Ijeremaya 22 - IWE ỌNỊNỊ

Ụtụ ana a tụ Ijeremaya hi ohinọyị Ijuda nịnị.

¹ Ẹnẹyịmavara ộ kà a yị Ijeremaya ka, ọ̀ nọ ini eehi ohinọyị Ijuda dị ọ̀ na kà a ịzọọ ka:

² Ẹwụ ohinọyị Ijuda, ana yaatụ ịrẹsụ aga ohinọyị Idevidi, ẹwụrị ezi ahụ awụ beri avaba Anijerusarẹmị ọ̀ wụ́ ịrẹyị ọnị Ẹnẹyịmavara kà.

³ Ẹnẹyịmavara kà, waa mẹ ịzẹyịza ọnịrị ịsa ana vọrọ nịnị. Ọza ana aa mẹ̀ẹ rị, dọ ọ hụrị ọza anaa mẹ̀ ẹ rị ụvọ nịnị. Asị ụ mẹ ọzọga nịnị ẹnịrị ezi oku, à vị osoku nịnị eyi ngwẹngwẹ. Asị ụ mẹ ẹvaya yị wa nịnị. Asị ụ wụ̀ aza ẹnẹ ẹ̀ yị nyị ịsị ẹ mẹ̀ ịzẹnị nịnị.

⁴ Ọ kà wàa sị ịzẹyịza aa saasa ọda ọnị ọnị mẹ yị ụ nịnị aanị, evere Idevidi ẹyị vaa vị ohinọyị awụ nịnị pooro nị. Ẹnịrị ezi ahụ ẹnịnị beri Anijerusarẹmị nịnị vaa tụra ịkẹkẹ ịrẹkụ ọnịrị umaata zị oze ana a zịị̄ ngụ irehi ohinọyị nịnị aanịị parahu.

⁵ Ẹnẹyịmavara kà, ama àa vị ka, wẹ yị saasa ọda ẹnẹnị nịnị, ọnị ọ sị ẹngụ anị hị́ eku ka, irehi ohinọyị awụ nịnị ọnọnị vị ọnị ọnị aa jị eburu.

⁶ Ọ kà, irehi ohinọyị Ijuda oo zoza anka ẹtẹ Anigiriyadi ọnịrị ataba Ịrẹbanọnị avọọ eyi anị; ama ọnị vaa hụ́ azaa hụụ ịzọọ, dị ọza ẹ yị ma vana rá ịnị anị.

⁷ Ọnị aa tu azaa vẹ enee vee vu u nịnị ẹtẹ. Aza ẹnẹẹ vaa kụ ịraga dị ẹ sị má o tu awụ nịnị ana a sị ọchị ozoza-ozoza ana aā hị́ isida mẹ, dị ẹ rị wa ịra.

⁸ Azọga ọrụrụ-ọrụrụ vaa zị aanị paraahu, dị ẹyaa họ̀ ẹngụ use ka, sị ẹ vẹ dị Ẹnẹyịmavara maanị nyayịnẹ vu ẹkụra ọbanyị ọnọnị ẹtẹ da?

⁹ Ẹnịnị vee tụ́ ohi ịjị ọnọọ ka, agụvị ka waa hụrị ụvọ ịrẹyị ẹwụrị ọnị, Ohomorihi awụ nịnị dudu dọ beri nịnị yọ nị. Wa naa hẹkẹ ori nịnị, dị waa kụụ yị wa nịnị nị.

Ịrẹyị ọnị Ijeremaya kà ịnị ịpa ọnọrụ anaa hị́ Ijowahazi

¹⁰ Ijeremaya ka, ẹwụ nịnị Anijuda, asị ụ hụ agụvị ohinọyị Ijosaya jị òrèrè nịnị o. Asị ụ zị ẹngụ anị nịnị oo su. Ama waa jị òrèrè nịnị ẹtẹẹtẹrẹ agụvị ozi anị ana aa hị́ Ijowahazi. Aa vaa sị ọ hụrị ẹkụra ọnọnị ana a ma a tụ. Ẹ́ ma vana vavẹ va si eyi re e.

¹¹ Ẹnẹyịmavara kà, Ijowahazi ozi Ijosaya ana dọ ada anị ịrẹsụ aa mẹ ohinọyị Ijuda, dị a va za a hụụ ịzẹnị aanị; ẹ́ ma vana vavẹ.

¹² Ẹkụra ana a za a nọ avọọ, o vee su tu nị, ẹ́ ma vana sị eyi re ẹkụra ọnọnị.

Ịrẹyị ọnị Ijeremaya kà ịnị ịpa ọnọrụ anaa hị́ Ijehoyakimi.

¹³ Ọza ana mẹ ọzaa rị dị ọ sị dà irehi, ọ sị da. Ọza ana mẹ ọza irikichi dị aa sịị dàa tụra irehi anị, ọ́ sị da. Ọza anaa zá ọnọhụva ka, ọọ mẹ̀ ụkọrọ ọọhẹ yị ọnị, dị e yi si wa ụta, ọ sị da.

¹⁴ Ọza ana ka ọnị aa dà irehi ọtụrọsa ana nyị akụ ọgana-ọgana yị ẹngụ anị, ọ sị da. Ịzẹyịza, ộ kụ ozokete hi ini eehi anị. Ộ tụ ọchị isida ku ọ, dị o ku ọ ọda ovivi nị.

¹⁵ Irehi ọnị ụ sị isida dà, dị o zoza huni irehi aza ana vọ aanị wáá zụ mẹ ka we huna ohinọyị ana vọ nị? Ada awụ ộ mẹ̀ ẹhẹ ẹtẹẹtẹrẹ, ọọ̄ mẹ̀ ịzẹyịza, dị ọ rẹẹ ngụ ayị ọza nị. Ô zee yọ ịnị avaba ịsa ọnị ọ mẹ.

¹⁶ Ộ ngụ ayị onosiye nịnị, dị ẹhẹ anị zoza yọ nị. Ịsị ẹ sịị zụ ka ọza ọ yẹ Ẹnẹyịmavara ọ vị ọnọọ nị.

¹⁷ Ẹnẹyịmavara kà ama ịrẹyị ẹngụ awụ kẹnẹ ọọ jị ụ areyi nị. Waa wụ̀ aza ẹnẹ ẹ yị nyị sị ẹ mẹ; dị waa sị ụkata-ụkata mẹ ẹvaya ya aza wụ nị.

¹⁸ Avọọ, Ẹnẹyịmavara kà, Ijehoyakimi, ozi Ijosaya, ana vị ohinọyị Ijuda aanị: Aza e yi vee sụ ùnè anị ịhị oo su ka, kwaa-kwaa; ọta amị o! Ọza ẹ yị vaa hụvị anịị jị òrèrè ka, Inda o! ohinọyị amị o!

¹⁹ Ọ kà, vị a vaa mẹ oku anị a mẹẹ mẹ oku ịkẹrịkẹtẹ avọọ nị. Vi e vee tụra oku anị ẹtẹ dị e ne e na tụ ịrẹma Ijerusarẹmị nị.

Ịsị Ijeremaya ka o vee tu Ijerusarẹmị.

²⁰ Ijeremaya ka, ẹwụ nịnị Anijerusarẹmị, nọ Ịrẹbanọnị nịnị dị we nee nowu, nọ ẹtẹ Ịbasanị dị waa jị òrèrè nịnị. Yà ịnị ataba Imowabi dị wee nowu booro-booro nịnị, agụvị ka asị avaba aza ẹnẹ ẹwụrị sì ịrẹyị ẹngụ nịnị hu ẹtẹ.

²¹ Ụmẹ ọnị o si zee yi wụ nịnị, Ẹnẹyịmavara ộ kà ịrẹyịị ụ, ama ụ ka wẹ yị wụ nịnị. Avọọ ụ mẹ mẹ nịnị ụ́ mẹ hụrẹ vẹ ẹhẹ nịnị nị. Wẹ́ ma saasa ịrẹyị Ẹnẹyịmavara nịnị.

²² Ọdọvịdị awụ nịnị vana ahị vaa kụụ kwooze. Aza ẹnẹ ẹwụrịị sì ịrẹyị ẹngụ nịnị vana vaa za ọrịhị eyi ịrẹkụ. Ẹkụra awụ nịnị vana vaa mẹ ụhịị nyị di ụhị aa nyị ụ nịnị agụvị ebira odivi ọnị ụ mẹ nịnị.

²³ Oo zoza ụ mẹ hi ịnị irehi ọyịza-ọyịza ana a sị ọchị isida Ịrẹbanọnị mẹ ọvị nịnị aanị, ama e yi vee kù di waa jị òrèrè, di wee rimanya nịnị anka ọnyẹnẹẹ ana barẹẹ mee rimanya avọọ.

Ọkarẹyị Ohomorihi yị Ijehoyakimi

²⁴ Â nyị ohinọyị ọnya ana aā hị́ Ijehoyakimi, ozi Ijehoyakimi ana vị ohinọyị Ijuda ọ vị nị. Ẹnẹyịmavara ộ kà a yọ ka, ọnị Ohomorihi ana yara ọ̀ọ yị yà ịzọọ, àa da ka vị ọnị ọ̀ vị ochirigege ọnị ọnị sị tụ ụvọ nị, ọnị vaa tụ ọ kwooze.

²⁵ Ọ kà ọnị vaa sị ọ chire aza enee si o usu, ọnị ọ́ vavọọ ee hí angwa anị avọọ ụvọ. Ọnị vaa sị ọ chire Inebukadineza, ohinọyị Ịbabịrọnị ọnịrị isoja anị nịnị ụvọ.

²⁶ Ẹnẹyịmavara kà ọnị vaa sị ụkata-ụkata dụ ọnịrị ọnya anị nee hi ẹkụra ọsa ịzị ọza ẹ yị ma wa tụ, dị ẹnịnị su tụ ịzọọ.

²⁷ Ọ kà a vanaa vụva ka ẹnị ẹ̀ vavẹ ẹkụra ẹnịnị ọnọnị, ama ẹnịnị ẹ ị ma vana zụ vavẹ.

²⁸ Ijeremaya ka, vị ohinọyị Ijehoyakimi kụkụ sị ya anka ụnọkọ ana sị chaka ẹnẹ ẹ̀ yị nyị ọza ene kuku ee sị̀, dụ ọnịrị ezi anị ne hi ẹkụra ẹnẹ ẹnịnị ẹ̀ yị vị dị yẹ́?

²⁹ Tee! ẹwụ nịnị anẹkụra, ẹwụ nịnị anẹkụra! Wụ́ ịrẹyị ọnị Ẹnẹyịmavara kà nịnị.

³⁰ Ẹnẹyịmavara kà ọnị ọ sị ọkarẹyị mẹ yị ọnọrụ ọnọnị ka avaba ezi anị vaa jị ọ ụvọ. E yị vee zee yọ. Ẹ yị nyị ịpa anị ana vanaa yaatụ ịrẹsụ aga ohinọyị Idevidi ọ̀ yị mẹ ohinọyị ẹtẹ Ijuda paa.