Ijeremaya 2 - IWE ỌNỊNỊ

Ẹnẹyịmavara ộ tẹsị Anisirẹrị

¹ Ijeremaya ka Ẹnẹyịmavara ộ tụ ọnị ka,

² ọnị ọ̀ na kà a yị Anijerusarẹmị nịnị ka ọnị ộ tamayị ẹnịnị mẹmẹ kụ ẹngụ hi ịrẹyị anị ịyẹẹyẹ anka ọnẹẹ ana sẹsẹ va ọnọrụ avọọ, ọnị ộ tamayị, ẹnịnị mẹmẹ saasa ọnị ịnị ụnọmị ọnị ọza ẹ yị da aarẹ tụ da.

³ Ẹnẹyịmavara kà Anisirẹrị vị aza ọnị ọnị nyị tụ irenyi yị ẹngụ anị. Avaba aza ana kwọ kata wa ẹngụ vị ọnị ọnị sị ụya rị, dị ọnị kụ ẹngụkata odivi tu wa.

Ịvị ọnị ohiku Anisirẹrị nịnị mẹ̀

⁴ Wụ ịrẹyị ọnị Ẹnẹyịmavara aa ka nịnị, avaba ẹwụ nịnị evere Ijekọvụ ana vị Anisirẹrị.

⁵ Ẹnẹyịmavara kà: Sị ẹ vị akụvị anị ọnị ohiku awụ nịnị re ẹnẹ ẹnịnị sị re ọnị zwe? Ẹnịnị ẹ naa hẹkẹ ịsa kẹnẹ-kẹnẹ, dị ẹnị ụvọta ẹnị rẹ kụkụ vị aza kẹnẹ-kẹnẹ nị.

⁶ Ẹnẹyịmavara kà ọnị ọ kụ ụ nịnị hụrị ẹtẹ Ijipiti dị ọnị kụ ụ nịnị zị oze ịnị ẹtẹ ọpaapara nị: Ụnọmị ọnọọ vị ẹtẹ aarẹ-aarẹ ọnị orihi ẹ yị ma hụra zụ ịnị anị, ẹtẹ ọyị wụ ene divi ẹtẹẹtẹrẹ ọ vị nị. Ọza ẹ́ yị ma ra ịnị anị, ẹ́ yị nyị ọza anaa dọ ka ọnị ọ zị avọọ jịnẹ. Ama ayị anị o ve hi ụ nịnị.

⁷ Ọ kà ọnị ộ kụ ụ nịnị ve hi ịnị ẹtẹ ọyịza-ọyịza ka wa va rị ẹtụtụ ọnịrị ịsa ozoza-ozoza ene hi ịzọọ. Ama ịjị ụ tù ịzọọ nịnị wa sị ẹtẹ ọnọọ du ha nịnị. Ẹkụra ọnị ọnị sị yị wụ nịnị we si o du ẹngụ nịnị.

⁸ Ẹnị ohirẹsụ irehi Ohomorihi ẹ yị kụkụ họ̀ use ka Ẹnẹyịmavara mẹ kà kẹ. Ẹnẹyịmavara kà ẹnị ohirẹsụ irehi anị ẹ yị kụkụ yẹ ọnị, Ẹnị ohinọyị ẹnịnị ệ kụ hịrẹ ọnị; ọnịsẹ nịnị kụkụ â sị ịrẹha ori anaā hị́ Ịbaarị kà ịrẹyị, dị ẹyaa hẹkẹ ori ịyẹyẹ-ịyẹyẹ nị.

⁹ Ẹnẹyịmavara kà agụvị avọọ, ọnị vee pe aza anị ọnịrị evere ẹnịnị zyaazị.

¹⁰ Ọ kà ẹnịnị ẹ nọ ẹtẹ Ịsayịpụrọsị ọnị enyi jị kara dị è ne re. Ẹyị vị avọọ ẹ tụ aza nọ ẹtẹ Ikeda dị ẹ tangwa na zama a re, èe ve re ka aa nyị ịzị ẹngụ ịrẹyị ọnọnị yà mẹ da.

¹¹ Ọ kà áá nyị anẹkụra ana ka a ka ẹnị ẹ yị kụkụ yẹ ori ẹnịnị da, ọọ daka vị ka ẹ yị nyị ịsị ori ẹnẹẹ vị? Ama aza anị ẹ raa sị ọnị ana mẹ ka a sị ụbanyị wa na dọ ori ẹnẹ ẹ yị nyị ịsị ẹ zụ mẹ yị wa.

¹² Ẹnẹyịmavara kà, agụvị avọọ ọnị ka ịrẹyị ọnọnị ọ̀ za avaba ịsị e hị́ ẹbẹẹba zizi nị. Ịrẹyị ọnọnị òo hi wa eyi, dị o re hi wa irenu,

¹³ ka aza anị ẹ raa mẹ̀ ebira odivi oze ẹẹva: Ọ kà ẹnịnị ẹ raa và ịrẹma anị, ọnị ana vị oswe enyi anaā sịị ẹngụ ọzaa hunẹnẹ, dị ẹnịnị na chị́ ịkangga ana ahịka ka ẹnịnị ẹ yị zụ re enyi da hụụnị anị vụrụ-vụrụ yị ẹngụ ẹnịnị nị.

Ịsị ẹ jịnẹ hụụnị arịmamẹ ịzẹyịza Anisirẹrị nịnị vẹ

¹⁴ Ẹnẹyịmavara kà Anisirẹrị ẹ yị vị ọrịhị; ọza ẹ yị ma a ọrịhị. Sị ẹ vẹ dị ọnịvị anị nịnị va maanị ngụ ọ chire ẹtẹ?

¹⁵ Ọnịvị Anisirẹrị nịnị aa hàa hi wa anka idu avọọ, ẹ kụ aza dụ hụrị ẹtẹ Isirẹrị, dị ẹkụra ẹnịnị sị jị eburu nị. Aza ẹ sị hụ́ hụụnị anị bemi-bemi.

¹⁶ Anẹkụra anaā hị́ Imemuhweri ọnịrị Itapanihesi ẹ sị ịsa ana Anisirẹrị nịnị aa sịị mẹ ụbanyị gara ha.

¹⁷ Ẹnẹyịmavara kà, Anisirẹrị, ẹwụ nịnị ọ kụ ọsọnị tu ẹngụ awụ nịnị nọ. Ka vị ọnị Ẹnẹyịmavara ana vị Ohomorihi awụ nịnị aa zụ ụ nịnị oze dị ụ vana và hụrị ọnị ịrẹma nịnị kẹnẹ nị.

¹⁸ Ọ kà, ọgụ sị ụ va rị nịnị ịnị enyi ịnị irehu Ịnayịrị ọnị ụ nọ Ijipiti ne hú nịnị booro aanị? Ọgụ sị ụ rị nịnị ịnị enyi ịnị irehu Iyuhwireti ọnị ụ nị Asiriya ne hú nịnị?

¹⁹ Ẹnẹyịmavara Ochẹtẹẹngụ ka ọnị ọ sị ọ ka: Ebira odivi awụ nịnị ọ vaa sị ụya rị ụ nịnị nị. Ụ vee vú ẹtẹ nịnị agụvị ka waa và ịrẹma anị nịnị nị. Ụ vee re ịsị aa hị́ ụya nịnị, dị wa yẹ́ nịnị ka ẹ yị zoza ka we yị Ẹnẹyịmavara ana vị Ohomorihi awụ nịnị tịtẹ, dị à sị ụ kụkụ nyị angwahi anị nịnị.

²⁰ Ẹnẹyịmavara ene hu kere-kere ka, Anisirẹrị, o si ku ọnị ụ hụrẹ ka a sị mị kụkụ mẹ ọda tụra wụ nịnị, Ụ ka wẹ yị kụkụ saasa ịrẹyị amị nịnị, dị ụ wẹ̀ yị rẹ kụkụ hẹkẹ mị nịnị nị. Dị ụ naa hẹkẹ ori nịnị ịrẹsụ avaba ataba ọnịrị avaba iruvo ọchị ohwoohu nịnị nị.

²¹ Maa nyị ụ nịnị jẹẹ anka ọza ana sị uhu ịvayịnị ene hu kere-kere dị o chire tu irenyi avọọ. Ama wee re ịsị ụ kụkụ vị nịnị booro aanị? Vị ụ kụkụ sị mẹ nịnị anka ịvayịnị ana vụ, dị ẹ̀ yị nyị ịsị ọ kụkụ rụra mẹ avọọ nị.

²² Ẹnẹyịmavara Ohomorihi ka ẹnịnị ẹ̀ẹ daka sị ụkwọ ene zoza hu kere-kere dị ẹ sị hụ enyi nị, vị ọnị ọnị ee yii re ịdọtị ebira odivi ẹnịnị.

²³ Ọ kà ẹnịnị ẹ́ẹ́ zụ ka a ka ẹnị ẹ yị sị ẹngụ ẹnịnị du ẹngụ aanị, ẹ́ẹ́ zụ ka a ka ẹnị ẹ yị mẹ̀ ori anaā hị́ Ịbaarị? Ọ kà ẹnịnị è re ịsị ẹnẹ raa mẹ, di è re ẹ mẹmẹ mẹ ịvị. Ọ kà vị ẹnịnị sị mẹẹ anka ịnyaakụmị ọnẹẹ enee si ka ọnị ọ̀ tụra di ee zwee zị,

²⁴ dị o zwe aa na ngụ ịnị ụnọmị avọọ nị. Ẹnẹ zụ zụ ọ oze ịjị ịrẹyị ara ọọ vavọọ sị há hịrẹ ẹ ẹngụ. Araka enee si ọ, asị ọ́ tụ ẹngụ anị akanya, òo si tu ụmẹ ẹnẹ sịị̄ gẹ o vee re e.

²⁵ Ọ kà, ẹwụ nịnị Anisirẹrị, sị ẹ vẹ dị wẹ yị dọ ka waa va hụụnị ori ọnị wa dụụ zị dị ụ ta mẹ sẹkẹ-sẹkẹ nịnị aanị? Ama ẹwụ nịnị ka, asị mị du irenu amị ha, agụvị ka vị ụ nyayịnẹ sì ịrẹyị ori ẹnẹnị nịnị nị. Ori ẹnẹnị vị ịsị ọzọga yị ụ nịnị. Ama ụ ka wẹ yị kụkụ zụ hụrẹ wa ụvọ nịnị.

²⁶ Ẹnẹyịmavara kà ụhị mee nyị oyi àa sị ọ za avọọ, avọọ ụhị mẹ vaa nyị avaba Anisirẹrị nịnị ẹnịrị ohinọyị ẹnịnị, ọdọvịdị ẹnịnị, ẹnị ohirẹsụ irehi Ohomorihi beri ẹnị ọnịsẹ ẹnịnị nị.

²⁷ Ụhị ọ vaa nyị ẹwụ nịnị ana a kà ọchị ọ va ada awụ nịnị, dị ịrẹta vị ọnyị awụ nịnị nị. Ọ kà aanị ọ mẹ vaa yaa wụ nịnị nị, agụvị ka wa sị ịrẹma và ka ọnị nịnị, we yị và eyi ka ọnị nịnị. Ama ịjị ẹngụkata ọọ ka wụ nịnị vẹ dị ụ ka ọnị ọ̀ kwẹẹtẹ dị ọnị ọ̀ dọ wụ nịnị tụ.

²⁸ Ama ịzị ori ọnị ụ mẹ yị ẹngụ awụ nịnị hi? Jẹẹ ẹ̀ kwẹẹtẹ kẹ, ẹnịnị ẹẹ zụ dọ wu nịnị tụ ịnị ụmẹ ẹngụkata awụ nịnị; ka ẹwụ nịnị Anijuda, ẹkụra awụ nịnị mẹ rụrụ, avọọ ori awụ nịnị mẹ rụrụ nị.

²⁹ Ẹnẹyịmavara kà, sị ẹ vẹ dị wa a rị uhuhu hi mi nịnị? Avaba awụ ọ ra a kụ hịrẹ mị nịnị.

³⁰ Ọ kà, ọnị ộ sị ụya rị ụ nịnị ama ọọhẹ kẹnẹ ọ vị nị, wẹ yị zẹ ka ọnị ọ vọrọ ụ nịnị zị oze wa sị ọnịsẹ awụ nịnị wụ̀ va ha anka idu anaa nyị ọyịkụ odivi avọọ.

³¹ Ẹnẹyịmavara kà ẹwụ nịnị Anisirẹrị ọ̀ wụ́ ịrẹyị anị: Vị ọnị wa sị vara ụnọmị yị wụ nịnị nị? Vị ọnị wa sị vara ẹtẹ ọnị ịrahụ ruma-ruma za yị wụ nịnị nị? Sị ẹ vẹ di ụ va ka ịsị e zee wu nịnị eyi kẹnẹ ụ kụkụ aa mẹ nịnị nị? Dị ụ ka wẹ yị ma vana và ka ọnị vẹ nịnị?

³² Ozwoorihi óó zụ hi ayị ẹnya ọvị anị kẹ? Ọnẹẹ anaa va ọnọrụ oo zụ hi ayị ịta anaa kụ hi ẹngụ ịhị anaa va ọnọrụ? Ama o si kù ọnị aza anị hụrẹ hi ayị anị.

³³ Waa yẹ ọbọ irenyi-irenyi o yi sì aza ọnị ụ sì ịrẹyị anị nịnị, ọsẹrẹka ene divi hu kere-kere ee tu ịdị awụ nịnị vị ẹ yaa kọsẹ nị.

³⁴ Anya aza anaa rị ụya ọnịrị aza ẹnẹ ẹ̀ yị nyị ịsị ẹ mẹ̀ e si che ku u nịnị ịta. Wẹ yị za wa ka ẹ yaa chaka oze ọyị ngụ ụ nịnị irehi. Waa maanị yị mẹ avaba ẹsẹnị,

³⁵ dị waa yị ka nịnị ka ẹ yị nyị ịsị ụ mẹ nịnị nị. Waa kà a nịnị ka ịzẹyịza, Ẹnẹyịmavara ẹ yị kụkụ kụ ayị hi u. Ama ọnị, Ẹnẹyịmavara vaa sị ụya rị ụ nịnị agụvị ka waa kà a nịnị ka wẹ yị mẹ̀ ebira odivi nịnị.

³⁶ Wa sị ẹngụ awụ nịnị vara ọnịyẹyẹ ụ maa ngụ ori zịịzị nịnị hụrị ẹkụra ẹnyị naa ngụ ọsa. Anijipiti vị ana vaa mẹ̀ ụhị nyị ụ nịnị anka Anasiriya mẹ mẹ̀ ụhị nyị ụ nịnị avọọ.

³⁷ Ụhị-ụhị ụ vaa sị hụrẹ Ijipiti nịnị. Ẹnẹyịmavara kà aza ọnị ụ sị ayị tụra nịnị avọọ vị ọnị ọnị yi tịtẹ. Ẹ yị nyị ọgụ ịsị ụ vaa rị hụụnị ụvọ ẹnịnị.