Ihabaku 1 - IWE ỌNỊNỊ

Ihabaku ộ rị angwụ hi Ẹnẹyịmavara

¹ Â nyị ọnọrụ ọnya aanị ọnị ịrẹha anị rị Ihabaku. Ọnụtụ Ẹnẹyịmavara ọ vị nị. Ẹnẹyịmavara ộ sị ịrẹyị ana vaa mẹ̀ zụ̀ ọ.

² Ihabaku ộ họ̀ Ẹnẹyịmavara kà ịzị ọnị vaa da ịpẹ yị ọ nee tù di o vee tụ́ ohi? Ọnị ee sụ́ ùnè hi ọ ẹngụ ka ọ̀ dọ ẹnị ha hụụnị ẹngụkata ene tu ẹnị, dị ọ ha ẹtẹ tụ́ ẹnị nị.

³ Dị ọ rẹ họ̀ Ẹnẹyịmavara ụsẹ ka sị ẹ vẹ dị ọ navọ ka aza ẹnyị ẹ̀ mẹ ọsa rị, dị ọnị oo re e? Dị ọ ha ẹtẹ tụ́ aza ka ẹẹ zyaazị, ee ba egidi, ẹẹ wụ́ ẹngụ ha, dị aza ẹnyị aa kụ́ ogu ọsa mẹ̀ anị.

⁴ Ịzẹyịza ọ ta hụrẹ ẹtẹ. Aza ọhịmị ẹ kụkụ aa nyị ẹbẹẹba aza ọyịza nị. Aza ẹ yị kụkụ saasa ọda Ẹnẹyịmavara. Ọzọza vị ana mẹ̀ ịsa ene zee eyi kẹnẹ.

⁵ Dị Ẹnẹyịmavara tụ́ Ihabaku ohi, dị ọ kà o kana eyi di o re ịrẹyị avụna-avụna ene vee tu anẹkụra ana vọ eyi anị. Ọza ọ̀ọ vịdị ka ịrẹyị ọnọnị yọ, vị aa kụ ọ hi ireche nị.

⁶ Ẹnẹyịmavara kà ọnị vaa kụ́ Anibabironi nịnị kwẹẹtẹ ka ẹ dọ̀ avaba ẹkụra ene hi ẹtẹ ọnọọ, dị ẹẹ mẹ ịjọva tụra wa ịrẹsụ. Anibabironi ẹnẹẹ ẹ divi. Ẹ yị nyị aza ene hi wa ụhwẹ.

⁷ Aza vị ana nyayịnẹ ee hí angwa ẹnịnị. Agụvị avọọ dị ẹ yaa mẹ kẹnẹ o me zee wa eyi nị.

⁸ Umaata ịrẹkụ ẹnịnị ẹ rẹ hụụnị ẹzụ, dị ọkụrẹkụ ana tụra wa nyẹngụrẹyị hụụnị ẹzụ ene zi ube ịrahụ. Ẹnịnị vị anaa hụrẹ aha ẹnẹẹnẹ vee pe ọnịvị ẹnịnị kụ́ ịrẹkụ. Ẹ rẹ anka ọkasịmẹ ọnị ụngwẹ aa kụ̀ ana vẹ ẹtẹ vee che ịsa avọọ nị.

⁹ Ịrẹkụ kẹnẹ ọ jị wa aréyí nị. Aza ẹnị ẹ za ọrịhị ẹ rụrụ anka aarẹ.

¹⁰ Ẹnịnị vi eneē nyị ohinọyị anẹkụra ana vọ unyi. Dị ẹ yaa mẹ̀ ọdọvịdị ẹnịnị isiya nị. Ẹkụra ẹbanyị-ẹbanyị ana aa jị ọvọ ọgọdọ kara vị ọnị ẹ yaa sị mẹ̀ ị̀yẹ̀ẹyẹ̀. Dị ẹ kụ́ èzi na hịrẹ ọvọ dị ẹ ngụ ẹkụra, dị ẹ rị ọ.

¹¹ Ẹnịnị ẹ rẹ́ anka ahị. Ẹ̀ẹ raa rị ẹkụra, dị ẹ vaa yaamị na ngụ aha ọsa. Ẹnịnị e si eyi tụra ụkata ọnị ẹ nyị huu Ohomorihi.

¹² Ihabaku ka Ẹnẹyịmavara ọ vị Ohomorihi hụrị ụmọrụmọ, ụmẹ ọbọba. Ẹ yị nyị ẹngụ anị. Ọnị ọ vị ịda ọnị ẹnị sị ịrẹma ka nị. Ẹ yị vaa zẹ ka ẹnị e vú ẹtẹ. Ộ sị Anibabironi nịnị ka ọnị ọ sị sị ụya rị ẹnị agụvị ebira odivi ẹnịnị nị.

¹³ Ọnị ọ yẹ ka Ẹnẹyịmavara ẹ yị dọ ka oni o re ka ọza aa mẹ̀ ebira odivi. Asị ọ zẹ ka aza ọhịmị ẹ wụ̀ aza ọyịza vaa ha kẹnẹ.

¹⁴ Ẹnẹyịmavara ụ́ụ́ wa mẹ̀ aza ene hi ịnị ẹhẹ anka ivovo ana aā za kẹnẹ avọọ nị, a vị uye eneē turaa zị ẹnẹ ẹ̀ yị nyị ọdọvịdị anaā zụ̀ wa oze?

¹⁵ Agụvị avọọ, ọnịvị vaa sị arị ọnịrị ọhaa kụ́ wa hụụnị enyi. Ịjị ẹ raa kú wa gụ́, dị ayị ẹnịnị ee hine ka ẹnị ẹ raa nyị ẹkẹhị ọnị ẹnị vaa sị rị ịsa ene zẹ ẹnị eyi.

¹⁶ Avọọ dị ẹ mẹ̀ ịsọvọ, dị ẹ rị eturare ịra ọnị ẹ sị gụ́ ọha ẹnịnị ẹngụ ka ọ̀ mẹ ẹ́nị nyị ụvọha.

¹⁷ Avọọ ẹnịnị wáá mẹ vaa ne ọha ẹnịnị dị ẹ sị ayị ọkatẹngụ wù aza va ha nị?