Ijeremaya 20 - IWE ỌNỊNỊ

 kụ́ ẹba hi Ijeremaya ahụ

¹ Â nyị ọnọrụ ọnya ana aā hị́ Ipasihuri. Ohirẹsụ Irehi Ohomorihi ọ vị nị. Ịrẹha ada anị ọ rị Ime nị. Ipasihuri ọnọnị ọ vị ohirẹsụ ọgọọga ene hi ini Irehi Ohomorihi nị. Ijeremaya ka ịjị ọ́ wụ́ ka ọnị ộ maanị kà ịrẹyị ọnị Ẹnẹyịmavara kà aanị,

² dị ọ kà a yị aza ka è tụ́ ọnị, dị à kụ́ ẹba hi ọnị ahụ tụ oze eyi ẹbẹẹba ana a zị ngụ ịnị irehi Ohomorihi nị. Eyi ọnọọ aā hị́ oze Ịbẹnjamịnị nị.

³ Ijeremaya ka, ẹnẹnẹ eyinẹhẹ anị, Ipasihuri mẹ raa hụrẹ ọnị ụvọ, dị ọnị kà a yọ ka, ẹ́ yị vị Ẹnẹyịmavara ọ sị ịrẹha yọ ka ọnị ọ rị Ipasihuri. Ịrẹha ọnị ọ sị yọ ọ vị ochire ọza angwa avaba aha nị.

⁴ Ka, Ẹnẹyịmavara kà ọnị vaa mẹ ka Ipasihuri ọnị ụvọta òo chire ẹngụ anị angwa, dị ee chire avaba ọta anị angwa bẹẹ. Ọ kà eyi Ipasihuri goro-goro ọnịvị ẹnịnị vaa wụ̀ ọta anị ha nị. Ẹnẹyịmavara kà ọnị vaa sị avaba Anijudaa chire ohinọyị Ibabironii ụvọ, dị ọ za wa ọrịhị ne hi Ịbabịrọnị. Ẹnịnị vị ọnị ọ́ vaa wụ̀.

⁵ Ẹnẹyịmavara kà ọnị vaa sị avaba ogu Ijuda ọnịrị ịsa anaa mẹ ịnị anịị chire ọnịvị ẹnịnịị ụvọ ka ẹ̀ kụ ọ. Ọ kà avaba ịsa ene e sì ịrẹyị anị hu kere-kere ọnịrị avaba ogu ohinọyị ẹnịnị vị ọnị ọnị ve sii chire ọnịvị ẹnịnịị ụvọ. Ọnịvị ẹnịnị vaa kụ ogu ẹnịnị nee hi Ịbabịrọnị.

⁶ Ọ kà àa vị ẹwụ Ipasihuri yọ, ẹwụrị avaba aza awụ vana vaa za ọrịhị nee hi Ịbabịrọnị bẹẹ. Ẹwụrị avaba ọta awụ ẹnẹ ẹwụrị cheeche ka vị Ohomorihi tụ wụ nịnị ụtụ avọọ vene vee sú tụ ịzọọ.

Ijeremaya ô du kà ịrẹyị yị Ẹnẹyịmavara

⁷ Ijeremaya ka, tee! Ẹnẹyịmavara, ọ sị ọnị vene ọ, ọ ka, Ẹnẹyịmavara ọ nyị ụkata hu ọnị nị, ọ́ raa nyị ẹbẹẹba anị. Dị avaba ọza kụkụ ee nyi ọnị unyi eyinị-eyinị nị.

⁸ Ọ kà ụmẹ tụra ụmẹ ọnị ọnị aa kà ịrẹyị vị ọnị ọnịị na owu ka, ezigi aa vẹ! Ee vee vú ẹnị ẹtẹ. Ọ kà, vị Ẹnẹyịmavara, waa kụkụ aa sị eyi wo nị dị aa mẹ̀ ọnị isiya pooro kẹnẹ, agụvị ka ọnị aa kà ụtụ ọnị ụ tụ ọnị nị?

⁹ Ọnị ọ̀ọ va kà a ka ọnị aa sị ayị hụụnị ịrẹyị Ẹnẹyịmavara dị asị ọnị kụkụ ka a ịrẹyị anị, dị ịrẹyị anị aa rị ọnị ayị anka ịra avọọ. Ọnị ộ sị vụrị ka asị ọnị kà a ama ọnị ẹ yị zụ za a.

¹⁰ Ijeremaya ka ọnị aa wụ́ aza maa kà a chire ẹngụ ụtọ ka: Avaba aha vị ayịhụrịnẹ-ayịhụrịnẹ! avọọ, à jẹẹ ẹnị ẹ̀ sị ịrẹyị anị na tụ ọdọvịdị nịnị ịrẹka. Ọta anị nịnị bẹẹ vị enee zí ka ọnị ọ̀ sẹ ẹdụ. Ẹ ka, ẹyịyara, e vee zuu vene ọnị, dị ẹnị ẹ̀ zá ọnị. Ẹnị ẹ̀ẹ zá ọnị, dị ẹnị họ̀ oponu ịrẹyị ẹngụ ẹnịnị.

¹¹ Ijeremaya ka ama, Ẹnẹyịmavara ana nyị ụkata jẹẹ pe ọnị, avọọ aza anaa sị ụyaa rị ọnị e yi vee ree mẹ. Ụhị ọ vaa nyị wa nị. Ụhị ana vaa nyị wa ẹ yị vaa ta ọza eyi pàá.

¹² Ama Ẹnẹyịmavara Ochẹtẹẹngụ, ẹwụ aa sị ịzẹyịzaa zama azaa re nị. Waa yẹ ịsị ẹ yà ịnị ayị aza, ọ ka, Ẹnẹyịmavara ọ̀ navọ ọnị o re ịjị aa họ̀ oponu ịrẹsụ ọnịvị anị nịnị.

¹³ Waa jị ahẹ gono Ẹnẹyịmavara nịnị. Wee gono O nịnị. Ọza ana aza edivi aa sị ụyaa rị vị ọnị ọọ dọ ọ ha.

¹⁴ Ijeremaya ka, oo du ẹkụhị ana a sị ma ọnịị kù ọza ẹ yị ma vana tamayị ẹkụhị ọnị ọnyị anị sị ma ọnị.

¹⁵ Oo du ọza ana va kà ụtụ yị ada anị ka ọ́ sị ozi ọnọrụ maa kù.

¹⁶ Ọza ọnọọ ọ̀ va sị mẹẹ anka ẹkụra ọnị Ẹnẹyịmavara ẹ yị vayị anị dị o vu ọ ẹtẹ avọọ. Ọza ọnọọ vana vaa jị òrèrè ẹnẹnẹ-ẹnẹnẹ pooro. Ọọdụ vị ọnị vaa wụ̀ ka aza ee na owu ịrẹkụ.

¹⁷ Ọ kà, aayẹ, Ẹnẹyịmavara ọ̀ vana wụ ọnị tụ ọnyị anị ịnẹ, dị asị á vana ma ọnị vẹ ẹhẹ vụrụ-vụrụ.

¹⁸ Ọ kà sị a vana ma ọnị vẹ ẹhẹ ve si da? Váá ma ọnị vẹ ẹhẹ ka ọnị ọ̀ maanị vee re ẹngụkata ọnịrị ayodu, dị ọnị ọ̀ sị ụhị za ẹhẹ anị ẹtẹ nị?