Ijeremaya 1 - IWE ỌNỊNỊ

Ijeremaya

¹ Ụmẹ ọnya, â nyị ọnọrụ ọnya aanị ana aā hị́ Ijeremaya ọnị ịrẹha ada anị rị Ihirikaya, ọnyara ịnị ẹnị ohirẹsụ irehi Ohomorihi ene hi ẹkụra ana aā hị́ Anatọtị ịnị ẹtẹ Ịbẹnjamịnị ọ vị nị. Ijeremaya ọnọọ ộ kà ịrẹyị ẹnẹnị nị.

² Ịrẹyị ana tụ ọ ịrayị ẹwụrẹta ọnị Ijosaya ana vị ozi Amọnị sị rị ohinọyị Ijuda Ẹnẹyịmavara maanị kà ịrẹyị yị Ijeremaya nị.

³ Ẹnẹyịmavara ộ rẹ kà ịrẹyị yị ọ ịnị ụmẹ ọnị ozi Ijosaya ana aā hị́ Ijehoyakimi sị vị ohinọyị. Ịrẹma anị ộ vana rẹ kà ịrẹyị yị ọ ụmẹ ọrụrụ-ọrụrụ naa ngụ ana tụ ọ ịrayị ẹwụrọnya ọnị ozi Ijosaya ọsa ana aā hị́ Ịzẹdẹkaya sị vị ohinọyị nị.

A mẹmẹ hị́ Ijeremaya

⁴ Ijeremaya ka, Ẹnẹyịmavara ộ kà a yị ọnị ka,

⁵ dị a va yẹ ka ee zyẹẹ aanị ọnị ộ yẹ ọnị, dị a va yẹ ka aa ma ọnị ọnị Ẹnẹyịmavara hụrẹ nyị ọnị ka ọnị vaa vị ọnịsẹ anị yị anẹhẹ nị.

⁶ Dị ọnị ka, oonino! Ẹnẹyịmavara Ohomorihi, ozweyi ọnị vị nọ, ọnị ẹ yị yara ka ịrẹyị o.

⁷ Ama dị Ẹnẹyịmavara kà a yị ọnị ka, a sị ọnị kà a ka ọnị ọ sị vị ozweyi, agụvị ka avaba aza ọnị ọnị ọọ tụ ọnị hi ọnị vaa nọ ịdị anị nị. Ịsa tụra ịsa ọnị ọnị ọọ ka yị ọnị, ọnị vaa kà nị.

⁸ Ẹnẹyịmavara kà, asị ọnị hí angwa ka ọnị vaa ya pe ọnị dị ọnị dọ ọnị tụ.

⁹ Ọ kà, dị Ẹnẹyịmavara sị ụvọ kanyị ọnị irenu, dị ọ kà a yị ọnị ka, re, ịrẹyị anị ọnị ọnị vaa kà ọnị sị tụ ọnị irenu aanị nị.

¹⁰ Dị Ẹnẹyịmavara kà, hụrị ajịnị, ọnị ọ raa sị ụkata yị ọnị ka, ọnị ọ̀ nyị ẹbẹẹba avaba anẹkụra ọnịrị ohinọyị nịnị. Ọ kà, ọnị ọ̀ nee hu ịsaa hụrị ẹtẹ, dị ọnị oo wụ ẹnyị vàa hi ẹtẹ. Ọnị ọ̀ọ gara ịsa ẹnyị ha, dị ọnị ọ̀ọ chaka wa. Dị ọnị ọọ tenyi ịsa ẹnyị, dị ọnị ò re chire ịsa ẹnyị.

Etore ẹẹva

¹¹ Ẹkụhị ọnya Ijeremaya kà Ẹnẹyịmavara ộ họ̀ ọnị ka, sị ọnị ee ré aanị? Dị ọnị tụ́ ohi ka, avọ́ ọchị ana aā hị́ arịmọndị yọ nị.

¹² Dị Ẹnẹyịmavara kà a yị ọnị ka, ọnị oo re ẹtẹ ẹtẹẹrẹ nị. Ẹnẹyịmavara kà ọnị nyẹmba vị enee zi ka ịrẹyị ọnị ọnị kà ọ̀ sẹ.

¹³ Dị Ẹnẹyịmavara rẹ họ̀ ọnị use ụpẹ ọhụva ka, sị ọnị eè re nị. Dị ọnị ka ọnị o re ụnọkọ ọnị enyi anị aa há, ụnọkọ ọnọọ vị ana kahi, dị ọ va eyi ka oze ẹbẹẹba, dị aa vaa vàa ha.

¹⁴ Dị Ẹnẹyịmavara kà hụrẹ eyi ẹbẹẹba ịsị edivi vaa gara vee ku avaba aza ene hi ịnị ẹtẹ ọnọnị nị.

¹⁵ Ẹnẹyịmavara kà ọnị aa hị́ avaba anẹkụra ene hi eyi ẹbẹẹba ẹnịrị ohinọyị ẹnịnị. Ohinọyị ẹnịnị vaa vẹ dị ẹ yaatụ ịnị oze ovwoovu Ijerusarẹmị, dị ẹnịị ta kara ọvọ ana jị kara a. Dị ẹ rẹ vavọọ ta kara ẹkụra ana vọ hi Ijuda bemi-bemi.

¹⁶ Ọ kà ọnị vaa mẹ̀ ọkarẹyị yị wa agụvị ebira odivi ẹnịnị ana mẹ ka ẹnịnị è yị ọnị tịtẹ. Ẹnịnị ẹ naa rị eturare ịra yị ori nịnị, dị ẹ yaa hẹkẹ ịsị ọnị ẹnị ụvọta sị ụvọ ẹnịnị mẹ nị.

¹⁷ Ijeremaya ka Ẹnẹyịmavara ọọ ka yị ọnị ka, ọnị o tenyi ẹngụ anị, dị ọnị ọ̀ kà a yị Anijerusarẹmị nịnị avaba ịsa ọnị ọnị ọ̀ọ mẹ ọda yọ, ọ ka, asị ọnị hụvị ẹnịnị hụrị ayịnẹ ka ẹ̀ẹ vị avọọ vị ọnị aa mẹ ayị hụrị ọnị ịnẹ nị eyi ẹnịnị nị.

¹⁸ Ọ kà dị Ẹnẹyịmavara kà, re, hụrị ajịnị, ọnị ọ mẹ̀ ọnị ka ọnị ọ̀ ya anka ẹkụra ana jị ọvọ kara avọọ, ọnị ọ̀ ya anka ọhẹ ana a sị enyusẹ mẹ, dị ọnị ọ̀ rẹ ya anka ugene ana sị enyusẹ ọkatẹngụ mẹ avọọ nị. Ẹnẹyịmavara kà agụvị ka avaba Anijerusarẹmị ẹnịrị ohinọyị Anịjuda nịnị, ẹnị ọdọvịdị nịnị beri ẹnị ohirẹsụ irehi Ohomorihi nịnị vaa kwẹẹtẹ tụ ọnị.

¹⁹ Ọ kà ẹnịnị vaa kụ ịrẹkụ tu ọnị ama ẹnịnị ẹ yị va zụụ za ọnị, agụvị ka ọnị ọ yà pe ọnị ọ yị dọ ọnị ha.