Ezikẹẹrị 8 - IWE ỌNỊNỊ

Ịsị enyisi ana aza aa mẹ ini Irehi Ohomorihi

¹ Ezikẹẹrị ka, ịnị ẹkụhị ọhụhị ụhwẹ ịhịnọnyị ịnị ana tụ ọ ịrayị ịhịnọnyị ana za ohinọyị Ijehoyakimi ọrịhị, azọkụ-azọkụ Anijuda nịnị ana a za ọrịhị ne hi Ịbabịrọnị ệ yaatụ pe ọnị ịnị eehi anị, kẹnẹ, dị ụkata Ẹnẹyịmavara Ohomorihi vana vẹ ọnị ịrẹsụ nị.

² Ọnị ô re ẹbẹẹba, dị ọnị re, ịsị ẹ sị mẹ ọza avọọ nị. Ẹhwị ọtẹ anị vachi vi ana sị mẹ anka ịra avọọ, dị ẹhwị ẹbẹẹba anị yà anka enyusẹ ọkatarihi anaa za nyoonyo avọọ nị.

³ Ịsị ẹ sị mẹẹ anka ọza avọọ aanị ộ tana ụvọ dị ọ sị ụvọ ngụ ọnị ẹyị ịrẹsụ nị. Ịnị ẹtẹ ọnị ọnị maanị re aanị, ụhwẹ Ohomorihi ộ sị ọnị tụ ẹba ịnị ahị, dị ọ sị ọnị na ngụ Ijerusarẹmị nị. Ộ sị ọnị na jẹẹ ịnị ịnẹ ịzị a zịị̄ ngụ eehi ịpa oze ọbanyị ana yà eyi ẹbẹẹba ana zịị̄ ngụ ịnị Irehi Ohomorihi. Ịzọọ a sị ori ọnya jẹẹ ẹnẹ ẹyaa sịị̄ mẹ ayịị kụ Ohomorihi ẹtẹẹtẹrẹ nị.

⁴ Ezikẹẹrị ka ọnị mẹ ya ịzọọ, oni ô re ẹtohweyi anaa za chanyị-chanyị ana sị zụ ka Ohomorihi Anisirẹrị nịnị yà ịzọọ. Avọọ ọnị mẹ vịdị re e ọnị mẹ ya ụtọ irehu Icheba nị.

⁵ Ohomorihi ộ kà a yị ọnị ka, ozi-ọza, ọnị ọ̀ kana eyi oze eyi ẹbẹẹba. Ọnị kana eyi, dị ọnị re ka ọ̀ sị gụrị ụta ịsọvọ ana yà ịzị a zịị̄ ngụ eehi ịpa oze ọbanyị, ori anaā mẹ ka ayị ọọ ku Ohomorihi ẹtẹẹtẹrẹ yà ịzọọ nị.

⁶ Ohomorihi ộ kà a yị ọnị ka, ozi-ọza, ọnị wee re ịsị Anisirẹrị nịnị aa mẹ? Ọ kà ọnị ò re ịsị aa nyị ọnị ịhyẹrẹ ọnị ẹyaa mẹ ịzẹnị, dị ẹyaa dụ ọnịị noze tara irehi anị. Ọ kà, ọnị vee re ịsị e divi hu ọsọnị ẹnẹ ẹyaa sịị mẹ̀ ụhị nyị ẹngụ ẹnịnị.

⁷ Ezikẹẹrị ka, ộ sị ọnị ịzị a zịị̄ ngụ ohweje ana yà ẹhẹ, dị ọ sị uhwohwo ọnyara ana ya ịnị ugene zụ̀ ọnị nị.

⁸ Dị ọ ka, ozi-ọza, ọnị ọ̀ chị́ ugene ọnọọ nị. Ọnị ộ chị́ ọ, dị ọnị ne tu oze nị.

⁹ Ohomorihi ộ kà a yị ọnị ka, ọnị ò ngụ eehi dị ọnị ò re ịsị aa nyị ọnị ịhyẹrẹ ẹnẹ ẹyaa mẹ ịzọọ.

¹⁰ Ịzẹyịza, ọnị ộ ngụ eehi, dị ọnị ré ka, Anisirẹrị nịnị ệ và uhwoto ẹwụ nịnị ọnịrị uye ana vọ ẹnẹ ẹ̀ yị nị, beri uhwoto ịsa ana vọ ẹnẹ ẹyaa hẹkẹ va hi ịnị ugene nị.

¹¹ Ezikẹẹrị ka, ọnị ô re ọdọvịdị Anisirẹrị nịnị, ẹnị ẹtarẹwụ ka ẹ jẹẹ va eyi ka ịsa ẹnẹnị ịzọọ ọnọrụ anaā hị́ Ijazanịya ozi Isahwani yà ịnị ẹnịnị bẹẹ. Ọzọza ộ sị ịsị a sịị̄ rị eturare ịraa rị ụvọ, dị areyi eturare ọnọọ aa daa vaa hịrẹ nị.

¹² Ohomorihi ộ họ̀ ọnị use ka, ozi-ọza, ọnị wee re ịsị ọdọvịdị Anisirẹrị nịnị aa mẹ ịnị ewere? Ẹnịnị ẹẹ kụ ẹngụ hi ịnị aku ana va uhwoto ịsị irenyi-irenyi hi, dị ẹyaa mẹ ori nị. Dị ẹ ka, Ẹnẹyịmavara ọ́ sị ẹkụra ẹnịnị hụrị ụvọ, é yi kuku re ẹnị.

¹³ Di Ẹnẹyịmavara rẹ kà a yị ọnị ka, ọnị vee re ịsị aa nyị ọnị ịhyẹrẹ ene huna ọsọnị ọnị ẹyaa mẹ.

¹⁴ Ịzẹyịza dị ọ sị ọnị oze ọbanyị ana ya eyi ẹbẹẹba ana a zịị̄ ngụ ịnị Irehi Ohomorihi nị. Ẹnị ee tu ịzọọ, dị ọ ka ọnị o re anyẹnẹẹ ene hi ẹtẹ aa jị òrèrè ka ori anaā hi Itamuzi ô wu su nị.

¹⁵ Di Ẹnẹyịmavara rẹ họ̀ ọnị ka, ozi-ọza, oni wee re? Ọnị vee re ịsị ẹẹ nyị ọnị ịhyẹrẹ ene huna ọsọnị nị.

¹⁶ Ịzẹyịza dị ọ sị ọnị ngụ ịnị ohweje ịnị Irehi Ohomorihi nị. Ọ̀ sị gụrị enoze aha ọnịnị, ịnị akakana ụtọ ịsọvọ ọnịrị oze ana a zịị paraahu dị aza ẹnị ohurẹẹhị yà ịzọọ nị. Ẹnịnị ệ varẹma ka aha ọnịnị, dị ẹ va eyi ka ịzị ọyịị̄ hụrẹẹ vẹ, dị ẹ ka ịrẹsụ hi aa hẹkẹ ọyị nị.

¹⁷ Dị Ẹnẹyịmavara kà a yị ọnị ka, ozi-ọza, ọnị wee ree re ọsọnị? Ọ kà, ịrẹyị oweyi ọ́ọ vị ka Anijuda nịnị ẹ̀ maanị mẹ avaba ịsị aa nyị ọnị ịhyẹrẹ aanị ẹkụra ọnọnị, dị ẹnịnị rẹ mẹ ka ebira odivi ọ̀ gara hi avaba ẹkụra nị. Ọnọọ ẹ́ yị hụ wa, dị ẹ rẹ kụkụ sị ọ aa vaa mẹ ịnị Irehi ọnị Ohomorihi, ka ẹnị ẹ̀ sị mẹ ayị kụ ọnị hu avọọ nị. Ọ kà ọnị ò re ẹnịnị mẹmẹ kụ̀ ọnị ụhụ zị oze anaa zị ọza ẹngụụ hu kere-kere.

¹⁸ Avọọ, ọnị vaa sị ọyịkụ anịị zụ wa ẹtẹẹtẹrẹ. Ọnị ẹ́ yị vaa sị eyi kwooze yị wa, ọnị ẹ́ yị vaa vayị ẹnịnị. Ẹnịnị vaa mẹ̀ aduwa, dị eyee nowu boro-boro, ama ọnị ẹ́ yị vee tu wa ohi.