Ijeremaya 21 - IWE ỌNỊNỊ

Ẹnẹyịmavara kà e vee hú Ijerusarẹmị ẹtẹ

¹ Â nyị ohinọyị Ijuda ọnyaa ana aā hị́ Ịzẹdẹkaya. Ẹkụhị ọnya dị ọ́ tụ ọnọrụ ana aā hị́ Ipasihuri ana vị ozi Imikaya ọnịrị Ịzẹhwanaya ozi Imaseya ne tu Ijeremaya nị. Ịzẹhwanaya vị ohirẹsụ irehi Ohomorihi.

² Ẹnịnị ê ne tu Ijeremaya dị ẹ́ ka, aarịhịnị, ò pe ẹnị pe Ẹnẹyịmavara kà ịrẹyị agụvị ka Inebukadineza ohinọyị Ịbabịrọnị ọnịrị Isoja anị ẹ́ raa kụ ịrẹkụ ee vee tu Ijerusarẹmị. Ẹ ka ẹyịyara, Ẹnẹyịmavara vaa mẹ ịvọpa yị ẹnị dị ọ dụ Inebukadineza varẹma.

³ Dị Ijeremaya kà a yị aza ana tụ ve tu ọ ka, Ẹnẹyịmavara kà

⁴ ẹ̀ na kà a yị Ịzẹdẹkaya ka Ẹnẹyịmavara, Ohomorihi Anisirẹrị ka, ọnị vaa và ẹnya ịrẹkụ ana yà ịnị ụvọ Ịzẹdẹkaya eyii kà a, ẹnya ịrẹkụ enee sii pe ohinọyị Ịbabịrọnị ọnịrị aza anịị kụ ịrẹkụ avọọ. Ọnị vaa kụ wa gụ ịnị akakana Ijerusarẹmị.

⁵ Ẹnẹyịmavara kà ọnị vaa sị ọyịkụ-ọyịkụ sị avaba ụkata anị pe Ịzẹdẹkayaa zyaazị.

⁶ Ọ kà, ọnị vaa avaba aza ene hi Ijerusarẹmị; aza ẹnịrị ịsụpa vị ọnị ụkụ odivi vaa wụ̀ ha.

⁷ Ọ kà ama Ịzẹdẹkaya, ọdọvịdị ẹkụra anị nịnị, ọnịrị aza ana vọ ịrẹma ịrẹkụ, ụngwẹ ọnịrị ụkụ ọnọọ, vị ọnị ọnị vaa hụrẹ ụvọ yị Inebukadineza ọnịrị ọnịvị ẹnịnị enee si wa isu. Ẹnẹyịmavara kà Inebukadineza vaa wụ̀ wa, ọza ịnyara ẹ yị yaa vọ. Ẹ yị vaa vayị ẹnịnị vụrụ-vụrụ.

⁸ Ẹnẹyịmavara ộ kà a yị Ijeremaya ka ọ̀ kà a yị Anijerusarẹmị nịnị ka, ẹ̀ sị ụtọ pe ẹtẹ! Ọnị ọ sị oze yị wa ka ẹ̀ nyị ọnyara ịnị oze ẹẹva ọnọnị: Oze anaa sị ọzaa yara ọnịrị oze iswọọza.

⁹ Ọza ana aa sị ahụ vaka ẹtẹ tu Ijerusarẹmị vị ọnị ịrẹkụ vaa rị; ẹ̀ yị vavọọ dị ụngwẹ à vị ụkụ wụ ọ. Ama ọza tụra ọza ana aa jịnẹ tụ ẹhẹ di ọ́ hụrẹ ẹngụ anịị ụvọ hẹẹ yị Anibabironi enee pe wa kụ ịrẹkụ booro aanị nị, e yi vee su.

¹⁰ Ẹnẹyịmavara kà ọnị ọ́ sị ọ ka ka ẹkụra ọnọnị vị ọnị ọnị è vú ẹtẹ, ẹ yị yaa vọ. Ọ kà vị ọnị vaa hụrẹ Ijerusarẹmị ụvọ yị ohinọyị Ịbabịrọnị dị ọ rị ọ ịra nị.

¹¹ Ẹnẹyịmavara kà Ijeremaya ọ̀ ka ẹ yị avaba aza ohinọyị Ijuda ana vị evere Idevidi ka

¹² ẹ̀ wụ́ ịrẹyị ọnị Ẹnẹyịmavara aa ka: Re ka waa mẹ ịzẹyịza nịnị eyinị-eyinị. Ọza ọnị ọza aa mẹẹ rị ụ dọ ọ hụrẹ ọza ana mẹẹ rị ụvọ nịnị. Ẹ̀ yị vavọọ ebira odivi awụ nịnị vaa mẹ ka ọnị ọ̀ kụ ayị hi u nịnị anka ịra anaa zá dị ọza e yi zụ mi ọ avọọ.

¹³ Ẹnẹyịmavara kà, ọnị vaa va eyi ịrazịị ka Ijerusarẹmị enee wo oto ka, ẹnị ẹ sị ha, ẹ yị nyị ịsị ẹ kụkụ zụ kanyị ẹnị agụvị ataba ana kara ẹnị aanị.

¹⁴ Ọnị vaa sị ụyaa rị wa agụvị ebira odivi ẹnẹ ẹ mẹ. Ọ kà ọnị vaa jị ịra da irehi ohinọyị ẹnịnị dị ọọ rị avaba ịsa ana kara wa ịra.