Ijeremaya 10 - IWE ỌNỊNỊ

Ohomorihi obooro ọnị ịnyara

¹ Ẹwụ nịnị Anisirẹrị ọ wụ́ ịrẹyị ọnị Ẹnẹyịmavara aa kà a yị wụ nịnị.

² Ẹnẹyịmavara kà, a sị ụ hama ebira ana anẹkụra ana vọ aa mẹ nịnị. Asị ụ hụrẹ ayịnẹ apọtẹrẹwa ọnị we re ẹbẹẹba nịnị, anẹkụra ana vọ ẹẹ daka hụrẹ ayịnẹ agụvị avọọ.

³ Ahẹkẹ ịyẹyẹ aza ẹnẹnị aa mẹ nị. Ẹẹ na dà ọchị hụụnị iruku, dị ẹẹ bẹ ẹ.

⁴ Dị ẹẹ sị Igooru ọnịrị Isiriva (ọmọ) dị ẹẹ sị mẹ̀ ẹ ọvị. Dị ẹẹ kanyị ọ iso zẹtẹ agụvị asị ọ hụrẹ nyẹtẹ.

⁵ Ẹngụ ori ẹnẹẹ vana sị mẹẹ anka eku ana tụra tụ ịnị aarẹ ọyị chire inomi angwa avọọ. Ẹnịnị ẹ yị zụ ka ịrẹyị; vị ee chema wa nị, agụvị ka ẹnịnị ẹ yị zụ zị ụsẹ. Asị u hí angwa ẹnịnị; ẹnịnị ẹ yị zụ zama wụ nịnị; ẹnịnị ẹ yị rẹ zụ mẹ ọyịza wụ nịnị.

⁶ Ẹ yị nyị ọza anka ẹwụ Ẹnẹyịmavara o. Waa nyị ụkata ẹtẹẹtẹrẹ, avọọ ịrẹha awụ mẹ banyị dị ọ nyị ụkata ẹtẹẹtẹrẹ nị.

⁷ È nee yị vee hí angwa ẹwụ ohinọyị avaba ẹhẹ? Vị a vọrọ ka ee hí angwa awụ nị. Ịnị avaba ọyẹrẹyị ẹhẹ ọnọnị ọnịrị avaba ohinọyị ẹnịnị ẹ yị nyị ọza anka ẹwụ.

⁸ Avaba ẹnịnị vị ọnụra. Ịrẹyọyẹ ịsị ẹ zụ kọ hụụnị ụvọ ori ana a sị ọchị bẹ kẹ?

⁹ Ori ẹnịnị vị ana a sị isiriva ọnịrị igooru mẹ ẹtẹ Itasisi ọnịrị ẹtẹ Uhwaazị. Ụkọrọ ụvọ aza ẹ vị nị. Dị ee chire wa awuru akàaka ọnị aza ana yara mẹ̀ ụkọrọ ẹtẹẹtẹrẹ hi ịta anị.

¹⁰ Ama Ẹnẹyịmavara ọ vị Ohomorihi obooro nị. Ọnị ọ vị Ohomorihi ana yara nị. Ọnị ọ vị Ohinọyị pooro zịna-zịna nị. Ẹnẹyịmavara àaa kụ ayị, avaba ẹhẹ vị ene e zizi. Anẹhẹ ẹ yị zụ jẹẹ zị ọ àaa kụ ayị.

¹¹ Kà ẹ yị wa nịnị ka, ori ẹnẹnị, ẹ yị vị ẹnị ọ mẹ ẹbẹẹba ọnịrị ẹhẹ ọnọnị. Ẹnịnị vị ene e vee vú ẹtẹ hụụnị ẹhẹ. Ọza, e me vene re wa ịnị ẹhẹ.

¹² Ama Ohomorihi ọ sị ụkata anị tụ ẹhẹ ọnọnị nị. Ọnị ọ sị ịrẹyọyẹ anị nyima ẹhẹ ọnọnị nị. Ịrẹyọyẹ anị ọ sị tana ẹbẹẹba nị.

¹³ Ohomorihi ọọ̄ ka ịrẹyị dị orihi aa karutu ẹbẹẹba nị. Ọnị ọọ̄ mẹ̀ ka ịnyanya ọọ̄ rị orihi aa zụ nị. Ọnị ọọ̄ mẹ̀ ka ahị ọọ̄ tụ́ hụụ ịzị ọ zaa ku tụ nị.

¹⁴ Ọsọnị aza ee si re, dị ẹ sị mẹẹ ọnụra ẹnẹ ẹ yị nyị ịrẹyọyẹ nị. Anịngẹrẹ enee tu ori vị ọnị ụhị aa nyị, agụvị ka ori ẹnẹ ẹ mẹ va hi ẹtẹ vị apẹ kẹnẹ; ẹnịnị ẹ yị nyị ụhwẹ.

¹⁵ Ịsa kẹnẹ ẹnịnị vị nị. A sị eyi wụ̀ wa. Ịjị ụmẹ ọkarẹyị ẹnịnị oo tu, e vee vu wa ẹtẹ.

¹⁶ Ohomorihi Ijekọvụ ọnịrị wa ẹ ị vị ọnya, agụvị ka ọnị ọ mẹ avaba ịsa nị. Ọ raa nyị Anisirẹrị nịnị ka ẹ vị aza anị. Ẹnẹyịmavara Ochẹtẹẹngụ ịrẹha anị rị nị.

¹⁷ Dị Ijeremaya ka, ẹwụ nịnị Anijerusarẹmị, we tenyi ẹnya awụ nịnị. Isoja nịnị ẹ raa ta kara wụ nịnị.

¹⁸ Ka, Ẹnẹyịmavara kà: Re, ọyaanị, avaba ẹwụ nịnị ana ra ịnị ẹtẹ ọnọnị vị ọnị vaa tụ̀ okoko. Ọnị vaa kụ ẹngụkata odivi tù wụ nịnị dị wa yẹ ọyịkụ anị nịnị.

¹⁹ Dị Anijerusarẹmị nịnị na owu zẹtẹ ka: ụnava ẹnịnị ọnọnị oo divi o! Ụnava ọnọnị ẹ yị zụ vị ọ. Vị ẹnị vịdị ro ka ịsị ẹnị zụ sị ẹngụ dọ yọ nị.

²⁰ Ẹ ka, ajẹngụ ẹnịnị e ku wu. Orupa anị ẹ kụ jị va ha. A raa kụ ezi ẹnịnị. Ẹ yị nyị ọza ana vọ ana vọrọ ka ò pe ẹnị kụ ajẹngụ ẹnịnị jẹẹ, dị pe ẹnị sị ịta jị ọ.

²¹ Dị Ijeremaya tụ́ ohi ka, ọdọvịdị ẹnịnị vị ọnụra-ọnụra. Ẹnịnị ẹ yị họ̀ Ẹnẹyịmavara kà ọ zụ ẹnị oze, avọọ ẹnịnị sẹ ẹdụ, dị aza ẹnịnị sị gara nị.

²² Sị ụtọ pe ẹtẹ nịnị! Enube ộ vẹ. Ẹ naa wụ̀ isoja nịnị ịrẹka ẹtẹ Ịbabịrọnị. Ẹnịnị aa vaa hụ azaa hụrị ẹtẹ Ijuda, dị ọ kụkụ vị aha ọnị irezi ịnị avị nịnị kụkụ ra nị.

²³ Ijeremaya ka, Ẹnẹyịmavara ọnị oo yẹ ka ẹ yị nyị ọza ana zụ sị ụvọ nya ịrachị ọnị ọ nyị ẹhẹ anị nị. Ẹ yị nyị ọza ana nyị ụkata ka a ka aanị ọnị mẹ vaa mẹ ẹhẹ anị nị.

²⁴ Ọ kà, Ẹnẹyịmavara ọ̀ navọ ọ sị ịzẹyịza vọrọ ẹnị zị oze. Asị ọ sị ọyịkụ sị ụya rị ẹnị ka ẹyịvavọọ vị ee vu ẹnị ẹtẹ nị.

²⁵ Ọ kà, ọ sị ọyịkụ anị zụ aza ana ka ẹnị ẹ yị yẹ ẹ; dị ẹnịnị ẹ yị maa hẹkẹ ẹ. Ẹnịnị ẹ sị aza Ẹnẹyịmavara wụ̀ ha; ẹ sị ẹnị vú ẹtẹ saka-saka, dị ẹ jị ẹkụra ẹnịnị eburu nị.