Ịdanịyẹrị 6 - IWE ỌNỊNỊ

Ịdanịyẹrị ịnị ụsị Idu nịnị

¹ Ẹkụhị ọnya, ohinọyị Ịdarịyọsị ộ nyị aza ẹnị ẹchẹhị tụra oohu ka ẹ̀ vị Ịgọvọnọ ene vee pe ọnị sị eyi pe avaba ẹtẹ ọnị ọnị aa mẹ ịjọva anị.

² Dị ọ rẹ nyị Ịdanịyẹrị ọnịrị aza ẹnị ẹẹva ọsa ka ẹnịnị è si eyi pe Ịgọvọnọ ẹnẹnị nị. Ọ kà ẹnịnị e re ka ụkọrọ aa na ẹtẹẹrẹ.

³ E yi kù dị ẹnịnị re ka Ịdanịyẹrị aa mẹ̀ ụkọrọ ẹtẹẹrẹ huni ẹnị ẹẹva ana vọ ana a ka ọnịrịị è si eyi pe Ịgọvọnọ nịnị nị. Ụkọrọ anị o re zoza huni ụkọrọ Ịgọvọnọ nịnị bẹẹ nị. Agụvị ka ụkọrọ anị ô zoza huni ẹnị ana vọ ẹtẹẹtẹrẹ, dị ohinọyị aa mẹ eto ka ọnị aa sị avaba ẹtẹ anị chire e ụvọ nị.

⁴ Ịjọnọọ, dị ẹnị ana a ka è si eyi pe Ịgọvọnọ nịnị ne beri Ịgọvọnọ ẹnẹnị ee si iruvo Ịdanịyẹrị nị. E yee sì ịrẹyị ene e ve sii du ọ ka ẹ yị mẹ̀ ụkọrọ ẹtẹẹrẹ. Ama ẹnịnị e yi re ịsa sị ụvọ za, agụvị ka Ịdanịyẹrị vị anaa sị ịzẹyịzaa mẹ̀ ụkọrọ anị.

⁵ Dị ẹ kà a yị ẹngụ nị ka, ẹnị e yi vee re ịsị a vọrọ ka ẹnị è si du Ịdanịyẹrị ẹ yị vị ịrẹyị oze ahẹkẹ anị.

⁶ Dị ẹnịnị gẹ eyi dị e ne tu ohinọyị Ịdarịyọsị nị. Dị ẹ kụ ọ ka, ọ̀ taarụ! vi o vee ku orubo ọcha, dị o ku orubo ẹya nị.

⁷ Ẹ ka, avaba ẹnị ọdọvịdị ẹkụra ẹ sị eyi gẹ ka ohinọyị ọ mẹ ọda ọnị ọza ẹ yị va nyayịnẹ sị ahụụ jịnẹ. Ẹ ka ọ̀ mẹ ọda ka asị a nyị ọza ene kuku họ̀ use ịsa hụụnị ụvọ ọza ọnyọọnyị ẹ yị vị hụụnị ụvọ ohinọyị ọnịnya kẹnẹ pooro dị ọ̀ mẹ ẹkụhị ohurẹẹwụ. Dị ọ̀ kà a ka ọza ene èe họ̀ use ịsa hụụnị ụvọ ọza ẹnẹsa, ọ̀ọ vị ori, ọ̀ọ vị ọzarẹyịrẹsụ vị e vee ne e ngụ ịnị ụsị ọbanyị ana a kụ idu nịnị hi nị.

⁸ Dị ẹ ka, agụvị avọọ, ohinọyị ọ mẹ ọda ọnọọ anka ọda Animeedi ọnịrị Anipesiya nịnị ọnị ọza ẹ yị ma vara.

⁹ Ịzẹyịza dị ohinọyị Ịdarịyọsị mẹ ọda ọnọọ, dị ọ sị ụvọ tụ ọ nị.

Ê ne Ịdanịyẹrị ngụ ụsị idu nịnị.

¹⁰ Ịjị Ịdanịyẹrị sị yẹ ka â maanị sị ọda mẹ dị o si hu aa nọ ini eehi anị nị. Ô tụ ịnị eehi, dị ọ nọ ịrẹsụ ọtụrọsa, dị ọ na ozokete aku anị nị. Ozokete ọnọọ vana va eyi ka oze Ijerusarẹmị. Dị o ku ẹtẹ, dị aa mẹ̀ aduwaa hi Ohomorihi anka ọ mẹẹ̄ vịdị yịị mẹ nị. Ụpẹ ẹẹta ọọ̄ mẹ̀ aduwa ịnị ẹkụhị nị.

¹¹ Ịjị ẹnị ọnịvị Ịdanịyẹrị sị yẹ ka aa mẹ̀ aduwaa hi Ohomorihi,

¹² dị avaba ẹnịnị gẹ eyi dị e ne tu ohinọyị nị. Ịjị e tu ịzọọ dị ẹ họ̀ ohinọyị ka, áá vị ọ mẹ ọda ka pooro dị ọ mẹ ẹkụhị ohurẹẹwụ, asị a nyị ọza ene vene họ̀ use ịsa hụụnị ụvọ ọza ọnyọọnyị, asị e họ̀ use ịsa hụụnị ụvọ ori, ẹ yị vị hụụnị ụvọ anị kẹnẹ, ọnịrị ka ọza ana àa vavọọ mẹ, vị e vee ne e ngụ ịnị ụsị ana a kụ idu nịnị hi nị? Dị ohinọyị ka ịzẹyịza yọ, ọda ọnọọ vị ọnị ọnị mẹ ẹtẹẹtẹrẹ anka ọda Animeedi ọnịrị Anipesiya, ọnị ọza ẹ̀ yị zụ vara.

¹³ Dị ẹnịnị va káa yị ohinọyị ka, ọnyara ịnị ẹnị ọrịhị ana a kụ hụrị Ijuda vẹ ana aā hị́ Ịdanịyẹrị ẹ yị saasa ọda ọnọọ. Ẹ ka ụpẹ ẹẹta aa yịị mẹ̀ aduwa ẹkụhị-ẹkụhị nị.

¹⁴ Ịjị ohinọyị maanị wụ́ ịrẹyị ọnọnị kẹnẹ, dị ayị anị sị du nị. Dị o si oze pooro dị ẹtẹ hozi ịhị ọnọọ ka ọnị ọ dọ Ịdanịyẹrị há hụụnị ịrẹyị ọnọnị nị.

¹⁵ Ama dị ọnịvị Ịdanịyẹrị ẹnẹnị gẹ eyi, dị ẹ varẹma ve tu ohinọyị dị ẹ ka, ộ yẹ́ ka ịdị Animeedi ọnịrị Anipesiya, ọda ọnị ohinọyị ọ̀ọ sị mẹ, ọza ọ ma kụkụ vara a.

¹⁶ Ịzẹyịza dị ohinọyị mẹ ọda, dị ẹ na sị Ịdanịyẹrị, dị e ne e ngụ ịnị ụsị idu nịnị nị. Dị ohinọyị kà a yị Ịdanịyẹrị ka, Ohomorihi anị ọnị ọ sị ịzẹyịza aa hẹkẹ ọ̀ va dọ ọ ha nị.

¹⁷ Dị ẹnịnị zịna ịrẹta ọbanyị dị ẹ sị gu ụsị ọnọọ irenu nị. Dị ohinọyị ọnịrị ẹnị ọdọvịdị ẹkụra na mẹ apọtẹrẹwa ẹnịnị tụ ịnị ịrẹta ọnọọ agụvị asị a nyị ọza ana nọ ịzọọ na mẹ ịsọnyị-ịsọnyị hi Ịdanịyẹrị nị.

¹⁸ Dị ohinọyị varẹma nọ ịnị eehi anị nị. Ô tu ini eehi, ẹ yị rị ịsa, ẹ hyakụ dọ ka ọnị ọ mẹ ayị ohine ọnyọọnyị, dị ẹ̀ yị rẹ zụ sụ ara ịrahụ nị.

Ohinọyị ô ro ịnẹ varẹma agụvị ka ẹ yị nyị ịsị ẹ mẹ̀ Ịdanịyẹrị.

¹⁹ Ini etumeyọnị, dị ohinọyị kwẹẹtẹ eyiha-eyiha, dị ọ nọ ịnị ụsị ene e ne Ịdanịyẹrị ngụ nị.

²⁰ Ịjị o tu ịzọọ, ayị anị vị ene du, dị o nowu, dị ọ ka: Ịdanịyẹrị, ọnụtụ Ohomorihi ana yara! Ohomorihi awụ ọnị ụ waa sị ịzẹyịzaa hẹkẹ ọ́ọ́ sị ụ dọ tụ hụụnị ụvọ idu nịnị kẹ?

²¹ Dị Ịdanịyẹrị tụ ọ ohi dị ọ ka, vị ohinọyị ọnọnị vee ku orubo ọcha, dị ọ ku orubo ẹya nị.

²² Ọ kà, Ohomorihi ộ tụ anggẹẹrị anị va sị ịsa kú idu nịnị irenu ka asị ẹ zụ mẹ̀ ọnị ịrẹyị. Agụvị ka ộ yẹ ka ẹ yị nyị odivi ọnị ọnị mẹ, dị ẹ̀ yị rẹ nyị odivi ọnị ọnị mẹ hi ẹwụ ohinọyị nị.

²³ Ịjị ọnọọ dị ayị ohinọyị sị hine ne hu nị. Dị ọ wụsẹ mẹ ọda ka è ve tura Ịdanịyẹrị hụụnị ụsị ọnọọ nị. Ịzẹyịza dị e tura a tụ ẹhẹ nị, dị ẹnịnị re ka ẹ rẹ va nyị ịsị ẹ mẹ̀ ẹ, agụvị ka ộ sị ayị tụra Ohomorihi nị.

²⁴ Dị ohinọyị ọnọnị mẹ ọda ka à na zá avaba aza ana sị ịrẹyị Ịdanịyẹrị va tụ ịrẹka nị. Ịzẹyịza dị a na zá wa nị. Dị a kụ wa beri ezi ẹnịnị ọnịrị ose ẹnịnị, dị e ne wa và hí ịnị ụsị ana kụ idu nịnị hi nị. Dị a naa nyị ka ê tu ẹtẹ idu za wa, dị ẹ nà wa rị chẹ́kẹ̀-chẹ́kẹ̀ nị. Ẹchụkụ ẹnịnị ikonyara ẹ yị hyakụ vẹtẹ.

²⁵ Ohinọyị ộ chẹrẹ iwe tu hi avaba Anịrẹsụ ẹtẹ nị. Dị ọ kụ wa nị.

²⁶ Ọ kà, ọnị ộ mẹ̀ ẹ ọda ka ịnị avaba anẹkụra ọnị ọnị vị ohinọyị ẹ̀ sị ụbanyị yị Ohomorihi ọnị Ịdanịyẹrị aa hẹkẹ, dị ee hí angwa anị. Agụvị ka, ọnị ọ vị Ohomorihi ana yara pooro nị. Ọnị ọ rẹ vaa mẹ ịjọva pooro nị. Ẹ yị nyị ọza ene ve zụ vú ịjọva anị ọnịrị ụkata anị ẹtẹ.

²⁷ Ọ kà, Ohomorihi ọnọọ ọọ̄ dọ ọzaa há hụụnị avaba ịrẹyị odivi nị. Ọnị ọọ̄ mẹ̀ ịvọpa ọnịrị ịtọmatapa ẹbẹẹba ọnịrị ịnị ẹhẹ nị. Ọnị ọnọọ ọ dọ Ịdanịyẹrị há ka asị idu nịnị zụ wụ ọ nị.

²⁸ Hụrị ịhị ọnọọ hụrị ịhị ọnọọ ẹ vana sị Ịdanịyẹrị tụ udi obobooro nị. Ụmẹ ọnọọ Ịdarịyọsị ọnịrị ọnọrụ ana aā hị́ Ịsayịrọsị ana vị Anipesiya sị vị ohinọyị nị.