Ịdanịyẹrị 5 - IWE ỌNỊNỊ

Ịsa ana chẹrẹ tụ ịnị ugene

¹ Â nyị ohinọyị ọnyara, ana aā hị́ Iberisaza. Ẹkụhị ọnya dị ọ tụ́ hị́ ẹnị ọdọvịdị ẹkụra ka ẹ̀ va rị ịsa ịdị anị nị. Ẹnịnị ệ gụ ẹ̀hụ́ aza ẹnị akahị avọọ. Dị ohinọyị ọnịrị wa dudu ee hú eche nị.

² Ịjị ẹ vavọọ ee hú eche ọnọnị, dị Iberisaza vana tụ́ ka, à na kụ ako ọnịrị ẹnya ana ada anị Inebukadineza, kụ́ hụụnị irehi Ohomorihi ana ya Ijerusarẹmị vẹ nị. Ako ọnịrị ẹnya ẹnẹnị vị ana sị igooru ọnịrị enyusẹ ana aā hị́ isiriva mẹ. Ohinọyị ka ọnị ee si ka ọnịrị ọdọvịdị ẹkụra nịnị, ose anị nịnị ọnịrị onyeehi anị nịnị è si hú eche.

³ Ịzẹyịza dị a wụsẹ na kụ ako ọnịrị ẹnya ẹnẹnị ana sị igooru mẹ aanị vẹ, dị avaba ẹnịnị ee sii hú eche nị.

⁴ Dị ẹ yàa ká ẹngụrẹhaa kú ori ẹnịnị ẹngụ e mee hú eche nị. Ori ẹnẹnị vị ana sị igooru, isiriva ọnịrị enyusẹ ana vọ beri ọchị ọnịrị ịrẹta mẹ.

⁵ Kẹnẹ, dị ohinọyị vene re ụvọ ọza ka aa chẹrẹ ịsa tụ ịnị ugene irehi anị nị. Ugene ọnọọ vị ana gụrị ịzị aā sị ozotupaa gẹ.

⁶ Ịjị ohinọyị vavọọ re e dị ẹngụ anị sị và hí nị. Dị ayị aa hụrẹ ẹ ịnẹ, dị ahụ anị aa dọ ẹgahị pàpàpà nị.

⁷ Dị ohinọyị nowu zẹtẹ dị ọ ka à na hị́ ẹnị ọmahọnọ anị nịnị, ẹnị ọpọchị nịnị, ẹnịrị avaba ọvavo anị nịnị va yị ọnị nị. Ịjị ẹnịnị vẹ, dị ohinọyị kà a yị wa ka, ọza ana àa zụ ka ịsa ana chẹrẹ tụ ịnị ugene aanị dị ọ rẹ zụ ka iruvo anị yị ọnị nị, ọnị vaa sị ọ mẹ ọgwọhụta ịnị aza anaa mẹ ịjọva ịnị ẹtẹ anị, dị e chire e irikimba, dị a rẹ sị ịsọbẹ ana sị igooru mẹ tụ ọ ọbẹ.

⁸ Ẹnịnị anajuwe ohinọyị ệ jịnẹ vẹ, ama ẹ yị nyị ọza ịnị ẹngụ ẹnịnị ana zụ ka ịsa ana chẹrẹ aanị, dị ẹ̀ hyakụ va zụ ka iruvo anịị yọ.

⁹ Ọsọnị ộ mẹ̀ ka ayị ọ̀ hụrẹ ohinọyị ịnẹ hu avọọ, dị ẹngụ anị ta và hí nị. Ẹnị ọdọvịdị ẹkụra ana gụ kara a ẹ yị yẹ ịsị a vọrọ ka ẹnị ẹ̀ mẹ.

¹⁰ Ịjị ọnyị ohinọyị wụ ịrẹka oni ohinọyị ọnịrị ọdọvịdị ẹkụra anị nịnị aa kụ, dị ọ ngụ eehi ịzị aza ya aa rị ịsa nị. Dị ọ ka, ohinọyị ọ̀ taarụ! Asị ọ zẹẹ ka ịrẹyị ọnọnị ò du ọnị ayị, dị ọ vaa và ẹngụ hi bẹẹ.

¹¹ Ọ kà, â nyị ọnọrụ ọnya ịnị ẹkụra ohinọyị ọnọnị ana aā hị́ Ịdanịyẹrị, Ohomorihi ộ sị ụkata yọ. Ọ kà, ịjị ada ohinọyị yà ịzọọ, ộ yẹ ka ọnọrụ ọnọnị ộ yẹ ịsa ọnị aza ana vọ ẹ̀ yị yẹ, dị ọ rẹ yẹ ịrẹyị ẹtẹẹtẹrẹ nị. Agụvị avọọ dị ohinọyị Inebukadineza ada anị sị ọ mẹ ohirẹsụ ẹnị eneē re ẹtẹẹ yọ, ọmahọnọ anị nịnị, ọpọchị nịnị ọnịrị avaba ọvavo anị nịnị nị.

¹² Ọ kà, ohinọyị ọ̀ tụ na hị́ ọ, ka ọ vaa kà iruvo avaba ịrẹyị ẹnẹnịị yọ, agụvị ka ẹ yị vị ọza kẹnẹ ọ vị. Ọ yara kà iruvo ụra, ọ yara swẹ ụhị, dị ọ rẹ́ẹ mẹ ẹhahi ịrẹyị ọnị iruvo anị nyịnẹ nị.

Ịdanịyẹrị ộ mẹ̀ ẹhahi ịsa ana chẹrẹ tụ ịnị ugene

¹³ Obooboro ọnọọ, dị a na hị́ Ịdanịyẹrị vẹ nị. Dị ohinọyị họ̀ ọ ka, ọnị ọ́ọ vị Aniju ana aā hị́ Ịdanịyẹrị ana ada anị ohinọyị za ọrịhị hụrị ẹtẹ Ijuda vẹ nị?

¹⁴ Ọnị ộ wụ́ ka Ohomorihi ộ sị ụkata yọ, ọnịrị ka Ịdanịyẹrị ộ nyị ụkata ụnarenyi ọnị ọọ̄ sị mẹ̀ ịsa. Dị ọnị rẹ wụ́ ka ịrẹyọyẹ anị ộ gụ ẹtẹẹtẹrẹ nị.

¹⁵ Ohinọyị ka â kụ anajuwe anị ọnịrị ọmahọnọ anị nịnị vẹ ka ẹ̀ va ka ịsa ana a chẹrẹ tụ ịnị ugene aanị ọnịrị iruvo anị, ama ẹnịnị ẹ yị zụ ka a.

¹⁶ Ama ọnị ọ va wụ ka Ịdanịyẹrị ọ yara ka iruvo ịrẹyị ọnịrị ka ọ yara pe ọza sì iruvo ịrẹyị ene èe hi ọ eyi. Agụvị avọọ, ọ̀ọ zụ ka ịsa ana a chẹrẹ aanị dị ọ rẹ zụ kà a ịsị ẹ vị iruvo anị nị, ọnị vaa sị ọ mẹ ọgwọhụta ịnị aza anaa mẹ Ịjọva ịnị ẹtẹ anị, dị e chire irikimba ovivi, dị a rẹ sị ịsọbẹ ana a sị igooru mẹ tụ ọ ọbẹ.

¹⁷ Dị Ịdanịyẹrị tú ohinọyị ohi, dị ọ ka, ọ̀ si ẹyịza anị, ẹyịvavọọ ọ̀ kụ ọ yị ọza ẹnẹsa; ama ọnị va kà ịsa ana a chẹrẹ aanị ọnịrị iruvo anịị yọ.

¹⁸ Ọ kà, ohinọyị ọ̀ taarụ! Ohomorihi ene hu kere-kere ọ̀ vịdị sị ada anị Inebukadineza mẹ ohinọyị, dị ọ mẹ ka ọ̀ nyị ụbanyị ẹtẹẹtẹrẹ nị.

¹⁹ Ộ nyị ụbanyị pooro ne tu ka avaba anịrẹsụ ẹtẹ vị enee hí angwa anị. Ọza enee ze e eyi ọ zụ wụ ọ, ọza ọnị ọ̀ọ ka ọ̀ọ mẹ ẹhẹ dị a mẹ ẹhẹ. Ọza enee ze e eyi, dị ọ kà udi anị hịrẹ, ẹ̀ yị vị avọọ dị ọ mẹ̀ ụhị nyị ọ.

²⁰ Ama agụvị ka ô nyima aa sị ẹngụ tụ ẹba, ọza ẹ yị kụkụ zụ ka ịrẹyịị yọ, dị ọ ra a mẹ̀ ebira odivi nị, Ohomorihi ộ dụ ọ hụụnị ohinọyị anị nị, dị ọ rẹ dọ ọ ụbanyị anị nị.

²¹ Ọ kà â dụ ọ hụụnị ẹkụra, dị ọ kụkụ aa mẹ̀ ebira uye ịnị avị nị. Ọnịrị ịkẹrịkẹtẹ ene hi ịnị avị ẹ vana rá dị aa rị avị anka ụnọ avọọ nị. Ịnị avị ọ vanaa sụ̀ dị eguhi ee chiree kụ ọ nị, ẹ yị hyakụ re aha tẹ̀. Avọọ ọ mẹ yà pooro ne tu ịjị ọ sị dọ ka Ohomorihi ọ nyị ịjọva avaba ẹhẹ nị, ọnịrị ka ọza enee ze e eyi ọ sịị̄ rị ohinọyị nị.

²² Dị Ịdanịyẹrị rẹ ka, ẹwụ ozi anị Iberisaza ộ maanị yẹ avaba ịrẹyị ẹnẹnị ama wẹ yị va hụvị avọọ kà ẹngụ awụ chi.

²³ Ọ kà ọ raà sị ẹngụ anị tụ ẹba huni Ananyị yị ana nyị ẹbẹẹba agụvị ka ộ kụ ako ọnịrị ẹnya ana a kụ hụụnị irehi Ohomorihi dị ọnịrị ọdọvịdị ẹkụra anị nịnị, ese anị beri onyeehi anị nịnị ee sii hú eche nị. Ako ọnịrị ẹnya ẹnẹnị ẹ yee sii hú eche dị ẹ yaa ka ẹngụrẹhaa ku ori ana a sị igooru ọnịrị isiriva beri enyusẹ ana vọ ọnịrị ọchị beri ịrẹta mẹ ẹngụ nị. Ori ene è yị re ẹtẹ, ẹ yị wụ́ ịrẹyị, di ẹ̀ yị hyakụ va yẹ ịsa ọnyọọnyị. Ama ẹ yị va sị ụbanyị yị Ohomorihi ana nyị ụhwẹ ana aza aa tụ́, dị ọ rẹ nyị ụkata avaba ịsa anaā mẹ.

²⁴ Ọ kà agụvị avọọ Ohomorihi tụ ụvọ ọnọnị ka ọ̀ va chẹrẹ ịsa ẹnẹnị nị.

²⁵ Ịsa ana a chẹrẹ yị: IMENE, IMENE, ỊTẸKẸẸRỊ, ọnịrị ỊPẸRẸẸSỊ.

²⁶ Iruvo ịrẹyị ọnọnị yị. IMENE (za a ịrịka) ộ sị zụ ka Ohomorihi ọ raà za ẹkụhị ịjọva ohinọyị Iberisaza ịrịka, ọ raà zá a ẹtẹ.

²⁷ Iruvo ỊTẸKẸẸRỊ ọ vị ka, asị ohinọyị zama re ịnị ịngọ, ê re ka â gẹsẹ aanị, ẹ yị nyị ịsị ọ vị.

²⁸ ỊPẸRẸẸSỊ ọ vị ka Ohomorihi ọ sị ẹtẹ ọnị ohinọyị áa mẹ ịjọva anị gà yị Animeedi ọnịrị Anipesiya nịnị.

²⁹ Ịjị Ịdanịyẹrị maanị sị ọ kàa yọ, ịzịịzọọ dị ohinọyị mẹ ọda ka è chire e irikimba ovivi, dị a rẹ sị ịsọbẹ ana sị igooru mẹ tụ ọ ọrọkọ nị. Ịhị ọnọọ ọ sị ọ mẹ ọgwọhụta ịnị aza enee pe e mẹ ịjọva nị.

³⁰ Ịrahụ ịhị ọnọọ gẹdẹ-gẹdẹ dị a wụ Iberisaza ana vị ohinọyị Ịbabịrọnị nị.

³¹ Dị ọnọrụ ọnyara ana aā hị́ Ịdarịyọsị ana vị Animeedi vana rị ohinọyị tụ ẹkụra ọnọọ nị. Ịdarịyọsị ọnọnị vị ịrayị ẹbẹẹta tụra ẹẹva ịnị ụmẹ ọnị ọ sị rị ohinọyị.