Ijeremaya 17 - IWE ỌNỊNỊ

Ebira odivi Anijuda nịnị ọnịrị ụya ẹnẹ ẹ vaa rị

¹ Ẹnẹyịmavara kà, ẹwụ nịnị Anijuda, enyusẹ asị mẹ̀ ịsa asị chẹrẹ ebira odivi awụ nịnị nị, enyusẹ ọkatẹngụ asị chẹrẹ ẹ tụ́ ịnị ayị awụ nịnị ọnịrị ịnị ọgọgọ ụta ịsọvọ awụ nịnị nị.

² Aza awụ nịnị anaa mẹ ahẹkẹ ịzị ụta ọnọọ yà, dị ụ raa nọ iruvo avaba ọchị ọnịrị ịrẹsụ ataba ịzị asị ụmọmọ ori ọnyẹnẹẹ ana aā hị́ Asẹra tụ nịnị nị.

³ Waa nọ ịnị ataba ene hi ịnị akakana ẹkụra naa mẹ ori nịnị. Agụvị avọọ dị Ẹnẹyịmavara kà ọnị vaa mẹ ka ọnịvị awụ nịnị ẹ̀ va kụ́ ogu awụ nịnị ọnịrị ịsa ọkụmị-ọkụmị ọnị ụ nyị nịnị agụvị ebira odivi ọnị waa mẹẹ ngụ ẹkụra awụ nịnịị zị.

⁴ Ọ kà ẹtẹ ọnị sị ụ nịnị vị ọnị ụ vaa hụrẹ ụvọ nịnị, dị ọnị mẹ ka wa naa kụụ yị ọnịvị awụ nịnị ịnị ẹtẹ ọnị wẹ yị yẹ ịsọnyịsọnyị ịnị ịpa anị nịnị, agụvị ka ọnị aa kụ́ ayị vị ọ sị mẹ anka ịra avọọ nị. Vị ọ́ vaa zaa pooro nị.

Ịrẹyị irenyi-irenyi ana a kà.

⁵ Ẹnẹyịmavara kà, ẹ́ yị vee zozaa yị aza ana và ịrẹma anị dị ẹ kụkụ sị ayị tụra ọzarẹyịrẹsụ ọnịrị ụkata ọza.

⁶ Ẹngụ aza ẹnẹẹ vana sị mẹẹ anka avị ana chị tụ ịnị ẹtẹ ọpaapara avọọ. Vị ọ́ sị mẹ anka avị ana yà ịnị ụnọmị avọọ nị. Ẹ́ yị nyị ịsị ọyịza ọnị oo ree sị ụvọọ za.

⁷ Ọ kà, ama, ọnị vaa mẹ ka ò zé yị ọza anaa sị ayị tụra ọnị.

⁸ Ẹngụ ọza ọnọọ vị ene vee hunẹnẹ anka ọchị ene e chire tụ ụtọ okuha dị ọ hà ẹpa na ngụ ịnị enyi avọọ. Ô me hí angwa ka ẹtẹ ọngụra aaa vẹ, agụvị ka avị anị vanaa yịị vị ohwoohu. Ọ́ ma hụrị ayịnẹ ụmẹ ọnị ọyị ọọ jị, agụvị ka vị aa yịị tụ́ ẹtụtụ nị.

⁹ Ẹnẹyịmavara kà, ẹnẹ zụ yẹ́ ayị ọza kẹ? Ẹ́ yị nyị ịsị ee vene ọza anka ayị ọza; oo divi ẹtẹẹtẹrẹ ana ahịka ọza ẹ yị zụ tenyi ọ.

¹⁰ Ẹnẹyịmavara kà, ọnị ịnyara kẹnẹ ọọ gara ayị ọza, dị ọnị zama a re nị. Ebira ọzọza ọnịrị ịsị ọzọza aa mẹ ọọ́ mẹmẹ yà, avọọ ọnị mẹẹ mẹ ẹ hi wa nị.

¹¹ Ijeremaya ka, ọza anaa sị irikichii nyị ẹkẹhị; vị ana sị mẹẹ anka irekwose enee kú ajẹ ẹnẹ ẹ yị vị ọnị ọ tụ́ avọọ. Avaba ogu anị vana vaa taa hi ọ ụvọ ẹhẹ anị ọọ maanị ta jẹẹ yị ọ kẹnẹ. Ọvavẹ ịrẹma anị dị o ne tù ka ọnụra kẹnẹ ọnị vị nị.

¹² Ẹnẹyịmavara, irehi awụ vị ana sị mẹẹ anka aga ohinọyị ana nyị ụbanyị ẹtẹẹtẹrẹ, hụrị ẹtẹẹtẹ á hụrẹ dàa ịrẹsụ ataba ana nẹba nị. Ịzọọ ị yaā hẹkẹ wụ nị.

¹³ Ọ kà, Ẹnẹyịmavara, ẹwụ Anisirẹrị nịnị aa tụra eyi nị ọ. Avaba aza ene yi wu tịtẹ vị ọnị ụhị vaa nyị; ka ẹnịnị ee yi ẹwụ Ẹnẹyịmavara, ana vị oswe ọnị enyi anịị na ọza onyi tịtẹ ẹnịnị vene vee vú anka ịrẹha ana chẹrẹ tụ ịnị ezi avọọ.

Ijeremaya ka Ẹnẹyịmavara ọ̀ gụ ọnị ụvọ

¹⁴ Ijeremaya ka, Ẹnẹyịmavara ọ̀ mẹ̀ ọnị ụkụ, ka ẹngụ anị vaa nịya saka-saka. Ọ̀ ka Ẹnẹyịmavara ọ̀ dọ ọnị tụ, dị asị á nyị ịsị ẹ mẹ̀ ọnị vụrụ-vụrụ. Ẹnẹyịmavara, ẹwụ ọnị aa sị ụgaa yị nị.

¹⁵ Ọ kà aza aa họ̀ ọnị use ka, ịzị avaba oto ọnị Ohomorihi ee wo hi ẹnị ịhị ọnọọ ya? Ẹ ka à naavọ ọ̀ va mẹ̀ ẹ booro aanị.

¹⁶ Ijeremaya ka, ama, Ẹnẹyịmavara, ọnị ẹ́ yị kà a ka wa kụ́ ẹngụkata ve tu wa o. Waa yẹ ka ọnị ẹ yị va ụva ka à nyị ụmẹ ọnị ẹngụkata si tu wa. Waa yẹ ịsị ọnị kà.

¹⁷ Ọ kà Ẹnẹyịmavara, ọ̀ navọ asị o chire ọnị angwa; Ụmẹ ọnị ẹngụkata ọọ vẹ, ịdị anị ọnị vaa tẹ̀ ka asị a nyị ịsị ẹ mẹ̀ ọnị nị.

¹⁸ Ọ̀ navọ asị ọ́ zẹẹ ka ụhị nyị ọnị ama ọ̀ mẹ̀ ụhị nyị aza anaa sị ụya rị ọnị. Asị ọ mẹ ayị hụrẹ ọnị ịnẹ, ama ọ̀ kụ ayịhụrịnẹ tu wa. Ọ̀ navọ ọ̀ kụ ẹngụkata odivi tu wa dị ọ̀ gara wa ha chẹkẹ-chẹkẹ.

Ịrẹyị ka aa saasa ẹkụhị ụhwọtụ

¹⁹ Ijeremaya ka, Ẹnẹyịmavara ộ kà a yị ọnị ka, ọnị ọ̀ nọ enoze ọnị ohinọyị Ijuda zịị̄ ngụ ịnị ẹkụra dị ọ rẹẹ̄ zị avọọ tụ ẹhẹ, dị ọnị ọ̀ rẹ nọ avaba oze ana vọ ana a zịị̄ ngụ Ijerusarẹmị, dị ọnị ọ̀ na nọ̀ọ ụtụ anị ọnọnị.

²⁰ Ọ kà, ọnị ọ̀ kà a yị ohinọyị nịnị ọnịrị avaba Anijuda, beri avaba aza ana ra Ijerusarẹmị, dị ẹẹ̄ zị oze ẹnẹnị ngụ eehi ka ẹ̀ wụ́ ịrẹyị Ẹnẹyịmavara.

²¹ Ẹnẹyịmavara kà, ẹnịnị ee sì ịrẹyị ẹhẹ ẹnịnị, asị e chema ẹnya ọnyọọnyị ẹkụhị ụhwọtụ. Asị e chema ịsị ọnyọọnyị zị oze ana a zịị̄ ngụ Ijerusarẹmị para hu ẹkụhị ụhwọtụ.

²² Asị e chema ịsị ọnyọọnyị hụụnị eehi ẹnịnị tụ ẹhẹ ẹkụhị ụhwọtụ. Asị ẹnịnị mẹ̀ ụkọrọ ọnyọọnyị ẹkụhị ụhwọtụ. Ẹnịnị ẹ̀ẹ saasa ẹkụhị ọnọọ, ka ẹkụhị ọnị Ohomorihi sị tụ irenyi ọ vị nị. Avọọ ọnị mẹ mẹ̀ ẹ ọda yị ohiku ẹnịnị nị.

²³ Ẹnẹyịmavara kà, ohiku ẹnịnị ẹ́ yị wụ́ ịrẹyị anị. Ama ệ mẹ ayị ọkatẹngụ, ẹnịnị ẹ́ yị wụ́ chire ọnị, ẹnịnị ẹ yị dọ ka ọnị ọ̀ zụ ẹnị ịsa.

²⁴ Ọ kà Ijeremaya ọ̀ kà a yị aza ẹnẹnị ka, ẹnịnị ẹ̀ saasa avaba ọda anị. Asị ẹnịnị zi oze ana a zịị̄ ngụ Ijerusarẹmị chema ẹnya ọnyọọnyị ngụ eehi ẹkụhị ụhwọtụ. Ọ kà ẹnịnị ẹ sị ụvọ za ẹkụhị ọnọọ, ka ẹkụhị ọnị Ohomorihi sị tụ irenyi yị ẹngụ anị ọ vị nị. Asị ẹnịnị mẹ̀ ụkọrọ ọnyọọnyị vụrụ-vụrụ ịhị ọnọọ.

²⁵ Ọnọọ vaa mẹ ka ohinọyị nịnị vanaa rị Ijerusarẹmị dị a sị ụkata ohinọyị yị ẹnịrị ezi ẹnịnị anka ohinọyị Idevidi. Ẹnịrị Anijuda nịnị beri Anijerusarẹmị nịnị vaa tụra ụkẹkẹ ịrẹkụ ọnịrị umaata, dị Ijerusarẹmị kụkụ vị ohihi yị aza pooro kẹnẹ.

²⁶ Ẹnẹyịmavara kà: Aza vaa hụrị ẹkụra ene hi Ijuda ọnịrị ẹkụra eweyi-eweyi ana kara Ijerusarẹmị; dị aza hụrị ẹtẹ Ịbẹnjamịnị, dị ẹ hụụnị ataba ọnịrị iruvo ataba beri eyi ụvẹtẹ Ijuda, dị ẹ kụ ịsị ịsọvọ irenyi-irenyi vị ịnị Irehi anị.

²⁷ Ama asị a nyị ka ẹnịnị ẹ yị wụ́ chire ọnị, dị ẹ sị ụvọ za ẹkụhị ụhwọtụ anka ẹkụhị ọnị Ohomorihi sị tụ irenyi yị ẹngụ anị. Asị ẹnịnị zị oze ana a zịị̄ ngụ Ijerusarẹmị za ẹnya ọnyọọnyị parahu ịhị ọnọọ. Ọ kà ẹnịnị ẹ̀ẹ vavọọ mẹ, vị ọnị aa jị ịra da oze ana a zị ngụ Ijerusarẹmị nị. Irehi ohinọyị ene hi Ijerusarẹmị vị ana a vaa rị ịra dị ẹ yị nyị ọza ene ve zuu mí ọ.