Ihoseya 9 - IWE ỌNỊNỊ

Anisirẹrị nịnị vaa rị ụya

¹ Ẹwụ nịnị Anisirẹrị, asị ẹ rẹẹ jẹ ịrajẹ anka anẹkụra ana vọ agụvị ka ẹnịnị ẹ yị mẹ ịzẹyịza ka Ohomorihi ẹnịnị na. Ẹnịnị ẹ raà ná ẹngụ ẹnịnị yị ori nịnị anka ebira ọsẹrẹka avọọ, dị ẹ ya mẹ̀ ịsọvọ yị ori ịnị ụmẹ ịsa ọyịna.

² Ori ọnị ẹ yaa hẹkẹ, ịsa ọyịna vị ene vee weyi, dị ẹnịnị ẹ yị re eche hú ana zụ nọ wa onyi.

³ Ẹnịnị ẹ yị vaa ra ịnị ẹtẹ Ẹnẹyịmavara. Aza ẹnyị ẹnịnị vị ana vaa kụ varẹma nọ Ijipiti, dị aa kụ ọba ẹnyị nọ Asiriya ịzị ẹ vaa rị ịsa enyisi.

⁴ Anẹkụra ẹnẹẹ ẹ yị vaa zẹ ka ẹ ka eche ịsọvọ tịtẹ yị Ẹnẹyịmavara. Ayị Ẹnẹyịmavara o yi vee hine tụ ịnị ịsa ịsọvọ ẹnịnị. Ịsa enyisi ẹngụ ịsa ịsọvọ ẹnẹẹ vị yọ anka ịsa ọnị aza ana zị ẹngụ oku sị ụvọ kanyị avọọ nị. Ẹnịnị ẹ zụ rị ịsa ọnọọ ụngwẹ aa kụ wa ama asị ẹ sị ọ ngụ irehi anị.

⁵ Sị ẹ vaa mẹ ịnị ẹkụhị eche ana a nyị ọnịrị ẹkụhị ana sị rị eche Ẹnẹyịmavara?

⁶ Ẹnịnị ẹ̀ẹ daka há hụụnị ụvọ Anasiriya nịnị, Anigipiti nịnị vaa wụ̀ wa, di e ne wa tụ Imemihwisi nị. Isiriva ana vị ogu ẹnịnị vị ana avị vaa za rị, dị igegenechi hụ̀ va jịnẹ eburu ajẹngụ ẹnịnị.

⁷ Ụmẹ ụyọrị Anisirẹrị nịnị ọ sị ngụ tu wa, Ụmẹ ọnị Ohomorihi ee si si wa atọ ebira odivi ẹnịnị aa gụrị ẹtẹ. Ẹ yị jẹẹ dị Isirẹrị ẹ yẹ. Ẹnịnị ẹ yaa kà a ka ọnịsẹ ọnịrị ọnụtụ Ohomorihi nịnị vị onuvu. Ẹnịnị ệ nyị ịhyẹrẹ Ohomorihi agụvị ka ebira odivi ẹnịnị ọ sị vị ẹnẹmẹhị.

⁸ Ihoseya kà ọnịsẹ ọnị Ohomorihi tụ ka o sere Anisirẹrị ọnị vị nị. Ama aha tụra aha ọnị ọọ nọ vị ẹnẹ ẹ va ịrẹpa zi ọnị anka inomi avọọ. Ẹnịnị vị ana nyẹngụrẹyị hi ọnị huu na ngụ ịnị irehi Ohomorihi.

⁹ Ẹnịnị vị ana nyayịnẹ du ha anka ẹ mẹ vịdị ya Igibiya ịyẹẹyẹ. Ohomorihi e yi vee hi ayị ebira ọhịmị ẹnịnị. Ọ vaa sị ụya anị rị wa.

¹⁰ Ohomorihi kà ịpaapa ọnị re Isirẹrị, ọ sị mẹ anka ọza oo rere re ẹtụtụ igirepi ọwọọwa ịnị ụnọmị avọọ nị. Ohiku ẹnịnị vị Ọnịrị re anka ẹtụtụ ọchị ihwigi ene vi sọkọ-sọkọ ịnị ụmẹ anị avọọ nị. Ama dị ẹnịnị va ịrẹma anị na sị ẹngụ ẹnịnị chire ori ana a hị́ Ịbaarị-Ịpẹyọ ụvọ nị. Dị ẹ kụkụ aa nyị ọza īhyẹrẹ anka ori ọnị ẹ yaa hẹkẹ nị.

¹¹ Ụbanyị ẹnịnị vị ene hira ne hu anka inomi mee hira avọọ. Anyẹnẹẹ ẹnịnị ẹ yị vee zyẹẹ, dị ẹ hyakụ vaa ma ozi.

¹² Ezi ẹnịnị ana hụ, dị ẹ yara vị ọnị vaa jị ọyị yị, dị ọnị ọ tụ́ wa avosusu. Hụrẹ ụmẹ ọnị ọnị va ịrẹma ẹnịnị, vị ọnị odivi-odivi vana vee tù wa.

¹³ Ọnị vịdị e re Isirẹrị ka o zoza anka ọsọchị ana aa hụ ịnị ẹtẹ zoza avọọ, ama booro aanị ẹnịnị ụvọta ẹ kụ́ ezi ẹnịnị tụ́ ẹhẹ ka aa wụ̀ wa nị.

¹⁴ Ihoseya ộ họ̀ Ẹnẹyịmavara kà ịsị ọ vaa mẹ aza ẹnịnị kẹ? Ọ kà Ohomorihi ọ jị anyẹnẹẹ ẹnịnị ọbọrị, dị asị e re ịrẹva ẹnẹ ẹ zụ sị ka ozi.

¹⁵ Ohomorihi kà avaba ebira odivi ẹnịnị vi ene nyima hụrị Igirigarẹrị ịzị ọnị ya nyị ịhyẹrẹ ẹnịnị agụvị ịsa ọhịmị ẹnịnị. Booro aanị ọnị vaa dụ wa jịnẹ hụụnị ịnị irehi anị. Ọnị ẹ yị kụkụ vaa sì ịrẹyị ẹnịnị agụvị ka ọdọvịdị ẹnịnị e reè vene ọnị.

¹⁶ Ọ kà Isirẹrị sị mẹ anka ịvayịnị ọnị ẹpa anị wụ̀, dị ẹyị zụ tụ́ ẹtụtụ avọọ. Ẹnịnị ẹ̀ẹ daka ma ozi rụrụ, di e sì ịrẹyị ẹtẹẹtẹrẹ, ọnị vaa wụ̀ avaba ẹnịnị ha.

Ọnịsẹ ộ ka Isirẹrị

¹⁷ Isirẹrị ộ mẹ̀ akamawụ yị Ohomorihi anị. Ộ ka booro aanị ọnị vaa sị ụkata-ụkata dụ wa ka ẹ ngụ ẹkụra-ẹkụra zịịzị.