Ịhagayị 2 - IWE ỌNỊNỊ

Uzoza irehi Ohomorihi ọwọọwa

¹ Ịnị ẹkụhị ohurọnya ịnị ụhwẹ ịhịmba ịnị ịrayị ọnọọ, Ẹnẹyịmavara rẹ tụ́ Ịhagayị ana vị ọnịsẹ ụtụ nị.

² Dị ọ ka Ịhagayị ọ hị́ Izerubabẹrị ozi Isiritiyẹrị ana vi Ịgọvọnọ Ijuda ọnịrị Ijosuwa ozi Ijehozadaki ana vi ohirẹsụ ọbanyị irehi Ohomorihi ne beri aza ana hụrẹ Ịbabịrọnị vavẹ. Dị ọ ka Ịhagayị ọ̀ họ̀ wa ụsẹ ka,

³ ẹnẹ vịdị re irehi Ohomorihi mẹmẹ zoza ịyẹẹyẹ? Ọ mẹmẹ ya ịnị eyi ẹnịnị booro aanị? Irehi ọnọnị ọ́ọ́ da ọ́gụ́ gụrị ana a vịdị da?

⁴ Ama dị Ẹnẹyịmavara, Ochẹtẹẹngụ ka yị Izerubabẹrị ọnịrị Ijosuwa ne beri avaba anẹkụra ka ẹ sị ayị za, dị ẹẹ mẹ̀ ụkọrọ ka ọnị vaa ya pe wa.

⁵ Dị ọ rẹ ka yị wa ka, asị ẹnịnị hí angwa agụvị ka ọnị vaa mẹ̀ ịsa ọnị ọnị ka yi wa ini ụmẹ ọnị ẹ yaa jịnẹ hụrẹ Ijipiti. Ọ kà ọnị vaa ya pe wa.

⁶ Dị Ẹnẹyịmavara, Ochẹtẹẹngụ ka, e yi vee ku dị ọnị o ziizi ihinẹba ọnịrị ẹhẹ, oku ọnịrị ẹtẹ.

⁷ Ọ kà ọnị vee ziizi avaba ẹkụra, dị ọnị kụ́ ogu ẹnịnị ve hi ini irehi anị, di ịzọọ hí yị ogu ẹnẹẹ.

⁸ Ẹnẹyịmavara Ochẹtẹẹngụ ka, isiriva ọnịrị Igooru ẹnẹ hi ịnị ẹhẹ ọnọnị vị aanị.

⁹ Dị ọ ka, irehi ọnị ẹ yaa da aanị o vee zoza huna ana a vịdị dà ịyẹẹyẹ nị. Ịzọọ ọnị vaa sị ẹngwọọrọ ọnịrị ize yị aza anị nị.

¹⁰ Ịnị ẹkụhị ohurịhịmba ịnị ụhwẹ ịhịịna ịnị ịrayị ọhụva ọnị Ịdarịyọsị rị ohinọyị, dị Ẹnẹyịmavara rẹ tụ Ịhagayị ọnịsẹ anị ụtụ nị.

¹¹ Dị ọ ka Ịhagayị ọ họ̀ ohirẹsụ irehi Ohomorihi ịsị ọda ka ịnị ịrẹyị ọnọnị.

¹² Ọza ọ̀ọ sị uye ịsọvọ tụ ịnị awuru ọnị o chire, dị ụtọ awuru anị kanyị apapa, a vị ẹpẹ, a vị angwẹ orivi, a vị ịsọyịrị ana vọ nị. Ọ́ọ́ vaa mẹ ka ịsọyịrị ọnọọ ọ vara ọnịnị? Dị ẹnịnị tụ ọ ohi ka eyiye de.

¹³ Dị Ịhagayị rẹ họ̀ wa use ka, ọza ọ̀ọ kanyị oku ene du ọ ẹngụ, ọza ọnọọ ọ̀ọ kanyị ịsọyịrị ẹnịnị, vị́ ọ́ọ́ zụ mẹ ka asị ịsa ẹnẹẹ kụkụ vị ọnịnị nị? Dị ohirẹsụ irehi Ohomorihi nịnị ka, hee nị.

¹⁴ Ịjọnọọ dị Ịhagayị ve tu wa ohi ka, avọọ Ẹnẹyịmavara mẹ re avaba anẹkụra ọnọnị ọnịrị avaba ịsa tura ịsa ọnị ẹnịnị aa mẹ̀ nị. A yi nyị ịsa ịsọvọ ẹnịnị ana nị ọvịdị anị.

¹⁵ Agụvị avọọ ẹnịnị e ro o ịsị ẹ vaa mẹ dị ẹ vaa sị ịrẹta ọnya tụra ọsa ka ẹnị aa da irehi Ẹnẹyịmavara.

¹⁶ Dị ọ ka, ẹnịnị ẹ̀ẹ nọ ịzị ẹ kụ akụ ikirogirami oohu hị́ dị ahịka ẹhụ ikirogirami ẹẹwụ kẹnẹ e ne tu nị. Ọza ana nyị ẹhụ eche apori ẹvarẹwụ tụ ịnị ụnọkọ avọọ, dị ahịka ẹhụ eche apori oohu kẹnẹ ọ kụkụ vọ nị.

¹⁷ Dị Ẹnẹyịmavara kà, ọnị ộ tụ́ ahị ịrịịra, dị ọnị zụ ịrẹta hụrẹ ẹbẹẹba ka o du avaba ụkọrọ ọnị ẹ mẹ̀ ha, ama ẹnịnị ệ yị hụ agụvị avọọ ro ịnẹ varẹma.

¹⁸ Dị ọ ka, ẹnịnị e ne si eyi pe ẹtẹ hụrẹ ẹkụhị oohu tụra ẹẹna ịnị ụhwẹ ịhịịna ana a ká irehi Ohomorihi ọnọnị ẹtẹ. Ẹnịnị vee re ịsa ana vaa mẹ tụ́ ọvịdị na.

¹⁹ Ẹnẹyịmavara ộ rẹ kà a ka, ẹnịnị ẹ yị daka nyị ihu ayị, dị ẹ yi nyị ẹtụtụ ịvayịnị ọnịrị, ihwigi beri orivi, ọnị vaa mẹ̀ ka o ze yị wa.

²⁰ Ẹnẹyịmavara ộ tụ Ịhagayị ụtụ ụpọhụva ịnị ẹkụhị ohurẹẹna ini ụhwẹ ọnọọ ọnyọọnya.

²¹ Dị ọ ka yị Ịhagayị ka ọ kà yi Izerubabẹrị, Ịgọvọnọ Ijuda ka ọnị vee henyi ihinẹba ọnịrị ẹtẹ.

²² Ẹnẹyịmavara kà ọnị vaa dọ ịjọva ọnịrị ụkata hụụnị ụvọ anẹkụra nịnị. Ọnị vaa va ịkẹkẹ ịrẹkụ ẹnịnị ọnịrị aza ana tụra wa anga, dị ọkụrẹkụ ẹnịnị anaā tụra umaata vara eyi tu ẹngụ aa wụ ẹngụ ha beri umaata ẹnịnị.

²³ Ẹnẹyịmavara Ochẹtẹẹngụ kà a ịhị ọnọọ ọnị vaa sị Izerubabẹrị ozi ahụ anị ana vị ozi Isiritiyẹrị jẹẹ ka ọ mẹ ịjọva tụra wa ịrẹsụ. Ọ kà ọnị ọ raà nyị ọ.