Ijeremaya 14 - IWE ỌNỊNỊ

Ọyọjị odivi anaa vẹ

¹ Ịrẹyị ọnị Ẹnẹyịmavara kà yị Ijeremaya ịnị ịpa ọyọjị anaa vẹ yị.

² Ọ kà, Anijuda nịnị ẹ sị ẹngụ và hí; anẹkụra ẹnịnị eè su; ẹnịnị hi ịnị eteesu ee sụ ùnè, Anijerusarẹmị nịnị aa jị òrèrè boro-boro ka a vaa gụ ẹnị ụvọ.

³ Aza ẹbanyị ẹnịnị ẹẹ tụ ezida ẹnịnị ka ẹ̀ na dà enyi vẹ, ệ nọ ịnị ịkangga, ẹnịnị e yi re enyi dà. Ụnọkọ osusu ẹ́ sị vavẹ nị. Ụhị aa nyị wa, ó si hí wa irenu, dị ẹ kụkụ aa sị eyi tẹ̀ nị.

⁴ Ka orihi ẹ yị zụ̀, ẹtẹ ọ sị wụ, ayị ọkụrẹkụ nịnị e si du; ẹnịnị kụkụ aa sị eyi tẹ.

⁵ Ùnè ene e yi ku ọnị o ma ozi, o si ozi anị hụrẹ ụvọ tụ ịnị ụnọmị agụvị ka ẹnịnị e yi re avị ẹnẹ yaa rị.

⁶ Ịkẹrịkẹtẹ jẹẹ ịrẹsụ ataba aa tụ kẹẹkẹ anka irezi avọọ. Ẹnịnị e yi kuku re ẹtẹ ẹtẹẹrẹ agụvị ka ẹnịnị e re ịsa rị.

⁷ Ẹnẹyịmavara kà, aza anị aa jị òrèrè ka, ịzẹyịza, ịvị ẹnịnị aa dọ ẹnị ivenu de, ama, ọnị navọ ọnị ọ̀ gu ẹnị ụvọ anka ọnị mẹ vịdị kà a. Ẹ ka, ụmẹ ọrụrụ-ọrụrụ ẹnị sị va ịrẹma Ẹnẹyịmavara nị, ẹnị ẹ raa rị ịvị anị.

⁸ Ẹ ka, ọnị ọ vị ọyịtureyi Anisirẹrị nịnị nị, ọnị ọọ dọ ẹnị ha hụụnị ẹngụkata nị. Sị ẹ vẹ dị ọnị kụkụ sị mẹ anka ọzọga anaa jịnẹ dị ọ ha ka ọnị sụ̀ venẹẹhẹ avọọ yị ẹnị?

⁹ Ẹ ka sị ẹ vẹ dị ọnị kụkụ sị mẹ anka ọza ọnị ịrẹyị hụrẹ hi avọọ? Dị ọnị aa mẹ anka isoja ẹnẹ ẹ yị nyị ụkata ọyị gụ ọza ụvọ avọọ? Ẹ ka, ịzẹyịza, ọnị Ẹnẹyịmavara jẹẹ pe ẹnị. Aza anị ẹnị vị nị, aarịhịnị asị ọnị hụrẹ ẹnị ụvọ.

¹⁰ Ẹnẹyịmavara ộ ka a ịnị ịpa aza ẹnẹnị ka, ẹnịnị ee sì ka ẹnị ee zwee hụrẹ ọnị ẹngụ, ẹnịnị ẹ́ ma sị ụvọ za ẹngụ ẹnịnị; avọ ayị anị e yi kuku hine tu wa. Ọnị vaa tamayị avaba ịrẹyị ọhịmị ọnị ẹ mẹ dị ọnị ọ̀ sị ụya anị rị wa ọ yaa nị.

¹¹ Ijeremaya ka Ẹnẹyịmavara ộ ka ẹ yị ọnị ka asị ọnị mẹ̀ aduwa ka ọnị ọ̀ mẹ ọgụvọ yị aza ẹnẹnị.

¹² Ka, ẹnịnị ẹ̀ẹ daka ba awẹ, ọnị ẹ yị vaa wụ́ orere ẹnị ẹyaa jị ka à va gụ ẹnị ụvọ avọọ. Ẹnịnị ẹ̀ẹ daka mẹ̀ ịsọvọ dị a rị ọ ịra yị ọnị nị, dị ẹ́ sị ịsa ọnị irenuu rị va mẹ̀ ịsọvọ yị ọnị nị, ayị anị ẹ yị vee hine tu wa. Ọ kà, eyi ịrẹkụ ọnị va naa wụ̀ wa ha nị. Dị ọnị rẹ sị ụngwẹ ọnịrị ụkụ wụ̀ wa va ha.

¹³ Ijeremaya ka, dị ọnị kà a yị Ẹnẹyịmavara Ochẹtẹẹngụ ka, tee, ọọ yẹ ka ọnịsẹ ana vọ nịnị vanaa kà a yị. Anijuda nịnị ka ẹ́ yị vaa nyị ịrẹkụ ọnịrị ka ụngwẹ ẹ́ yị rẹ vaa kụ̀ wa. Ẹnịnị ka waa vị dị sị ọ ka ka ẹngwọọrọ ọ́ vaa vị̀ị yị wa ịnị ẹtẹ ẹnịnị nị.

¹⁴ Ama dị Ẹnẹyịmavara tụ ohi ka, ọnịsẹ ẹnẹẹ vi enee cheeche ka maa tụ ẹnị ụtụ. Ọ kà ọnị ẹ́ yị tụ wa ụtụ, ọnị ọ yị rẹ mẹ ọda ọnyọọnyị yị wa. Ẹnẹyịmavara kà ọnị ẹ yị nyị ụvọ tụ ịnị ẹtẹ ẹnẹ ẹ ka ẹnị ee re zị; ịsẹ ẹnẹ ẹ yaa ka vị ịrẹyị kẹnẹ-kẹnẹ ẹnẹ ẹ yaa sị ayị ẹnịnịị rò.

¹⁵ Ẹnẹyịmavara kà, ọnị aa ka ịsị ọnị vaa mẹ ọnịsẹ ẹnẹẹ ọnị ọnị ẹ yị tụ ụtụ ama dị ẹ naa ka a zị ka ịrẹkụ ẹ yị vaa ngụ ẹkụra; ụngwẹ ẹ yị rẹ vaa ngụ ịzọọ bẹẹ. Eyi ịrẹkụ ọnị vaa wụ̀ wa, dị ọnị sị ụngwẹ wụ̀ ẹnị ana vọ nị.

¹⁶ Oze ọnyọọnya á va zịị wụ̀ aza ẹnẹnị ẹnẹ ẹ maanị kà ịrẹyị ẹnẹnị aanị nị. Oku ẹnịnị vị ana a vaa kụụ vaa hi oze ene hi Ijerusarẹmị, ẹ yị vaa nyị ọza ene vee ne wa. Aanị a mẹ vaa mẹ avaba ẹnịnị beri ose ẹnịnị ọnịrị ezi ẹnịnị nị. Ẹnẹyịmavara kà, ọnị vaa mẹ ka ẹnịnị ẹ̀ rị ụya avaba ebira odivi ẹnịnị.

¹⁷ Ijeremaya ka, Ẹnẹyịmavara ộ kà a yị ọnị ka, ọnị ọ̀ kà a yị Anijuda nịnị ịsị ẹ vị ayodu anị, dị ọnị ọ̀ kà a ka, aanị eyi anị mẹ vaa ka ẹgọ, ọọdụ ọnịrị ịrahụ nị, ọnị ẹ yị hụụnị orere ọ̀ yị jị, agụvị ka aza anị ẹ́ raa tụ ụnava ngọtọọ, ịrẹyị odivi ô tù wa.

¹⁸ Ọ kà, ọnị ộ nọ ịnị aarẹ, dị ọnị re oku aza ana wụ̀ va hi ẹtẹ eyi ịrẹkụ. Ịjị ọnị va nọ ịnị ẹkụra, ọnị ee re ụngwẹ maa wụ̀ azaa vaa hi ẹtẹ. Ọ kà, ọnịsẹ nịnị ẹnịrị ohirẹsụ irehi Ohomorihi aa yịị mẹ̀ ụkọrọ ẹnịnị, ama ẹnịnị ẹ yị yẹ ịsị ẹ yaa mẹ.

Anijuda nịnị ệ dá ịpẹ yị Ẹnẹyịmavara

¹⁹ Anijuda nịnị ka tee! Vị Ẹnẹyịmavara wa kụkụ sị ẹnị yi tịtẹ samị-samị nị? Ẹ ka, vị Ẹnẹyịmavara waa kụkụ nyị ịhyẹrẹ Anịzayọnị nịnị nị? Sị ẹ vẹ dị ọ maanị kụ ẹngụkata odivi tu ẹnị ka, asị ẹngụ ẹnịnị zụ nịya? Ẹnị ee zi ka ẹnị a vaa nyị ẹngwọọrọ, ama ẹ yị nyị ịsị ọyịza anaa mẹẹ tu ẹnị vụrụ-vụrụ. Ẹnị èe zị ka ẹngụ ẹnịnị aa vaa nịya, dị ahịka ayịhụrịnẹ ọ rẹ vẹ nị.

²⁰ Ẹ ka, ẹnị ệ dọ irenu ebira odivi ẹnịnị ọnịrị ebira odivi ohiku ẹnịnị ka ẹnị ệ rị ịvị Ẹnẹyịmavara.

²¹ Ẹ ka Ẹnẹyịmavara ọ̀ navọ, ọ̀ tamayị ịrẹyị ọnị ọ́ ka, dị asị o sị eyi para ẹnị hu. Ẹ ka aarịhịnị asị ọ maanị mẹ̀ ụhị nyị Ijerusarẹmị, ịzị ọ sị aga ohinọyị anị ana maanị nyị ụbanyị hi ẹtẹ. Ẹnẹyịmavara ọ̀ navọ asị và hụụnị ịrẹyị ọnị ọnịrị Anịjuda nịnị dọ beri ẹngụ tụ ịnị anị.

²² Ẹ yị nyị ori Anẹkụra ọnyọọnyị ana zụ zụ̀ ori; eguhi ụvọta ẹ yị zụ mẹ ka orihi ọ̀ zụ̀. Anijuda nịnị ka, tee! Ẹnẹyịmavara ana vị Ohomorihi ẹnịnị ẹnị zi eyi nị, agụvị ka ọyịnyara ọọ̄ mẹ̀ ịsa ẹnẹnị nị.