Ịdanịyẹrị 2 - IWE ỌNỊNỊ

Ụra ọnị Inebukadineza ra

¹ Ịrahụ ẹkụhị ọnya, ịnị ịrayị ọhụva ọnị Inebukadineza rị ohinọyị, dị ọ ra ụra nị. Ụra ọnọọ vana nyayịnẹ mẹ ayị hụrẹ ịnẹ ẹtẹẹtẹrẹ, dị ẹ yị zụ sụ ara nị.

² Obooboro ọnọọ dị ọ tụ́ hị́ avaba ẹnị ọmahọnọ anị, aza eneē ré ẹtẹẹ yọ, Anajuwe anị nịnị ẹnịrị ọpọchị anị nịnị ka, ẹ̀ va kà a yị ọnị ụra ọnị ọnị ra nị. Ịzẹyịza dị ẹnịnị ve tu ọ nị.

³ Dị ohinọyị kà a yị wa ka, â nyị ụra ọnị ọnị ra anaa mẹ ayịị hụrẹ ọnị ịnẹ, ẹnịnị ẹ kà a yị ọnị agụvị ka ọnị è sị ka ọnị ọ yẹ ẹ nị.

⁴ Dị aza eneē re ẹtẹẹ yọ aanị tụ́ ohi ịnị ẹkụra Aramị dị ẹ ka: taarụ ohinọyị, aarịhịnị ọ kà a yị ẹnị ụra ọnị ọ ra, dị ẹnị kà iruvo anịị yọ nị.

⁵ Dị ohinọyị tu wa ohi dị ọ ka, ịzẹyịza ọnị aa kà nị, ẹnịnị ẹ̀ẹ yị kà a yị ọnị ụra ọnị ọnị ra aanị ọnịrị iruvo anị, vị a vaa na wa saka-saka dị áa jị irehi ẹnịnị eburu nị.

⁶ Ama ẹnịnị ẹ̀ẹ kà a yị ọnị, ọnị vaa mẹ wa ẹyịza ọbanyị, dị ọnị ka udi ẹnịnị hịrẹ. Agụvị avọọ ẹnịnị ẹ̀ kà a yị ọnị ụra ọnị ọnị ra ọnịrị ịsị ẹ vị iruvo anị.

⁷ Dị ẹnị rẹ varẹma kà a yị ohinọyị ka, aarịhịnị ọ̀ kà a yị ẹnị ụra ọnị ọ ra ka ẹnị vaa kà iruvo anịị yọ nị.

⁸ Dị ohinọyị tu wa ohi ka, ọnị ee re ka vị ẹnịnị aa dọ ọbọ kẹnẹ ọ yị za ọnị kù nị. Ọ kà ẹnịnị ẹ̀ yẹ ka ẹ yị vị ịrẹyị aahẹ ọnị aa kà o.

⁹ Ọ kà ẹnịnị ẹ̀ẹ yị kà a yị ọnị ụra ọnị ọnị ra, avaba ẹnịnị vị ene e vee vu ẹtẹ. Ọ kà, vị ẹnịnị gẹ eyi ka ẹnị è cheeche yị ọnị dị ọnị ọ vara ayị anị nị. Agụvị avọọ ẹnịnị ẹ̀ kà ụra ọnọọ yị ọnị, dị ọnị ọ̀ yẹ́ ka ẹnịnị ẹ rẹ zụ kà iruvo anị.

¹⁰ Dị aza eneē ré ẹtẹẹ yọ aanị tu ọ ohi dị ẹ ka, ẹ yị nyị ọza ịrẹsụ ẹtẹ ana zụ ká ẹ yị ọ ịsị enee họ̀ use anị aanị nị. Ẹ ka ẹ yị nyị ohinọyị ọsa, ịzị ọ kata na za ana họ̀ ẹngụ usirẹyị ọnọnị hụụnị ụvọ aza eneē ré ẹtẹ yọ, a vị hụụnị ụvọ ọmahọnọ anị ọnịrị ọpọchị anị nịnị da.

¹¹ Ẹ ka ịrẹyị ọkatẹngụ ohinọyị ee họ̀ use anị aanị nị, ẹ yị nyị ọza ana zụ ka ẹ yị ọ ụra ọnị ọ ra, ẹ̀ yị vị ori nịnị; ẹ̀ẹhẹẹ ori nịnị ẹnịrị aza ẹ yị mā ra vabẹ kẹ.

¹² Ọsọnị ọ va mẹ ayị kụ ohinọyị hu, dị ayị anị aa dọva nị. Dị ọ ka à na wụ̀ avaba ẹnị ọyẹrẹyị Anibabironi va ha nị.

¹³ Ịjị a sị ọda mẹ ka à na wụ̀ wa, dị ẹ sị hu enee sị Ịdanịyẹrị ọnịrị ọta anị nịnị ka à wụ̀ wa beri wa nị.

¹⁴ Â nyị ọnọrụ ọnya aanị ana aā hị́ Ariyoki, ọnị ọ vị ọdọvịdị isoja ohinọyị nịnị nị. Ịjị ọ raà kụ aza ka à na wụ ẹnị ọyẹrẹyị Anibabironi, dị Ịdanịyẹrị tangwa sị ịrẹyọyẹ pe e kà ịrẹyị nị.

¹⁵ Dị ọ họ̀ ọ ka, sị ẹ vẹ dị ohinọyị maanị mẹ ọda ịrịịra ọnọnị? Dị Arịyoki mẹ ẹhahi ịrẹyị ọnọnịị yọ nị.

¹⁶ Dị Ịdanịyẹrị ngụ eehi ne tù ohinọyị, dị ọ ka ọ̀ sị ụmẹ yị ọnị ka ọnị vaa kà iruvo ụra anịị yọ nị.

¹⁷ Dị Ịdanịyẹrị nọ ịnị eehi dị ọ na kà avaba ịrẹyị ẹnẹnị zụ Ịhananịya, Imisịyẹrị ọnịrị Azarịya nị.

¹⁸ Dị ọ kà a yị wa ka ẹ̀ vẹ dị ẹnị ẹ da ịpẹ yị Ohomorihi ka ọ vayị ẹnịnị dị ọ̀ sị iruvo ịrẹyị ọnọnị zụ ẹnị agụvị asị a wụ ẹnị beri ẹnị ọyẹrẹyị Anibabironi ana vọ nị.

¹⁹ Ịrahụ ọnọọ dị Ohomorihi sị ụra ọnị ọza ẹ yị yẹ́ aanị zụ Ịdanịyẹrị nị. Ịdanịyẹrị sị ụga yị Ohomorihi ana nyị ẹbẹẹba,

²⁰ dị ọ ka, aa kụ́ Ohomorihi avọ pooro, agụvị ka ọnị ịnyara kẹnẹ ọ nyị avaba ịrẹyọyẹ ọnịrị ụkata nị.

²¹ Ọnị ọọ̄ jị ụmẹ ọnị avaba ịsa sịị mẹ ịnị ẹhẹ nị. Ọnị ọọ̄ sị ohinọyị nịnị rị nị. Ọnị o reē chi waa hụrị udi ẹnịnị nị. Ọnị ọọ̄ sị ịrẹyọyẹ yị aza ana yẹ ịrẹyị nị. Ọnị ọọ̄ mẹ̀ ka aza ana yẹ ịsa ẹ̀ yẹ ẹ nị.

²² Ọnị ọọ̄ sị ịsa ana tẹ̀ aha ana nyịnẹẹ zụ nị; ộ yẹ avaba ịsa ana tẹ aha ene hozi, ọnị ụvọta vị ana ya ịnị ẹtohweyi.

²³ Ịdanịyẹrị ka, “mâ kụ Ohomorihi ohiku amị nịnị avọ, dị mị rẹ sị ụgaa yọ nị, agụvị ka ọ raà sị ịrẹyọyẹ ọnịrị ụkata yị mị”. Ô tu ẹnị ohi ịrẹyị ọnị ẹnị họ̀ use anị, dị ọ kà a yị ẹnị ịsa ọnị ohinọyị ee sị ka ọnị ọ̀ yẹ nị.

²⁴ Dị Ịdanịyẹrị ne tù Arịyoki, ọnị ohinọyị tụ ka ọ̀ na wụ ọyẹrẹyị Anibabironi nịnị, dị ọ kà a yọ ka à sị ọ wụ̀ wa nị. Ọ kà, ọ̀ sị ọnị ne tu ohinọyị dị ọnị kà a yọ iruvo ụra ọnị ọ ra.

²⁵ Ịzịịzọọ dị Ariyoki sị Ịdanịyẹrị ne tù ohinọyị nị. Dị ọ kà a yọ ka, ọnị ọ sị ọza ịnyara re hụụnị aza a na za ọrịhị hụrẹ ẹtẹ Ijuda vẹ ana zụ ka a yọ ịsị ẹ vị iruvo ụra ọnị ọ ra nị.

²⁶ Dị ohinọyị họ̀ Ịdanịyẹrị ọnị ịrẹha anị ọsa rị Ịbẹtịsaza use ka, ọ́ọ́ zụ́ kà a yị ọnị ụra ọnị ọnị rá ọnịrị iruvo anị nị?

²⁷ Dị Ịdanịyẹrị tú ọ ohi ka, ẹ yị nyị ọza ọnyọọnyị ana zụ ka ẹngụ ịsa ẹnẹnị yị ohinọyị nị.

²⁸ Ọ kà, ama â nyị Ohomorihi ana ya ẹbẹẹba anaā sịị ịsa ana tẹẹ zụ aza. Ọ raà sị zụ ohinọyị Inebukadineza ịsa ana vaa mẹ ụhwọọ. Ọ kà, ẹtẹ ọnị ohinọyị ré ịnị ụra ọnị ọ raà yị.

²⁹ Dị Ịdanịyẹrị ka, Taarụ ohinọyị! Ọ mẹ̀ hụtẹtẹ aha ọyịsụ anị dị e ro ịrẹyị ịsị ẹ vaa mẹ ụhwọọ, Ohomorihi anaā sịị ịsa ọnị ọza ẹ yị yẹ iruvo anịị zụ, ọ sị zụ ọ ịsị ẹ vaa mẹ nị.

³⁰ Ọ kà, ẹ́ yị vị agụvị ka ọnị ọ yẹ ịrẹyị hu asị sị ịsa ana tẹ aanị zụ̀ ọnị nị, ama agụvị a zụ ka iruvo anị zụ ohinọyịị yọ nị, dị ọ̀ zụ yẹ ịsa e nee rò ịnị ayị anị.

³¹ “Ịdanịyẹrị kà, taarụ ohinọyị! wê re ịsa ene vene ọza ka ọ jẹẹ ọvịdị awụ. Ịsa ọnọọ ộ hụ ẹtẹẹtẹrẹ, dị ọ nyayịnẹ aa zẹtẹ nị. Ọza òo re e vị angwa ee hí ọ nị.

³² Ịrẹsụ ịsa ọnọọ vị ana a sị igooru mẹ, dị a sị enyusẹ anaā hị́ isiriva mẹ ịrachị anị ọnịrị ụvọ nị. Hụụnị ịrẹka na ngụ ịnị usi anị vị ana a rẹ sị enyusẹ irenyi mẹ,

³³ dị a sị enyusẹ ọsa mẹ ọchahụ anị nị. Ịpẹtahụ ịsa ọnọọ vị ana a sị ụmọpa ọnịrị enyusẹ ene e hùra vabẹ mẹ”.

³⁴ Ọ kà, óhinọyị mẹ̀ vavọọ e ré e, dị ịrẹta ọbanyị ọnya dà va nya ịsa ọnọọ ịpẹtahụ dị ọ gara a ha rugu-rugu nị. Ẹ yị vị ọza ọ da ịrẹta ọnọọ ne.

³⁵ Kẹnẹ, dị avaba ẹngụ anị ana vọ ana a sị enyusẹ irenyi-irenyi mẹ ẹnị rẹ kwọ̀rọ̀ va ha anka azịzẹ avọọ, dị ahị kụ ọ ne hu saka-saka nị, ọza ẹ yị vè ne re ịpa anị. Ama dị ịrẹta ana va sụ ịsa ọnọọ ịpẹtahụ aanị ọnị vana vara ataba ọbanyị tụ avaba ẹhẹ nị.

³⁶ Dị Ịdanịyẹrị ka, taarụ! ụra ọnị ụ ra yị o ohinọyị. Ẹnị rẹ vaa kà iruvo anịị yị wụ.

³⁷ Dị ọ ka ohinọyị ọ taarụ nị, Ohomorihi ana mẹ ẹbẹẹba ọ mẹ̀ ẹ ka ọ̀ vị ohinọyị ene huna ohinọyị nịnị nị, dị ọ mẹ ka ọ̀ nyị ụkata ọnịrị ụbanyị nị.

³⁸ Ohomorihi ọ mẹ ka ọọ mẹ ọda tụra avaba anẹhẹ ọnịrị uye ịnị avị beri inomi nịnị ịrẹsụ nị. Agụvị avọọ Inebukadineza ohinọyị ọ vị̀ ịrẹsụ ana a sị igooru mẹ̀ ịnị ịsa oni o re nị.

³⁹ Ộ ka ịrẹma anị, ohinọyị ọsa ana banyị vanaa rị, ama ẹ yị vaa ya anka Inebukadineza. Ịrẹma ọnọọ, dị ohinọyị ọhụta ọnị rẹ vaa rị ana vaa mẹ ọda tụra avaba anẹhẹ ịrẹsụ, ọnọọ ọ vị ịpa ana sị enyusẹ ọsa mẹ nị.

⁴⁰ Ohinọyị ọhụna ọnị rẹ vaa rị vàa tụra ọsọnị. Ọ vaa banyị, dị ọ katẹngụ anka enyusẹ avọọ. Vị ọ vaa gara avaba ịsa ohinọyị ana vịdị rị mẹ và ha anka enyusẹ mẹ̀ẹ gara ịsaa ha chẹ̀kẹ̀-chẹ̀kẹ̀ avọọ nị.

⁴¹ Ọ kà, ahụ ọnịrị igege ịnị ahụ ọnị ohinọyị ré ka a sị enyusẹ ọnịrị ụmọpa mẹ avọọ ộ sị zụ ka udi ohinọyị ọnọọ vị ana va gàa hi.

⁴² Ịpa ẹnyị ịnị udi ohinọyị ọnọọ vaa katẹngụ anka enyusẹ, dị ẹnyị vị ọkụmị anka ụmọpa.

⁴³ Ọ kà, enyusẹ ọnịrị ụmọpa ene hùra vabẹ aanị aa sị zụ ka eni ohinọyị ẹkụra ẹnẹnị vee si ka ẹnị ẹ vabẹ dị ẹnị ẹẹ mẹ uze, agụvị avọọ dị ẹ sị ozi ga ẹngụ. Ama uze ẹnịnị e yi ve tu oruva, agụvị ka enyusẹ ọnịrị ụmọpa ẹ yị zụ́ vabẹ.

⁴⁴ Ịnị ụmẹ ọnị ohinọyị ẹnẹnị ẹ̀ẹ vavọọ àa mẹ ịjọva, Ohomorihi ana nyị ẹbẹẹba vaa sị ohinọyị ọnyara rị ọnị ọza ẹ̀ yị ve zuu zizi. Ọnị ọ vaa gara avaba ịzị ohinọyị ana vọ yaa mẹ ịjọvaa ha nị. Ama ọnị vana vaa jẹẹ pooro.

⁴⁵ Ohinọyị ọnọọ ọ vị ịrẹta ọnị ẹ̀ yị vị ọza o ne ana a sị va chaka ịsa ene vene ọza ana sị enyusẹ irenyi-irenyi mẹ aanị nị. Dị Ịdanịyẹrị ka ohinọyị ọ̀ taarụ! Ohomorihi ana nyị ụbanyị ọ ra sị zụ ọ ịsa ana va mẹ ụhwọọ. Ọ kà, ụra ọnọnị ọnịrị iruvo anị ọnị ọnị kà zụ ọ aanị vị ịzẹyịza o.

Inebukadineza ọọ mẹ Ịdanịyẹrị Ẹyịza

⁴⁶ Dị Inebukadineza và ku ẹtẹ ọvịdị Ịdanịyẹrị dị aa kụ ọ nị. Dị ọ̀ ka ana mẹ̀ ịsọvọ dị a rị eturare ịra yị Ịdanịyẹrị nị.

⁴⁷ Dị ohinọyị kà a yị Ịdanịyẹrị ka, ịzẹyịza, Ohomorihi Ịdanịyẹrị o huna avaba ori nịnị nị, dị ọ rẹ nyị avaba ohinọyị nịnị nị. Ọ kà, ọnị ọọ̄ sị ịsa ana tẹẹ zụ aza nị. Ohomorihi ọnọọ ọ mẹ ka ọ̀ zụ ka ẹ yị ọnị ụra ọnị ọnị rá nị.

⁴⁸ Dị ọ ka udi Ịdanịyẹrị hịrẹ ka ọ̀ kụkụ sị eyi pe avaba ẹtẹ Ịbabịrọnị nị, dị ọ rẹ vị ohirẹsụ avaba anajuwe Anibabironi nị. Dị ọ rẹ mẹ̀ ẹ ẹyịza ẹbanyị-ẹbanyị va kà a nị.

⁴⁹ Ịdanịyẹrị ộ da ịpẹ yị ohinọyị ka, ọ̀ nyị Isediraki, Imesaki ọnịrị Abedinego dị ẹ̀ sị eyi pe ịsa anaa na ịnị ẹtẹ Ịbabịrọnị nị. Ama ọnị Ịdanịyẹrị vanaa ya ịdị ohinọyị.