Ihoseya 8 - IWE ỌNỊNỊ

Anisirẹrị nịnị ee yi Ẹnẹyịmavara tịtẹ

¹ Ẹnẹyịmavara kà Anisirẹrị nịnị e hu ịkakanchị ịrẹkụ ka aza ọnọ, ka ẹnịnị ệ mẹ̀ akamawụ hi ọda anị, dị ẹ sị ahụ jịnẹ oto ọnị ọnịrị wa mẹ̀ tịtẹ, ọnịvị ẹnịnị vee chi hi wa ịrẹsụ anka ọkasịmẹ avọọ.

² Ẹnịnị mẹ vavọọ wụ̀ ịrẹyị ọnọọ, di e na owu na za Ẹnẹyịmavara. Dị ẹ ka ọ navọ ọ gụ ẹnị ụvọ agụvị ka ọnị ọ vị Ohomorihi ẹnịnị nị.

³ Ka ẹnịnị é yi ịsa ọyịza tịtẹ, ọnịvị ẹnịnị vị ana vaa dụ wa.

⁴ Ẹnịnị ẹ yị họ̀ Ẹnẹyịmavara wụ̀, dị ẹnị ụvọta nyị ohinọyị ọnịrị Ọdọvịdị ẹnịnị yị ẹngụ ẹnịnị. Ẹnịnị ệ sị igooru ọnịrị isiriva mẹ̀ ọnyịnọkụmị ori ẹnịnị. Ịsa ọnị ẹ mẹ̀ aanị ọ raà sị kụ usu tù ẹngụ ẹnịnị.

⁵ Ẹnẹyịmavara kà tee ẹwụnị Anịsamarịya! Yere ụmẹ ọnị ụ vaa sị rị ịhị nịnị? Ọ kà ọnị aa kụ́ ayị hi wa agụvị ọchị ọnị ệ bẹ anka ụnọ ọnị ẹ sị mẹ̀ ori ẹnịnị.

⁶ Ọza ọ bẹ ọchị ọnị ẹ yaa hẹkẹ avọọ nị. Ori kẹnẹ ọ vị nị, agụvị avọọ ọnị aa chaka a rugurugu ha.

⁷ Ẹnịnị ee chire ahị tụ ịnị aarẹ, okoruwa ọ vị ịsa ọyịna ọnị e vee re nị. Ọchị ihwiti ana aa jẹẹ vị ana vaa wụ̀, dị ẹ yị nyị ịsa, Ẹnịnị ẹ̀ẹ nyị ịsa ọyịna akụ, anikinami kẹnẹ aa rị ọ yị wa nị.

⁸ Anikinami nịnị ẹ raà za Anisirẹrị nịnị rị. Ẹnịnị ẹ yị nyị ịsị ẹ vị ịnị akakana anẹkụra nịnị ana vọ

⁹ Anka ịkẹrịkẹtẹ ọnị ọnịnya anaa ngụ zịịzị avọọ, Anisirẹrị nịnị ê ne si tù Anasiriya nịnị. Ẹnịnị ẹ̀ na raà sị ẹngụ ẹnịnị tụ wa ahụ.

¹⁰ Ẹnẹyịmavara kà ẹnịnị ẹ̀ẹ daka ná ẹngụ ẹnịnị yị anẹkụra nịnị, ọnị vaa kụ wa gụ. Ẹ yị vaa jẹẹ dị ohinọyị ọnịrị ọdọvịdị Anisiriya nịnị pa ẹva yị wa.

¹¹ Anisirẹrị nịnị vee hí ụta rụrụ ịzị ẹ vaa mẹ̀ ịsọvọ ịvị ẹnịnị. Ama ụta ẹnẹẹ vaa vị aha ịzị ẹ vaa ya mẹ̀ ịvị.

¹² Ẹnẹyịmavara kà avaba a mẹ vọrọ ka a mẹ̀ ịsọvọ ọnị ọnị chẹrẹ tịtẹ vị ọnị e si eyi wụ̀ anka ịrẹyị ọzọga avọọ.

¹³ Ẹnịnị ẹ̀ẹ daka sị ịsa ịsọvọ ana vọrọ mẹ̀ ịsọvọ, dị ẹ rị ọ nị, ọnị ẹ yị dọ ịsọvọ ẹnịnị. Ọ kà ọnị ẹ yị vaa sị eyi hụụnị ebira odivi ẹnịnị. Ọnị aa sị ụya ịvị ẹnịnị rị wa. Ẹnịnị vaa varẹma nọ Ijipiti.

¹⁴ Ẹnẹyịmavara kà Anisirẹrị nịnị e hi ayị ọnị ana tụ wa, dị ẹ yaa dà irehi ẹbanyị-ẹbanyị yị ohinọyị ọnịrị ẹkụra ẹbanyị-ẹbanyị ana a jị ọvọ kara ẹtẹ Ijuda, avọọ ọnị vaa tụ́ ịra ka o du irehi ẹnẹẹ ha.