Ijemiisi 4 - IWE ỌNỊNỊ

Sị ẹẹ̄ kụ́ ịrazịị ngụ ịnị ịragụ Ohomorihi

¹ Sị ẹẹ̄ kụ́ ịrẹkụụ vẹ, sị ẹẹ̄ mẹ ka waa zyaazị nịnị? Iruvo ịrazị awụ nịnị ọ vị ka ayị awụ nịnị ọ yị nẹtẹ agụvị oyisì odivi ẹngụ awụ nịnị.

² Wee sì ka wa nyị ịsa, ama wẹ yị zụ nyị ọ nịnị, agụvị avọọ dị ụ waa wụ́ ọza nịnị nị. Waa mẹ eyọhụrẹ hi ịsa ọza nịnị pooro di ò yi tù wu nịnị ụvọ nị, dị ụ kụkụ vara a ịrazị nịnị. Iruvo ọnị ụ wẹ̀ yị mā zụ sị nyị ịsị u wee sì nịnị, ọ vị ka wẹ yị mā da ịpẹ ka Ohomorihi ọ̀ sị wụ nịnị nị.

³ Wàa hyakụ da ịpẹ, ọ yị sị, agụvị ka wẹ yị da ịpẹ a mẹ̀ vọrọ nịnị; agụvị ka ịsa ene zé ẹwụ ịnyara eyi nịnị kẹnẹ u wee sì nịnị nị.

⁴ Wâ navọ Ohomorihi tịtẹ nịnị anka ọsẹrẹka ana navọ ọva anị tịtẹ avọọ. Wáá yẹ nịnị ka ọza ene sì ịrẹyị ịsa ịnị ẹhẹ ọnọnị vị ọnịvị Ohomorihi? Ọza ọnịrị ẹhẹ ọ̀ọ sị ọta za, ọza ọnọọ ọ sị vara ọnịvị Ohomorihi.

⁵ U wéé ro ka ịrẹyị kẹnẹ-kẹnẹ Iwe Ohomorihi aa kà nị, ịjị ọ kà a ka: Ụhwẹ Ọnịnị oni Ohomorihi sị tụ́ ịnị ayị awụ nịnị vị anaā kụ̀ ụhị?

⁶ Ama ụkata oni Ohomorihi sị yị ọ banyị hu nị, agụvị ka Iwe Ohomorihi ọ́ kà a ka: Ohomorihi o yi sì aza anaā sịị ẹngụ ẹnịnịị̄ tụ́ ẹba ama ọọ̄ mẹ̀ ọyịzaa yị aza anaā kà ẹngụ ẹnịnịị chi.

⁷ Agụvị avọọ ká ịrẹsụ hi yị Ohomorihi nịnị! Asị ụ sị oze yị Echu nịnị, ka o vee zwèe kà naa wụ nịnị.

⁸ Kà pe Ohomorihi nịnị, ka ọnị rẹ vaa kà a pe wu nịnị! Ẹwụ nịnị ọnịvị, sị ụvọ hụụnị ịsa odivi nịnị! Tenyi ayị awụ nịnị, ẹwụ nịnị ana aa mẹ ayị ẹẹva!

⁹ Sị ụya rị ẹngụ awụ nịnị, wee nowu dị ụ wa rẹẹ jị òrèrè nịnị. Waa jị òrèrè, asị u re kuku nyi unyi nịnị! Du ayị, asị ụ rẹ kụkụ jẹ ịrajẹ nịnị!

¹⁰ Kà ẹngụ awụ nịnị chi ọvịdị Ohomorihi Ananyị yị, ka ọ vaa sị wụ nịnịị tụ́ ẹba!

Asị ụ sị ẹngụ awụ vị ọmọkarẹyị!

¹¹ Ẹwụ nịnị ẹyịnyara amị, asị ụ rẹ kà ịrẹyị odivi ẹngụ nịnị! Ọza ana àa kà ịrẹyị odivi ọnọhụva anị, à vị ka dị ọ jị ịvị yọ, ọda Ohomorihi ọ́za ọnọọ aa kà ịrẹyị odivii hi, dị ọ raa jị ịvịị yị avọọ nị. Yẹ ka wàaa jị ịvịị yị ọda Ohomorihi, wẹ yị kụkụ mẹ̀ ịsa ọnị ọda kà, ụ kụkụ aa jị ịvịị yọ avọọ nị.

¹² Ohomorihi ọnịnya kẹnẹ ọọ̄ mẹ̀ ọdaa yị ọza, ọnị ọọ̄ rẹẹ mẹ̀ ọkarẹyị nị. Ọnị ọ zụ dọ ọza há nị, ọnị ọ rẹ zụ wụ̀ ọza nị. Ẹnẹ vị ẹwụ ana aa jị ịvị yị ọnọhụva awụ?

Ẹwáá nyị ọda ẹngụ awụ nịnị?

¹³ Sị ụtọ pe ẹtẹ nịnị oo, ẹwụ nịnị ana aa kà a ka: Ajịnị yaa nọ ẹkụra ọsọọ; ụhwọọ yaa nọ ẹkụra ọsọọ, dị ya na mẹ ịrayị ọnya ịzọọ. Yaa yà ịzọọ, dị ya sẹ ohu, dị ya rị ọgụ.

¹⁴ Ama wẹ yị yẹ ịsị ụhwọọ vaa vị nịnị. Sị ụ sị ọ hị́ ka ụhwẹ awụ nịnị ọ́ọ vị? Vị ụ sị mẹẹ nịnị anka eguhi ene èe chire chee, dị ọ wụsẹ ta avọọ nị.

¹⁵ Ịsị a vọrọ ka wa kà nịnị, ọ vị ka: Ohomorihi Ananyị yị òo sì, ị vaa yàra, dị ị mẹ ọsọnị, dị ị rẹ mẹ ọsọọ.

¹⁶ Ama ẹwụ nịnị vị anaā yị sị ẹngụ awụ nịnịị tụ́ ẹba, di u ree wo oto nịnị. Ẹngụ oto ọnọọ e yi zoza.

¹⁷ Agụvị avọọ ọza ana àa yẹ ịsa ana vọrọ dị ẹ̀ yị mẹẹ nị, ịvị ọ vị yọ nị.