Ihoseya 1 - IWE ỌNỊNỊ

Ihoseya ộ nyị ọsẹrẹka

¹ Â nyị ọza ọnya aanị ana aa hị́ Ihoseya, ana vị ozi Ibeeri. Ẹnẹyịmavara ộ tụ́ ọ ụtụ ịnị ụmẹ ọnị Uziya, Ijotami, Ahazi, ọnịrị Ihezekaya nịnị sị mẹ̀ ohinọyị Ijuda vọ yị ẹngụ. Ịnị ụmẹ ọnọọ gẹdẹ-gẹdẹ, Ijerobowami ozi Ijowasi ọnị rẹ sị vị ohinọyị Isirẹrị nị.

² Ịnị ụmẹ ọnọọ, Ẹnẹyịmavara nyima aa tụ Ihoseya hi Anisirẹrị nị. Ọ́ kà Ihoseya ọ̀ na nyị ọsẹrẹka, dị ọ ma ezi ẹngụ ọza ẹnẹsa yọ. Ộ kà ọ vavọọ mẹ, dị ọ sị zụ Anisirẹrị nịnị mẹmẹ para ọnị hu naa hẹkẹ ori.

³ Agụvị avọọ dị Ihoseya na nyị ọsẹrẹka ọnya aanị ọnị ịrẹha anị rị Igoma ana vị ozi Idibirayimi nị. Dị ọsẹrẹka ọnọọ zyẹẹ, dị ộ ma ozi ọnọrụ yị ọ nị.

⁴ Dị Ẹnẹyịmavara kà Ihoseya ọ̀ yị́ ozi ọnọọ Ijezirẹẹrị. Ộ ka agụvị ka ọ yị vee ku dị ọnị ọ̀ sị ụya rị evere Ijehu agụvị aza anị ọnị Ijehu wụ̀ Ijezirẹẹrị. Ọ kà agụvị avọọ ọnị vee vu Anisirẹrị nịnị ẹtẹ.

⁵ Dị Ẹnẹyịmavara kà ịhị ọnọọ vị ọnị ọnị vee che ọkịta ọnịrị ọpa ẹnịnị ha eyi ịrẹkụ inozi Ijezirẹẹrị nị.

⁶ Dị Igoma rẹ varẹma zyẹẹ dị ọ ma ozi ọnẹẹ nị. Dị Ẹnẹyịmavara kà yị Ihoseya ka ịrẹha ozi ọnọọ ọ rị Iro-ruhama ọnị iruvo anị ọ vị “Ẹ yị nyị ayamva”. Ẹnẹyịmavara kà ọnị ọ yị kụkụ vaa vayị Isirẹrị dị ọnị ọ hyakụ vaa vagu wa.

⁷ Ama ọnị vaa vayị evere Ijuda, dị ọnị dọ wa ha agụvị ka ọnị ọ vị Ẹnẹyịmavara ana vị Ohomorihi ẹnịnị nị. Ẹ yị vaa nyị ka ẹ kụ ọpa ọnịrị ọkịta, ụ̀hwọ̀ ọnịrị umaata nọ ịrẹkụ, dị ẹ sị dọ ẹngụ ẹnịnị ha.

⁸ Ịjị ozi ọnọọ sị vịra, dị Igoma rẹ zyẹẹ ọsa, dị ọ ma a ọnọrụ nị.

⁹ Dị Ẹnẹyịmavara yị ozi ọnọọ ịrẹha ka Iro-Amị ọnị iruvo anị vị “Wẹ yị vị aza amị”. Dị ọ kà Anisirẹrị nịnị ẹ yị vị aza anị, dị ọnị ẹ yị rẹ vị Ohomorihi ẹnịnị nị.

Eyọtụra Anisirẹrị

¹⁰ Anisirẹrị nịnị vaa rụrụ anka àarẹ ịnị òkū ọnị ọza ẹ yị yẹ ịrịka anị. Ịzị a ya kà a ka ẹnịnị ẹ yị va aza anị, a rẹ vaa hị́ wa ezi Ohomorihi ana yara nị.

¹¹ Anijuda ọnịrị Anisirẹrị nịnị vaa vabẹ, dị ẹ nyị ọdọvịdị ọnyara yị ẹngụ ẹnịnị. Dị ẹ varẹma dọ ẹtẹ ẹnịnị agụvị ka ẹkụhị Ijezirẹẹrị vaa nyị ẹngụ anị.