Ijeremaya 11 - IWE ỌNỊNỊ

Ijuda ọnịrị Isirẹrị ệ raà jịnẹ oto Ẹnẹyịmavara

¹ Ẹnẹyịmavara ộ kà a yị Ijeremaya ka:

² Ọ̀ wụ́ ịrẹyị ẹnị ẹnị ka ọnị dọ beri ẹngụ tụ ịnị anị. Ọ kà ọ̀ kà a yị Anijuda ọnịrị Anijerusarẹmị nịnị ka

³ Ọnị Ẹnẹyịmavara, Ohomorihi Anisirẹrị. O ree chì hị́ avaba aza ẹnẹ ẹ yị saasa ịrẹyị ọnị ẹnị dọ beri ẹngụ tụ ịnị anị.

⁴ Ịrẹyị ọnị ọnị mẹ ọda anị yị ohiku ẹnịnị ọnị mẹ kụ wa hụrị ẹtẹ Ijipiti ọ vị ọnọọ nị. Ẹtẹ Ijipiti vị ana sị mẹẹ anka arasị ịrịịra avọọ yị wa. Ọnị ộ kà a yị wa ka ẹ wụ́ chire ọnị dị ẹẹ mẹ avaba ịsị ọnị mẹ ọda anị yị wa. Ọnị ka ẹnịnị vaa vị aza anị, dị ọnị vị Ohomorihi ẹnịnị.

⁵ Ọ kà ịjị ọnọọ, ọnị vaa mẹ ịsị ọnị hị́ eku anị yị ohiku ẹnịnị, ka ọnị vaa sị ẹtẹ ịzị ịsụpa ẹnịnị ọnịrị ịsa ịnị aarẹ ẹnịnị vaa ha dị ẹ yaa mẹ ẹtẹẹtẹrẹ yị wa. Ẹtẹ ọnọọ ẹnịnị yà ịnị aanị nị. Dị Ijeremaya tụ́ ohi ka, Ẹnẹyịmavara, ọ̀ vavọọ ya (aamị).

⁶ Ijeremaya ka, dị Ẹnẹyịmavara kà a yị ọnị ka, ọnị ọ̀ nọ ẹkụra ene hi Ijuda ọnịrị utoze-utoze Ijerusarẹmị dị ọnị ọ̀ naa nọ̀ọ avaba ịrẹyị ọnọnị yị wa nị. Ọ ka ọnị kà a yị wa ka ẹnịnị ẹ̀ wụ́ ịrẹyị ọnị ẹnị dọ beri ẹngụ tụ ịnị anị dị ẹnịnị ẹ̀ saasa a.

⁷ Ẹnẹyịmavara kà, ọnị mẹ kụ ohiku ẹnịnị hụrị Ijipiti ọnị ộ kà wa ọnọ ẹtẹẹtẹrẹ ka ẹnịnị ẹẹ saasa ịrẹyị anị. Vị va ngụ ajịnị vị ọnị ọnị aa kịị kà wa ọnọọ.

⁸ Ama ẹnịnị ẹ yị wụ́ chire ọnị. Ẹnịnị ẹ yị wụ́ ịrẹyị anị. Dị ahịka ịsị ayị ọzọza ọọ ka yị wa kẹnẹ ẹ yaa saasa nị. Ayị ẹnịnị ọọ katẹngụ, avọọ o me divi nị. Ọ kà ọnị ộ kà a yị wa ka ẹnịnị ẹ̀ sị ụvọ za ịrẹyị ọnị ẹnị dọ beri ẹngụ tụ ịnị aanị ama ẹnịnị ê yi. Avọọ, ọnị aa sị avaba ụya ana ya ịnị anịị rị wa nị.

⁹ Ijeremaya ka Ẹnẹyịmavara ộ rẹ kà a yị ọnị ka, Anijuda ọnịrị Anijerusarẹmị nịnị aa gẹ eyi ọyị kwẹẹtẹ tụ ọnị, Ẹnẹyịmavara.

¹⁰ Ẹnịnị ẹ sị varẹma naa mẹ̀ ebira odivi ohiku ẹnịnị. Ohiku ẹnịnị ẹ yị saasa ịrẹyị anị. Ẹnịnị ẹ́ naa hẹkẹ ori ọsa. Anisirẹrị ọnịrị Anijuda nịnị ẹ raa sị ahụ jịnẹ eku ọnị ọnịrị ohiku ẹnịnị mẹ.

¹¹ Ẹnẹyịmavara kà agụvị avọọ, ọnị vee vu wa ẹtẹ ọnị ẹnịnị ẹ yị vaa ha hụụnị anị. Ẹnịnị ẹẹ nowu ka ọnị ọ gụ ẹnị ụvọ, ọnị e yi vee tụ́ ohi.

¹² Ịjọnọọ Anijuda ẹnịrị Anijerusarẹmị vị anaa hị́ ori ẹnẹ ẹ yaa mẹ̀ ịsọvọ yị ka ẹ̀ gụ ẹnị ụvọ, ama ori ẹnẹẹ ẹ yị va zụụ dọ wa ha ịjị ẹngụkata oo tu wa.

¹³ Ẹnẹyịmavara kà, ẹwụ nịnị Anijuda, avaba ẹkụra awụ nịnị vị ana kụkụ nyị ori ẹnịnị. Avaba oze ene hi Ijerusarẹmị vị ẹnị ẹnị re hi ụta hi. Ịnị ụta ẹnẹẹ ẹ yaa mẹ̀ ịsọvọ yị ori ana aā hị́ Ịbaarị nị. Ori ọnọọ vị anaa nyị ọza ịhyẹrẹ.

¹⁴ Ọ kà, agụvị avọọ, asị ọnị Ijeremaya hụvị aza ẹnẹnị mẹ̀ aduwa; asị ọnị dá ịpẹ yị ọnị agụvị ẹnịnị, agụvị ka ọnị ẹ yị vaa wụ̀, ẹnịnị ẹẹ hị́ ọnị ịnị ụmẹ akanya ẹnịnị.

¹⁵ Ẹnẹyịmavara kà, sị aza ọnị ọnị sì ịrẹyị anị aa mẹ ini irehi anị, ịrẹma ẹnị ẹ na raa mẹ ịsị edivi-edivi ẹnịnị? Vị eku ẹnị ẹ yaa hị́ ọnịrị ịsụpa ẹnị ẹ yaa sị mẹ̀ ịsọvọ waa zụ za wa ka asị ẹ rị ụya nị? Ẹnẹnị waa zụ mẹ ka waa jẹ nịnị nị?

¹⁶ Ọ kà, ọnị ộ vịdị hị́ wa ọchị orivi avị-avị da, dị ọ tụ ẹtụtụ ozoza-ozoza nị. Ama booro aanị, ọnị vaa sụrẹyị anka apaapa ihinẹba avọọ, ọnị vaa jị ịraa da a, dị ọnị che avaba avọ anị ha.

¹⁷ Ọnị Ẹnẹyịmavara Ochẹtẹẹngụ ene chire wu nịnị, ọ sị ọ ka ka vị ọnị ee vu wu nịnị ẹtẹ nị agụvị ebira odivi ọnị ẹwụ nịnị Anisirẹrị ọnịrị Anijuda aa mẹ nịnị. Ọ kà wa sị ayị mẹ kụ ọnị nịnị agụvị ka wa naa mẹ̀ ịsọvọ yị Ịbaarị nịnị.

¹⁸ Ijeremaya ka Ẹnẹyịmavara ộ sị zụ ọnị ka ọnị ọ̀ yẹ ka ọnịvị anị nịnị aa geyi anị.

¹⁹ Ama ọnị vị ana sị mẹẹ anka ozi atẹmẹ ana a sị ka à na wụ avọọ. Ọnị ẹ yị yẹ ka ọnị ẹ yaa geyi anị nị. Ẹ yaa kà a ka: à jẹẹ ẹnị du ọchị ọnọnị ha beri ẹtụtụ anị à jẹẹ ẹnị ẹ wụ ọ dị asị a kụkụ tamayị ịrẹha anị.

²⁰ Dị Ijeremaya ka, ẹwụ Ẹnẹyịmavara Ochẹtẹẹngụ, ẹwụ aa mẹ̀ ọkarẹyị ọ mẹ vọrọ nị. Ẹwụ zama ayị ọza ọnịrị ivehu ọzaa re nị. Ọ̀ na ọ̀ họ̀ oponu ịrẹyị anị ịrẹsụ aza ẹnẹnị dị ọnị ò ree, Ẹnẹyịmavara ọnị sị ịrẹyị anị chire ụvọ nị o.

²¹ Avọọ dị Ẹnẹyịmavara kà yị ọnị ka, aza ene hi Anatọtị ee sị ọnị isu, dị ẹ ka asị ọnị vana vaa kụ tụ Ẹnẹyịmavara yị ẹnị, ka ẹyịvavọọ vị ẹnị aa wụ ọnị nị.

²² Ọnị vaa sị ụya rị wa. Ezwọọmụha ẹnịnị vị ana a vaa wụ̀ eyi ịrẹkụ. Ezi ẹnịnị vị ọnị ụngwẹ vaa wụ̀ vaa ha.

²³ Ọ kà ọnị ọ raa jị ụmẹ ọnị ọnị ve sii vu anị Anatọtị ẹtẹ. Ịjị ụmẹ ọnọọ oo tu, ọza ikonyara ẹ yị yaa vọ ẹtẹ ịnị ẹnịnị.