Ijeremaya 24 - IWE ỌNỊNỊ

Uji ẹẹva ana a kụ ihwigi hi.

¹ Ijeremaya ka Ẹnẹyịmavara ộ sị uji ẹẹva ana a kụ ihwigi hi dị asị tụ ọvịdị irehi Ohomorihi zụ ọnị. Ịjọnọọ, Inebukadineza ohinọyị Ịbabịrọnị ọ́ va raa za Ijehoyakimi, ohinọyị Ijuda, ana vị ozi Ijehoyakimi ọrịhị hụrị Ijerusarẹmị ne hi Ịbabịrọnị. Ọnịrị avaba ọdọvịdị Ijuda beri ẹnị anaa mẹ ụkọrụvọ ọnịrị aza ana yára mẹ̀ ụkọrọ irenyi-irenyi ọ́ kụ́ na nị.

² Ijeremaya ka, ihwigi ene hi ini uji ịpaapa vị ozoza-ozoza. Ẹnị ene vịdị vi ẹ vị ẹnẹẹ nị. Ihwigi ene hi ịnị uji ọhụva vị ọyịvụ-ọyịvụ. Ee divi poori, ẹ́ yị hyakụ wụra rị.

³ Dị Ẹnẹyịmavara họ̀ ọnị ka, Ijeremaya, sị ọnị re nị? Dị ọnị tụ́ ohi ka, ihwigi yọ nị. Ẹnyị ee zoza ẹtẹẹtẹrẹ, dị ẹnyị vị ọyịvụ-ọyịvụ dị ẹ̀ yị wụra rị nị.

⁴ Dị Ẹnẹyịmavara kà a yị Ijeremaya ka,

⁵ ọnị Ẹnẹyịmavara, Ohomorihi Anisirẹrị ka, ihwigi ozoza-ozoza ẹnẹnị vị ana jẹẹ yị aza ana za ne hi Ịbabịrọnị aanị. Ọnị vaa mẹ wa ọyịza-ọyịza.

⁶ Ọ kà ọnị vee sere wa, dị ọnị varẹma kụ wa vavẹ ẹtẹ Ijerusarẹmị. Ọnị vaa hị́ wa hi ịnị ẹkụra, ọnị e yi vee hu wa hụrẹ ẹtẹ. Ọnị vaa mẹ ka ẹẹ hụ, ọnị ẹ yị vaa gụ wa hyẹdụ.

⁷ Ọ kà ọnị vaa sị ayị yị wa ana vaa mẹ ka ẹ̀ yẹ́ ka ọnị ọ vị Ẹnẹyịmavara nị. Ẹnịnị vaa vị aza anị, dị ọnị vị Ohomorihi ẹnịnị, agụvị ka ẹnịnị vaa sị avaba ayị ẹnịnị và a ka ọnịị vẹ.

⁸ Ẹnẹyịmavara kà, Ịzẹdẹkaya ohinọyị Ijuda, ẹnị ọdọvịdị ana kara a ọnịrị avaba Anijerusarẹmị ana vọ ẹtẹ, ẹ̀ẹ ya Ijerusarẹmị, èe zwe na ra Ijipiti, vị ọnị ọnị vaa mẹ anka ihwigi ọyịvụ-ọyịvụ ẹnẹ ẹ̀ yị wụra rị aanị.

⁹ Ọ kà ọnị vaa kụ ẹngụkata odivi tù wa ana vaa mẹ angwaa hi anẹhẹ. Ọ kà aza vị ana vaa sị wa mẹ enyinyi, dị aa sị ịrẹyị ẹnịnị mẹ̀ isiya, dị a raa kụ wa ụhụ. Aha tụra aha ọnị ọnị ọọ dụ wa ne hi vị ana a vaa sị ịrẹha ẹnịnịị chii hi aza.

¹⁰ Ẹnẹyịmavara kà ọnị vaa kụ́ ịrẹkụ, ụngwẹ ọnịrị ụkụ vee tù wa. Avọọ ọnị mẹ vaa mẹ wa pooro nee tu ka asị ọza ịnya kụkụ vọ tụ ịnị ẹtẹ ọnị ọnị sị yị ẹnịrị ohiku ẹnịnị nị.