Ezikẹẹrị 9 - IWE ỌNỊNỊ

 wụ̀ aza Ijerusarẹmị

¹ Ezikẹẹrị ka ọnị ộ wụ́ ka Ohomorihi ô nowu, dị ọ ka, ẹwụ nịnị ana vaa sị ụyaa rị Ijerusarẹmị ẹ̀ vẹ́ ịzẹnị nị. Ọ kà ẹnịnị ẹ kụ́ ẹnya ịrẹkụ ẹnịnị rị ụvọ o.

² Ịzịịzọ, dị aza ẹnị ịhịnọnyị vana zị oze ọbanyị ana a zịị̄ ngụ ịnị irehi Ohomorihi vẹ nị. Oze ọbanyị ọnọọ vị ana yà eyi ẹbẹẹba. Ọzọza vị ana sị ẹnya ịrẹkụ anị rị ụvọ. Â nyị ọza ịnyara ana kụ ẹnya ọvwọọvụ hi ẹngụ, ana saasa wa vẹ. Dị ọ sị ịsị a sịị chẹrẹ ịsa rị ụvọ nị. Dị avaba ẹnịnị vaa jẹẹ akaha ụta ịsọvọ ana a sị enyusẹ ọkatarihi mẹ nị.

³ Dị ẹtohweyi anaa za chanyị-chanyị kara Ohomorihi Anisirẹrị nịnị kụ̀rà hụrị ịrẹsụ icherubi ịzị ọ vịdị yà, dị ọ́ na yà enoze Irehi Ohomorihi nị. Ẹnẹyịmavara ộ hị́ ọza ana kụ ẹnya ọvwọọvụ hi ẹngụ aanị, dị ọ ka,

⁴ Ọ̀ ngụ avaba Ijerusarẹmị zịịzị, avaba aza enee du ayị agụvị ka aza aa mẹ ịsị aa nyị ọnị ịhyẹrẹ aanị ịnị ẹkụra, dị ọ̀ tọ̀ wa ịrẹwa ịnị ibe nị.

⁵ Ezikẹẹrị ka, ọnị ộ wụ Ohomorihi mẹ kà a yị aza ẹnị ịhịnọnyị ana vọ ka, ẹ̀ saasa ọza ọnọnị ngụ avaba Ijerusarẹmị zịịzị, dị ẹnịnị ẹẹ wụ̀ azaa ha. Asị ẹ́ dà aza ẹnyẹẹnyị tịtẹ. Asị ẹ́ vayị ọza ọnyọọnyị.

⁶ Ọ kà, ẹnịnị ẹ̀ wụ ọnọrụ ọzọkụ-ọzọkụ, dị ẹ̀ wụ ezwọọmụha. Ẹnịnị ẹ̀ wụ ezwoorihi, ọnyị ozi nịnị ẹnịrị ezweyi bẹẹ. Ama asị ẹ́ kanyị ọza ọnyọọnyị ana a raa tọ̀ ịrẹwa ịnị ibe. Ọ kà ẹnịnị è nyima hụụnị irehi ọnị Ohomorihi Ịzẹyịza dị é nyima hụụ ịrẹsụ ẹnị ọdọvịdị ana jẹẹ ịnị Irehi Ohomorihi ịzọọ nị.

⁷ Ẹnẹyịmavara ộ kà a yị wa ka, ẹ̀ mẹ o me zee wa eyi ịnị irehi Ohomorihi. Ẹnịnị ẹ̀ wụ̀ aza và hí ẹtẹ ịnị irehi Ohomorihi. Ọ kà ẹnịnị ẹ̀ vavọọ na. Ịzẹyịza, dị ẹ naa, wụ̀ azaa vaa hi ẹtẹ Ijerusarẹmị nị.

⁸ Ezikẹẹrị ka, ịjị ẹ́ vavọọ aa wụ̀ azaa na, dị ọyịnyara anava jẹẹ ịzọọ nị. Ọnị ô va eyi ku ẹtẹ, dị ọnị nowu ka, tee! Ohomorihi Ananyị avaba ụkata, Ụ waa vaa maanị kụ́ ayịị hi Ijerusarẹmị, dị ụ sị avaba aza ana vọ hi ẹtẹ Isirẹrị wụ nị?

⁹ Dị Ohomorihi tụ́ ohi ka, Anisirẹrị ọnịrị Anijuda nịnị ẹ́ ra rị ịvị ebira odivi-odivi ọ̀ yị mẹ baaba nị. Ẹnịnị ẹ́ kụ aza wụ̀ avaba aha, dị ẹ gara ebira odivi hi ẹtẹ Ijerusarẹmị nị. Ẹnịnị ka, ọnị Ẹnẹyịmavara ọ sị ẹkụra ẹnịnị hụrị ụvọ; ọnị é yi kuku re ẹnị.

¹⁰ Ama ọnị ẹ́ yị vaa vayị ẹnịnị. Ọnị vaa mẹ wa, ịsị ẹ́ mẹ aza ana vọ.

¹¹ Dị ọza ana kụ ẹnya ọvwọọvụ hi ẹngụ ịsọọnị vavẹ dị ọ va ka ụtụ yị Ẹnẹyịmavara kà, ọnị ọ raa mẹ ịsị ọ ka ọnị ọ̀ na mẹ nị.