Ịdanịyẹrị 8 - IWE ỌNỊNỊ

Ẹtẹ ọhụva ọnị Ịdanịyẹrị re ịnị ịpa ịdẹba ọnịrị ẹvụ ọnyara.

¹ Ịnị ịrayị ọhụta ọnị Iberisaza sị rị ohinọyị, Ịdanịyẹrị ka ọnị ô re ẹtẹ ụpẹ ọhụva.

² Ọ kà ọnị ô re ẹngụ anị ẹkụra ana aā hị́ Isusa ana vị aha ọ yị yaatụ ịjọva ẹtẹ Erami. Dị ọnị ré ka ọnị jẹẹ ụtọ irehu ana aā hị́ Urayi nị.

³ Ọ kà ọnị mẹ kana eyi, dị ọnị ré ka ịdẹba ọnyara aanị jẹẹ ụtọ irehu ọnọọ nị. Ịdẹba ọnọnị ô nyị ọpanyị ọgọdọ-ọgọdọ ẹẹva, ama ọnyara ộ gọdọ huna ọsa nị. Dị a hị́ ka ana gọdọ hu aanị ó nyị ọdịrẹma nị.

⁴ Ịdanịyẹrị ka ọnị ô re ka ịdẹba ọnọnị aa jị ayị vàa chi vàa hịrẹ ọnịrị eyi ọnyị eyi ọsa zị. Ẹ yị nyị uye ana zụ za a, ẹ yị rẹ nyị uye ana zụ jẹẹ zi ọ. Dị ịdẹba ọnọnị ê wùu zị, dị â mẹ ọ́ mẹ ze e eyi nị.

⁵ Ọ kà ọnị mee yi rò ịrẹyị ẹtẹ ọnị ọnị ré aanị kẹnẹ dị ọnị ve ne re ka ịdẹ ọnyara ô ku echeechi hụrị eyi ọnị ọyịị̄ zị na ngụ ẹtẹ àa vẹ nị. Ịdẹ ọnọnị ộ ngụ avaba ịrẹsụ ẹtẹ zị, ó mee zwe echi vị ọ sị mẹẹ anka vị ahụ anị e yi tu ẹtẹ nị. Ô nyị ọpanyị ọnyara poporopo anị tụ ịnị akakana eyi anị ẹyịva.

⁶ Ọ kà ọnị ô re ka ịdẹ ọnọnị ộ sị ụkata-ụkata àa tụra ka ịdẹba ana jẹẹ ụtọ irehu ịsọọnịị vẹ.

⁷ Dị ọ sị ịrẹsụ ngwọ ọ nị, dị ọ sị ọyịkụ-ọyịkụ chi ịdẹba ọnọọ rị ẹtẹ, dị o chee ọpanyị ẹyịva nị. Ịdẹba ọnọọ ẹ yị kụkụ nyị ụkata ọ yị gẹ ẹ ịrẹvụ. Dị ọ za a, dị ọ kwọ ọ sisi ẹtẹ nị. Ẹ yị nyị ọza ana zụ dọ ọ hụrẹ ẹ ụvọ.

⁸ Dị ịdẹ ọnọnị ọnị rẹ kụkụ e wù, dị aa mẹ kàrà-kàrà zị nị. Ộ maanị ta jẹẹ kẹnẹ, dị e che e ọpanyị nị. Dị ọpanyị ẹẹna nyị dọ e ne che aanị ịrẹsụ nị. Ẹnịnị vị ana va eyi ka aha irenyi-irenyi.

⁹ Ịdanịyẹrị ka ọnyara ịnị ọpanyị ẹẹna ẹnẹnị ộ vàna nyí ụkata ẹtẹẹtẹrẹ ne tu ka ộ sị ụkata anị pịva yị Anijipiti ọnịrị Anipesiya beri Anipataya nịnị. Anisirẹrị nịnị vị ọnị ọ́ rẹ mẹ̀ ẹ yị bẹẹ.

¹⁰ Ộ mẹ ụkata pooro ne tu ka ọ̀ kụ́ ịrẹkụ ne tu aza Ohomorihi, ana vị ụzọmị ẹbẹẹba. Ộ gụ aza ẹnyị ẹnịnị hyẹdụ, dị ọ sị ahụ pịrị wa zẹtẹ nị.

¹¹ Ọpanyị ọnọọ ộ hyakụ kụ hịrẹ ọdọvịdị isoja ẹbẹẹba, dị ọ ka asị a kụkụ mẹ̀ ịsọvọ hi Ohomorihi a mẹ̀ vịdịị mẹ̀ ẹ eyinị-eyinị nị. Ịzị aā yàa hẹkẹ Ohomorihi vị ọnị ọ hyakụ du va hi ẹtẹ bẹẹ.

¹² Ana vọrọ ka aza Ohomorihi ẹ sịị mẹ̀ ịsọvọ hi Ohomorihi, dị ẹnịnị kụkụ aa mẹ ịvị nị. Aza ẹ yị kụkụ sị ịzẹyịza hẹkẹ Ohomorihi ama dị ee zee yị ọpanyị ọnọọ ịnị avaba ịsị aa mẹ nị.

¹³ Ịdanịyẹrị ka, ọnị ộ vana wụ ka anggẹẹrị ọnya ộ họ̀ ọsa use ka, ịzị avaba ịsa ọnị ọnị maanị vaa yà nee tu? Ịzị aza vaa maanị mẹ ịvị naa za, dị aza ẹ yị kụkụ mẹ̀ ịsọvọ hi Ohomorihi? Aanị áa mẹ yị vaa kụ́ ahụụ hị́ aza Ohomorihi di ee du irehi anị vaa hi ẹtẹ nị?

¹⁴ Ọ kà dị ọnị wụ anggẹẹrị ọsa mè tú ohi ka, avọọ ọ mẹ vaa yà dị ọ mẹ ẹkụhị akawụ beri ịrẹkẹẹchẹhị nị (2,300). Ịrẹma ọnọọ dị e ve tenyi irehi Ohomorihi anka ọ mẹ̀ vịdị yà nị.

Anggẹẹrị ana aā hị́ Igebirẹẹrị ộ mẹ̀ ẹhahi ẹtẹ ọnị Ịdanịyẹrị ré

¹⁵ Ịdanịyẹrị ka ịjị ọnị sị ẹtẹ ọnọnị re, dị ọnị ê si ka ọnị ọ yẹ́ ịsị ẹ vị iruvo anị nị. Kẹnẹ dị ọnị ve ne re ka ọza ịnyara jẹẹ ọvịdị anị nị.

¹⁶ Ọ kà dị ọnị vana wụ́ ka ọza ịnyara yà ụtọ irehu Urayi dị ọ hị́ ọza ọnọnị ka: Igebirẹẹrị! Dị ọ kà a yọ ka ọ̀ mẹ ẹhahi ẹtẹ ọnị ọnị re aanị yị ọnị nị.

¹⁷ Ịzẹyịza dị Igebirẹẹrị kà pe ọnị nị. Ọ mẹ kà pe ọnị, angwa ô hí ọnị, dị ọnị hyẹdụ va eyi ku ẹtẹ nị. Ama dị ọ kà a yị ọnị ka, ọnị ozi ọza, ọnị ọ̀ yẹ́ ka ẹtẹ ọnị ọnị re aanị vị ịrẹyị ụmẹ ọnị ẹhẹ àaa vaa ta.

¹⁸ Ọ kà, ọ́ maa ka ịrẹyịị yị ọnị dị ọnị va eyi ku ẹtẹ dị ara vavọọ dọ ọnị nị. Ama dị ọ́ za ọnị, dị ọ sị ọnị vọrọ jẹẹ nị.

¹⁹ Dị Igebirẹẹrị kà a yị ọnị ka, ọnị aa sị zụ ọnị ịsị Ohomorihi vaa mẹ ịnị ọyịkụ anị. Ộ ka ẹtẹ ọnị re aanị vị ịrẹyị ụmẹ ọnị ẹhẹ àa va ta.

²⁰ Ọ kà ịdẹba ọnị ọnị re ene nyị ọpanyị ẹẹva aanị vị ẹnị ohinọyị Animediya ọnịrị Anipesiya ana vaa rị.

²¹ Dị ịdẹ ọnọọ ọnị vị ohinọyị Anigirisi nị. Ọpanyị ana jẹẹ ịnị akakana eyi anị ẹyịva ọ vị ohinọyị ẹnịnị ịpaapa nị.

²² Ọpanyị ẹẹna ene ve ne nyị tụ aha ene e che ikonyara hụrẹ aanị, ẹnị vị ohinọyị ẹẹna ana va naa rịị tụ́ ẹtẹ ohinọyị ịpaapa ọnọnị, ama ẹnịnị ẹ yị va nyị ụkata ọnị ọ nyị.

²³ Ịjị ụmẹ ohinọyị ẹnẹnị àaa vaa ta, dị ẹ kụkụ aa mẹ̀ ebira odivi kẹnẹ. Dị à va sị ụya rị wa, a vaa nyị ohinọyị ọkatẹngụ ọnya.

²⁴ Igebirẹẹrị ka ohinọyị ọnọnị vaa nyị ụkata ẹtẹẹtẹrẹ. O vee du ẹtẹẹ ha ene vee chire ọza angwa. Ịsị ee ze e eyi kẹnẹ ọ vaa mẹ nị. Aza ọkọọka beri aza Ohomorihi vị oni o vee vú ẹtẹ.

²⁵ Ọ kà agụvị ka ộ yẹ ọbọ, aza vị oni o vee vene kẹnẹ o me ze e eyi, dị ọ kụkụ ee wùu zị. Aza ẹnyị ẹ yị vaa kà rohi-rohi dị ò vu wa ẹtẹ. Ohinọyị ene huna avaba ohinọyị nịnị vị ọnị ọ hyakụ vaa kụ̀ụ hịrẹ. Ama ọza ẹ yị vaa bẹ ụvọọ tụ ọ ịrẹyị dị Ohomorihi o vu ọnị nyẹmba ẹtẹ.

²⁶ Ịdanịyẹrị kà, Igebirẹẹrị ộ kà a yị ọnị ka, ẹtẹ ọnị ọnị re ịnị ịrẹyị ịsọvọ ẹ́nẹnẹ ọnịrị oruva aanị vị ịzẹyịza anka a mẹ̀ mẹ ẹhahi anịị yị ọnị; ama ọnị ọ̀ sị tụ ịnị ayị da agụvị ka ụmẹ ộ yịị vọ gọdọ dị ọ̀ va mẹ.

²⁷ Ịdanịyẹrị ka ịrẹyị ọnọnị ộ za ọnị zizi, dị ọ vara ẹngụ aa zị ọnị nị. Ẹngụ ộ zị ọnị mẹ ẹkụhị chee, ịjị ọnị sị kwẹẹtẹ, dị ọnị naa mẹ̀ ụkọrọ ọnị ohinọyị sị yị ọnị nị. Ama ẹtẹ oni oni re aanị ô hi oni irenu; e yị re ye ọnị bẹẹ.