Ịdanịyẹrị 9 - IWE ỌNỊNỊ

Aduwa ọnị Ịdanịyẹrị mẹ yị aza nị.

¹ Ọnọrụ ana aā hị́ Ịdarịyọsị ana vị Animeedi, ộ rị ohinọyị Ibabironiya ụmẹ ọnya aanị. Ada anị aā hị́ Atakisesi nị.

² Ịdanịyẹrị kà ịnị ịrayị ịpaapa ọnị ộ rị ohinọyị, dị ọnị àa ka iwe Ohomorihi. Dị ọnị re ka Ẹnẹyịmavara ộ vịdị kà a yị Ọnịsẹ Ijeremaya ka, Ijerusarẹmị vànaa mẹ̀ ịrayị ẹtarẹwụ dị aza ẹ̀ vana và nọ ịnị anị na ra nị.

³ Ọ kà ịjị ọnị maanị re e kẹnẹ, dị ọnị ệ ro ịrẹyị Ohomorihi Ananyị yị nị. Di oni nyima â mẹ̀ aduwa, dị ọnị â dá ịpẹẹ yọ nị. Ọ kà ọnị ệ yị rị ịsa, dị a hịka ịta kawụ-kawụ ọnya aanị kẹnẹ ọnị sị vụ, dị ọnị kụ atịtọ ku ịrẹsụ nị.

⁴ Ịdanịyẹrị ka ọnị ộ mẹ̀ aduwa, dị ọnị dọ irenu ịvị ẹnịnị yị Ẹnẹyịmavara ana vị Ohomorihi anị nị. Dị ọnị kà, Ohomorihi Ananyị yị, ọnị ộ banyị dị ọ rẹ nyị avaba ụbanyị nị. Ọnị ọ rẹ yị ma sị ahụ jịnẹ ịrẹyị ọnị ọnịrị ọza ka tịtẹ nị, ọza ene sì ịrẹyị anị dị aā mẹ̀ ịsa ọnị ọ mẹ ọda anị yọ vị ọnị o sị ịrẹyị anị pooro.

⁵ Dị ọnị kà, ẹnị ẹ sị ịvị mẹ, dị ẹnị ệ yị mẹ̀ ịsa ana vọrọ nị. Ẹnị ệ mẹ̀ ebira odivi dị ẹnị ệ yị sị ụbanyị yị Ohomorihi nị. Ẹnị ệ navọ ọda anị tịtẹ naa mẹ̀ ịsa ọsa.

⁶ Ẹnị ệ yị saasa ịrẹyị ẹnịnị ọnụtụ Ohomorihi ana vị ọnịsẹ, ẹnịnị mẹ va kà ịrẹyị anị yị ohinọyị ẹnịnị, ọdọvịdị ẹnịnị ọnịrị ohiku ẹnịnị beri avaba anẹkụra ẹnịnị.

⁷ Dị ọnị rẹ kà a yị Ananyị yị ka ọnị ọọ̄ mẹ̀ ịsa ana vọrọ nị ẹnị vanaā mẹ̀ ụhị nyị ẹngụ nịnị pooro kẹnẹ. Avọọ ọ mẹ yà yị avaba ẹnịnị ene hi Ijudiya ọnịrị Ijerusarẹmị beri avaba ẹnị Anisirẹrị ana Ananyị yị dụ ne hi ẹkụra irenyi-irenyi agụvị ka ẹnịnị ệ yị mẹ ịzẹyịza hi ọ nị.

⁸ Ộ ka ẹnị ohinọyị ẹnịnị, ọdọvịdị ẹnịnị ọnịrị ohiku ẹnịnị ẹ sị ụhị mệ nyị ẹngụ ẹnịnị agụvị ka ẹnị ẹ sị ịvị mệ hi Ananyị yị.

⁹ Dị ọnị rẹ kà, dị ẹnị daka yị sị ịvị mẹ hi Ananyị yị ana vị Ohomorihi ẹnịnị aanị, ọnị ọọ̄ vayị aza dị ọ rẹẹ̄ vagu aza nị.

¹⁰ Ẹnị ệ yị saasa ịrẹyị Ẹnẹyịmavara ana vị Ohomorihi ẹnịnị ọnịrị ọda ọnị ộ sị tụ ọnịsẹ nịnị ana vị ọnụtụ anị hi ẹnị.

¹¹ Ọnị ka avaba ẹnị Anisirẹrị ệ raa sị ahụ jịnẹ ọda anị. Ẹnị ệ yị saasa ịrẹyị anị. Agụvị avọọ aa sị ụya rị ẹnị anka a mẹ chẹrẹ ẹ tụ ịnị ọda ọnị ộ sị tụ Imosiisi ana vị ọnụtụ anị hi ẹnị nị.

¹² Dị ọnị kà a yị Ohomorihi ẹnịnị ka, ịsị ộ ka ọnị vaa mẹ ẹnịrị ọdọvịdị ẹnịnị ộ sị ọ mẹ. Ẹ́ẹ yị nyị anẹkụra ọsa ịrẹsụ ẹtẹ ọnị ọ maanị sị ụya rị da anka ọ mẹ sị ụya rị Anijerusarẹmị aanị.

¹³ Anka â mẹ chẹrẹ ẹ tụ ịnị ọda Imosiisi, avọọ â mẹ sị avaba ụya ẹnẹnị rị ẹnị nị. Ama ẹnị ẹ yị va hụvị avọọ da ịpẹ yị Ẹnẹyịmavara ana vị Ohomorihi ẹnịnị ka ọ navọ ọ vayị ẹnịnị. Ẹnị ẹ yị va và hụụnị ebira odivi ẹnịnị dị ẹnị ẹ mẹ ịzẹyịza.

¹⁴ Avọọ Ẹnẹyịmavara tenyi ẹngụ dị ọ sị ụya rị ẹnị nị, ka Ẹnẹyịmavara ana vị Ohomorihi ẹnịnị vị anaā mẹ̀ ịsa ana vọrọ ọnịrị ka ẹnị ẹ yị saasa ịrẹyị anị.

¹⁵ Dị Ịdanịyẹrị rẹ ka, Ẹnẹyịmavara ana vị Ohomorihi ayị, ẹwa sị ụkata awụ zụ dị ụ kụ aza awụ hụrị ẹtẹ Ijipiti nị. Dị ụ sị mẹ ịrẹha yị ẹngụ awụ pooro va ngụ ajịnị nị. Ama ệ ya sị ebira odivi mẹ hi u ọ.

¹⁶ Ẹnẹyịmavara, anka ụ mẹ mẹ̀ ịzẹyịza hi yị ịyẹẹyẹ navọ a sị ụ kụkụ kụ ayị hi Ijerusarẹmị huni aanị. Ẹkụra awụ ọnị ụ yaā sị ẹngụ awụ zụ ọ vị nị. Ama agụvị ebira odivi ohiku ayị nịnị, Ijerusarẹmị ọnọọ ọnịrị aza awụ avaba anẹkụra ana kara a kụkụ a sị mẹ enyinyi aanị nị.

¹⁷ Ohomorihi ayị, navọ wa wụ́ aduwa ọnịrị ịpẹ ọnị maa da aanị. Irehi ahẹkẹ awụ ene du và hí ẹtẹ aanị, navọ wa varẹma tenyi ọ dā jẹẹ e tenyi ọ da dị avaba aza ẹ yẹ́ ka ẹwa vị Ohomorihi nị.

¹⁸ Ohomorihi, kwogwo, navọ wa wụ́ ọngwẹ ayị. Kana eyi di u we ré ụya ọnị yaa rị aanị. Ré ẹkụra anaā sịị ịrẹha awụ hị́. Yaà ta u ubo agụvị ka vị ụ vayị ọza nị, ẹ yị vị agụvị ka yaa mẹ̀ ịsa ana vọrọ.

¹⁹ Ẹnẹyịmavara kwogwo, navọ wa wụ́ ọngwẹ ayị dị wa vagu yị. Ẹnẹyịmavara kwogwo, wụ́ ọngwẹ ayị dị wa hụvị ayị kwẹẹtẹ. Asị ụ kù ụvị dị aza ẹ̀ yẹ́ ka ẹwa vị Ohomorihi nị. Ẹwa nyị Ijerusarẹmị ọnịrị aza ene hi ịnị anị nị ọ.

Igebirẹẹrị ọ́ọ mẹ ẹhahi ịsẹ ọnọọ

²⁰ Ịdanịyẹrị ka, ọnị maà mẹ̀ aduwa dị ọnị aa dọ irenu ịvị anị ọnịrị ịvị aza anị Anisirẹrị nịnị nị. Dị ọnị aa da ịpẹ ka Ẹnẹyịmavara ana vị Ohomorihi anị ọ̀ navọ dị ọ varẹma tenyi irehi Ohomorihi anị dà nị.

²¹ Ọnị mẹ vavọọ aa yị mẹ̀ aduwa, dị ọnị vene ré Igebirẹẹrị ọnị ọnị vịdị ré ịnị ẹtẹ ịpaapa ọnị ọnị ré nị. Dị o hira hẹẹ ve tu ọnị nị. Ụmẹ anaā sịị mẹ̀ ịsọvọ oruva ọ vavọọ sị vẹ nị.

²² Ộ ka, ộ vẹ, dị ộ hị́ ọnị nị. Dị ộ ka vị ọnị vẹ ọ̀ yị va mẹ ọgụvọ yị ọnị dị ọnị ọ zụ yẹ iruvo ịrẹyị ọnị ọnịsẹ maanị ka tịtẹ aanị nị.

²³ Ộ ka Igebirẹẹrị ộ kà a yị ọnị ka, ọnị mẹ nyima aa mẹ̀ aduwa kẹnẹ Ohomorihi tụ ọnị ohi nị. Ọnị ộ vẹ ọ̀ọ yị va kà a yị ọnị, agụvị ka Ohomorihi o sị ịrẹyị anị ẹtẹẹtẹrẹ, agụvị avọọ ọnị ọ sị ụtọ pe ẹtẹ dị ọnị ọ mẹ ẹhahi ẹtẹ ọnị ọnị re aanị yị ọnị.

²⁴ Ịrayị ẹtarẹwụ oze ịhịmba Ohomorihi jị ka ọ vaa mẹ dị aza anị ana vị Anijerusarẹmị ẹ va hụụnị ebira odivi ọ̀ yị mẹ, dị a kụ ebira odivi hụrị ẹtẹ nị. A vaa mẹ ka à kụkụ mẹ̀ ịsa ana vọrọ pooro, dị ẹtẹ ọnị Ịdanịyẹrị ré aanị ọnịrị ịrẹyị ọnị ọnịsẹ kà aanị sị gẹ. Dị a varẹma ve tenyi irehi Ohomorihi ana ya Ijerusarẹmị.

²⁵ Ộ ka agụvị avọọ ọnị ọ yẹ́ ọsọnị ọ vaa mẹ ịrayị ẹtarẹwụ oze ịhịmba hụrị ụmẹ ọnị Ohomorihi sị mẹ ọda ka ene tenyi Ijerusarẹmị dà aanị pooro ne tu ka ọdọvịdị ọnị Ohomorihi nyị ọ vẹ. A vaa sị ịrayị ẹbẹẹta tụra ẹẹva oze ịhịmba tenyi Ijerusarẹmị dà. Dị aa tu oze hi ọ, dị a rẹ jị ọvọ kara a. Ama aza Ohomorihi vaa rị ụya o.

²⁶ Ịjị ụmẹ ọnọọ ọ̀ọ sị gụ, a vaa kụ ayị ọdọvịdị ọnị Ohomorihi nyị aanị dị aa wụ̀ ọ. Ọdọvịdị ọnyara vaa sị ụkata kụ isoja anị vẹ, dị e vu Ijerusarẹmị ọnịrị irehi Ohomorihi ana ya ịzọọ ẹtẹ. Ịsị ẹ vaa za ịrẹsụ yị ọdọvịdị ọnọọ ve divi ẹtẹẹtẹrẹ. A vaa kụ̀ ịrẹkụ dị e du ịsa ha ẹtẹẹtẹrẹ. Avọọ Ohomorihi mẹ mẹ̀ ẹ ọda tịtẹ nị.

²⁷ Ọdọvịdị ọnọọ ọnịrị aza ọrụrụ-ọrụrụ vaa dọ yị ẹngụ ẹtẹẹtẹrẹ dị ọ mẹ ịrayị ịhịmba. Ịnị akakana ịrayị ọnọnị dị ẹ yị kụkụ zẹ̀ẹ ka àa mẹ̀ ịsọvọ hi Ohomorihi. Ẹ yị rẹ vaa zẹ̀ẹ ka àa sị ẹyịza ve ịnị irehi Ohomorihi bẹ ẹ. Ọ vaa sị ịsa eenyisi na jẹ ẹ ịnị ohurohuro irehi Ohomorihi pooro na ngụ ịjị Ohomorihi o vu ọza ana sị ọ jẹ ịzọọ ẹtẹ anka ọ mẹ vịdị mẹ̀ẹ ọda e zi ọ.