Ịdanịyẹrị 1 - IWE ỌNỊNỊ

Ịdanịyẹrị ọnịrị ẹẹta anị ịnị irehi ohinọyị Ịbabịrọnị

¹ Â nyị ọnọrụ ọnya aanị ana aā hị́ Ijehoyakimi ana vị ohinọyị Ijuda ịnị ụmẹ ọnya aanị. Ụmẹ ọnọọ ọnọrụ ana aā hị́ Inebukadineza ọnị rẹ sị vị ohinọyị ẹtẹ Ịbabịrọnị nị. Ịnị ịrayị ọhụta ọnị Ijehoyakimi rị ohinọyị, dị Inebukadineza kụ ịrẹkụ ne tu anị Ijerusarẹmị dị ẹ họ̀ karaa okiri-okiri nị.

² Ananyị yị ộ hụrẹ Ijehoyakimi ụvọ yị Inebukadineza beri ẹnya ẹnyị ene hi ịnị irehi Ohomorihi. Dị ọ kụ wa na ngụ ịnị irehi ori ẹnịnị Ịbabịrọnị nị. Ô tu ịzọọ dị ọ kụ ẹnya ẹnẹẹ hi ịnị irehi ori anị nị.

³ Â nyị ọnọrụ ọnya aanị ana aā hị́ Asipenazi, ana vị ohirẹsụ aza anaa mẹ̀ ụkọrọ ịdị ohinọyị. Dị Inebukadineza kà a yị ọ ka, ọ nọ ịnị ovwoovu ohinọyị Ijuda na tọ ozwọọmụha vẹ nị. Ẹnịnị ẹ vị aza ana ayị ẹnịnị vị, ọnị aza zụ́ sị ayị tụra, dị ẹ vị aza anaā tẹsị ọza.

⁴ Ọ kà ọ̀ tọ̀ọ ezwọọmụha ene zoza, dị ẹ kata, ọnị ịsa ẹ yị zị. Ẹnịnị ẹ̀ vị aza ana yẹ ịrẹyị, dị ẹ rẹ yẹ ịsa, ana va zụụ mẹ ụkọrọọ yị ọnị. Dị ọ ka à kọ wa ẹkụra Anibabironi dị ẹ rẹ zụ chẹrẹ ẹ nị.

⁵ Dị ohinọyị ka aa mẹ ịsọyịrị ọnị ọnị a rị yị wa, dị a rẹ sị eche ọnị nị ee hú yị wa nị. Dị à zụ́ wa ịsa pooro mẹ ịrayị ẹẹta, ịrẹma anị dị ẹ̀ vee beri ọnị mẹ̀ ụkọrọ nị.

⁶ Â nyị ezi Anịjuda ẹnyị aanị ịnị ẹnịnị ana aā hị́ Ịdanịyẹrị, Ịhananịya, Imisẹrị ọnịrị Azariya.

⁷ Dị ohirẹsụ aza anaa mẹ̀ ụkọrọ ịdị ohinọyị sị ịrẹha Anibabironi yị wa nị. Ọ kà Ịdanịyẹrị ọ̀ rị Ịbẹrịtẹsaza nị, dị Ịhananịya ọnị rị Isediraki nị, Imisẹrị ọ rị Imesaki nị, dị Azarịya ọnị rị Abedinego nị.

⁸ Dị Ịdanịyẹrị kà a yị ẹngụ anị ka ọnị ọ yị vaa sị ịsọyịrị ọnịrị eche ohinọyịị du ẹngụ anị ẹngụ nị. Dị ọ kà a yị Asipenazi ka ọ̀ navọ ọ̀ gụ ọnị ụvọ ka oni e yi sì ka ọnị ò du ẹngụ anị ẹngụ nị.

⁹ Ohomorihi ộ mẹ̀ ka Asipenazi ọ ngụ ayị ịdanịyẹrị ẹtẹẹtẹrẹ.

¹⁰ Dị ọ kà a yị Ịdanịyẹrị ka angwa e hi ọnị, agụvị ka, ohinọyị ana kà a ẹngụ ịsọyịrị ọnịrị eche ọnị ọ ka àa sị yị wa òo ne re ka ọchẹngụ anị ọ̀ọ jị ọsa nye yị ọpọọpa anị ana vọ, vị aa wụ ọnị nị.

¹¹ Dị Ịdanịyẹrị da ịpẹ yị ọza ọnị Asipenazi nyị ka ọ sị eyi pe ọnịrị Ịhananịya, Imisẹrị, beri Azariya nị.

¹² Dị ọ ka ọ̀ zama eni re mẹ ẹkụhị ẹẹwụ dị aa chịnẹ avị kẹnẹ yị ẹnị ọyịrị, dị ẹnị ẹ ree hú enyi kẹnẹ nị.

¹³ Ẹkụhị ọ̀ọ sị gụ, dị o re ọchẹngụ ẹnịnị ọnịrị ọchẹngụ ẹnị ana vọ anaa rị ịsọyịrị ohinọyị chọmị-chọmị nị. Òo mè re ka ẹnị ẹẹ ya, dị ọ̀ yẹ ẹngụ ebira ọnị ọ̀ọ vaa mẹẹ hi ẹnị.

¹⁴ Ịzẹyịza dị ọza ana ka ọ̀ sị eyi pe wa aanị dọ ooho, dị ọ vavọọ zama wa re ẹkụhị ẹẹwụ nị.

¹⁵ Ịrẹma ẹkụhị ẹẹwụ ọnọọ dị e re ka Ịdanịyẹrị ọnịrị ọta anị ẹyịta ẹnẹnị ẹ banyị, dị ọchẹngụ ẹnịnị rẹ swa huni ẹnị anaa rị ịsọyịrị ohinọyị nị.

¹⁶ Hụrị ụmẹ avọọ dị ọza ana ka ọ̀ sị eyi pe wa aanị ka à kụkụụ chịnẹ avị kẹnẹẹ yị wa nị.

¹⁷ Ohomorihi ộ mẹ̀ ka ezwọọmụha ẹẹna ẹnẹnị ẹ̀ yẹ ịrẹyị ẹtẹẹtẹrẹ, dị ẹ rẹ zụ kọsẹ ịsa irenyi-irenyi. Dị ọ rẹ sị ụkata yị Ịdanịyẹrị ka ọ̀ zụụ ka iruvo etore ọnịrị ụra nị.

¹⁸ Ịjị ịrayị ẹẹta ana ka à zụ̀ wa ịsa sị gụ, dị ohirẹsụ aza anaa mẹ̀ ụkọrọ ịdị ohinọyị kụ wa vẹ ọvịdị Inebukadineza ohinọyị nị.

¹⁹ Ohinọyị mè pe wa ka ịrẹyị, ô re ka ịnị avaba ẹnịnị ẹ yị nyị ọza ana da ọgụ gụrị Ịdanịyẹrị, Ịhananịya, Imisẹrị ọnịrị Azarịya. Agụvị avọọ dị ohinọyị nyị wa ka ẹ̀ ya ịnị aza anaa mẹ̀ ụkọrọ ini ikootu anị nị.

²⁰ Ịnị avaba ịrẹyị ịrẹyọyẹ ọnịrị ọkarẹyị obooro ọnị ohinọyị họ̀ wa use, ô re ka Ịdanịyẹrị nịnị ee huna avaba ọmahọnọ ọnịrị ọvavo ene hi ịnị avaba ẹtẹ anị nị.

²¹ Ịdanịyẹrị ộ mẹ̀ ụkọrọ ịdị ohinọyị pooro ne tu ịrayị ịpaapa ọnị ọnọrụ ọnya ana aā hị́ Ịsayịrọsị sị rị ohinọyị ẹtẹ Ipesiya.