Ijeremaya 27 - IWE ỌNỊNỊ

Ijeremaya ộ tụ́ ẹngụ anị ọkẹẹkẹrẹ.

¹ Â nyị ọnọrụ ọnya ana aā hị́ Ịzẹdẹkaya, ozi Ijosaya ọ vị̀ nị. Ijeremaya ka cheechee ọnị Ịzẹdẹkaya ọnọnị rị ohinọyị Ijuda, dị Ẹnẹyịmavara kà a yị ọnị ka

² ọnị ọ̀ sị́ obo ana a sị ịtụmpaha mẹ ọnịrị ọchị ana gọdọ dị ọ bụrụ mẹ ọkẹẹkẹrẹ, dị ọnị ọ̀ sị tụ ọbẹ nị.

³ Dị Ẹnẹyịmavara kà ọnị ọ̀ tụ ụtụ hi ẹnị ohinọyị ẹtẹ Edomi, Imowabi, Amọnị, Ịtaya ọnịrị Ịsịdọnị nị. Ọ kà ọnị ọ̀ tụ́ odeyi ẹkụra ẹnẹẹ ana vaa vẹ Ijerusarẹmị vee re ohinọyị Ịzẹdẹkaya.

⁴ Ọ kà ọnị ọ̀ kà a yị wa ka, Ẹnẹyịmavara Ochẹtẹẹngụ, Ohomorihi Anisirẹrị ka, ẹnịnị ẹ̀ kà a yị ohinọyị ẹnịnị ka,

⁵ ọnị Ẹnẹyịmavara kà ụkata anị ọnị sị tụ ẹhẹ ọnọnị beri aza ọnịrị uye ene hi ịnị anị nị. Ọza enee zee ọnị eyi kẹnẹ ọnị nyẹngụ sị wa chire ụvọ nị.

⁶ Ọnị ọ sị avaba anẹkụra chire ozi ahụ anị, Inebukadineza ohinọyị Ibabironii ụvọ nị. Uye ịnị avị nịnị vị ọnị ọnị sị vakaa yọ bẹẹ ka, ẹnịnị ẹẹ kụụ hẹkẹ ẹ.

⁷ Avaba anẹkụra vị ana vaa kụụ hẹkẹ e. Ẹnịnị vaa kụụ hẹkẹ ezi anị ọnịrị aazị anị pooro nee tu ụmẹ ọnị ẹkụra anị ọnị rẹ vaa sị sẹ̀ ẹdụ. Dị anẹkụra anị ẹnị rẹ vaa kụụ hẹkẹ anẹkụra ọrụrụ-ọrụrụ ana nyị ụkata ẹtẹẹtẹrẹ ẹnịrị ohinọyị ẹbanyị-ẹbanyị nịnị.

⁸ Ẹnẹyịmavara kà, ama, àa nyị anẹkụra ọnyọọnyị, àa vị ohinọyị ana ka ẹnị ẹ̀ yị dọ ka ohinọyị Inebukadineza ọ̀ mẹ ohinọyị tụra ẹnị ịrẹsụ, ọnị vaa kụ́ ịrẹkụụ tù wa beri ụngwẹ ọnị ụkụ, dị ọnị sị sị́ ụya rị wa. Avọọ ọnị mẹ vaa mẹ wa pooro nee tu ịjị ọnị ọọ raa mẹ ka Inebukadineza ò vu wa ẹtẹ samị-samị nị.

⁹ Ọ kà, asị ụ wụ́ ịrẹyị ọnị ọnịsẹ awụ nịnị, aza eneē ré ẹtẹ wụ nịnị, aza anaā kà iruvo ụraa wụ nịnị ọ̀ọ va vị ọmahọnọ awụ nịnị aa kà. Ẹnịnị ka wẹ́ yị vaa kụụ hẹkẹ ohinọyị Anibabironi nịnị.

¹⁰ Ireche e yee che wụ nịnị nị, ọ̀ vavẹ ịrẹma anị vị ọnị ọnị vaa dụ wụ nịnị tụ ẹhẹ, dị a kụ wụ nịnị huu hụrẹ ẹtẹ awụ nịnị, dị ụ ne vú ẹtẹ nịnị nị.

¹¹ Ẹnẹyịmavara kà ama, anẹkụra anaa dọ ka ẹnị aa dọ ọkẹkẹrẹ ohinọyị Anibabironi, dị ẹnị ẹẹ kụụ hẹkẹ ẹ, ọnị vaa navọ wa ka ẹ̀ ra ịnị ẹtẹ ẹnịnị, dị ẹyaa kụ ịrụkụ ịzọọ.

¹² Ijeremaya ka ọnị ộ rẹ vavọọ kà a yị Ịzẹdẹkaya ohinọyị Ijuda ka, ọ̀ọ ka ọnịrị aza anị ẹ yàra, ọ̀ wụ́ chire ohinọyị Anibabironi, dị ẹẹ kụkụụ hẹkẹ ẹ.

¹³ Ọnị ka Ẹnẹyịmavara ọ́ sị ọ ka ka, anẹkụra anaa ka ẹnị ẹ yị dọ yị ohinọyị Anibabironi vị ana vaa kụ ịrẹkụụ tù dị e su va ha ẹ̀yị vị avọọ dị ụngwẹ ọnịrị ụkụ wụ̀ wa va ha. Sị ẹ vẹ dị Ịzẹdẹkaya ọnịrị aza aa vaa vavọọ sú vaaha kẹ?

¹⁴ Ọnị ộ kà a yị Ịzẹdẹkaya ka, asị ọ wụ́ ịrẹyị ọnịsẹ nịnị anaa kà a yị wa ka asị ẹ dọ yị ohinọyị Anibabironi avọọ o. Vị e yee vene u nịnị nị.

¹⁵ Ẹnẹyịmavara ọnị ụvọta ka ọnị ẹ́ yị tụ wa ụtụ. Ireche e yee chee zị ka vị ọnị tụ ẹnị ụtụ nị, avọọ ọnị vaa dụ ẹwụrị ọnịsẹ enee cheechee wụ nịnị avọọ hi ẹhẹ dị aa wụ̀ wụ nịnị.

¹⁶ Ijeremaya ka ọnị ộ rẹ kà a yị ohirẹsụ irehi Ohomorihi nịnị ọnịrị aza ana vọ ka, Ẹnẹyịmavara kà; asị ụ wụ́ ịrẹyị ọnịsẹ nịnị anaa kà a ka ẹ yị nyị aa jẹẹ dị à kụ ẹnya ene hi ini irehi Ohomorihi và vẹ hụrị Ịbabịrọnị. Ireche eyee chee wụ nịnị nị.

¹⁷ Asị ụ wụ́ ịrẹyị ẹnịnị o! Hụrẹ ẹngụ awụ nịnị ụvọ yị ohinọyị Anibabironiya dị wa yara nịnị. Sị ẹ vẹ dị aa vaa hụ aza hụrị ẹkụra ọnọnị kẹnẹ-kẹnẹ?

¹⁸ Ẹnẹyịmavara kà àa vị ọnịsẹ ẹ vị nị, dị ẹ ka ọnị ộ tụ ẹnị ụtụ nị, ẹnịnị ẹ̀ dà ịpẹ yị ọnị ka, asị ọnị Ẹnẹyịmavara Ochẹtẹẹngụ kụkụ zẹẹ ka à kụ ẹnya ana vọ tụ ịnị irehi anị ọnịrị ịnị irehi Ohomorihi ana yà Ijerusarẹmị aanị na tụ Ịbabịrọnị kẹ.

¹⁹ Aanị Ẹnẹyịmavara Ochẹtẹẹngụ mẹ̀ kà ịnị ịpa ọhẹ nịnị, iruku ọbanyị ana a sị enyusẹ ọkatẹngụ mẹ, ịsa aā sị ẹnyaa hí ọnịrị avaba ẹnya ana vọ.

²⁰ Ọnị Inebukadineza, ohinọyị Ịbabịrọnị navọ hi ẹtẹ, ụmẹ ọnị ọ sị va za Ijekoniya, ohinọyị Ijuda, ana vị ozi Ijehoyakimi, ụmẹ avọọ ộ rẹ za odeyi-odeyi Anijuda ọnịrị Ijerusarẹmị nịnị.

²¹ Ẹnẹyịmavara Ochẹtẹẹngụ, Ohomorihi Anisirẹrị ka, avaba ẹnya ana navọ tụ ịnị irehi anị ọnịrị ịnị irehi ohinọyị ana yà Ijerusarẹmị aanị.

²² Ẹnịnị vị ana vaa kụ nee hi Ịbabịrọnị, dị ẹ kụkụ yà ịzọọ pooro nee tù ụmẹ ọnị ọnị ọọ sị va eyi vẹ ịnị ịrẹyị ẹnịnị. Dị ọnị kụ wa vavẹ va tụ aha anị ịzẹnị.