Ijeremaya 3 - IWE ỌNỊNỊ

Anisirẹrị ẹnẹ ẹ yị nyị ịzẹyịza.

¹ Ẹnẹyịmavara kà, ọza ọ̀ọ jị ose anị ịjẹvụ, dị ose anị ọnọọ hụụ ịdị anị, dị ọ na va ọnọrụ ọsa nị, ọza ọnọọ ẹ yị kụkụ zụ dọ ọ varẹma. Ọza ọnọọ ọ̀ọ dọ ọ varẹma, ọ sị ẹtẹ du saka-saka. Ama, ẹwụ nịnị Anisirẹrị, ẹwụrị onyeehi ọrụrụ ọ na ra sẹ̀ ịrẹka zịịzị. Ụ́ wáá kụkụ a vaa vàa ka mịị vẹ nịnị booro aanị nị?

² Ẹnẹyịmavara kà, kana eyi tụ ẹba dị we ré ịrẹsụ ataba nịnị. Ịzị ẹ vọ ọnị wẹ yị ya sẹ̀ ịrẹka nịnị da? Ụtọ oze vị ọnị ụụ yaatụ zi onyeehi nịnị anka Anaaravụ enee zi ọza ịnị ụnọmị avọọ. Wa raa sẹ̀ ịrẹka ọyị sẹ awụ nịnị du ẹkụra va hi ẹtẹ.

³ Ọ kà, agụvị avọọ ọnị za orihi jẹẹ, di orihi ịrẹsụ ẹ yị zụ nị. Vị ụ sị mẹ nịnị anka ọsẹrẹka avọọ nị, ụhị ẹ yị nyị ụ nịnị.

⁴ Ọ kà ẹwụ nịnị vaa hị́ ọnị booro aanị ka, ọnị ọ vị Ada awụ nịnị, dị ọnị sì ịrẹyị awụ nịnị hụụnị ozweyi nị.

⁵ Ịzẹyịza ọnị ẹ yị vaa maanị du ayịị hi u nịnị agụvị ịrẹyị kiiki; ọnị vee hi ayị anị. Avọọ wụ mẹ vaa kà, dị waa yịị mẹ̀ avaba ebira odivi ụmẹzụ-ụmẹzụ nịnị.

Anisirẹrị ọnịrị Anijuda e ro ịnẹ varẹma

⁶ Ijeremaya ka, Ẹnẹyịmavara ộ ka ẹ yị ọnị, ụmẹ ọnị Ijosaya sị vị ohinọyị ka, ọnị oo rẹ ịsị Anisirẹrị nịnị mẹ? Anisirẹrị nịnị vị ọnyẹnẹẹ ẹnẹẹ yị nyị ịzẹyịza. Ọ sị ịrẹma và ka ọnị, dị ọ naa sẹ̀ ịrẹka ngụ ịrẹsụ ataba ọnịrị iruvo avaba ọchị ohwoohu zị nị.

⁷ Ẹnẹyịmavara kà ọnị ô rò ka ọ̀ọ sị avaba ẹsẹnị mẹ, ọ vaa và a ka ọnị vẹ, ama ọ yị và vẹ. Ijuda, onyeyiza anị ẹnẹẹ yị nyị ịzẹyịza oo ré avaba anị nị.

⁸ Ọ kà, Ijuda ẹnẹẹ yị nyị ịzẹyịza vị onyeyiza Isirẹrị. Oo re ka ọnị ộ jị Isirẹrị ịjẹvụ, dị ọnị da uwe yọ, dị ọnị dụ ọ kana kwooze nị, agụvị ka ộ và ịrẹma ka ọnị, ọ naa sẹ̀ ịrẹka. Ama angwa ẹ yị hụvị avọọ hi Ijuda, ọnị ọ́ rẹ naa sẹ̀ ịrẹka ụhị ẹ yị nyị ọ.

⁹ Isirẹrị ọ sị ẹkụra du. Ịrẹta ọnịrị ọchị ọnị ọ naa hẹkẹ vị ịrẹka ọyị sẹ yọ. Ịrẹka ọyị sẹ vị ịsa oweyi eyi anị.

¹⁰ Ẹnẹyịmavara kà, dị ọ́ maanị yị mẹ avaba ẹsẹnị, onyeyiza anị, Ijuda ẹnẹẹ yị nyị ịzẹyịza ẹ yị sị ịzẹyịza và ka ọnị vẹ; vaa da ọbọ kẹnẹ nị.

¹¹ Ijeremaya ka, dị Ẹnẹyịmavara kà a yị ọnị ka ọọ daka vị ka Isirẹrị ọ raa va ịrẹma ka ọnị, aanị ọ dahi huni Ijuda ẹnẹẹ yị nyị ịzẹyịza nị.

¹² Ẹnẹyịmavara kà ọnị ọ na nọ̀ ọ yị Anisirẹrị nịnị ka, ẹwụ nịnị Anisirẹrị, aza anị ẹnẹ ẹ yị nyị ịzẹyịza, và vẹ eehi nịnị, dị waa ka ọnịị vẹ nịnị, agụvị ka ọnịị vayị ọza. Ọnị ẹ yị vaa kụ́ ayịị hi u nịnị zịna-zịna.

¹³ Ẹnẹyịmavara kà dọ nịnị kẹnẹ ka waa rị ịvị nịnị, dị ụ kụ̀ hịrẹ ọnị ana vị Ohomorihi awụ nịnị nị. Dọ irenu nịnị ka waa mẹ̀ ebira ịrẹka ọyị sẹ, dị ụ naa hẹkẹ ori nịnị iruvo ọchị ohwoohu nịnị nị. Dọ irenu nịnị ka wẹ yị wụ́ chire Ohomorihi awụ nịnị.

¹⁴ Ẹnẹyịmavara kà, vavẹ eehi nịnị, ka aanị ụ vị nịnị nị. Ọ kà ọnị vaa sị ọza ikonyi ikonya hụrị ẹkụra ọnya, aza ẹnị ẹẹva hụụnị ịrẹsụ ọnya, dị ọnị kụ wụ nịnị vavẹ ẹtẹ.

¹⁵ Ọ kà ọnị vaa sị ẹngụ ọza ana vaa wụ́ chire ọnịị yị wụ nịnị ene vee sere wụ nịnị anka oseratẹmẹ avọọ. Ọza ọnọọ vaa sị ịrẹyọyẹẹ pá wụ nịnị.

¹⁶ Ẹnẹyịmavara kà, ịjị waa ta yárá tụ ẹkụra awụ nịnị, aza ẹ yị kụkụ vaa kà a ka: Apoti oto Ẹnẹyịmavara yọ. Aza ẹ yị hyakụ kụkụ vaa tamayị anị. Ẹnịnị ẹ yị kụkụ vee tenyi ọ mẹ.

¹⁷ Ọ kà, ụmẹ ọnọọ vị ana a kụkụ vaa hị́ Ijerusarẹmị aha udi ohinọyị Ẹnẹyịmavara. Avaba anẹhẹ vaa vẹ ịzọọ vaa hẹkẹ ọnị. Ẹnịnị ẹ yị kụkụ vaa mẹ ayị ọkatẹngụ ẹnịnị anaa sị wa mẹ̀ ebira odivi enee si.

¹⁸ Anisirẹrị nịnị ẹnịrị Anijuda vaa vàa bẹ, dị e dudu hụrẹ ẹkụra ana a za wa ọrịhị ne hi eyi ẹbẹẹba. Ẹnịnị vaa vàa vẹ ịnị ẹtẹ ọnị ọnị sị mẹ ogu yị ohiku ẹnịnị.

¹⁹ Ẹnẹyịmavara kà ọnị ô rò o ka vị ọnị vaa sị ụvọ za awụ nịnị anka ezi anị avọọ nị. Ọnị sì ka ọnị ọ̀ sị ẹtẹ ene zoza hu kere-kere ịnị ẹhẹ yị wụ nịnị nị. Ọnị ô zi ka vị ẹwụ nịnị va hị́ ọnị Ada awụ nịnị, dị wa a saasa ọnị nịnị pooro nị.

²⁰ Ẹnẹyịmavara kà, ama ẹwụ nịnị Anisirẹrị, anka ọnẹẹ ẹnẹẹ yị nyị ịzẹyịza ana para ọva anị hu avọọ, avọọ ụ wẹ yị mẹ mẹ ịzẹyịza hi ọnị nịnị nị.

²¹ Aa wụ́ ka aza ee na owu ịrẹsụ ataba. Anisirẹrị nịnị aa jị òrèrè, dị ẹ yaa da ịpẹ nị, agụvị ka ẹnịnị ẹ sị ebira odivi-odivi mẹ. E reè hi ayị Ẹnẹyịmavara, Ohomorihi ẹnịnị.

²² Ẹnẹyịmavara kà, avaba ẹwụ nịnị ezi ana kama wụ ọ̀ và ka ọnị vẹ. Ọnị vaa sị ụ nịnị ẹngụ nịya, dị ọnị mẹ ka waa mẹ ịzẹyịza nịnị. Dị ẹnịnị tụ́ ohi, dị ẹ ka, ịzẹyịza ẹnị aa vàa vẹ, agụvị ka ẹwụ a vị Ẹnẹyịmavara, Ohomorihi ẹnịnị nị.

²³ Ẹ ka, ori ọnị ẹnị aa hẹkẹ ngụ ịnị atabaa zị, ọnịrị eche ọnị ẹnị ee hú zị ka vị ẹnị aa mẹ ahẹkẹ aanị nị vị evene kẹnẹ. Ẹnẹyịmavara Ohomorihi kẹnẹ ọ vaa dọ Anisirẹrị ha nị.

²⁴ Ama ori ana aā hi Ịbaarị anaā mẹ̀ ụhị nyị ọza ọnị ẹnị aa hẹkẹ ọ raa mẹ ka atẹmẹ ọnịrị imaaru ẹnịnị beri ezi ẹnịnị ẹ̀ ta hi ẹnị ụvọ. Avaba ogu ọnị ohiku ẹnịnị mẹ tịtẹ yị ẹnị hụrị ụmọrụmọ ẹẹ ta.

²⁵ Ẹ ka, à jẹẹ vị ẹnị sụtẹẹtẹ và hí ẹtẹ ụhị-ụhị, agụvị ka ẹnịrị ohiku ẹnịnị ẹ sị ebira odivi mẹ hi Ẹnẹyịmavara, Ohomorihi ẹnịnị. Ẹ ka, ẹnị mẹ hụrẹ vị ozweyi, pooro va ngụ ajịnị, ẹnị ẹ yị wụ́ chire Ohomorihi da.