Ijeremaya 31 - IWE ỌNỊNỊ

Anisirẹrị vaa vàa vẹ Eehi

¹ Ẹnẹyịmavara kà ụmẹ aa vẹ ọnị ọnị vaa vị Ohomorihi avaba ịrẹsụ-ịrẹsụ Anisirẹrị nịnị, dị ẹnịnị ẹnị rẹ vị aza anị.

² Ẹnẹyịmavara kà, ọnị ộ vayị aza ene è yị re ve su ịnị ụnọmị. Ịjị Anisirẹrị nịnị ê sị ịzị ẹyaa na tụ́ ụhwọ́.

³ Ẹnẹyịmavara kà ọnị ộ hụrẹ aha ẹnẹẹnẹ ve tu wa, dị ọnị ka, ẹwụ nịnị Anisirẹrị, vị ọnịị sì ịrẹyị awụ nịnị pooro kẹnẹ nị ọ. Avọọ ọnị maanị aa yịị sị zụ wụ nịnị ka ọnị oo sì ịrẹyị awụ nịnị pooro nị.

⁴ Ọ kà, ẹwụ nịnị Anisirẹrị ọnị vanaa kụ ụ nịnị kwẹẹtẹ, ịzẹyịza dị ụ kwẹẹtẹ nịnị. Ụ vanaa sị ahịhya awụ nịnị, dị waa nyẹzẹ ụ waa maa jẹ ịrajẹ nịnị.

⁵ Ọ kà, ụ vanaa da ụbazị ịvayịnị hi ịrẹsụ ataba Ịsamarịya nịnị. Anaarẹ nịnị vee chire ịvayịnị dị ẹyaa rị ẹtụtụ anị.

⁶ Ka ẹkụhị aa vẹ ọnị oserẹtẹ vaa yà ịrẹsụ ataba Ehwireemi dị ọ hị́ aza ka! Aa kwẹẹtẹ, dị aa vaa hịrẹ nọ ne tu Ẹnẹyịmavara Ohomorihi ayị.

⁷ Ẹnẹyịmavara kà, hụ̀ agụvị Anisirẹrị waa jẹ ịrajẹ dị waa jị ahẹ nịnị. Hụ agụvị Anisirẹrị wee nowu nịnị agụvị ka ẹnị ẹ vị ohirẹsụ avaba anẹkụra nịnị nị. Wee gono Ẹnẹyịmavara boro-boro, dị waa kà a nịnị ka, ọ sị aza anị ana vẹtẹ dọ ha.

⁸ Ọ kà, re, ọnị vaa kụ wa hụrị ẹtẹ Ịbabịrọnị vẹ, dị ọnị kụ wa gụ hụrị aha ẹnẹẹnẹ ịnị ẹhẹ. Ogweyi ọnịrị oswahụ, aza enee zyẹẹ ẹnịrị aza ẹnị ịrẹẹ aa zị vee hi ịnị ẹngụ ẹnịnị, dị ẹyaa vẹ gigirigi.

⁹ Ọ kà, aza anị vaa vàa vẹ dị eyee sụ ùnè, ọnị ọọ kụ wa aa vàa vẹ dị ẹyaa mẹ̀ aduwa. Ọnị vaa zụ wa oze naa ngụ ịnị okuha ana nyị enyi, ọnị vaa kụ wa vaa tụra oze ana swa, ẹnịnị ẹ́ yị vaa vangga. Ọ kà, Ada ọnị vị yị Anisirẹrị nịnị nị, dị Ehwireemi vị ozi ịpaapa anị nị.

¹⁰ Ẹwụ nịnị anẹkụra ọ̀ wụ́ ịrẹyị Ẹnẹyịmavara dị wa nọ̀ ọ yị anẹkụra ene hi utenyi ẹnẹẹnẹ. Ẹnẹyịmavara ana gara Anisirẹrị hi rẹ vaa kụ wa gụ dị ee sere wa anka oseratẹmẹ mee sere ịsụpa anị avọọ.

¹¹ Ẹnẹyịmavara kà ọnị o ree si ụta Anisirẹrị nịnị. Ọnị ọ raa dọ wa ha hụụnị ụvọ anẹkụra ene chi wa ẹngụ.

¹² Ẹnịnị vaa vẹ, dị ẹ jẹ ịrẹsụ dị ẹyaa jị ahẹ boro-boro. E vee hine ayị agụvị ịsọyịza ẹnẹ Ẹnẹyịmavara mẹ yị wa. E vee hine ayị agụvị ịsọyịrị, eche, ọnịrị angwẹ beri ịsụpa ọnị ọ vaa sịị yị wa. Ẹnịnị vị ana vaa yà anka ụbazị ana a da enyi hi avọọ. Ẹnịnị é yi me vene re ayodu.

¹³ Ịjọnọọ ezi anẹẹ ẹnịnị vaa jẹ dị ẹyaa nyẹzẹ. Ezweyi ọnịrị azọkụ ọnọrụ ẹnịnị vee hine ayị. Ẹnẹyịmavara kà ọnị vaa vara ayodu ẹnịnị ịnohine ọnị vaa sị wa ayịị nẹtẹ, dị ọnị sị ayohine dọ ayodu ịrẹsụ yị wa.

¹⁴ Ẹnẹyịmavara kà, ọnị vaa sị ịsọyịrị ọyịza-ọyịzaa yị ohirẹsụ irehi Ohomorihi ẹnịnịị rị. Ọ kà, avaba ịsị aza anị ee si vị ọnị ọnị vaa sịị yị wa dị ịnẹ ha wa.

Ẹnẹyịmavara ộ vayị Anisirẹrị nịnị

¹⁵ Ẹnẹyịmavara kà, ọnị ộ wụ́ a maa jị òrèrè ọngwọọngụ ẹtẹ Iraama. Irechẹrị aa jị òrèrè agụvị ka e yi kuku re ezi anị. Â sị ọ ayị nẹtẹ pooro ô yii.

¹⁶ Ẹnẹyịmavara kà, hụụnị orere ọ̀ yị jị dị we nyee ẹgọ hụụnị eyi awụ, agụvị ka ụ vaa dọ ọgụ ụkọrọ awụ. Ezi ewu vanaa vàa hụrị ẹtẹ ọnịvị ẹnịnị ve eehi.

¹⁷ Ọ kà waa nyị ọyịtureyi ụhwọọ, ezi ewu vaa vàa vẹ eehi.

¹⁸ Ẹnẹyịmavara kà ọnị ộ wụ́ Anisirẹrị nịnị mee du ayị dị ẹ ka, Ẹnẹyịmavara, vị́ ẹnị sị mẹẹ uye odivi avọọ nị, ama ọnị vị ana kọ ẹnị ka ẹnị ẹẹ saasa ịrẹyị anị. Ẹ ka ọnị ọ̀ kụ ẹnị vàka ẹngụ anị vẹ; ẹnị ee tenyi ẹngụ ka ẹnị aa vaa ka Ẹnẹyịmavara Ohomorihi ẹnịnịị vẹ.

¹⁹ Ẹ ka ẹnị ệ vịdị ha hụrị oze Ẹnẹyịmavara ama ẹnị varẹma ka a vẹ. Ẹ ka ẹnị mẹ sị yẹ aanị, ẹnị ee va ụvọ kụ ịrẹsụ ẹnị mee du ayị. Ụhị aa nyị ẹnị agụvị ebira odivi ẹnẹ ẹnị mẹ ẹnị mẹ hụrẹ vị ozweyi.

²⁰ Ẹnẹyịmavara kà, ẹwụ nịnị Anisirẹrị ẹ vị ozi ịpaapa anị nị. Ẹwụ nịnị ọnị sì ịrẹyị anị hu nị. Ọnị ọ̀ọ daka aa yịị kụ ayịị hi u nịnị ọnị ee yii rò ịrẹyị awụ nịnị. Ọ kà, ịrẹyị awụ nịnị ẹ́ yị hụụnị ayị anị, ọnị vaa vayị awụ nịnị.

²¹ Ọ kà wa mẹ apọtẹrẹwa jẹẹ oze nịnị. Vatụra oze ọnị ụ zị na nịnị, wa rẹẹ vaavẹ nịnị. Ẹwụ nịnị Anisirẹrị wa vaavẹ eehi awụ nịnị.

²² Ẹnẹyịmavara kà, ịzị ụ vaa mẹ ọsọọsa nee tu, ẹwụ nịnị ẹnẹ yị nyị ịzẹyịza aanị? Ọ kà ọnị vaa mẹ̀ ịsa ọwọọwa ana vị irenyi ọ̀ mẹ ịnị ẹhẹ. Anisirẹrị nịnị vee sì ịrẹyị Ohomorihi ẹnịnị.

Ize ọnị Ohomorihi vanaa mẹẹ yị aza anị.

²³ Ẹnẹyịmavara Ochẹtẹẹngụ, Ohomorihi Anisirẹrị ka, ịjị ọnị ọọ raa varẹma kụ aza anị vaavẹ eehi ẹnịnị, ẹnịnị vanaa kà a ịnị ẹtẹ Ijuda ọnịrị avaba ẹkụra ene hi ịnị anị ka, Ẹnẹyịmavara ọ̀ mẹ ka ò zé yị ataba anị ana yà Ijerusarẹmị, aha ọnịnị ịzị ọnị ụvọta ra.

²⁴ Aza vaa ra Ijuda ọnịrị avaba ẹkụra ene hi ịnị anị. Anaarẹ vee hi ịzọọ. Oseratẹmẹ ẹnịrị ịsụpa ẹnịnị vee hi ịzọọ.

²⁵ Ọ kà, ọnị vaa sị ụkata yị aza ọnị ọ sị ngụ ẹngụ, ọnị vaa sị ịsọyịrịị yị aza ọnị ụngwẹ raa tụ ọkụmị dị ịnẹ ha wa.

²⁶ Avọọ, aza kụkụ vaa kà a ka, ẹnị mẹ na sụ, ẹnịrị ụkata ọ ha nị.

²⁷ Ẹnẹyịmavara kà, ọnị ka ụmẹ aa vẹ ọnị ọnị vaa mẹ ka ẹtẹ Isirẹrị ọnịrị Ijuda ẹ vị ohihi yị aza ọnịrị ịsụpa.

²⁸ Ọ kà anka ọnị mẹ mẹ ka è hu wa hụrị ẹtẹ, dị a ma wa nyẹtẹ, dị ọnị mẹ ka à kụ wa hụrị ẹtẹ, è vu wa ẹtẹ dị a gara wa va ha avọọ, avọọ ọnị mẹ rẹ vaa mẹ ka à hị́ wa dị ẹẹ hụ nị.

²⁹ Ẹnẹyịmavara kà, ịjị ụmẹ ọnọọ oo tu, aza ẹ́ yị ma vana kụkụ kà a ka Aza ana ma ezi ẹ rị ikoko ọchị ẹbaazị nị ama irenu ezi ẹnịnị ẹ va sụrẹyị nị.

³⁰ Ama ọza tụra ọza anaa rị ikoko ọchị ẹbaazị, anyị anị vee su nị. Ọzọza vị ene vee su isu ịvị anị.

Ịzẹzẹ ọwọọwa.

³¹ Ẹnẹyịmavara kà, re, ụmẹ aa vẹ ọnị ọnịrị Anisirẹrị beri Anijuda nịnị vaa zẹẹ oto ọwọọwa.

³² Ẹ́ yị vaa vị ẹngụ ịzẹzẹ ọkụkụ ọnị ọnị zẹẹ yị ohiku ẹnịnị ọnị mẹ kụ wa hụrị ẹtẹ Ijipiti. Dị ọ daka vị ka vị ọnị sị mẹẹ anka ọva ọnẹẹ avọọ yị wa nị, ẹnịnị ẹ yị sị ụvọ za ịzẹzẹ ọnọọ.

³³ Ẹnẹyịmavara kà, aanị ọnị mẹ vaa zẹẹ oto ọwọọwa yị wa nị: Ọnị vaa chẹrẹ ọda anị tụ ịnị ayị ẹnịnị; ọnị vaa vị Ohomorihi ẹnịnị, dị ẹnịnị vị aza anị.

³⁴ Ọ kà, ọza ẹnyị ẹ́ yị kụkụ vaa kọ ọ yị ọsa ka ọ̀ yẹ Ẹnẹyịmavara, agụvị ka avaba ẹnịnị vaa yẹ ọnị, hụụnị ozweyi ẹnịnị na ngụ ọzọkụ. Ọ kà ọnị vaa vagu avaba akụvị ẹnịnị, dị ọnị ẹ́ yị kụkụ tamayị ebira odivi ẹnịnị.

³⁵ Ẹnẹyịmavara ọ mẹ ọyị ka ọ̀ vị ẹtohweyi yị ọọdụ nị, ọnị ọ mẹ ụhwẹ ọnịrị ụzọmị ka ẹẹ zẹtẹ ịrahụ nị. Ọnị ọ mẹ ka oku ọọ jị ayị dị ọọ da vụụvụ nị. Ịrẹha anị ọ rị Ẹnẹyịmavara Ochẹtẹẹngụ nị.

³⁶ Ọ kà avaba ịsị ọnị maanị mẹ aanị òo zụ vu, hụrị ọnị eyi, ịjọnọọ Anisirẹrị vee vu dị ọza ẹ́ yị maa vana hị́ wa ẹkụra paa nị.

³⁷ Ẹnẹyịmavara kà aza ẹ̀ẹ zụ ngọ ẹbẹẹba, dị ẹ rẹ zụ sị iruvo ọnị mẹmẹ ka ẹhẹ ẹtẹ nị, ọnị vaa hụ agụvị avaba ịsị ọnị ezi Anisirẹrị nịnị mẹ, dị ọnị dụ wa kwooze.

³⁸ Ẹnẹyịmavara kà ụmẹ aa vẹ ene e vee tenyi Ijerusarẹmị dà anka ẹkụra. A vaa dà a hụrị ohurohuro Ịhananẹrị eyi ọnị ọyịị̄ zị naa ngụ ẹtẹ naa ngụ oze ovwoovu ẹkụra ana yà ịnị ịkọna.

³⁹ A vaa sị obo ngọ ọ tụ ọvịdị huu naa ngụ ịnị ataba Igarebi dị ọ vaa ha naa ngụ ẹtẹ Igowa.

⁴⁰ Ọ kà, avaba inoze ene ee ne okuu hi ọnịrị ịzị aa kụ ututuu hi ne beri avaba ẹtẹ ana ya ẹbẹẹba okuha Ikidironi, huu naa ngụ oze umaata ana a zị ngụ ịnị ẹkụra eyi ọnị ọyịị̄ zịị hụrẹ, vị ana vanaa sịị turenyi yị ọnị. Ọza e me vene vu Ijerusarẹmị ẹtẹ paa.