Ẹzịra 3 - IWE ỌNỊNỊ

Ê re nyima aa ahẹkẹ Ẹnẹyịmavara

¹ Ịnị ụhwẹ ana tụ ọ ụhwẹ ịhịmba ọnị Anisirẹrị na ra ẹkụra ẹnịnị, dị ẹ kụ ẹngụ gụ Ijerusarẹmị.

² Dị Ijesuwa ana vị ozi Ijozadaki ọnịrị ohirẹsụ irehi Ohomorihi ana vọ neberi Izerubabẹrị ozi Isiritiyẹrị ọnịrị aza anị tenyi ụta ịsọvọ Ohomorihi Anisirẹrị da nị. Ệ da a anka a mẹ̀ chẹrẹ tụ ịnị iwe ọda Imosiisi ana vị ọnịsẹ Ohomorihi. Ẹ vavọọ da a agụvị dị ẹ rị ịsa ịsọvọ ịra ịrẹsụ anị.

³ Ịnị eyi angwahi-angwahi aza ana kara wa ẹ sị da ụta ọnọọ nị. Dị ẹ da a tụ ịzị ọ vịdị yaa ịnị ịyẹẹyẹ nị. Dị ẹ nyima a rị ịsa ịsọvọ ịra ịrẹsụ anị ẹnẹnẹ ọnịrị oruva yị Ẹnẹyịmavara.

⁴ Dị ẹ yaa rị eche ajẹngụ anka ọda mẹ ka a nị. Dị ẹ rẹ yaa mẹ̀ ịsọvọ ẹkụhị-ẹkụhị nị.

⁵ Ịrẹma ịsọvọ ẹnịnị, dị ẹ rẹ yaa mẹ̀ ịsọvọ eyinị-eyinị ọnịrị ịsọvọ ụhwẹ ọwọọwa neberi ịsọvọ eche ịrayị-ịrayị yi Ẹnẹyịmavara nị. Dị ẹ rẹ yaa mẹ̀ ịsọvọ ọnị ọzọza ụvọta anị sị ayị anị sị hẹkẹ Ẹnẹyịmavara nị.

⁶ Ịsọvọ ẹnẹẹ vị ẹnị ẹ nyima anị hụụnị ẹkụhị ịpaapa ịnị ụhwẹ ịhịmba ọnị ẹ na ngụ ịzọọ, dị ụkọrọ irehi Ẹnẹyịmavara vẹ nyima nị.

Ê nyima oyitenyi irehi Ohomorihi dà

⁷ Dị ohinọyị Ịsayịrọsị ku ịsọyịrị ọnịrị eche neberi angwẹ na hị́ ọchị Isida hụụnị ụvọ Anịsayịdọnị, Anitaya ọnịrị Ịrẹbanọnị. Dị ọ sị ẹkẹhị yị wa ẹnẹ sị sị wa ọtụrarehi ọnịrị Ikahunta ana kanyị irehi. Ọchị ẹnẹẹ vị ana sị enyi kụ vẹ hi ẹkụra ana hị́ Ịjọpa yị wa.

⁸ Ịnị ụhwẹ ana tụ ọ ụhwẹ ọhụva ịnị ịrayị ọhụva ọnị Anisirẹrị hụrẹ Ịbabịrọnị vaa ve eehi, ẹ nyima e tenyi irehi Ẹnẹyịmavara Ohomorihi da nị. Dị Izerubabẹrị ozi Isiritiyẹrị, Ijesuwa ozi Ijozadaki, ohirẹsụ irehi Ohomorihi nịnị ọnịrị Anireevi neberi avaba aza ana ve eehi nọ Ijerusarẹmị ne nyima ụkọrọ ọnọọ nị. Dị ẹ nyị ezi Ireevi ana sị gụ ịrayị oohu va hịrẹ ka e si eyi pe ụkọrọ ọnọọ nị.

⁹ Ẹnị Anireevi ana vị ọga avaba ụkọrọ ẹ vị Ijesuwa ọnịrị ezi anị vaka ẹyịnyara anị, neberi Ikadimẹrị ọnịrị ezi anị (evere ana chị hụụnị ovwoovu Ihodaviya) ọnịrị aza.

¹⁰ Ịjị ọnị aza ana da irehi ọnọọ raa ka a ẹtẹ, dị avaba ohirẹsụ irehi Ohomorihi nịnị kụ ẹnya ahẹkẹ ẹnịnị hị́ ẹngụ, di e yee hu Ịkakanchị, dị ezi Asahwi ẹnị e hu ịchaacha nị. Dị ẹyaa ga Ẹnẹyịmavara anka Idevidi ohinọyị Anisirẹrị mẹ chẹrẹ ẹ tịtẹ.

¹¹ Agụvị irehi ana a ka a ẹtẹ aanị, dị avaba aza sị ọngwẹ tụ ẹba aa ga Ẹnẹyịmavara nị. Dị ẹ yaa jị ahẹ gono o nị. Dị ẹ kà, “ọ yẹ ịrẹyị, di o sì ịrẹyị Anisirẹrị nịnị pooro zịna-zịna nị”. Dị ẹyaa kụ ọ avọ nị.

¹² Ama ọrụrụ-ọrụrụ azọkụ ohirẹsụ irehi Ohomorihi, ọnịrị Anireevi nịnị neberi azọkụ-azọkụ ovwoovu me re irehi ana kwẹẹtẹ, dị ẹ yaa jị òrèrè booboro ẹ mẹ tamayị irehi ana vịdị da tụ ịzọọ ịnị ịyẹẹyẹ. Dị aza ana vọ ẹnị ee nowu ịrajẹ nị.

¹³ Ẹtẹ maa sụ̀ ịrẹyị bụdụ vabẹ, ọza ọ yị kụkụ yẹ irenyi yị owu ịrajẹ ọnịrị owu orere. Dị aza ana yị aha ẹnẹẹnẹ aa wụ ọngwẹ ẹnịnị nị.