Ihoseya 13 - IWE ỌNỊNỊ

Ẹnẹyịmavara ộ kụ́ ayị hí Anisirẹrị nịnị

¹ Ịnị ịyẹẹyẹ, Anehwireemi ọ̀ọ ka ịrẹyị kẹnẹ, avaba Anisirẹrị ana vọ eē hí angwa ẹnịnị agụvị ka ẹnịnị vị aza ẹnị ana vọ sị eyi tụra. Ama Anehwireemi nịnị a raà mẹ̀ ebira odivi hi Ẹnẹyịmavara. Ẹnịnị aa hẹkẹ ori ana hị́ Ịbaarị, di e yee vú ẹtẹ nị.

² Booro aanị, ẹnịnị vị ana dà ụvọ tụ́ ịnị ụvọ hu avọọ ịnị ebira odivi ẹnịnị. Ẹnị ụvọta e kuku aa sị ụvọta ẹnịnị sị́ enyusẹ isiriva tụ́ ọnyọọnọkụmị ori ẹnịnị nị. Ẹnịnị vị ana aa mẹ̀ ịsọvọ yọ ori ẹnẹẹ, dị ẹ yaa ku ụnọ ene e tụ jẹẹ irenu.

³ Avọọ, ẹnịnị vị ene vee vú ẹtẹ anka ọyị mẹẹ̄ wụ́ eguhi ẹnẹnẹ, a vị ewuri avọọ nị. Ẹhẹ ẹnịnị sị mẹ anka azịzẹ ana ahị aa kụ́ para ịzị eē tụ́ ayị avọọ, ọ rẹ sị mẹ anka areyi ọnị ahị aa kụ́ avọọ nị.

⁴ Ẹnẹyịmavara kà ọnị ọ vị Ẹnẹyịmavara Ohomorihi ẹnịnị ana dọ wa ha hụụnị ụvọ Anigipiti ana za wa ọrịhị nị. Asị a nyị ịsa ọnyọọnyị ẹnị ẹ mẹ Ohomorihi ẹnịnị ẹ vị ọnị. Ẹ yị nyị ọdọzaha ọsa.

⁵ Ẹnẹyịmavara kà ọnị ô sere wa ịnị ụnọmị ịnị ẹtẹ ọyịwụ ịzị ẹ yị nyị enyi nị.

⁶ Ama ịjị ẹ sị ịsa rị, dị ịnẹ sị wa ha, dị e yee wu, dị ayị anị hi wa nị.

⁷ Avọọ ọnị vaa eyi ịrazị ka wa anka idu avọọ nị. Ộ kà ọnị ee ne kú oze zi wa anka ẹzụ avọọ nị.

⁸ Ọnị vaa nọ wa ịrẹvụ anka ọdụmị ọnị ozi anị vu avọọ nị. Ọnị aa gara wa chẹkẹ-chẹkẹ anka uye ịnị avị, dị ọnị rị wa anka idu avọọ nị.

⁹ Ẹnẹyịmavara kà ọnị vee vu Anisirẹrị nịnị ẹtẹ. Ẹnẹ zụ gụ wa ụvọ?

¹⁰ Ộ họ̀ wa use ka, ịzị ohinọyị ẹnịnị ya booro aanị agụvị dị ọ dọ wa ha? Ẹ ka ene e si ohinọyị ọnịrị ọdọvịdị nịnị. Ịzị ẹnịnị hì?

¹¹ Ọ kà ọnị ọ sị ọyịkụ-ọyịkụ sị ohinọyị yị wa, avọọ ọnị mẹ raà sị ayodu dọ wa nị.

¹² Ebira odivi Anisirẹrị nịnị vị ana chẹrẹ tịtẹ, di e tenyi ọ tẹ̀ ee zi wa.

¹³ Ẹnịnị aa mẹ ụra anka ozi ene yi ka ọnị ẹ yị jịnẹ hụụnị ihi ozi ọnyị anị avọọ nị.

¹⁴ Ẹnẹyịmavara kà a ọnị ọ́ọ́ jị wa hụụnị ụkata aneku? Ọnị ọ́ọ́ dọ wa ha hụrị ụvọ usu?

¹⁵ Anehwireemi ẹ̀ẹ daka nyị ịsa hu ezi ẹyịnyara ada ẹnịnị, Ẹnẹyịmavara kà ọnị vaa tụ́ ahị ịrịra hụrị ịnị ụnọmị eyi ịzị ọyị zị hụrẹ vẹ ka ọ va wụ enyi ini oswe ọnịrị ịkangga ene hi ịzọọ. Avaba ogu ọnị ẹ nyị vị ana va kụ́ hụrẹ wa ẹngụ.

¹⁶ Anịsamarịya vị ana a vaa sị ụya rị agụvị ka ẹnịnị ệ mẹ akamawụ hi Ẹnẹyịmavara. Eyi ịrẹkụ ẹnịnị vee su nị. Ezinụvọ ẹnịnị vị ana a vaa sẹ ku ẹtẹ, dị a sị ụhwọ ha avaba anẹẹ ẹnịnị ene zyẹẹ ịnẹ.