Ẹzịra 8 - IWE ỌNỊNỊ

Ovwoovu-Ovwoovu ana saasa Ẹzịra varẹma vẹ eehi

¹ Atazazasisi ọ vị ohinọyị ẹtẹ Ipesiya ụmẹ ọnị Ẹzịra sị kụ́ ọdọvịdị ovwoovu-ovwoovu ẹnẹnị nọ Ijerusarẹmị nị.

² Ịrẹha ọdọvịdị ẹnẹẹ ẹ vị Igesomi hụrị ovwoovu Ihunihasi, Ịdanịyẹrị hụrị ovwoovu Ịtama.

³ Ihatusi ozi Isekaniya hụrị ovwoovu Idevidi. Ịzakaraya ọnịrị anọrụ ẹchẹhị tụra ẹvarẹwụ hụrị ovwoovu Iparosi.

⁴ Eriyẹhonayi ozi Izerahiya ọnịrị anọrụ ịrẹka e hụrị ovwoovu Ipahati Imowabi.

⁵ Isekaniya ozi Ijahaziyẹrị ọnịrị anọrụ ịrẹkẹẹchẹhị hụrị ovwoovu Izatu.

⁶ Ebedi ozi Ijonatani ọnịrị anọrụ hụụnị ovwoovu Adini.

⁷ Ijesaya ozi Atarịya ọnịrị anọrụ ẹtarẹwụ hụrị ovwoovu Erami.

⁸ Izebadiya ozi Ịmayịkẹẹrị ọnịrị anọrụ ẹbẹẹna hụrị ovwoovu Isehwatiya.

⁹ Ọbadaya ozi Ijehiyẹrị ọnịrị anọrụ ịrẹka tụra ẹwụrịhịnta hụrị ovwoovu Ijobi.

¹⁰ Iseromiti ozi Ijosihwaya ọnịrị anọrụ ẹchẹhị tụra ẹbẹẹta hụrị ovwoovu Ịbanị.

¹¹ Ịzakaraya ozi Ibebayi ọnịrị anọrụ ohurịhịnta hụrị ovwoovu Ibebayi.

¹² Ijohananị ozi Ihakatani ọnịrị anọrụ ẹchẹhị tụra ẹẹwụ hụrị ovwoovu Azigadi.

¹³ Erihwẹrẹtị, Ijeyẹrị ọnịrị Isemaya ne beri anọrụ ẹbẹẹta hụrị ovwoovu Adonikami.

¹⁴ Ụtayị ọnịrị Izaku beri anọrụ ẹtarẹwụ hụrị ovwoovu Ibigivayi.

¹⁵ Dị Ẹzịra kụ avaba aza gụ ụtọ okuha Ahava, dị ẹ ya ịzọọ ẹkụhị ẹẹta nị. Ịzọọ ọ kana eyi ọzọza dị ọ re ka ẹ yị nyị Anireevi ikonya ịnị akakana aza ọnịrị ohirẹsụ irehi Ohomorihi nịnị nị.

¹⁶ Agụvị avọọ dị Ẹzịra tụ hị́ ọdọvịdị ẹnịnị nị. Aza ọnị ọ tụ́ hị́ ẹ vị Eriyaza Ariyẹrị, Isemaya, Erinatani, Ijaribi, Erinatani, Inatanị, Ịzakaraya ọnịrị Imesurami. Avọọ, ọ mẹ̀ rẹ hị́ Ijoyaribi ọnịrị Erinatani ana vị ọzwọzịsa nị.

¹⁷ Dị Ẹzịra tụ wa ne tu ọnọrụ ọnya ana aā hị́ Ido ana vị ọdọvịdị tụ Ikasipiya. Dị ẹ kà a yị ọ ka ọnịrị anụkọrọ irehi Ohomorihi ẹ̀ kụ aza va mẹ̀ ụkọrọ ịnị irehi Ohomorihi nị.

¹⁸ Ohomorihi ộ vayị ẹnịnị dị ọ mẹ ka à tụ ọza ịnya ana ye eyi ụkọrọ ẹtẹẹtẹrẹ vẹ nị. Ịrẹha anị ọ rị Iserebiya nị. Anireevi hụụnị ovwoovu Imahiri ozi Isirẹrị ọ vị nị. Dị ezi Iserebiya ọnịrị ẹyịnyara anị ana saasa a vị ẹwụrịhịnta nị.

¹⁹ Dị a rẹ tụ aza ẹnị oohu saasa Ihasabiya ọnịrị Ijesaya hụụnị ovwoovu Imerari vẹ nị.

²⁰ Â nyị aza ẹnị ịrẹka tụra oohu ọnị Idevidi ọnịrị ọdọvịdị nịnị vịdị sị nyị tịtẹ ẹ̀ gụ Anireevi nịnị ụvọ ịnị ụkọrọ irehi Ohomorihi. Ịrẹha ẹnịnị vị ana a chẹrẹ tịtẹ.

Ẹzịra ộ kụ́ aza za awẹ dị ẹ mẹ̀ aduwa nị

²¹ Ụtọ okuha Ahava ịzọọ, Ẹzịra va ka ẹ yị aza ana gụ ka ẹ̀ za awẹ, dị ẹ̀ ka ẹngụ ẹnịnị chị, dị ẹ da ịpẹ ka Ohomorihi ò sere ẹnịrị ẹnya ẹnẹ ẹ kụ aa nọ Ijerusarẹmị nị.

²² Ẹzịra ka ụhị ọ vị yị ọnị ka ọnị ọ̀ varẹma ne tù ohinọyị ka ọ̀ kụ isoja ọnịrị umaata ịrẹkụ sere ẹnị agụvị ọnịvị ẹnịnị nị. Ẹnị ệ vịdị sị ọ kàa yị ohinọyị ka Ohomorihi ẹnịnị vị eneē sere aza ana sị ayị tụra a, ama di ee du ayịị hi aza ene yi ọ tịtẹ.

²³ Agụvị avọ dị ẹ sị ịzẹyịza mẹ̀ aduwa, dị ẹ̀ yị rị ịsa nị. Ohomorihi ộ wụ́ aduwa ẹnịnị dị o sere wa nị.

Ẹyịza ana tụ́ yị irehi Ohomorihi

²⁴ Dị Ẹzịra nyị ọdọvịdị ohirẹsụ irehi Ohomorihi ẹwụrẹva beri Iserebiya ọnịrị Ihasahiya vaka ẹyịnyara ẹnịnị ẹẹwụ nị.

²⁵ Ẹzịra ộ ngọ avaba igooru, isiriva ọnịrị ẹnya ana vọ ọnị ọ dọ hụụnị ụvọ ohinọyị, Anajuwe ọnịrị ọdọvịdị Anipesiya nịnị beri Anisirẹrị ẹnị ẹ yị varẹma vẹ eehi. Dị Ẹzịra ga ẹnya ẹnẹẹ yị aza ẹnẹẹ ka ẹ̀ kụ wa na da irehi Ohomorihi nị.

²⁶ Dị ọ ngọ isiriva ẹnyarẹsụ ohurẹẹhị, ẹnya ana a sị isiriva mẹ̀ vị ẹchẹhị ikirogirami (70 kg), igooru vị ẹnyarẹsụ ẹẹta tụra achẹta ẹẹna ẹnyarẹsụ, dị ọnyị ẹnya Igooru vị oohu nị.

²⁷ Igooru ẹnyarẹsụ oohu ana rata ikirogirami ịhịnta rẹ ẹjịjị vaka ẹnya enyusẹ ẹẹva ene nyee ene re zoza anka igooru.

²⁸ Dị Ẹzịra kà yị ohirẹsụ irehi Ohomorihi ka ẹnịnị vị Ẹnẹyịmavara Ohomorihi ohiku ẹnịnị, dị avaba ịsa ẹnẹnị vị ẹnịnị. Isiriva ọnịrị igooru ẹnẹẹ vị ana sị va mẹ ẹyịza yị Ẹnẹyịmavara

²⁹ Ẹnịnị e re ka ẹnị e si eyi pe e, dị asị a nyị ịsị ẹ kanyị wa pooro dị ẹ ngụ Ijerusarẹmị. Dị a ngọ wa ini irehi Ohomorihi eyi ohirẹsụ ọbanyị irehi Ohomorihi ohirẹsụ, Anireevi ọnịrị ọdọvịdị Anisirẹrị nịnị.

³⁰ Dị ohirẹsụ irehi Ohomorihi nịnị ọnịrị Anireevi nịnị ê sị eyi pe ẹyịza ana ngọ aanị agụvị dị ẹ̀ kụ wa nọ ịnị irehi Ohomorihi ana ya Ijerusarẹmị.

³¹ Ịnị ẹkụhị ẹwụrẹva ịnị ụhwẹ ịpaapa, ẹ́ hụrẹ irehu Ahava aa nọ Ijerusarẹmị nị. Ohomorihi ẹnịnị ô sere wa, dị ọnịvị ẹnịnị ẹ yị jẹẹ zi wa oze nị.

³² Ẹ́ mẹ sị ngụ Ijerusarẹmị, ệ tụ́ ụhwọ́ ẹkụhị ẹẹta.

³³ Ịhyẹgwẹna anị, ẹnịnị ệ nọ ịnị irehi Ohomorihi ịzị ẹ ya tenyi isiriva, igooru, ọnịrị ẹnya ana vọ ngọ yị Imeremọtị ozi Uriya ana vị ohirẹsụ irehi Ohomorihi. Eriyaza ozi Ihwinehasi ọnịrị Ijozabadi ozi Ijesuwa beri Inowadiya ozi Ibinuyi ana vị Anireevi ya ịzọọ beri wa.

³⁴ Avaba ẹnya ẹnẹẹ vị ana a za ịrịka, dị a ngọ, dị a chẹrẹ ịrịka ọzọza tịtẹ.

³⁵ Ẹnị ana va hụrẹ Ịbabịrọnị vẹ eehi ệ mẹ̀ ịsọvọ ana aā rị ịra yị Ohomorihi Anisirẹrị. Ệ sị ụnọ ẹwụrẹva mẹ̀ ịsọvọ yị avaba Anisirẹrị nịnị, dị ẹ sị ịdẹba ẹnarẹwụ tụra ịhịnọnyị, ozi atẹmẹ ẹtarẹwụ tụra ịhịmba ọnịrị ịdẹ ẹwụrẹva mẹ̀ ịsọvọ ịvị nị. Avaba uye ẹnẹnị vị ana aa rị ịra ịsa ịsọvọ yị Ẹnẹyịmavara.

³⁶ Ẹnịnị ệ sị ọda ọnị Ohinọyị mẹ̀ na yị Ịgọvọnọ nịnị ẹnịrị ọdọvịdị akẹnẹ irehu Iyuhwuretisi nịnị ana gụ wa ụvọ dà irehi Ohomorihi.