Ijemiisi 2 - IWE ỌNỊNỊ

Asị ụ nyị ọza remeyi

¹ Ẹwụ nịnị ẹyịnyara amị, anka ọza ana sị ayị tụra Ijeesu Ikirisiti Ananyị yị ana nyị ụbanyị hu keekere, asị ụ zẹẹ ka wa nyị ọza remeyi nịnị o!

² Àa kà a ka àa nyị ọza ana kụ́ ịta chomi-chomi hi ẹngụ, dị ọ rẹ sị ochirigege igooru tụ ụvọ nị. Dị a rẹ nyị onosiye ana kụ́ ụsẹmụsẹ hi ẹngụ nị. Dị ẹ vẹ aha ọnị ụ kụ́ gụ nịnị nị.

³ Ama dị ahịka ọnyẹkẹhị ọnọnị ụ hị́ ẹngụ ẹtẹ anị nị, dị ụ wụsẹ ka: Aarịhịnị Nda, va yaayịtẹ ịzẹnị, ama dị ụ kà a yị onosiye ọnọnị ka ọ̀ jẹẹ ịzọọ, ẹ̀ yị vị avọọ, dị ụ ka ọ̀ na yaayịtẹ ini eteesu.

⁴ Wàa vavọọ aa mẹ, wee re ka we si nyima ee re aza ẹnyị eyii hu ọsa ịnị ẹngụ awụ nịnị avọọ? Yẹ ka ịsa oni u wee ro nịnị o yi zoza oo!

⁵ Ẹwụ nịnị ẹyịnyara amị oni mi sì, batọ nịnị oo! Wáá yẹ ka onosiye ene hi ịnị ẹhẹ ọnọnị Óhomorihi nyị ka ẹ̀ sị ayị tụraa, dị ẹ̀ nyị ụbanyị obooro nị, dị ẹ̀ rẹ nyị tụ́ ịnị ịjọva anị? Ohomorihi ộ kà a ka ẹ́ yị zụ nyị ka ọnị ọ yị vaa sịị yị aza ene sì ịrẹyị anị.

⁶ Ama ẹwụ nịnị aa sị oweyii re onosiye. Wáá tamayị ka ọzọbanyị nịnị ẹẹ̄ mẹ ehunaa wụ nịnị nị? Wáá yẹ ka ẹnị ẹ rẹẹ za wụ nịnịị nọ ikootu nị?

⁷ Wáá rẹ tamayị ka ẹnị ẹẹ̄ kà ịrẹyị odivii hi ịrẹha Ijeesu ana aa sịị hị́ wụ nịnị nị?

⁸ Wàa sị eyi pe ọda oni Ohomorihi ohinọyị ayị mẹ, anka a mẹ̀ chẹrẹ ẹ tụ́ ini iwe Ohomorihi óo zoza. Ọda ọnọọ ộ kà a ka: Sì ịrẹyị ọnọhụva awụ anka u mè sì ịrẹyị ẹngụ awụ.

⁹ Ama wàaa nyị ọzaa remeyi nịnị, wa sị ịvị mẹ nịnị; ọda ọ sị wụ nịnị za, agụvị ka wa sị jịnẹ ọda nịnị.

¹⁰ Ọza ọ̀ọ daka sị eyi pe avaba ọda Ohomorihi, dị ọ jịnẹ ọnya kẹnẹ nị, avaba ọda Ohomorihi bemi ọ jịnẹ avọọ nị.

¹¹ Ohomorihi ana kà a ka: Asị ụ sẹ̀ ịrẹka, ọnị ọ rẹ kà a ka: Asị ụ wụ̀ ọza nị. Wẹ̀ yị daka sẹ̀ ịrẹka, ama dị ụ wụ̀ ọza nị, wa raà jịnẹ ọda Ohomorihi.

¹² Agụvị avọọ dị ụ wa tamayị ịnị avaba ịrẹyị ọnị ụ waa kà, ọnịrị ebira ọnị ụ waa mẹ, ka Ohomorihi vaa mẹ̀ ọkarẹyị yị wụ anka ọda Ohomorihi ana nyẹngụ dọ yị tịtẹ.

¹³ Ọza ẹnẹ ẹ̀ yị mā vayị ọza, Ohomorihi ọnị ọ yị rẹ vaa vayị anị, ịhị àaa mẹ̀ ọkarẹyị yọ. Ọza anaā vayị ọza, vee re ka ayamva Ohomorihi ọ vaa mẹ ka asị ọnị rị ịvị, ịhị Ohomorihi àaa mẹ̀ ọkarẹyị nị.

Mẹ ebira ana sị zụ̀ ka waa sị ayị tụra Ijeesu nịnị

¹⁴ Ẹwụ nịnị ẹyịnyara amị, ọza ọ̀ọ ka ọnị ọ́ọ sị ayị tụra Ohomorihi, dị ọ̀ yị sị vị ebira mẹ nị, ọgụ ịsị ẹ yà ịnị anị? Wéé ro ka Ohomorihi vaa dọ ọ há agụvị ka ộ sị ayị tụra Ohomorihi kẹnẹ?

¹⁵ À kà a ka áa nyị ẹnẹbẹnị, àa vị onyeyiza ọnya ene è yi re ịta kú ẹngụ, dị è yi re re ịsa rị nị,

¹⁶ ama dị ọza ịnyara awụ nịnị yị kà a yọ kẹnẹ ka: Ngwa o! Wa na ka u vee re itaa kú ẹngụ ajịnị ọnịrị ịsọyịrị, ama di ẹ̀ yị nyị ịsị ọ sị yọ ịnị ịsa ene ee sì nị, áá nyị ọgụvọ ịsị u ro ka ọ́ọ vị?

¹⁷ Avọọ gẹdẹ-gẹdẹ ọ mẹ̀ rẹ yà nị; ọza ọ̀ọ ka ọnị ọ́ọ sị ayị tụra Ohomorihi, dị ẹ̀ yị sị vị ebira mẹ nị, ẹngụ ẹdọwụ ẹnẹẹ vị oku oyisu.

¹⁸ Aza ẹnyị ẹ zụ nyị ahankata ka: Ọza ịnya ộ dọ Ohomorihi wụ́ kẹnẹ, dị ọsa ọnị aa mẹ̀ ịsa ana vọrọ nị. Ohi amị ọ vị ka: Ọ́za mẹmẹ nyẹngụ dọ Ohomorihi wụ́ kẹnẹ dị ẹ yị sị vị ebira mẹ? Ẹma nyẹngụ sị zụ wụ ka maa sị ayị tụra Ohomorihi ini oze ebira ọnị maa mẹ̀.

¹⁹ Wâ dọ wụ́ ka Ohomorihi vị ọnya, óo zoza. Ama ụhwẹ echu nịnị ẹnị ẹ rẹ vavọọ dọ bẹẹ, dị ẹ hyakụ hụ agụvị avọọ aa da ẹgahị papapa, e mee hí angwa.

²⁰ Ịrẹyọyẹ awụ óo weyi oo! Ụ́ wáá ka à rẹ kụkụ kà a wụ ka ọza ọ̀ọ ka ọnị ọ́ọ dọ Ohomorihi wụ́, dị ọ̀ yị sị vị ebira mẹ nị, ka osusu samị-samị ọ vị nị?

²¹ Wáá kụkụ tamayị Abụrahamị ana vị ohiku ayị? Sị ẹ mẹ ka Ohomorihi ọ̀ jị ịhị yọ? Wáá yẹ ka agụvị ebira ọnị ọ mẹ yọ, ọ̀ mẹ̀ sị ozi anị Ayiziiki tụ́ ịrẹsụ ụta, dị ọ sị mẹ̀ ịsọvọ yị Ohomorihi nị.

²² Wee re ka Ábụrahamị mẹ̀ sị ayị tụra Ohomorihi, ọ rẹ sị vị ebira mẹ?

²³ Avọọ ịrẹyị ana chẹrẹ tụ́ ini Iwe Ohomorihi, mẹ̀ sẹ nị. Ịrẹyị ọnọọ ka: Abụrahamị ộ sị ayị tụra Ohomorihi, agụvị avọọ dị Ohomorihi za ịrịka tụ́ ịnị ọnịrẹyịzẹyịza nị; dị a kụkụ aa hị́ ọ ọta Ohomorihi nị.

²⁴ Wée re nịnị ka ịsa ọnị ọza mẹ, Óhomorihi sịị̄ jị ịhị yọ nị, ẹ́ yị vị agụvị ẹdọwụ anị kẹnẹ.

²⁵ Wáá rẹ tamayị Ịrahabị nịnị ana vị ọsẹrẹka avọọ? Sị ẹ vẹ dị Ohomorihi jị ịhị yọ? Aanịka ẹ yị vị agụvị ebira ọnị ọ mẹ? O mè re ọnụtụ Aniju nịnị, di o sì wa ọzọga nị; dị ọ mẹ ọgụvọ yị wa ka è zwe zị oze ọsa, dị asị a wụ̀ wa nị.

²⁶ Wâ yẹ nịnị ka, ẹ̀ yị kụkụ nyị ụhwẹ ịnị ẹngụ ọza, vị ọza ọnọọ sú avọọ nị. Avọọ gẹdẹ-gẹdẹ ọza ọ̀ọ ka ọnị ọ́ọ sị ayị tụra Ohomorihi kẹnẹ, dị ọ̀ yị sị vị ebira mẹ nị, vị ẹdọwụ anị sị mẹẹ anka oku ene sú avọọ nị.