Ijeremaya 28 - IWE ỌNỊNỊ

¹ Ijeremaya ka, ịnị ịrayị ọnọọ ọnyọọnya, ịnị ụhwẹ ọhụhị ịrayị ọhụna ọnị Ịzẹdẹkaya rị ohinọyị, â nyị ọnọrụ ana aā hị́ Ịhananịya ozi Azuri. Anẹkụra ana aā Igibiyọnị ọ́ vị nị. Dị ọ vị ọnịsẹ nị. Ịhananịya ọnọnị ộ kà a yị ọnị eyi ohirẹsụ irehi Ohomorihi nịnị ọnịrị eyi avaba aza ịnị irehi Ohomorihi ka,

² Ẹnẹyịmavara Ochẹtẹẹngụ, Ohomorihi Anisirẹrị nịnị ka, ọnị ọ sị ọkẹẹkẹrẹ ohinọyị Anibabironi che va ha.

³ Ọ kà Ẹnẹyịmavara kà, ịnị akakana ịrayị ẹẹva, ọnị vaa kụ avaba ẹnya ọnị ohinọyị Inebukadineza kụ hụụnị irehi Ohomorihi ne hi Ịbabịrọnị vaavẹ ịzị ẹnị.

⁴ Ọ kà Ẹnẹyịmavara kà ọnị vaa sị Ijehoyakimi ozi Ijehoyakimi, ohinọyị Anijudaa vaa vẹ, beri avaba Anijuda ana a dụ ne hi Ịbabịrọnị. Ẹnẹyịmavara kà, ịzẹyịza, ọnị vee che ọkẹẹkẹrẹ ohinọyị Anibabironiya vaaha.

⁵ Ijeremaya ka, dị ọnị kà a yị Ịhananịya eyi ohirẹsụ irehi Ohomorihi nịnị ọnịrị eyi avaba aza ana jẹẹ ịnị irehi Ohomorihi ka,

⁶ Aamị! Ẹnẹyịmavara ọ̀ vavọọ mẹẹ. Ẹnẹyịmavara ọ̀ vaa mẹẹ anka Ịhananịya mẹ kà a gẹdẹ-gẹdẹ avọọ. Dị ọ̀ kụ ẹngụ ana a kụ hụụnị irehi Ohomorihi ọnịrị aza ana a dụ ne hi Ịbabịrọnị và vẹ nị.

⁷ Ama Ịhananịya ọ̀ wụ́ ịrẹyị ọnị ọnị aa kà a yị ọnịrị aza ana vọ o.

⁸ Ijeremaya ka, ọnịsẹ nịnị ana yà ọvịdị ọnịrị Ịhananịya ệ kà a da ka ịrẹkụ, ụngwẹ ọnịrị ụkụ vee tù anẹkụra ọrụrụ-ọrụrụ ọnịrị ohinọyị nịnị ana nyị ụkata ẹtẹẹtẹrẹ.

⁹ Ama ọnịsẹ anaa kà a ka a vaa nyị ẹngwọọrọ dị ọ vaa vavọọ sị ya nị, dị a dọ ka ịzẹyịza Ẹnẹyịmavara ọ tụ ọ ụtụ nị.

¹⁰ Dị Ịhananịya sị ọkẹẹkẹrẹ ọnị Ijeremaya sị tụ ọrọkọ dị o chee piri-piri nị.

¹¹ Dị ọ kà a eyi avaba aza ka, Ẹnẹyịmavara kà aanị ọnị me vee che ọkẹẹkẹrẹ ohinọyị Inebukadineza hụrị avaba anẹkụra nịnị ọrọkọ nị. Ịnị akakana ịrayị ẹẹva ọnị vaa maanị mẹẹ nị. Ijeremaya ka, dị ọnị hụụ ịzọọ nị.

¹² Ijeremaya ka ịjị o ne kù chee ọnị Ihananiya maanị mẹ dị Ẹnẹyịmavara kà a yị ọnị ka:

¹³ Ọnị ọ̀ na kà a yị Ịhananịya ka: Ẹnẹyịmavara kà, ọ sị ọkẹẹkẹrẹ ana a sị ọchị mẹ che va ha, ama ọnị vaa sị ana a sị enyusẹ mẹ dọ ọ ịrẹsụ.

¹⁴ Ẹnẹyịmavara Ochẹtẹẹngụ, Ohomorihi Anisirẹrị nịnị ka, ọnị vaa sị ọkẹẹkẹrẹ ana a sị enyusẹ mẹẹ tụ anẹkụra nịnị ọrọkọ. Ẹnịnị vaa kụụ hẹkẹ Inebukadineza, ohinọyị Anibabironi. Uye ịnị avị nịnị bẹẹ vị ana vaa hẹkẹ ẹ.

¹⁵ Ijeremaya ka, ọnị ộ maanị kà a yị Ịhananịya, dị ọnị rẹ ka a tụ ọ yọ ka, Ịhananịya wụ́ o! Ẹnẹyịmavara ẹ́ yị tụ ụ ụtụ, á vị dị waa mẹ ka aza ẹnẹnị ẹ̀ sị ayị tụra ireche ahẹ.

¹⁶ Avọọ, Ẹnẹyịmavara kà ọnị vaa sị ụ hụrị ẹhẹ. Wee sú dị ịrayị ọnọnị ọ̀ gẹ, agụvị ka wàa sị ịrẹyị irenu awụụ kụ̀ụ hịrẹ Ẹnẹyịmavara.

¹⁷ Ịzẹyịza, dị Ịhananịya sú ịnị ụhwẹ ọhụhịmba ịrayị ọnọọ nị.