Ihoseya 7 - IWE ỌNỊNỊ

Anisirẹrị nịnị e sì ịrẹyị ebira odivi

¹ Ẹnẹyịmavara kà ọnị e si ka ọnị ọ mẹ̀ Anisirẹrị nịnị ụkụ ama ebira odivi Anehwireemi nịnị ẹ yị tẹ̀. Anịsamarịya nịnị vị ana kụ ụvọ chire ịsa odivi. E yee cheeche, dị ẹ yaa chaka irehi ọza kụ ẹnya anị, di e hi oze aa mẹ̀ ako nị.

² Ama ẹnịnị ẹ yị ro ka Ẹnẹyịmavara ee re avaba ebira odivi ẹnịnị. Ee re ịvị mẹ jị ọvọ kara wa hi.

³ Ebira odivi ẹnịnị vị ene hine ohinọyị ayị, di ireche ẹnịnị vị ayohine ọdọvịdị nịnị nị.

⁴ Avaba ẹnịnị vị anaa sẹ̀ ịrẹka. Ịrẹkọyịsẹ vị ana jị odo tụ wa ẹngụ anka arasị mẹẹ̄ ngwụra zi ịbụrẹdị ana jị avọọ.

⁵ Ịnị ụmẹ ana aa nyị ohinọyị, ọdọvịdị nịnị vị eneē hu eche dị aa mẹrị wa, dị ohinọyị saasa aza ana sị ọ mẹ̀ enyinyii hu eche.

⁶ Ọyịkụ ẹnịnị sị mẹ anka ịra ana sị avaba ịrahụ za, dị akịna anị banyị hu avọọ ịnị ẹnẹnẹ eyinẹhẹ anị.

⁷ Ẹnịnị sị mẹẹ anka ịra anaa rị ọdọvịdị ẹnịnị avọọ, dị ẹ yị ọza ana vọrọ ka o na owu na za Ẹnẹyịmavara kà ọ gụ wa ụvọ avọọ nị.

⁸ Anehwireemi nịnị ẹ̀ raà kụ ẹngụ vahụra anikinami nịnị. Ẹnịnị sị mẹ anka Ịbụrẹẹdị ọnị ọza ẹ yị vara ana rị ịra eyi ụkụha ọnya avọọ nị.

⁹ Ẹnịnị ẹ yị yẹ ka anikinami ẹnẹẹ ẹ raà tụ ẹnị ọkụmị. Ịrẹsụ ẹnịnị ẹ̀ ta vị ẹwẹwa, ama ẹnịnị ẹ yị yẹ ka ẹnị ẹ yị kụkụ nyị ụkata.

¹⁰ Ka ẹnịnị aa sị ẹngụ tụ ẹba, ẹnịnị ẹ yị varẹma ne tu Ẹnẹyịmavara Ohomorihi ẹnịnị ịnị ụmẹ ọnị ịrẹyị sị tụ́ wa.

Anisirẹrị ẹ sị ayị tụra Anẹkụra ana vọ

¹¹ Anehwireemi nịnị sị mẹẹ anka arivadi avọọ nị. Ẹnịnị ẹ yị yẹ ịrẹyị, ọ yị tụ́ akanya dị ọza o vene wa, avọọ ẹ yaa hị́ Anigipiti, di e yee ne tụ́ Anasiriya nị.

¹² Ẹnẹyịmavara kà ọnị vaa za wa anka ịrẹpa mẹẹ za inomi ịnị ahị avọọ. Ọnị vaa sị ụya rị wa anka enube ẹnịnị ana kà ịnị ịragụ.

¹³ Ka ẹnịnị e yi ọnị tịtẹ o vee du wa ku nị. E vee su agụvị ka ệ mẹ̀ akamawụ hi ọnị. Ọnị yaanị dọ wa ha ama e yee cheeche kú ọnị.

¹⁴ Ẹnẹyịmavara kà ẹnịnị ẹ yị sị ayị ọnya na owu hi ọnị ẹngụ. E hi ịrẹsụ ode ẹnịnị aa jị òrèrè kẹnẹ nị. Ẹnịnị vị anaa sị ịsa na ẹngụ ẹnịnị yị ori anikinami ka ẹ mẹ̀ ịsa ịnị aarẹ nịnị zoza, dị ẹnị ẹ nyị akụ ọnịrị eche.

¹⁵ Ẹnẹyịmavara kà ọnị ọ zụ wa ịsa dị ẹ va yẹ nị. Ọnị ọ mẹ̀ ka ẹnịnị ẹ nyị ụkata ama di e yee geyi odivi anị nị.

¹⁶ Ẹnịnị e yi si ọgụvọ hụrị ẹbẹẹba ịda Ẹnẹyịmavara. Ẹnịnị sị mẹẹ anka ọkịta ana rara enee zụ che ịsa avọọ nị. Ọnịvị ẹnịnị ẹ vaa wụ́ ọdọvịdị ẹnịnị ha nị.