Ezikẹẹrị 32 - IWE ỌNỊNỊ

Ụya odivi ọnị Ihwarawo vaa rị.

¹ Ezikẹẹrị kà, ịnị ẹkụhị ịpaapa ịnị ụhwẹ ẹwụrẹva ịrayị ana tụ ọ ịrayị ẹwụrẹva ana a za ẹnị ve hi Ịbabịrọnị, Ẹnẹyịmavara ộ kà a yị ọnị ka.

² Ozi-ọza, nyayịnẹ kà ohinọyị Ijipiti ọ̀nọ̀. Kà ẹ yị ọ ka, ví o re ẹngụ anka idu avọọ ịnị akakana anẹkụra nịnị nị. Ama ọ yà anka agụgụ odivi anaa họ̀ enyi waaa, dị a sị ahụ wụ ụdọ hi enyi ọnọọ, dị ụ mẹ ka ọọ dà agụ.

³ Ịjị anẹkụra-ẹkụra ẹ̀ẹ kụ gụ, ọnị vaa za a tụ ịnị ọha anị, dị ọnị mẹ ka è tura ọha ọnọọ tụ ẹhẹ.

⁴ Ọnị vee ne e nya ẹtẹ, dị ọnị kụ́ avaba inomi ọnịrị uye ene hi ịnị ẹhẹ vẹ, ka ẹ̀ vaa rị uye anị.

⁵ Oku anị ana sị vụ, vị ọnị ọnị vaa garaa hi avaba ataba ọnịrị inozi.

⁶ Ọnị vaa mẹ ka ọ va hi ẹtẹ pooro nee tu ka, oo sì naa ngụ ịnị ataba ọnịrị ịnị okuha.

⁷ Ẹnẹyịmavara kà ịjị ọnị èee vu ọ ẹtẹ, ọnị vaa sị ịsaa kú ihinẹba, dị ọnị kụ́ ụzọmị nịnị kwooze. Ọnị vaa dà eguhi kú ọyị, dị ụhwẹ ẹ́ yị kụkụ zẹtẹ.

⁸ Ọnị Ẹnẹyịmavara Ochẹtẹẹngụ ka, ọnị vaa kụ́ avaba ịsa ene hi ẹhẹẹba ana mẹ ka à nyị ẹtohweyi kwooze, dị etohozi za avaba ẹhẹ.

⁹ Ịjị ọnị ọ̀ọ naa kà a ngụ ẹkụra-ẹkụra ọnị wẹ̀ yị vịdị wụ́ ịrẹyị anị da nịnị ka, ọnị ọ sị wụ nịnị vú ẹtẹ, ọ vaa kata aza ọrụrụ-ọrụrụ ẹngụ.

¹⁰ Ọ kà ịsị ọnị vaa mẹ wụ vaa za aza ọrụrụ-ọrụrụụ henyi. Ịjị ọnị òo mí ụhwọ anị, angwa vee hí ohinọyị nịnị, dị ẹyaa dá ẹgahị pàpàpà. Ịhị waa sị sẹ ẹdụ, ẹnịnị va dá ẹgahị, dị eyee hí angwa agụvị ẹhẹ ẹnịnị.

¹¹ Ẹnẹyịmavara Ochẹtẹẹngụ aa kà a yị ohinọyị Ijipiti ka, ohinọyị Ịbabịrọnị vaa tụ̀ ụhwọọ tu wu.

¹² Ọnị vaa mẹ ka isoja anẹkụra anaā chamayị nịnị ẹ̀ tụ̀ ụhwọ, dị ẹ wụ̀ avaba aza awụ. Avaba aza awụ ọnịrị avaba ịsa ana vọ ọnị waa sịị mẹ eyi vị ene e vee vú ẹtẹ.

¹³ Ẹnẹyịmavara kà ọnị vaa wụ̀ avaba imaaru awụ nịnị hụrị ụtọ okuha. Ẹ́ yị ma vana nyị ọza à vị imaaru anaa vanaa wụ́ ụdọ hi enyi awụ nịnị.

¹⁴ Ọnị vaa navọ ka enyi awụ nịnị ọ̀ varẹma nyeeyi, dị irehu awụ nịnị kụkụ tangwa ee sì hẹẹ anka angwẹ avọọ. Ọnị Ẹnẹyịmavara Ochẹtẹẹngụ ọ ka avọọ nị.

¹⁵ Ịjị ọnị ọ̀ọ sị Ijipiti jị eburu, dị ọnị raa wụ̀ aza ọnịrị ịsụpa ene hi ịzọọ ha nị, ẹnịnị vaa yẹ ka ọnị ọ vị Ẹnẹyịmavara.

¹⁶ Ịrẹyị ọnị ọnị tangwa aa kà wa ọnọ anị aanị, vanaa vara oreree yị wa. Anyẹnẹẹ ene hi ịnị ẹkụra vaa sị jị òrèrè agụvị Ijipiti ọnịrị aza ana ra hi ịzọọ. Ọnị, Ẹnẹyịmavara Ochẹtẹẹngụ ọ ka avọọ nị.

Ịdị Aneku

¹⁷ Ezikẹẹrị ka, ịnị ẹkụhị ẹwụrẹhị, ụhwẹ ịpaapa ịrayị ana tụ ọ ịrayị ẹwụrẹva ana a za ẹnị ve hi Ịbabịrọnị, Ẹnẹyịmavara ộ kà a yị ọnị ka,

¹⁸ Ozi-ọza, ọnị ọọ jị òrèrè agụvị avaba Anijipiti otomiroku. Ọnị ọ̀ kà a ka, ẹnịrị anẹkụra nịnị ana nyị ụkata ẹẹ vaachi nọ ịdị aneku.

¹⁹ Ọ kà ọnị ọ̀ kà a yị wa ka: Ví u wéé ro nịnị ka ẹwụ nịnị o zoza hu aza ana vọ nị? Ụ vaa nọ iro nịnị, dị ẹwụrị aza ẹnẹ ẹ̀ yị yẹ Ohomorihi, ẹ̀ na sụ̀tẹtẹ hi ịzọọ nịnị.

²⁰ Anijipiti nịnị vee sú beri aza ana a wụ a maa kụ̀ ịrẹkụ. Asị ụhwọ tenyi tịtẹ ana a vaa sị wụ̀ avaba ẹnịnị.

²¹ Aza ana na gụ Anijipiti nịnị ụvọ kụ̀ ịrẹkụ, vị ene hi ịdị aneku aa kụ waa nyaasẹ. Ẹnịnị ê nowu ka: Aza ẹnẹ ẹ̀ yị yẹ Ohomorihi ana a wụ a maa kụ̀ ịrẹkụ hi ịzẹnị, ẹnị ẹ sụ̀tẹtẹ aanị nị.

²² Asiriya ọnịrị avaba isoja ẹnịnị yà ịzọọ. Ikuta avaba aza anị ana a wụ a maa kụ̀ ịrẹkụ vị ana gụ ẹtẹ kara a.

²³ Ikuta ẹnịnị vị ene hi aha ana nyịnẹ hu ịdị aneku. Avaba isoja anị vị ana a wụ a maa kụ̀ ịrẹkụ, dị e ne wa kara a nị. Ama, avaba aza ẹnẹnị vị enee vịdị chire anẹhẹ nịnị angwa.

²⁴ Ẹramị yà ịzọọ. Ikuta avaba isoja anị gụ kara a. A maa kụ̀ ịrẹkụ á wụ̀ avaba ẹnịnị nị. Ẹnịnị ẹ́ yị yẹ Ohomorihi, dị ẹ na ngụ ịdị aneku. Ịjị ẹnịnị yà ịnị ẹhẹ vị ọnị ee chire aza angwa; ama ẹnịnị ê wusu booro aanị. Asị ụhị mẹ nyị wa anka aza ana a wụ a maa kụ̀ ịrẹkụ avọọ.

²⁵ Ẹramị vi ene e ne tu ịnị akakana aza ana a wụ a maa kụ̀ ịrẹkụ. Ikuta isoja anị nịnị vị ana gụ kara a. Avaba ẹnịnị ẹ́ yị yẹ Ohomorihi; á maa kụ̀ ịrẹkụ á wụ̀ wa nị. Ịjị ẹ́ yà ịnị vị ọnị ee chire aza angwa, ama ẹnịnị ệ wusu booro aanị. Asị ụhị mẹ nyị wa anka aza ana a wụ a maa kụ̀ ịrẹkụ avọọ.

²⁶ Ẹkụra ana aā hị́ Imesechi ọnịrị Itubari yà ịzọọ. Ikuta isoja ẹnịnị gụ kara wa. Avaba ẹnịnị ẹ́ yị yẹ Ohomorihi. Á maa kụ̀ ịrẹkụ á wụ̀ wa nị, agụvị ka ẹnịnị vị enee vidii chire anẹhẹ nịnị angwa.

²⁷ Ọza ẹ́ yị sị ụbanyị yị wa é mee ne wa, anka a mẹ sị ụbanyị yị aza ọkọọka ịyẹẹyẹ ana ahịka ẹnịrị ẹnya ịrẹkụ ẹnịnị e ne nị. Ụhwọ ẹnịnị vị ene e si pe wa ịrẹsụ, dị a sị ogonto ẹnịnị tụra wa. Aza ẹnẹnị ệ vịdị sị ụkata ẹnịnị chire anẹhẹ angwa da o.

²⁸ Avọọ á mẹ rẹ vaa kwọrọ ẹwụ nịnị Anijipiti ha beri aza ẹnẹ ẹ̀ yị yẹ Ohomorihi ana a wụ á maa kụ̀ ịrẹkụ nị.

²⁹ Edomi ọnịrị ohinọyị anị nịnị beri ẹnị ọdọvịdị anị nịnị hi ịzọọ. Isoja ana nyị ụkata ẹtẹẹtẹrẹ ẹ vị nị, ama ẹnịrị aza ẹnẹ ẹ̀ yị yẹ Ohomorihi ana a wụ á maa kụ̀ ịrẹkụ hi ịdị aneku booro aanị.

³⁰ Avaba ẹnị ọdọvịdị anị eyi ẹbẹẹba ẹnịrị Anisidoni nịnị hi ịzọọ. Ệ vịdị sị ụkata ẹnịnị kụ ayịhụrịnẹ hi avaba da, ama booro aanị, a sị ụhị mẹ nyị ẹnịrị aza a maa kụ̀ ịrẹkụ. A sị wa ne. Ụhị ọnyọọnya a mẹ nyị ẹnịrị aza anaa nọ ịdị aneku nị.

³¹ Ẹnẹyịmavara Ananyị ụkata hu ka, ịjị ohinọyị Ijipiti ọnịrị isoja anị nịnị ẹ̀ẹ maanị ré avaba aza ana a maanị wụ aanị, ayị ẹnịnị vee hunẹnẹ.

³² Ọ kà ọnị ộ mẹ̀ ka ohinọyị Ijipiti ò chire anẹhẹ nịnị angwa. Ama ọnịrị avaba isoja anị vị ana a vaa wụ̀, dị e ne wa beri aza ẹnẹ ẹ̀ yị yẹ Ohomorihi ana a wụ a maa kụ ịrẹkụ.