Ihoseya 4 - IWE ỌNỊNỊ

Anisirẹrị nịnị ẹ yị mẹ̀ ịzẹyịza

¹ Ẹwụ Anisirẹrị batọ wa wụ́ ịrẹyị Ẹnẹyịmavara nịnị. Ộ kà ẹwụ nịnị ana ra ịnị ẹtẹ ọnọnị ọ nyị ịrẹyị anị. Ẹ yị nyị ọza awụ nịnị ana mẹ̀ ịzẹyịza, a vị sì ịrẹyị anị. Ẹ yị nyị ọza ana tẹsị anị.

² Ẹnẹyịmavara kà ẹnịnị aa hị́ eku uruku, di e yee cheeche, dị ẹ yaa wụ́ ọza, di e yee yi oyi, dị ẹ yaa sẹ̀ ịrẹka; dị ezigi hi ẹtẹ avaba aha, dị aza wụ́ ẹngụ ha kẹnẹ nị.

³ Ẹtẹ ẹnịnị ọ sị tụ́ osusu agụvị ka aza ọnịrị uye ne beri inomi ọnịrị ivovo ịnị oku ne beri avaba ịsa ana nyị ụhwẹ e yee vú ẹtẹ.

⁴ Ẹnẹyịmavara kà asị ẹ sụ̀ ọ za azẹnịzẹnị. Ộ kà ohirẹsụ irehi anị nịnị ẹ nyị ohuvọ anị nị.

⁵ Ọọdụ hi ịrahụ vị ọnị ẹnịrị ọnịsẹ ẹnịnị aa tụ́ ahụ vanga, ộ kà ọnị vu Isirẹrị ọnyị ẹnịnị ẹtẹ.

⁶ Ẹnẹyịmavara kà eyogu aa wụ́ aza anị. Ohirẹsụ irehi anị nịnị ẹ yaa mẹ̀ akamawụ hị́ ọnị. Ọnị o yi wa tịtẹ agụvị ka ẹnịnị e hi ayị ịrẹyị anị. Agụvị avọọ ọnị ẹ yị vaa tamayị ezi ẹnịnị.

⁷ Ẹnị ohirẹsụ irehi anị maa rụrụ hu avọọ, avọọ ịvị ẹnịnị maa banyị hu avọọ nị. Agụvị avọọ Ẹnẹyịmavara kà ọnị aa vara ịsị ẹ vị ụbanyị ẹnịnị ụhị yị wa.

⁸ Ẹ yaa tụ́ aza ụka ka ẹẹ mè ebira odivi agụvị dị ẹnị ẹẹ kụ́ ịsa ịsọvọ ịvị ẹnịnị rị.

⁹ Ẹnẹyịmavara kà ọnị vaa sị ụya ọnyọọnya rị aza ọnịrị ohirẹsụ irehi anị nịnị, dị ọnị sì wa ụta ebira ẹnị mẹ̀.

¹⁰ Ịsa ọyịrị ọnị ẹ yaa rị ọ yị vaa ha wa ịnẹ. Ịrẹkọyịsẹ ọnị ẹ yaa sẹ aha ori irenyi-irenyi ọ yị vaa sị ozi yị wa agụvị ka e re yi Ẹnẹyịmavara tịtẹ na saasa ori.

Ẹnẹyịmavara ọ yị sì ịrẹyị ori ọyị hẹkẹ

¹¹ Ịrẹkọyịsẹ ọnịrị eche ahaahara ene e yee hu, ọ raà dọ wa ịrẹyọyẹ.

¹² E yee họ̀ use etore hụụnị ụvọ ori ana sị ọchị bẹ. Okutẹ aa jị ẹva yị wa. Ụhwẹ ịrẹkọyịsẹ ọ raà sị wa nyeeyi ka asị ẹ yẹ Ohomorihi ẹnịnị.

¹³ Ẹ yaa mẹ̀ ịsọvọ ịrẹsụ ataba ọnịrị otutu zịịzị, ẹ yaa mẹ̀ iruvo ọchị oki ọnịrị aha tụra aha ọnị uhuhu anị zoza. Agụvị avọọ, ezi ẹnịnị anẹẹ ọnịrị ose ezi ẹnịnị aa sẹ̀ ịrẹka nị.

¹⁴ Ẹnẹyịmavara kà ọnị ẹ yị vaa sị̀ ụya rị wa agụvị ka anọrụ ẹnịnị vị anaa na irehi ori ne pe ọsẹrẹka sụ̀. Anka ụhịrẹyị mẹẹ kà a, “aza ẹnẹ ẹ yị yẹ ịrẹyị vị ene ee vu.”

¹⁵ Ọ mẹ yị daka vị ka Anisirẹrị nịnị aa sẹ̀ ịrẹka, asị Ijuda bẹ ụvọ tụ́ ịnị ebira ọnị ẹ yaa mẹ̀. Asị ẹ nọ Igirigari a vị Ịbẹtị-Aveni na hẹkẹ ori, asị ẹ hị́ eku uruku ịnị ịrẹha Ẹnẹyịmavara ana yara.

¹⁶ Ayị Anisirẹrị ẹ katẹngụ anka imaaru; Ẹnẹyịmavara ọ́ọ́ zụ aa kụ́ wa na rị ịnị avị anka atẹmẹ?

¹⁷ Ehwireemi ọ̀ raà bẹ ụvọ tụ́ ịnị ahẹkẹ ori nịnị. Agụvị avọọ aa ha ẹtẹ tụ ọ.

¹⁸ Ee sị eche hu, dị ẹ nyima ee sì ọsẹrẹka ọnị ẹnịrị waa sụ. Ẹnịnị e sì ịrẹyị ịsị ụhị hụụnị ịsị ẹ vaa sị ụbanyị yị wa.

¹⁹ A vaa kụ wa kwooze anka ahị ọbanyị mẹẹ kụ ịsa avọọ. Ụhị vaa nyị wa agụvị ịsọvọ ọnị ẹ yaa mẹ yị ori.