Ezikẹẹrị 7 - IWE ỌNỊNỊ

Ẹzẹtẹ Isirẹrị ò si tu.

¹ Ezikẹẹrị ka Ẹnẹyịmavara ộ kà a yị ọnị ka

² Ọnị ozi-ọza, ọnị Ẹnẹyịmavara Ohomorihi aa kà a yị ẹtẹ Isirẹrị ka, ẹzẹtẹ ẹnịnị o si tu o! vị ẹzẹtẹ avaba ẹtẹ Isirẹrị tù aanị nị ọ.

³ Ẹwụ nịnị Anisirẹrị, eyi awụ nịnị ọ sị nị. Ọnị vaa sị ọyịkụ anịị zụ̀ wụ nịnị, dị ọnị mẹ̀ ọkarẹyị avaba ịsị ọnị Ụ mẹ yị wụ nịnị. Ọnị vaa sị ụyaa rị wụ nịnị agụvị avaba ịsị enyisi ọnị u mẹ nịnị.

⁴ Ọ kà ọnị ẹ́ yị vaa sị eyi kwooze yị wụ nịnị; ọnị ẹ́ yị vaa vayị awụ nịnị; ama ọnị vaa sị ụyaa rị wụ nịnị agụvị avaba ịsị enyisi ọnị waa mẹ nịnị. Ịjọnọọ, ụ vaa yẹ nịnị ka ọnị ọ vị Ẹnẹyịmavara nị.

⁵ Ẹnẹyịmavara Ohomorihi ka, ẹwụ nịnị Anisirẹrị, ẹngụkata ẹnyị aa tụra ọsaa a wụ nịnịị vẹ.

⁶ Re, eyi awụ nịnị ọ sị nị. Ẹzẹtẹ awụ nịnị o si tu. Aa wụ nịnị ộ ta o.

⁷ Ẹwụ nịnị ana ra hi ẹtẹ Isirẹrị, ẹzẹtẹ awụ nịnị aa vẹ o. Ụmẹ ọ sị gụrị ẹtẹ ana avaba awụ nịnị vaa vazi, dị ọza ẹ yị ma vana kụkụ wụ ka aza ee nowu, ayị ẹnịnị mee hine, ịnị ịrẹba ọnị ụ jị hi ịnị ataba nịnị.

⁸ Ọka, é yị vee kù dị ọnị ọ̀ sị ọyịkụ zụ̀ wụ nịnị ẹtẹẹtẹrẹ ọnị vaa mẹ̀ ọkarẹyị avaba ịsị ụ mẹ yị wụ nịnị. Ọnị vaa sị́ ụya avaba ịsị enyisi ọnị waa mẹẹ rị wụ nịnị.

⁹ Ẹnẹyịmavara kà ọnị ẹ́ yị vaa sị eyii kwooze yị wụ nịnị, Ọnị ẹ́ yị vaa vayị awụ nịnị. Ọnị vaa sị ụyaa rị wụ nịnị agụvị avaba ịsị enyisi ọnị waa mẹ nịnị. Ịjọnọọ, ụ vaa yẹ nịnị ka, ọnị ọ̀ vị Ẹnẹyịmavara anaa sị ụyaa rị wụ nịnị nị.

¹⁰ Ọ kà, ẹwụ nịnị Anisirẹrị ẹkụhị ọnị ụ vaa sị rị ụya nịnị aa vẹ. Ebira jugu-jugu vị ọnị ọzọza kụkụ aa mẹ o me zee e eyi. Ọzọza vị ana kụkụ à sị ẹngụ tụ ẹba ọ mẹ zụ mẹ zụ.

¹¹ Ebira jugu-jugu ana aza aa mẹ, ọ kụkụ raa mẹ ka ẹẹ chamayị hu avọọ. Ẹ́ yị nyị ịsị ẹnịnị ana navọọ tịtẹ; ẹ́ yị nyị ogu ẹnịnị ọnịrị ịsị ẹyaa sịị mẹ ụbanyị ana vaa vọ tịtẹ.

¹² Ọ kà ụmẹ ọọ vẹ, ẹkụhị o si tu. Navọ asị aza anaa hị́ ịsa hine ayị ka ọọ mẹ yị ọnị, asị aza anaa ná ịsa du ayị ka ẹ́ yị gụụ yị ọnị, agụvị ka avaba ịsa vị ọnị ọnị vaa sị ọyịkụ-ọyịkụụ vú ẹtẹ.

¹³ Osohu anaa daka yị yà ịzọọ ẹ́ yị vaa zụụ dọ ịsa ohu anịị varẹma, agụvị ka ịrẹyị ọnị Ẹnẹyịmavara aa kà aanị, avaba aza ọ́ za nị. Ẹ yị nyị ọza anaa mẹ̀ ebira odivi ana vaa ha ịnị ịrẹyị ọnọnị.

¹⁴ E ree hú ịkakanchị ka avaba isoja Anisirẹrị è tenyi ẹngụ ịrẹkụ, ama ẹ́ yị nyị ọza ana jịnẹ tụ ẹhẹ ka ọnị aa nọ ịrẹkụ, ka avaba ẹnịnị Ohomorihi aa kụ ayị hi nị.

Ụya ana Anisirẹrị nịnị vaa rị agụvị ebira odivi ẹnịnị

¹⁵ Aa kụ̀ ịrẹkụ eyi ẹhẹ, ịsa aa zị aza ene hi ini eehi, dị ụngwẹ aa kụ̀ wa nị. Ọza ana àa jịnẹ tụ ẹhẹ hụụnị ẹkụra vị ọnị ịrẹkụ aa rị, ọza anaa va yà ịnị eehi, dị ụkụ ọnịrị ụngwẹ taa ku.

¹⁶ Aza enee zwe, dị e ne hi ịrẹsụ ataba anka arivadi ana a dụ hụụ inozi avọọ. Avaba ẹnịnị va jị òrèrè agụvị ebira odivi ẹnịnị.

¹⁷ Ụvọ avaba ẹnịnị vaa sụ̀ ẹgahị, dị ahụ ẹnịnị aa bànyị.

¹⁸ Avaba ẹnịnị vaa và ịta suku-sukuu ku ẹngụ, dị angwahi ta ngụ wa ẹngụ. Ẹnịnị vaa kụ́ avaba ịrẹsụ ẹnịnị anka ọza ana nyị ọmarị avọọ, dị a mẹ̀ ụhị nyị avaba ẹnịnị.

¹⁹ Ẹnẹyịmavara kà avaba Anisirẹrị nịnị vaa và ẹkẹhị ẹnịnịị haa hi oze anka ututu avọọ. Ẹkẹhị ẹnịnị ẹ́ yị va zụụ dọ waa ha ịhị Ẹnẹyịmavara àaa kú ayịị hi wa. Ẹkẹhị ẹnịnị ẹ́ yị va zụụ mẹ avaba ịsa ene eyee sìi yị wa; ẹ́ yị vaa ha wa ịnẹ. Ẹkẹhị ẹnịnị ọ raa kụ wa hi ịnị ebira odivi ọ̀ yị mẹ.

²⁰ Ẹnya ọyịza-ọyịza ẹnẹ ẹ́ sịị̄ mẹ ọvị ene eyee sịị wùu zị, ọnị ẹ kụkụ sị̀ mẹ ori enee du ọnị ayị nị; avọọ ọnị Ẹnẹyịmavara vaa mẹ ka ogu ẹnịnị ọ̀ kụkụụ nyị wa ịhyẹrẹ.

²¹ Ọ kà ọnị vaa mẹ ka Anẹkụra ọsa ẹ̀ va kụ ogu ẹnịnị; ọnị vaa mẹ ka aza edivi ene hi ẹhẹ ọnọnị ẹ̀ vaa kụ́ ogu Anisirẹrị nịnị di e du ọ ha.

²² Ẹnẹyịmavara kà ọnị vaa kara ụvọọ hụrẹ oze dị aza edivi ẹnẹnị ẹ ngụ ịnị Irehi anị dị e du ọ ha. Ọnị é yị vee tụ́ ohi ịjị anako nịnị ẹ̀ẹ ngụ ọ dị ẹ́ yaa mẹ kẹnẹ-kẹnẹ nị.

²³ Ọ kà avaba ẹtẹ Isirẹrị ọ sị vazi, aza vị ana a kụkụ aa wụ kẹnẹ, dị avaba ẹkụra kụkụ vị ohihi yị ebira odivi-odivi nị.

²⁴ Agụvị avọọ, ọnị vaa mẹ ka anẹkụra ene divi hu kere-kere ẹ̀ vẹ ẹtẹ Isirẹrị, dị ẹ̀ vaa dọ wụ nịnị irehi awụ nịnị. Aza awụ nịnị ana kata hu kere-kere ẹ́ yị nyị otuturumaa jẹẹ, ịjị ọnị ọ̀ọ mẹ ka anẹkụra ọsa ẹ ngụ ịzị ụ yaa mẹ ahẹkẹ nịnị dị ẹ mẹẹ ọsọọsa nị.

²⁵ Ịjị ụyọrị ọdẹngụ oo tu wu nịnị, u vee sì ẹngwọọrọ nịnị, wé yi vee re e nịnị.

²⁶ Ẹngụkata odivi ẹnyị vị ana vaa saasa ọsa vee tù wu nịnị. Avọọ ụ mẹ vaa wụ̀ enube odivi-odivi nịnị pooro kẹnẹ nị. Ụ vanaa dá ịpẹẹ yị ọnịsẹ nịnị ka è re ẹtẹ wụ nịnị. Ẹnị ohirẹsụ irehi Ohomorihi nịnị é yi kuku vee re ịsaa zụ̀ wụ nịnị, dị azọkụ nịnị ẹ́ yị kụkụ zụ pe wu nini juwe.

²⁷ Ẹnẹyịmavara kà ohinọyị vee sụ́ ùnè, dị ẹnị ọdọvịdị ẹkụra nịnị é yi kuku re ịsị ọnyọọnyị tụra eyi. Ẹngụ Anisirẹrị nịnị vaa dá ẹgahị angwa mee hi wa. Ọ kà ọnị vaa sị ụya avaba ịsị ọnị ụ mẹẹ rị wụ nịnị, dị ọnị mẹ̀ ọkarẹyị yị wụ nịnị anị ka ẹwụ nịnị mẹ rẹ mẹ yị aza. Ọ kà ọsọnị vaa mẹ ka wa yẹ nịnị ka, ọnị ọ vị Ẹnẹyịmavara nị.