Ịdanịyẹrị 12 - IWE ỌNỊNỊ

Ụmẹ ẹzẹtẹ

¹ Ụmẹ aa vẹ anaa vaa nyị ẹngụkata ana ahịka ẹ yị vịdị vavọọ nyị da á mẹ hụrẹ nyị ẹkụra anaā hị́ Isirẹrị. Ụmẹ ọnọọ Ịmayịkẹẹrị ana vị anggẹẹrị ana sị eyi pe Anisirẹrị nịnị vaa kwẹẹtẹ. Ịjị ụmẹ ọnọọ òo tu, Ohomorihi vaa dọ avaba Anisirẹrị ọnị ịrẹha ẹnịnị hi ịnị iwe anịị ha.

² Aza ọrụrụ-ọrụrụ ana raà sị eteesu vị ịta kụ ẹngụ vaa ha kwẹẹtẹ. Aza ẹnyị ẹnịnị vaa ha dị ẹ yara ịdị Ohomorihi pooro zịna-zịna, dị aza ẹnyị naa rị ụya dị ụhị aa nyị wa pooro zịna-zịna.

³ Aza ana yẹ ịrẹyị ẹnịrị aza ana mẹ ka aza ọrụrụ-ọrụrụ ẹ̀ mẹ̀ ịsa ana vọrọ vaa za ẹtẹ anka ụzọmị ene hi ẹbẹẹba avọọ pooro zịna-zịna.

⁴ Ịdanịyẹrị ka anggẹẹrị ọnọọ ộ kà a yị ọnị ka ọnị ò ku iwe ọnọọ oku dị ọnị ọ̀ sị ịsa va a ne tù ụmẹ ọnị ẹhẹ vaa sịị za ẹtẹ. Dị ò ve tù, aza ọrụrụ-ọrụrụ vaa vàa chi vàa hịrẹ dị ọzọza aa kọsẹ ka ẹnị ẹ̀ yẹ ịsa huni avọọ.

Anggẹẹrị ẹẹva ọnị Ịdanịyẹrị re ụtọ irehu

⁵ Ịdanịyẹrị ka, ọnị me yii re e, dị ọnị re ka anggẹẹrị ẹẹva jẹẹ ụtọ irehu eyi ẹnyị-eyi ọsa nị.

⁶ Dị ọnyara họ̀ anggẹẹrị ana kụ́ ẹnya ọvwọọvụ hi ẹngụ ana jẹẹ akẹbẹẹba irehu aanị ka, ye re ụmẹ ọnị ịvọpa ẹnẹnị vaa sị ta kẹ?

⁷ Ịdanịyẹrị kà, dị ọnị re ka anggẹẹrị ana jẹẹ akẹbẹẹba irehu aanị ộ và ụvọ ẹyịva hịrẹ, dị ọ sị Ohomorihi ana yara pooro hị́ eku nị. Dị ọnị wụ́ ka ọ ka, ọ vaa mẹ ịrayị ẹẹta rị ẹjịjị nị, ọ ka ẹ̀ yị vị ịjị e reè vu avaba ịrazị ana kụ tu aza Ohomorihi nịnị ẹtẹ saka-saka, ụya ana a sịị rị aza Ohomorihi aanị ẹ yị vaa ta.

Ẹhahi ịrẹyị Anggẹẹrị nịnị ọnị Ịdanịyẹrị re

⁸ Ịdanịyẹrị ka ọnị ộ wụ ịsị ọ ka ama e yị ye ọnị, avọọ dị ọnị họ̀ ọ use ka; Inda, sị ẹ vaa vị ọvavẹ ịrẹma ịrẹyị ọnọnị kẹ?

⁹ Ộ ka dị anggẹẹrị ọnọọ kà a yị ọnị ka ọnị ọ̀ọ na booro aanị nị, ka ịrẹyị ẹnẹnị vị ịrẹyị ewere ana sị tẹ ne tu ụmẹ ọnị ẹhẹ vaa sịị ta.

¹⁰ Anggẹẹrị ọnọọ ka Ohomorihi vaa nyịna aza ọrụrụ-ọrụrụ hụụnị ịdọtị ẹnịnị, dị ẹ kụkụ vị ọnịnị. Aza anaa mẹ̀ ebira odivi ẹ yị vaa yẹ ịsị aa na, ama dị ẹ yaa yịị mẹ odivi ẹnịnị. Aza ana sị ụvọ za ịrẹyị Ohomorihi kẹnẹ ẹ vaa yẹ ịsị aa na nị.

¹¹ Ọ kà hụrị ụmẹ ana sị za ịsọvọ eyinị-eyinị ọ yị mẹ hi Ohomorihi jẹẹ ọnịrị ụmẹ ana sị sị ịsị eenyisi na jẹẹ ịnị irehi Ohomorihi vaa gụ ẹkụhị akahị tụra ịrẹka tụra ẹnarẹẹwụ (1,290). Ịsị eenyisi ọnọnị vaa vị ayodu yị aza, dị ọ mẹ ka à sị a kụkụ nyị aza ịnị irehi Ohomorihi.

¹² Ama aza anaa sị ayị tụra Ohomorihi pooro dị ẹkụhị akahị tụra ịrẹkẹẹchẹhị tụra ohurẹẹwụ tụra ẹẹhị (1,335) ọ̀ gụ vaa daa jẹ.

¹³ Ịdanịyẹrị ka, Anggẹẹrị ọnọọ ộ kà a yị ọnị ka ọnị ọ̀ sị ayị tụra Ohomorihi pooro ne tu ẹzẹtẹ. Ọ kà ọnị Ịdanịyẹrị vee su, ama ọnị rẹ vaa ha dị ọnị ọ̀ dọ ọgụ ọnị Ohomorihi sị tịtẹ yị ọnị.