Ijeremaya 12 - IWE ỌNỊNỊ

Ijeremaya ô họ̀ Ẹnẹyịmavara use ịrẹyị

¹ Ijeremaya ka, Ẹnẹyịmavara, ọnị ọ̀ọ ka ọnị ee pe ewu nyị ahankata ịrẹyị anị, awụ ọ raa yịị gẹ nị. Ama ọnị aa yịị họ̀ ụ use ịrẹyị ịnị ịpa ịzẹyịza awụ. Sị ẹ vẹ dị ẹhẹ aza edivi zee yị wa? Sị ẹ vẹ dị oō zee yị aza ẹnẹ ẹ yị ma mẹ ịzẹyịza?

² Wee chire wa tụ ịnị ẹkụra, ẹ sị ẹpa nyị; Ẹnịnị ệ hụ dị ẹ yaa tụ ẹtụtụ nị. Ịrẹyị awụ vị ẹnị ẹ sịị̄ tụ irenu pooro kẹnẹ ama ẹ yị yaa wa ayị.

³ Ọ kà ama, Ẹnẹyịmavara waa yẹ ọnị, wee re ịsị ọnịị̄ mẹ ọnịrị ọnị mẹmẹ sì ịrẹyị awụ. Tura aza edivi ẹnẹnị hi ẹhẹ anka atẹmẹ ana a ka à na wụ avọọ. Sị eyi pe wa nee tu ụmẹ ana a vaa sị wụ̀ wa.

⁴ Ọ kà, ịzị ẹkụra ẹnịnị vaa maanị wụ naa za, dị avaba avị ịnị aarẹ kụ wụ? Ịsụpa ẹnịrị inomi nịnị ee su vaa ha agụvị ebira odivi ana aza ene hi ịnị ẹkụra aa mẹ. Aza anaa kà a ka Ohomorihi e yi re ịsị ẹnị aa mẹ.

Ohi ọnị Ohomorihi tụ Ijeremaya

⁵ Dị Ẹnẹyịmavara kà, Ijeremaya, ẹwụrị aza ana sị ahụ ee zwe echi dị ọ sị ngụ ụ ẹngụ nị, wéé ve zuu pe umaata zwe echi? Wẹ ẹ yị zụ vọrọ jẹẹ ịnị ọyị chapaa, sị ụ vaa mẹ ịnị uruku Ijodani?

⁶ Ẹyịnyara awụ ana vị anda awụ nịnị nyẹmba vị enee vene u. Ệ bẹ tụ ịnị aza ana aa kụụ tu u. Ẹẹ daka èe pe u ka ịrẹyị ohine-ohine, asị ụ sị ayị tụra wa.

Ayodu Ẹnẹyịmavara agụvị aza anị

⁷ Ẹnẹyịmavara kà, ọnị ọ sị va ịrẹma Anisirẹrị nịnị, ọnị ọ raa hụrẹ aza anị ụvọ. Ọnị ọ raa sị aza ọnị ọnị sì ịrẹyị anị chire ọnịvị ẹnịnị ụvọ.

⁸ Ọ kà, aza anị vị ana kụkụ sị mẹẹ anka idu ana yà ịnị iruku avọọ yị ọnị. Ẹnịnị ee nowu ka ẹnị ee si ọnị, agụvị avọọ ọnị ọ yị kụkụ sì ịrẹyị ẹnịnị.

⁹ Ẹnẹyịmavara kà, aza anị vị ana kụkụ sị mẹẹ anka ezi ụụhwẹ ọnị ukokoro ee bè oze eyi ụvọnị-ụvọnị avọọ. Hị́ avaba uye ịnị avị vẹ ka ẹ̀ va rị eche nịnị.

¹⁰ Ọ kà, oseratẹmẹ ọrụrụ-ọrụrụ ẹ sị ụbazị ịvayịnị anị du ha. Ẹ raa sị ahụ chaka aarẹ anị. Ẹ sị ẹtẹ anị ọkụmị-ọkụmị vara ụnọmị ọyịwụ.

¹¹ Ẹnịnị ẹ sị ọ vara ụnọmị tịtẹ ọvịdị anị. Avaba ẹkụra ọyịvụrụ ọ sị vara ụnọmị. Ẹ yị jị ọza ọnyọọnyị areyi.

¹² Aza ene eē du ịsaa ha ẹẹ wara hụụnị ụnọmị eyi ẹbẹẹba vẹ; ka ọnị Ẹnẹyịmavara ọ́ raa kụ ịrẹkụ ka è ve vu avaba ẹkụra Ijuda ọnịrị Ijerusarẹmị nịnị ẹtẹ, ẹ yị nyị ọza ana a kụkụ nyị ẹngwọọrọ.

¹³ Ẹnẹyịmavara kà, aza anị ê chire akụ ama dị a hi ka ebe ẹ́ kụ gụ nị. Ẹnịnị ệ mẹ̀ ụkọrọ ẹtẹẹtẹrẹ ama ẹ yị nyị ịsị e re hụụnị anị. Ịsị ịnị aarẹ ẹnịnị ẹ yị mẹ agụvị ka ọnị aa kụ ayịị hi wa.

Ịsị Ẹnẹyịmavara kà ọnị vaa mẹ aza ana ra va hura Anisirẹrị nịnị.

¹⁴ Ẹnẹyịmavara kà, aa nyị ịsị ọnị aa kà ịnị ịpa aza ana ra vahụra Anisirẹrị nịnị. Ẹnịnị ẹ sị ẹtẹ ọnị ọnị sị yị aza anị, Anisirẹrị nịnị du ha. Ọ kà, ọnị vaa kụ aza edivi ẹnẹẹ hụụnị ẹkụra ẹnịnị anka á mee hu ọchị hụrị ẹtẹ avọọ, dị ọnị dọ Anijuda nịnị hụrẹ wa ụvọ.

¹⁵ Ama, ọnị ọọ raa kụ wa kwooze, ọnị varẹma vaa vayị ẹnịnị. Ọnị varẹma vaa kụ anẹkụra ọzọzaa vaa vẹ eehi ẹnịnị, ịnị ẹkụra ẹnịnị.

¹⁶ Ọ kà, ẹnịnị ẹ̀ẹ sị avaba ayị ẹnịnị aa hẹkẹ ọnị anka aza anị maa hẹkẹ ọnị, ọnị vaa sị wa anka aza anị. Ẹnịnị àa sị ịrẹha anịị hị́ eku anka ẹ mẹ vịdị kọ aza anị ka, ẹẹ sị Ịbaarị hị́ eku, o vee zee yị wa.

¹⁷ Ama àa nyị anẹkụra ọnyọọnyị ẹnẹ ẹ yị saasa ịrẹyị anị, vị ọnị vee hụ wa hụrị ẹtẹ saka-saka, dị ọnị vu wa ẹtẹ nị.