụkọrọ ẹnẹẹ ịnị ẹtẹ Isirẹrị ọnịrị aha ana vọ nị. Wa sị ịrẹha mẹ yị ẹngụ awụ avaba aha ịnị ajịnị.

²¹ Wâ mẹ apọtẹrẹwa ọnịrị ịvọpa, ene chire ọnịvị ayị nịnị angwa, dị ụ sị ụkata awụ kụ aza awụ Anisirẹrị hụrị ẹtẹ Ijipiti nị.

²² Wâ sị ẹtẹ ozoza, ẹtẹ ize ọnọnị yị Anisirẹrị anka ụ mẹ hị́ eku anị yị ohiku ẹnịnị ka ụ vaa mẹ.

²³ Ama ịjị ẹ́ va sị ra ịnị ẹtẹ ọnọnị, ẹnịnị ẹ́ yị saasa ọda awụ. Ẹnịnị ẹ́ yị mẹ ịsị ụ kà yị wa. Avaba ịsị ụmẹ ọda anị yị wa ka ẹẹ mẹ, ẹ́ yị nyị ẹnẹ ẹ mẹ. Agụvị avọọ ụ maanị kụ odivi ọnọnị tù wa aanị nị.

²⁴ Wee re, Anibabironi nịnị ẹ sị kwẹẹtẹ tu yị, dị ẹ họ̀ kara Ijerusarẹmị ka ẹnị aa vaa za wa anị nị. Ịrẹkụ, ụngwẹ ọnịrị ụkụ, aza ẹnẹnị vị anaa za Ijerusarẹmị. Wee re ka vị avaba ịrẹyị ọnị ụ ka sị gẹ aanị nị.

²⁵ Ijeremaya ka: Ama Ohomorihi Ananyị ka dị a daka aa yịị vaa sị ẹkụra ọnọnị yị Anibabironi aanị, ọnị sị ẹkẹhị na hị́ ẹtẹ ọnọnị dị ọnị ọ̀ nyị onivenu tụ ọ.

²⁶ Ọ kà, dị Ẹnẹyịmavara kà a yị ọnị ka,

²⁷ Re, ọnị ọ vị Ẹnẹyịmavara, Ohomorihi ana tụ́ avaba aza nị; vị áá nyị ịsị ẹ sị katẹngụ baaba yị ọnị kẹ?

²⁸ Agụvị avọọ, Ẹnẹyịmavara kà: Rẹ, ọnị vaa sị Ijerusarẹmị chire Inebukadineza ohinọyị Ịbabịrọnị ọnịrị ezirẹkụ anị nịnịị ụvọ. Ẹnịnị vaa nyị ẹbẹẹba anị,

²⁹ dị ẹ jị ịra da a. Ẹnịnị vaa rị ọ ịra bẹrị avaba irehi ana aza ya mẹ ayị kụ ọnị. Aza ẹ ya ịrẹsụ irehi ẹnẹẹ aa rị eturare ịra yị ori ana aā hị́ Ịbaarị, dị ẹ́ rẹ yaa sị eche mẹ̀ ịsọvọ yị ori ana vọ nị.

³⁰ Ẹnẹyịmavara kà hụrị ụmẹ ọnị Anisirẹrị ọnịrị Anijuda sị nyima ẹhẹ ẹnịnị, ayị anị é yi hine tu wa. Avaba ịsị ẹnịnịị mẹ vị ẹnẹ ẹ sịị mẹ ayịị kụ ọnị pooro.

³¹ Ọ kà, ẹkụra ọnọnị me hụrẹ nyima, pooro va ngụ ajịnị, aza ene hi ịnị anị hụrẹ aa mẹ ayịị kụ ọnị dị ayị aa dọva nị. Agụvị avọọ ọnị ka ọnị ee vu wa ẹtẹ nị.

³² Ọ kà ọnị ee vu wa ẹtẹ agụvị ebira odivi ọnị ezi Anisirẹrị ẹnịrị ezi Anijuda nịnị mẹ ẹnẹ ẹ sị mẹ ayị kụ ọnị. Ẹnẹyịmavara kà ohinọyị ẹnịnị ọnịrị ọdọvịdị ẹnịnị, ohirẹsụ irehi Ohomorihi ẹnịrị ọnịsẹ ẹnịnị, Anijuda nịnị ẹnịrị aza ana ra hi Ijerusarẹmị vị ana mẹ ayị kụ ọnị.

³³ Ọ kà, ẹnịnị ệ varẹma ka ọnị, ọnị ọ ka ịrẹyị yị wa pooro ẹnịnị ẹ́ yị wụ́ ịrẹyị anị.

³⁴ Ẹnẹyịmavara kà, ẹnịnị ệ hyakụ kụ ori ẹnịnị na jẹẹ ịnị irehi ana a dà kà a hẹkẹ ọnị ịnị anị, dị ẹ sị du ọ ẹngụ nị.

³⁵ Ọ kà ẹnịnị e ne hi ụta tụ Ihimoni ẹnẹ ẹ yaa mẹ̀ ịsọvọ ịnị anị yị Ịbaarị. Ịnị anị ẹyaa sị ezi ẹnịnịị mẹ̀ ịsọvọ yị ori Imorẹkị nị. Ẹnẹyịmavara kà ọnị ẹ́ yị kà a yị wa ka ẹ̀ maanị mẹ; ọnị é yị rò o bẹẹ ka ẹnịnị ẹ́ zụ vavọọ mẹ, dị ẹ̀ mẹ ka Anijuda ẹ̀ mẹ ịvị.

Ẹnẹyịmavara kà aa nyị ọyịtureyi

³⁶ Booro aanị, Ẹnẹyịmavara, Ohomorihi Anisirẹrị nịnị ka, Anẹkụra ọnọnị ana aza aa kà a ka ịrẹkụ, ụngwẹ ọnịrị ụkụ vaa mẹ ka ẹ̀ hyẹdụ yị ohinọyị Ịbabịrọnị aanị;

³⁷ Ọ kà, re, ọnị vanaa kụ wa gụ hụrị avaba ẹkụra ọnị ọnị sị ọyịkụ-ọyịkụ dụ wa ne hi. Ọnị vanaa kụ waa vaavẹ ịzị ẹnị, dị ọnị mẹ ka ẹnịnị ẹ̀ ra ẹngwọọrọ-ẹngwọọrọ.

³⁸ Ọ kà, ẹnịnị vaa vị aza anị, dị ọnị vị Ohomorihi ẹnịnị.

³⁹ Ọnị vaa mẹ ka ẹnịnị ẹ̀ nyị ayị ọnya, dị ẹ̀ rẹẹ mị ịsị ọnyọọnya. Ẹnịnị vaa sị ụbanyị yị ọnị pooro, ụvị ò zoza yị ẹnịrị ezi ẹnịnị.

⁴⁰ Ẹnẹyịmavara kà, oto ọnị ọnị vee woo yị wa ẹ́ yị vaa nyị ẹzẹtẹ. Ọnị vị ana vaa mẹ ọyịzaa yị wa pooro, ọnị vaa mẹ ka ẹnịnị ee hí angwa nị, dị à sị ẹnịnị kụkụ va ịrẹma anị.

⁴¹ Ọ kà, ọnị vaa mẹ ọyịzaa yị wa dị ayị anị ee hinee tụ ọ, Ọnị vaa sị avaba ayị anịị sị ịzẹyịzaa mẹ ka ẹnịnị ẹ̀ ra ịnị ẹtẹ ọnọnị pooro.

⁴² Ẹnẹyịmavara kà, anka ọnị mẹ kụ ịrẹyị odivi tu aza ẹnẹnị aanị, avọọ gẹdẹ-gẹdẹ ọnị mẹ rẹ vaa mẹ ọyịzaa yị wa anka ọnị mẹ kà a yị wa nị.

⁴³ Ọ kà, ẹtẹ ọnọnị ọnị aza aa kà a ka ọ vaa tụ osusu dị ọza é yị rẹ ọza à vị ịsụpa ịnị anị aanị; dị ẹ ka e ree si chire Anibabironi nịnị ụvọ aanị, a vanaa vaa hị́ ẹtẹ ịzị ẹnị.

⁴⁴ Aza vaa sị ẹkẹhịị hị́ ẹtẹ. A vaa mẹ iwe dị a sị ụvọ hi ọ, dị a dọ ivenu tụ ọ, dị e ku ọ oku, dị a sị ịsa va a. A vavọọ vaa hị́ ẹtẹ Ịbẹnjamịnị, ọnịrị ẹkụra eweyi-eweyi ana kara Ijerusarẹmị beri ẹkụra ẹbanyị-ẹbanyị ene hi Ijuda. A vaa hị́ ẹtẹ ẹkụra ene hi ịrẹsụ ataba ọnịrị ẹkụra ene hi iruvo ataba beri eyi ụvẹtẹ Ijuda. A vaa hị́ ẹtẹ ẹkụra ene hi ịrẹsụ ataba ọnịrị ẹkụra ene hi iruvo ataba beri eyi ụvẹtẹ Ijuda. Ẹnẹyịmavara kà ọnị vaa và aza ịrẹma vẹ ịnị ẹtẹ ẹnịnị.