Ijeremaya 18 - IWE ỌNỊNỊ

Ịrẹyị ọza anaa jị ụnọkọ

¹ Ẹnẹyịmavara ộ kà a yị Ijeremaya ka,

² Ọ̀ kwẹẹtẹ dị ọ̀ nọ ịnị eehi ọza anaā jị ụnọkọ. Ọ̀ ka, òo tu ịzọọ, ọnị vee pe e kà ịrẹyị.

³ Ijeremaya ka ịzẹyịza dị ọnị na ịzọọ dị ọnị ne tu ka, ọza anaā jị ụnọkọ aanị aa sị ịsị ọ sị jị ụnọkọ ọ jị ụnọkọ nị.

⁴ Ụmẹ tụra ụmẹ ọnị ụnọkọ ana aa jị ẹ yị mẹ ẹtẹẹrẹ, dị ọ rẹ sị ụmọpa anị dị ọ rẹ sị jị ịsa ọsa

⁵ Dị Ẹnẹyịmavara va ka yị ọnị ka,

⁶ Ọnị oo rò ka ọnị Ẹnẹyịmavara ẹ yị nyị ụkata ọ̀ yị mẹ ẹnị Anisirẹrị ịsị ọza anaa jị ụnọkọ aanị mẹ ụmọpa ọnọnị aanị? Ọ kà ụmọpa mẹ yà ịnị ụvọ ọza anaa jị ụnọkọ aanị, avọọ ẹnị mẹ yà ịnị ụvọ anị nị.

⁷ Ẹnẹyịmavara kà, àa nyị ụmẹ ọnyọọnyị ọnị ọnị kà a ka ọnị vee hu aza ẹnyẹẹnyị àa vị ohinọyị nịnị hụrị ẹtẹ, dị ọnị ka ọnị aa gara wa ha, dị ọnị ò vu wa ẹtẹ nị.

⁸ Aza ẹnẹẹ ẹ̀ẹ va hụụnị ịsị odivi ẹnịnị, ọnị rẹ vaa và a hụụnị ịsị ọnị ka ọnị vaa mẹ wa.

⁹ Ama ọnị ọ̀ọ kà a ka ọnị vaa nyị aza àa vị ohinọyị nịnịị jẹ dị ọnị ọ̀ vara wa aza ọkụmị-ọkụmị,

¹⁰ dị Aza ẹnẹẹ ẹ̀ẹ sị ahụ jịnẹ ọda anị dị ẹ kụkụ aa mẹ̀ ebira odivi nị, ọnị vaa vàa hụụnị ịsị ọnị ka ọnị aa mẹ̀ ẹ yị wa.

¹¹ Ẹnẹyịmavara kà, agụvị avọọ, booro aanị, Ijeremaya ọ kà a yị Anijuda ọnịrị Anijerusarẹmị nịnị ka, ọnị ọ́ sị nyima aa mẹ eto ịrẹyị ẹnịnị, ọnị vaa sị ụyaa rị wa. Ọ kà, ọ̀ kà a yị wa ka ẹnịnị ẹ̀ hụụnị ebira odivi-odivi ọ̀ yị mẹ. Ẹ̀ vara oze ẹnịnị ọnịrị ịsị ẹnẹ ẹyaa mẹ.

¹² Ama ẹnịnị vee tụ́ ohi ka, ịzị ọ na vị, sị ẹ vẹ dị ẹnị aa vaa và hụụnị ayọkatẹngụ ọnịrị ebira odivi ẹnịnị?

Aza Ẹnẹyịmavara ẹ́ yị dọ yọ.

¹³ Ẹnẹyịmavara kà, à họ̀ avaba anẹkụra use ka áá nyị ịzị ẹngụ ịrẹyị ọnọnị vịdị mẹ da? Anisirẹrị nịnị ẹ sị ebira odivi hangụ-hangụ mẹ.

¹⁴ Eguhi waa tá hụụ ịrẹsụ ataba Ịrẹbanọnị kẹ? Enyi ohunẹnẹ eneē sìi hụụ ịzọọ wa rẹ ẹ wụ?

¹⁵ Ẹnẹyịmavara kà ama, aza anị e ree hí ayị anị; ẹnịnị vana kụkụ rị eturare ịra yị ori nịnị. Ẹnịnị ẹ raa tụ́ ahụ oze ẹnẹ và tụra. Ẹ́nịnị ẹ yị và tụra oze ịyẹẹyẹ. Ụparị ọnị ọza ẹ yị tọrẹwa ẹ́ kụkụ aa zị nị.

¹⁶ Ẹnịnị ẹ́ raa mẹ ka ẹtẹ ọnọnị oo chire ọza angwa, dị à kụkụụ sị eyi wụ ọ pooro. Ịsị ana aza anaa parahu vee re, vaa za waa zizi. O vee hi wa irenu di e yee zizi ịrẹsụ.

¹⁷ Ẹnẹyịmavara kà ọnị vaa gara aza anị eyi ọnịvị ẹnịnị, anka ahị anaa tụ́ hụrị eyi ọnị ọyị zịị hụrẹẹ vẹ mẹẹ kụ́ edudu avọọ. Ọ kà ịhị ẹngụkata odivi oo tu wa, ọnị vana varẹma kà wa.

 gẹ eyi Ijeremaya

¹⁸ Dị Anijuda nịnị ka, à vẹ dị ẹnị ẹ̀ mẹ Ijeremaya ọnyaa. Ẹnị ẹ̀ẹ mẹ ọnyaa, ohirẹsụ irehi Ohomorihi ị ve hi ẹtẹ ana vaa sị ịrẹyịị zụ ẹnị; aza ana yẹ ịrẹyị hi ẹtẹ ene vee pe ẹnịị jị uwe. Ọnịsẹ nịnị hi ẹtẹ ọnị Ohomorihi vaa yịị tụ́ hi ẹnị. Ẹ ka, à vẹ ẹnị ẹ̀ kwẹẹtẹ tu ọ, dị asị ẹnịnị kụkụ wụ́ ịrẹyị anị.

¹⁹ Ijeremaya ka, agụvị avọọ dị ọnị mẹ̀ aduwa nị ka, Ẹnẹyịmavara ọ̀ navọ ọ̀ wụ́ ịrẹyị anị, dị ọ̀ wụ́ ịrẹyị anị ọnị ọnịvị anị nịnị aa kà.

²⁰ Ọnị ka, áá vọrọ ka aa sị odivii sị́ atọ ọyịza? Ama aza anị ẹ raa chị́ ụsị ka ọnị ò ve horo ngụ ọ. Ẹnẹyịmavara ọ̀ navọ ọ̀ tamayị ọnị mẹmẹ hụvị ẹnịnị va dá ịpẹ yọ, ka asị ọ́ kụ ayị hi wa.

²¹ Ama booro aanị Ẹnẹyịmavara ọ̀ navọ ụngwẹ ọ̀ wụ ezi ẹnịnị và ha; ọ̀ navọ à wụ̀ wa và ha eyi ịrẹkụ. Ẹnẹyịmavara ọ̀ navọ ọ̀ jị anyẹnẹẹ ẹnịnị osoku, dị ezi ẹnịnị ẹ̀ jị wa ụvọ. Ọ̀ navọ ụkụ ọ̀ wụ ọnọrụ ẹnịnị, dị à wụ ezwọọmụha ẹnịnị và ha eyi ịrẹkụ.

²² Ọnị ka asị Ẹnẹyịmavara kà wa ọnọ, dị ọ̀ tụ enezigi nịnị va kụ wa ẹnya irehi. Ọ̀ navọ ọ̀ mẹ ayị hụrẹ wa ịnẹ, dị ẹ̀ jị òrèrè. Ẹnịnị ẹ sị ụsị chị̀ ka ọnị ò ve horo ngụ ọ. Ẹ́ sị ịrẹpa và ee zi ọnị.

²³ Ama Ẹnẹyịmavara waa yẹ́ avaba eyi ẹnẹ yaa gẹ ka à wụ ọnị. Ẹnẹyịmavara, asị ụ vagu wa ịnị ebira odivi ẹnịnị; asị ụ sị eyi hụụnị anị yị wa. Nyị ẹbẹẹba ẹnịnị dị wa gụ wa sẹ ẹdụ. Sị ọyịkụ tana ụvọ za wa o.