Ihoseya 2 - IWE ỌNỊNỊ

Ẹnẹyịmavara ộ tụ́ Isirẹrị ohuvọ

¹ Ẹnẹyịmavara kà, ẹ hị́ ọhụva ẹnịnị ana vị anọrụ Amị (Aza Ohomorihi), dị ẹ hị́ anyẹnẹẹ ẹnịnị Iruhama (Ọnị Ẹnẹyịmavara sì).

² Dị Ẹnẹyịmavara kà Isirẹrị ọ yị kụkụ vị ose anị, dị ọnị ọ yị rẹ kụkụ vị ọva anị nị. Ộ kà ẹnịnị ẹ da ịpẹ yị ọnyị ẹnịnị ka asị ọ rẹ kụkụ sẹ̀ ịrẹka. Dị ọ hụrẹ ụvọ onyeehi ẹnẹẹ ọnị ọ za ku ayị.

³ Ẹnẹyịmavara kà ẹ yị va ahụ vẹ ịrẹma, dị ọnị tu ọ ahwaahụ anka ịhị a maa avọọ. Dị ọnị naavọ tụ ịzị ẹ yị nyị enyi, dị onyi wụ ọ.

⁴ Ẹnẹyịmavara kà ọnị ẹ yị vaa vayị ezi anị agụvị ka ezi ọta ẹ vị nị. Ọnyị ẹnịnị vana sẹ̀ ịrẹka dị ọ ma wa.

⁵ Ọnyị ẹnịnị vị ọsẹrẹka ana sị ụhị wara rị. Ịnị ịrẹkọyịsẹ ọ ya dọ ịrẹẹ ẹnẹẹ nị. Ọ kà ọnị aa dụ onyeehi zịị agụvị dị ọnị ọ rị, dị ọnị o hu, dị ọnị nyị achị ọnịrị angwẹ orivi ne beri eche nị.

⁶ Agụvị avọọ Ẹnẹyịmavara vaa sị igegenechi jị ọvọ gu ọ hi, dị asị o re oze zị.

⁷ Ọ̀ọ dụ onyeehi anị pooro, ụvọ anị e yi vee ku ọ. Òo si wa, o yi vee re wa. Ịjọnọọ ọ vaa kà a ka ọnị aa va ka ọva ịpaapa na, ịzị ẹhẹ anị yaa ze yọ hu.

⁸ Ayị oo hí ọ ka Ẹnẹyịmavara kẹnẹ ọọ̄ sị akụ, ọnịrị eche ne beri angwẹ orivi mẹ̀ ọza ẹyịza nị. Igooru ọnịrị isiriva ana aa sị na hẹkẹ ori Ịbaarị vị anị.

⁹ Agụvị avọọ, ịnị ụmẹ ịsa ọyịna, ọnị ọ yị vaa zẹ ka e re akụ ọnịrị ẹtụtụ ọchị anaā sịị mẹ̀ eche. Ẹnịnị e yi vee re ẹyị ịsụpa ọnịrị òwù ene e vee si hi achị kú ahwaahụ ẹnịnị.

¹⁰ Ẹnẹyịmavara kà ọnị vaa tụ́ wa ahwaahụ eyi aza ana vị onyeehi anị nị. Ộ kà a yị nyị ọza ana vaa zụụ dọ ọ ha.

¹¹ Ộ kà ọnị rẹ vaa za avaba eche Anisirẹrị jẹẹ; eche ụhwẹ-ụhwẹ ọnịrị eche ịrayị-ịrayị ẹnịnị ne beri eche ụhwọtụ irenyi-irenyi ọnịrị avaba eche ana vọ.

¹² Ẹnẹyịmavara kà ọnị vee du ụbazị ịvayịnị ọnịrị ọchị ihwigi ọnị onyeehi anị sị si ọ ụta ịbẹhị anị ha. Ọ́ kà ọnị vaa vara ịzọọ iruku, dị uye ini avị aa rị ịsa ene hi ịnị anị.

¹³ Ẹnẹyịmavara kà ọnị vaa sị ụya rị ọ agụvị ẹkụhị ọnị ọ sị hẹkẹ Ịbaarị aha irenyi-irenyi ọnịrị ọnị ọ rị eturare ịra yị ọ. Dị ọ hi ayị Ẹnẹyịmavara, dị ọ kụ ochirigege ọnịrị ọmọ hi ẹngụ ana a sị va onyeehi nịnị eyi ku ẹngụ anị nị.

Ẹnẹyịmavara oo sì ịrẹyị aza anị

¹⁴ Ẹnẹyịmavara kà ọnị e vene e nọ ịnị ụnọmị ịzị ọnị vaa tangwa ka ịrẹyị yọ, dị ọnị ọ dọ ayị.

¹⁵ Ọ kà ọnị aa sị ụbazị ịvayịnị anị ẹnẹẹ varẹma yọ, dị ọnị vara inozi ana vị aha akanya aha eyọtụra. Ọ vaa sị ẹngụ anị yị ọnị ịzọọ anka ộ mẹ mẹ̀ ịnị ozweyi ọ maa hụrị Ijipiti.

¹⁶ Ẹnẹyịmavara kà ụmẹ aa vẹ, ọnị Isirẹrị vaa hị́ ọnị adarehi, dị ẹ yị kụkụ hị́ ọnị ọga anka ọ mẹẹ̄ hị́ Ịbaarị.

¹⁷ Ẹnẹyịmavara kà ọnị vaa mẹ ka Isirẹrị o hi ayị ori Ịbaarị nịnị, dị ọza ẹ yị kụkụ hị́ ịrẹha ẹnịnị vụrụ-vụrụ.

¹⁸ Ộ kà ọnị vaa dọ ka Isirẹrị ọ̀ ra ịnị ẹngwọọrọ. Ọnị vaa mẹ̀ ka asị uye ịnị avị nịnị ọnịrị inomi nịnị kụ́ akanya tù ọ. Dị ọnị rẹ kụ́ ịrẹkụ hụrẹ ẹtẹ kwooze yị ọ.

¹⁹ Ẹnẹyịmavara kà ọnị vaa sị Isirẹrị mẹ̀ ose anị pooro zịna-zịna. Ọnị vaa mẹ̀ ịzẹyịza ka a na, dị ọnị nyayịnẹ sì ịrẹyị anị, dị ọnị vayị anị.

²⁰ Ộ kà ọnị vaa sị ọ mẹ ose anị ịnị ịzẹyịza, dị ọ yẹ ọnị anka ọva anị.

²¹ Ộ kà ọnị vaa mẹ̀ ọda yị eguhi dị ọ zụ orihi yị ẹtẹ,

²² dị ẹtẹ mẹ̀ akụ, dị Igirepi ọnịrị orivi tụ́ hi ẹtẹ ịnozi Ijezirẹẹrị.

²³ Ẹnẹyịmavara kà ọnị vaa sị Isirẹrị jẹẹ, di o zee yọ. Ọnị vee sì ịrẹyị aza ọnị ọnị e yi vịdị si, dị aza ọnị ọnị ka ẹ yị vị aza anị kụkụ vị aza anị, dị ẹ yaa hị́ ọnị Ohomorihi ẹnịnị.