Ịdanịyẹrị 10 - IWE ỌNỊNỊ

Ẹtẹ ọnị Ịdanịyẹrị re ịnị ịpa ọza ana kụ ịta ọvụ hwẹkẹ-hwẹkẹ hi ẹngụ

¹ Ịnị ịrayị ọhụta ọnị ọnọrụ anaā hị́ Ịsayịrọsị sị rị ohinọyị ẹtẹ Ipesiya, áa nyị ịrẹyị ana sị zụ Ịdanịyẹrị, ana aā raa hị́ Ịbẹrịtẹsaza. Ịrẹyị ọnọọ vị ịzẹyịza ama ọ́ọ katẹngụ ẹtẹẹtẹrẹ ọ̀ yị yẹ. Â va mẹ ẹhahi anị yọ nị.

² Ịdanịyẹrị ka ụmẹ ọnọọ, ọ sị mẹ ẹkụhị-ẹkụhị ọsẹ ẹẹta ọnị ọnị hụrẹ a jị òrèrè.

³ Dị ọsẹ ẹẹta ọnọọ gụ, ọnị ẹ yị rị ịsa ohinẹ ọnyọọnyị ọnị ẹ yị rị uye, ọnị ẹ yị hu eche, a vị ka ọnị ọ hyakụ dị ẹpara sisi ẹngụ bẹẹ.

⁴ Ịnị ịhị ana tụ ọ ẹkụhị ohurẹẹna ịnị ụhwẹ ịpaapa, dị ọnị jẹẹ ụtọ irehu ọbanyị anaā hị́ Itigirisi nị.

⁵ Ọnị ộ kana eyi, dị ọnị ré ọza ịnyara aanị ana kụ ịta ọvụ hwẹkẹ-hwẹkẹ hi ẹngụ, dị a hịka igooru a sị mẹ obo ọnị ọ sị sụ ọtẹ nị.

⁶ Ộ ka ọchẹngụ ọza ọnọnị vị ana sị mẹ anka uweyi ọkatarihi, dị ẹyịrẹsụ anị aa zẹtẹ ana ịnyanya avọọ nị. Onyeyi anị vana zẹtẹ anka ịra, dị ọchụvọ anị ọnịrị ahụ aa zẹtẹ anka enyusẹ ozoza ana a da ịsa sisi avọọ nị. Ọ mẹ kà ịrẹyị, ọngwẹ anị vana sị mẹ anka ọkọnị aza èe rere na owu avọọ.

⁷ Ịdanịyẹrị ka, ọnị ịnya ô re ẹtẹ ọnọnị nị. Aza ana jẹẹ pe ọnị ệ yị re e agụvị ka dị ọnị ve re ẹtẹ ọnọnị ẹnịnị vi ene zwe na tẹ̀ angwa mee hi wa.

⁸ Dị ahịka ọnị ịnya ộ vọ jẹẹ ene re ẹtẹ ohyozirenu ọnọnị nị, ọnị ẹ ị kụkụ nyị ụkata vụrụ-vụrụ. Angwahi mẹ za ọnị dị ọnị vara ọza òo re ọnị ẹ yị hyakụ a yẹ ọnị.

⁹ Ịjị ọnị wụ ọngwẹ ọza ọnọnị kẹnẹ, dị ewu za ọnị, dị ọnị hyẹdụ na va eyi ku ẹtẹ nị.

¹⁰ Kẹnẹ dị ọza ịnya vana sị ụvọ gẹ ọnị nị. Dị ọnị sị ụvọta ọnịrị idinku ka ẹtẹ dị ọnị aa dọ ẹgahị nị.

¹¹ Dị anggẹẹrị ọnọọ ka ẹ yị ọnị ka, Ịdanịyẹrị, Ohomorihi ộ da sì ịrẹyị anị. Ọnị ọ̀ vọrọ jẹẹ dị ọnị ọ̀ sị ụtọ pe ịrẹyị ọnị ọnị aa va ka aanị. Ộ ka, va tụ ọnị hi ọnị nị. Ịjị ọ maanị sị ka, dị ọnị vọrọ jẹẹ dị ọnị aa yị dọ ẹgahị nị.

¹² Dị ộ ka, asị ọnị hí angwa, agụvị ka hụrị ịhị ịpaapa ọnị ọnị hụrẹ ka ẹngụ anị chi dị ọnị ê si ka ọnị ọ yẹ́ iruvo ịrẹyị ẹnẹnị, Ohomorihi hụrẹ tụ́ ohi aduwa anị nị, aduwa anị ọnọọ ọnị ve aanị nị.

¹³ Ọ sị mẹ ẹkụhị ohurọnya ọnị anggẹẹrị ene sị eyi pe ẹtẹ Ipesiya sị va dọ ọnị oro tụ oze, ọ sị vị ọnị ịnyara tu Ipesiya ịzọọ, dị Ịmayịkẹẹrị ana vị ọnyara ịnị ohirẹsụ anggẹẹrị nịnị vavẹ, dị ọ va gụ ọnị ụvọ nị.

¹⁴ Ộ ka, ọnị ọ zị vẹ ọ yị va ka ẹ yị ọnị ịsị e ve tu aza anị ụhwọ, agụvị ka ẹtẹ ọnị re aanị ẹ yị vị ịrẹyị ọ yaanị ọ vị.

¹⁵ Ịdanịyẹrị ka ịjị ọ maanị sị ịrẹyị ẹnẹnị kà yị ọnị, dị ọnị ka ịrẹsụ hi ê re eteesu nị, ọnị ọ yị zụ ka ịrẹyị vụrụ-vụrụ.

¹⁶ Dị ịsa ọnya ana sị mẹẹ anka ọza avọọ va sị ụvọ kanyị ọnị irenu nị. Dị ọnị ha irenu dị ọnị kà a yị ọza ana jẹẹ ọvịdị anị aanị ka, ọga, ẹtẹ ọnị ọnị re aanị ọ raa mẹ ka ọ̀ ngụ ọnị ẹngụ, ọnị ẹ yị kụkụ nyị ụkata vụrụ-vụrụ.

¹⁷ Dị ọnị ka, vị ọnị sị mẹẹ anka ọrịhị ana jẹẹ ọvịdị ọga anị avọọ nị. Ẹnị ẹ vị ọnị ana vaa và a ịkarenu. Ụkata ọnyọọnyị ẹ yị kụkụ vị aanị, vị ọnị aa vụrị tụ ụhwẹ nị.

¹⁸ Dị ịsa ọnya ana sị mẹ anka ọza avọọ rẹ va sị ụvọ kanyị ọnị dị ọ mẹ ka ọnị ộ nyị ụkata nị.

¹⁹ Dị ộ ka, Ohomorihi ọ da sị ịrẹyị anị kẹnẹ, agụvị avọọ a sị ọnị hí angwa, ẹngwọọrọ ọ̀ sị vị aanị. Ộ ka, ọnị ọ sị tụ ọtụtụrụma dị asị ọnị va ẹngụ hi ẹtẹ. Ịdanịyẹrị ka ịjị ọ maanị sị ka yị ọnị, dị ọnị sị ụkata nyị huna avọọ nị. Dị ọnị ka, aarịhịnị ịsị ọ̀ọ nyị ọ yị ka ọ̀ kà a yị ọnị agụvị ka ọ ra mệ ka ọnị ọ nyị ụkata booro aanị nị.

²⁰ Ọza ọnọnị ô tu oni ohi ka: Ọnị ọ́ọ́ yẹ ịsị ẹ sị ọnị vẹ aanị? E yi kù dị ọnị ọ̀ varẹma ne pe anggẹẹrị ene si eyi pe ẹtẹ Ipesiya vụ̀ ịrẹvụ. Dị ọnị re ve ne pe anggẹẹrị ene si eyi pe ẹtẹ Igirisi vụ̀ ịrẹvụ.

²¹ Ama Ịpaapa da, ọnị vaa kà a yị ọnị, ịsa a chẹrẹ tụ ịnị iwe ịrẹyịzẹyịza ọnọnị. Ẹ yị nyị ọza ana gụ ọnị ụvọ ịnị ịrẹyị ọnịrị anggẹẹrị ẹyịva ẹnẹnị, ẹ̀yị vị Ịmayịkẹẹrị kẹnẹ, ana vị anggẹẹrị ana sị eyi pe ọnị.